1. Ioasa, Usia, bona Iosia ediai be dahaka e vara?

 MANI ina a laloa, bema oi na maraḡimu ai Dirava ena taunimanima edia king ai boma lao, emu siahu be ede boma ḡaukaralaia toma? Baibul ese Iuda edia king ai ela matamata taudia haida e herevalaidia. Heḡereḡere, Ioasa laḡanina na 7, Usia laḡanina na 16, bona Iosia laḡanina na 8. Idia na mamaraḡi dainai king ḡaukarana bae karaia na auka, to Iehova bona ma haida ese e durudia dainai ḡau namodia momo e kara.

2. Dahaka dainai Ioasa, Usia bona Iosia edia haheitalai baita lalodia na namo?

² Ita na dia king eiava queen, to Ioasa, Usia bona Iosia edia amo ḡau momo baita dibamu. Idia na abi hidi maorodia e kara, to abi hidi kereredia danu e kara. Idia edia haheitalai amo baita dibamu dahaka dainai bamo namodia baita abi hidi, hanaihanai baita manau, bona Iehova baita tahua.

3. King Ioasa ese Hahelaḡa Tauna Badana Iehoiada ena sisiba be ede e lalodia toma?

³ Ioasa heḡereḡerena, abi hidi maorodia ba kara. King Ioasa na maraḡina ai tamana e mase, bona ia na Hahelaḡa Tauna Badana Iehoiada ese e naria bona Iehova sivaraina e hadibalaia. Ioasa na abi hidi maorona e karaia badina ia ese Iehoiada ena sisiba e badina. Una dainai, Ioasa na lalona e hadaia Iehova e hesiai henia bona taunimanima e durudia unu bae kara toma. Danu ia ese dala e kara Iehova ena dubu helaḡa bae hanamoa lou.—2 Sis. 24:​1, 2, 4, 13, 14.

4. Iehova ena taravatu ilalodia bada karana ese ede be duruda tomamu? (Hereva Lada-isidia 2:​1, 10-12)

 ⁴ Bema oi na tamamu o sinamu eiava ma ta ese e hadibamumu Iehova ba lalokau henia bona ena taravatu ba badinadia, una na hahenamo. (Hereva Lada-isidia 2:​1, 10-12 ba duahidia.) Tamamu bona sinamu na dala momo ai oi bae durumu diba. Taihu ta ladana Katya na abi hidi maorodia baine kara totona tamana ese e durua dalana mani aita laloa. Dina iboudiai tamana ese skuli e laohaiava lalonai, ia ida dina sirina e herevalaia hebouva. Katya na e gwa: “Una herevahereva karana ese e durugu dina ta ta ai e varava hekwakwanaidia baina hanaidia totona.” Reana tamamu bona sinamu na Baibul ena hereva heḡereḡerena taravatu be atomu, to bo laloamu unu taravatu na oi e koumumu emu ura ḡaudia basio kara. Dahaka ese baine durumu idia ba kamonai henidia? Taihu ta ladana Anastasia na e gwa, ia tamana bona sinana ese taravatu e ato badidia na ia enai e herevalaiva. Ia na eto: “Una ese e durugu bena na laloparara unu taravatu ese lau na se biagugumu, to e gimagumu.”

5. Edena dala ai tamamu sinamu bona Iehova ba hamoaledia? (Hereva Lada-isidia 22:6; 23:​15, 24, 25)

⁵ Bema oi na tamamu bona sinamu ese e henimu Baibul sisibadia bo badinamu, idia na be moalemu. Mai anina bada ḡauna na, Dirava bo hamoaleamu bona ia ida emu hetura karana na be goadamu. (Hereva Lada-isidia 22:6; 23:​15, 24, 25 ba duahidia.) Unu badi namodia daidiai Ioasa ena haheitalai ba tohotohoa.

6. Ioasa be daidia edia sisiba e kamonai, bona dahaka e vara? (2 Sisiga 24:​17, 18)

⁶ Ioasa ena abi hidi kereredia amo diba bavabi. Iehoiada e mase murinai, Ioasa na bamo kereredia e abidia hidi. (2 Sisiga 24:​17, 18 ba duahidia.) Ia ese Iuda lohiadia—Iehova asie lalokau heniava taudia—edia sisiba e kamonai. Reana bo lalomu Ioasa ese idia na basinema bamodia badina edia kara na dia namo. (Her. 1:10) To, ia na idia edia sisiba kereredia e badinadia. Iena kasen Sekaria na e ura ia baine durua neganai, ia ese e hamasea. (2 Sis. 24:​20, 21; Mat. 23:35) Una na kara dika rohorohona! Matamanai Ioasa na king namona ta, to gabeai aposteit bona ala-ala tauna ai ela. Bena se daudau, ia na ena hesiai taudia ese e hamasea. (2 Sis. 24:​22-25) Una na basinema vara bema ia na Iehova bona Iehova e lalokau henia taudia dounu bema kamonai henidia. Iena haheitalai amo dahaka o dibamu?

7. Daidia ba bamodia be namo? (Laulau danu ba itaia.)

 ⁷ Ioasa ena abi hidi kererena amo ta dibaiamu ḡauna ta na, namona na Iehova e lalokau heniamu bona e uramu ia bae hamoalea taudia baita bamodia. Danu, laḡanidia idauidau taudia—matamata taudia bona burukadia—baita bamodia. Ba helalotao, Ioasa laḡanina be maraḡi, a ia turana Iehoiada laḡanina be bada. Bema oi na o uramu turamu bavabidia hidi, sibomu ba henanadai: ‘Idia ese lau be durugumu egu abidadama Iehova enai baina hagoadaia, a? Idia ese lau be hagoadagumu Dirava ena taravatu baina badinadia, a? Idia be Iehova bona iena hereva momokanidia e herevalaimu, eiava? Dirava ena taravatu e matauraidiamu, a? Idia be lau be durugumu egu kerere baina hamaoromaorodia, a?’ (Her. 27:​5, 6, 17) Bema turamu na Iehova asie lalokau heniamu, basio bamodia. To bema Iehova e lalokau heniamu, ba bamodia, badina idia ese oi na be durumumu.—Her. 13:20.

8. Bema intanet ta ḡaukaralaiamu, dahaka baita laloatao na namo?

⁸ Hari ina negai taunimanima na intanet amo edia ruma bese bona turada ida e herevaherevamu. To, momo na e hoimu ḡaudia eiava e karamu ḡaudia laulaudia bona vidiodia na intanet ai e atomu, ma haida ese bae heaḡilaidia totona. Bema oi na intanet o ḡaukaralaiamu, sibomu ba henanadai: ‘Lau be na uramu ma haida ese bae heaḡilaigu, a? Lau be na uramu ma haida baina hagoadadia eiava idia ese bae imodaigu? Ma haida edia lalohadai ese egu lalohadai, hereva bona kara e hadikamu, a?’ Tadikaka Nathan Knorr, Gavanin Bodi memba ta na e gwa: “Taunimanima iboudiai na basio hamoaledia toho. Badina ta basio hamoalea dibamu. To Iehova ba hamoalea, unu amo ia e lalokau heniamu taudia iboudiai danu bo hamoalediamu.”

9. Iehova ese Usia e durua dahaka e kara? (2 Sisiga 26:​1-5)

⁹ Usia heḡereḡerena, abi hidi maorodia ba kara. King Usia na matamatana negana ai, ia na e manau, bona “Dirava garina” e gariva. Bona Iehova ese laḡani 68 lalodiai e hanamoa. (2 Sisiga 26:​1-5 ba duahidia.) Usia ese Israel taudia inaidia momo e hadareredia bona Ierusalem e gimaia. (2 Sis. 26:​6-15) Ia na e moale badina e kara ḡaudia iboudiai lalodiai Dirava ese e durua.—Koh. 3:​12, 13.  

10. Usia enai be dahaka e vara?

¹⁰ Usia ena abi hidi kereredia amo diba bavabi. King Usia na nega momo ma haida e hamaorodiava iena hereva bae badina. Reana una dainai e laloava ena ura ḡaudia na baine kara diba. Dina ta, ia na Iehova ena dubu helaḡa ai e vareai bona mai hekokorokuna ida e ura boubou patana ai muramura mai bonana baine gabua, to una na dia king edia ḡaukara. (2 Sis. 26:​16-18) Hahelaḡa Tauna Badana Asaria ese e sisiba henia, to ia na e badu dikadika. Usia na Iehova se badinaia dainai lepra gorerena amo e hahisia. (2 Sis. 26:​19-21) Bema ia na dounu bema manau, Dirava ese bema lalo namo henia.

11. Dahaka ese baine duruda dounu baita manau? (Laulau danu ba itaia.)

¹¹ Usia na e goada neganai, ia na e helaloboio iena goada bona e abi hahenamodia na Iehova ena amo. Dahaka ta dibamu? Namona na baita helalotao ita ta abimu hahenamodia na Iehova ena amo e maimu. Ita na ta haḡuḡuru ḡaudia daidiai basita heaḡi, to Iehova baita imodaia badina ia ese e durudamu. b (1 Kor. 4:7) Namona na mai manauda  ida baita abia dae ita na dia ḡoevadae bona sisiba baita abi na namo. Tadikaka ta, laḡanina na 60 heḡereḡerena, na e gwaumu: “Na diba basina badu o basina lalomanoka na namo. Nega haida egu kerere daidiai sisiba na abimu negadiai, na hekwarahimu egu kara baina hanamodia bona baina goada.” Baita manaumu bona Iehova baita badinaiamu neganai, baita moalemu.—Her. 22:4.

12. Edena dala ai Iosia na maraḡinai Iehova e tahua? (2 Sisiga 34:​1-3)

¹² Iosia heḡereḡerena, abi hidi maorodia ba kara. Iosia na laḡanina 16 ai Iehova e tahua matama. Ia na e ura Iehova baine dibaia namonamo bona ena ura baine karaia. To, una negai taunimanima momo na dirava koikoidia e tomadiho henidiava, una dainai Iosia na tomadiho momokanina baine badinaia totona baine lalo goada na namo. Bona ia na unu e kara toma! Iosia na laḡanina 20 do se abia neganai, Israel amo tomadiho koikoi e haorea matama.—2 Sisiga 34:​1-3 ba duahidia.

13. Emu mauri Iehova enai ba gwauhamatalaia anina be dahaka?

¹³ Bema oi na matamata, namona na Iosia heḡereḡerena Iehova ba tahua bona ena kara namodia ba dibadia. Unu bo kara tomamu neganai, bo uramu emu mauri na Iehova enai ba gwauhamatalaia. Una gwauhamata ba karaia anina be dahaka? Laḡanina 14 ai e bapatiso merona, Luke, na ena mauri Iehova enai e gwauhamatalaia dinana ai, e gwa: “Hari amo, egu mauri ai Iehova ena hesiai ḡaukara baina atoa guna, bona baina hekwarahi ia baina hamoalea.” (Mar. 12:30) Bema oi na unu bo kara tomamu, una na abi hidi maorona.

14. Edena dala ai matamata taudia haida na King Iosia e tohotohoa?

¹⁴ Iehova e hesiai heniamu matamata taudia haida be dahaka hahetoho e davarimu? Laḡanina 12 ai e bapatiso merona, Johan na ena skuli turadia ese e doria siga baine ani. Johan na una hahetoho baine dadaraia totona, e lalo siga be animu neganai, tauanina be hadikaiamu bona ena hetura karana Iehova ida be dikamu. Laḡanina 14 ai e bapatiso  kekenina, Rachel na skuli ai hahetoho baine haheaukalai totona e durua ḡaudia na ini e herevalaidia toma: “Lau ese Baibul bona Iehova e herevalaiamu ḡaudia na lalomu. Heḡereḡere, history lesson ta a abiamu neganai, Baibul sivaraina ta o peroveta herevana ta na laloamu. Eiava ta ida skuli ai a herevaherevamu neganai ia baina durua sirina ta na laloamu.” Reana oi ese o davarimu hahetohodia na King Iosia ena amo idau, to ia heḡereḡerena ba aonega bona Iehova ba badinaia. Hari o davarimu hekwakwanaidia bo hanaidiamu neganai, vaira nega hekwakwanaidia danu bo hanaidiamu.

15. Dahaka ese Iosia e durua Iehova e badinaia? (2 Sisiga 34:​14, 18-21)

¹⁵ King Iosia na laḡanina 26 ai dubu helaḡa e hanamoa lou. Una ḡaukara lalonai “Iehova ena taravatu bukana, Mose ena amo e heni ḡauna” e davaria. King na una taravatu bukana ai e heduahi herevadia e kamonai neganai, maoromaoro e badinadia. (2 Sisiga 34:​14, 18-21 ba duahidia.) Oi be o uramu Baibul ba duahia hanaihanai, a? Reana dina ta ta ai do duahiamu, to o moalelaiamu, a? Oi e durumumu siridia be o lalotaomu, a? Matamanai ta herevalaia merona Luke ese poin namodia na noutbuk ai e toremu. Oi danu unu bo kara tomamu neganai, Baibul siridia bona o dibamu ḡaudia bo lalotaomu. Baibul bo dibaia namonamomu bona bo ura heniamu neganai, bo uramu Iehova ba hesiai henia. King Iosia heḡereḡerena, Dirava ena Hereva ese be durumumu kara maorodia ba kara.

16. Dahaka dainai Iosia na kerere badana ta e karaia, bona dahaka ta dibamu?

¹⁶ Iosia ena abi hidi kererena amo diba bavabi. Iosia na laḡanina 39 neganai, ia na sibona ena diba ai e tabekau, bona Iehova ena heduru na se tahua. (2 Sis. 35:​20-25) Una ese ita na ḡau ta e hadibadamu. Herevana ita laḡanida na bada eiava maraḡi, o laḡani hida Baibul vada ta stadilaia, to hanaihanai Iehova baita tahua. Anina na ia enai heduru baita abi totona,  hanaihanai baita ḡuriḡuri, Baibul baita stadilaia, bona lo Kristen taudia edia sisiba namodia baita badina. Unu amo ita na kerere badadia basita karamu, bona baita moalemu.—Iak. 1:25.

17. Iuda edia king Ioasa, Usia, bona Iosia edia amo dahaka ta dibamu?

¹⁷ Umui matamata taumui na ḡau namodia momo ba kara diba. Ioasa, Usia, bona Iosia sivaraidia ese e hahedinaraiamu, matamata taudia na abi hidi maorodia bae kara diba, bona Iehova bae hamoalea. Momokani, unu king tatoiosi na edia abi hidi kereredia daidiai dika e davari. Namona na idia edia kara kereredia na baita dadarai, to edia kara namodia hari baita tohotoho. Unu amo eda mauri na baita moalelaiamu.

18. Daidia edia haheitalai ese e hahedinaraiamu emu mauri na ba moalelaia diba? (Laulau danu ba itaia.)

¹⁸ Baibul ese matamata taudia ma haida e sivarailaidia, idia na Iehova turana ai ela, iena lalonamo e abia, bona edia mauri na e moalelaia. Idia ta na David. Ia na ena matamata negana ai Dirava e badinaia, bona gabeai king namona ta ai ela. Ena be ia na kerere haida e kara, to ena abidadama dainai Dirava ese e lalonamo henia. (1 Han. 3:6; 9:​4, 5; 14:8) David sivaraina bo stadilaiamu neganai, una ese oi na be hagoadamumu. Eiava emu stadi projek ai Mareko eiava Timoteo sivaraina ba stadilaia. Idia na edia matamata negana amo Iehova e hesiai henia dainai, iena lalonamo e abia, bona edia mauri na e moalelaia.

19. Edena dala ai emu mauri ba moalelaia?

¹⁹ Emu matamata negana ai bo karamu abi hididia ese emu mauri be hanamoamu eiava be hadikaiamu. Bema Iehova bo abidadama heniamu, bona sibomu emu laloparara basio abidadama heniamu, ia ese be durumumu. (Her. 20:24) Emu mauri na bo moalelaiamu. Ba helalotao, Iehova ese ia dainai o karamu ḡaudia na e lalo badamu. Emu mauri lalonai Tamada lalokauna, Iehova, ba hesiai henia na hahenamo badana.