1. Petro na Iehova ena heduru amo dahaka e kara?

 APOSETOLO PETRO na laḡani momo lalodiai Iehova e hesiai henia. Ia na haroro ḡaukara ai Iesu e bamoa, idau bese taudia e haroro henidia, bona gavanin bodi memba ta ai ela. Ena mauri ginigabedia ai Iehova ese ma ḡaukara haida e henia. Laḡani 62 ela 64 C.E. lalodiai, Iehova ena heduru amo ia ese revareva rua e toredia—unu na 1 Petro bona 2 Petro bukadia. Petro na e ura, ia baine mase murinai unu revareva ese Kristen taudia na baine durudia.—2 Pet. 1:​12-15.

2. Dahaka dainai Petro ena revareva na nega maorona ai e toredia?

² Petro na ena revareva e tore negana lalonai, ia tadikakana na “hedibaḡani momo daidiai” e lalohisihisiva. (1 Pet. 1:6) Kara havara taudia ese hahediba hereva koikoidia bona kara mirodia na kongrigeisin lalonai e vareailai. (2 Pet. 2:​1, 2, 14) Ierusalem ai e nohova Kristen taudia ediai “ḡau iboudiai dokodia” na vada kahirakahira—Roma tuari oreana ese Ierusalem bona ena dubu na vada bae hadikaia. (1 Pet. 4:7) Una dainai, Petro ena revareva ese Kristen taudia e durudia, e davariva hahetohodia bae haheaukalai bona vaira negai bae davari hahetohodia daidiai bae heḡaeḡae. b

3. Dahaka dainai Petro ese e tore revarevadia baita stadilai?

³ Ena be Petro ese ena revareva na iena negai e nohova taudia  daidiai e tore, to Iehova ese unu revareva na Baibul ai e atodia. Una dainai hari ita danu unu revareva amo namo ta davarimu. (Roma 15:4) Ita na kara dika tanobadana ai ta nohomu bona ta davarimu hahetohodia ese Iehova ta hesiai heniamu karana na baine hadikaia diba. Danu, kahirakahira hisihisi badana ta be varamu, bona una ese Ierusalem ai e vara hisihisina na be hereaiamu. Ita ese Petro ena revareva rua amo ḡau badadia haida baita dibamu. Unu ese be durudamu Iehova ena dina baita naria, taunimanima garidia basita gari, bona baita helalokau heheni. Bona elda taudia be durudiamu, tadikaka taihu bae reḡudia namonamo dalana be dibamu.

4. Petro Iharuana 3:​3, 4 heḡereḡerena, dahaka ese eda abidadama baine hamanokaia diba?

⁴ Ita na Baibul ena peroveta herevadia asie abi daemu taudia bogaraḡidiai ta nohomu. Ita e inai henidamu taudia ese e kirikirilaidamu badina laḡani momo lalodiai ita na nega dokona ta herevalaiamu. Taunimanima haida na e gwaumu dokona na basine maimu. (2 Petro 3:​3, 4 ba duahidia.) Bema ta haroro heniamu tauna, ta ḡaukara heboumu tauna, eiava eda ruma bese tauna ta ena amo hereva unu bamodia baita kamonaimu, eda abidadama na be manoka dibamu. To Petro ese ita iduruda ḡauna na e herevalaia.

5. Dahaka ese baine duruda lalohadai maorona baita abia? (2 Petro 3:​8, 9)

⁵ Taunimanima haida na e laloamu Iehova ese ina tanobada dikana na basine haorea haraḡamu. Petro ena hereva ese ita be durudamu lalohadai maorona baita abia, badina e hadibadamu Iehova ese nega e laloamu dalana na idau, taunimanima edia amo. (2 Petro 3:​8, 9 ba duahidia.) Iehova enai laḡani 1,000 na dina tamona na heto. Iehova na e haheaukamu bona se uramu ta baine mase. To iena dina be kaumu neganai, ina tanobada dikana na be haoreamu. Ina nega miana ai bese idauidau ta haroro henidamu na hahenamo badana ta.

6. Edena dalai Iehova ena dina baita naria? (2 Petro 3:​11, 12)

⁶ Petro na e gwa ita ese Iehova ena dina ‘ena mai baita naria.’ (2 Petro 3:​11, 12 ba duahidia.) Edena dala ai? Dina ta ta ai ita ese tanobada matamatana ai baita abi hahenamodia baita lalodia dobu. Sibomu lalomu ai ba piksaia, oi na hodahoda ḡoevana o hairuamu, aniani namodia o animu, tore isi lou taudia o welkam henidiamu, bona taunimanima na peroveta herevadia e ḡuḡuru karana o hadibadiamu. Unu bo lalodia dobumu karana ese be durumumu una nega bo nariamu bona bo dibamu dokona na vada kahirakahira. Baibul amo vaira negai bae vara ḡaudia ta ‘diba gunamu’ dainai, hahediba koikoi taudia ese ‘basie hakauda sirimu.’—2 Pet. 3:17.

7. Taunimanima baita gari henidiamu neganai dahaka be varamu?

⁷ Iehova ena dina ta nariamu lalonai, sivarai namona na ma haida ediai baita harorolaia. To, reana nega haida baita garimu dainai basita uramu baita haroro. Petro enai una na e vara. Iesu bae hakotaia hanuaboina ai, Petro na e gari dainai se ura baine gwau hedinarai ia na Iesu ena hahediba ta bona Iesu e ḡorea loulou. (Mat. 26:​69-75) To, Petro ese ena gari karana na e hanaia badina gabeai ia na eto: “Edia hahegari herevadia na garidia basio gari; kudoumui danu basie hetaha.” (1 Pet. 3:14) Petro ena hereva ese e hagoadadamu taunimanima basita gari henidia.

8. Dahaka ese baine duruda taunimanima basita gari henidia? (1 Petro 3:15)

 ⁸ Dahaka ese baine duruda taunimanima basita gari henidia? Petro na e gwa: “Keriso na lalomui ai ba hahelaḡaia, emui Lohiabada.” (1 Petro 3:15 ba duahia.) Una anina na baita abia dae Iesu Keriso na iseda king bona ia na mai ena siahu. Bema oi na ma haida ediai sivarai namona iharorolaina na o garimu, eda King ba laloa. Lalomu ai ba piksaia, ia na guba ai e lohiamu bona aneru milion momo ese e ḡeḡea. Bona ba helalotao “siahu idoinai guba ai bona tanobada ai” na ia e henia. Bona ia na dina iboudiai oi ida ela bona tanobada dokona. (Mat. 28:​18-20) Petro ese e hadibadamu nega iboudiai baita heḡaeḡae, eda abidadama baita herevalaia totona. Oi be o uramu ḡaukara gabunai, skuli ai eiava gabu ma haida ai ba haroro, a? Ba haroro negana ba laloa guna, bena ba herevalaia ḡauna ba heḡaeḡaelaia. Iehova enai goada ba noi, bona bavabidadama ia ese oi na be durumumu dainai, taunimanima na basio gari henidiamu.—Apos. 4:29.

9. Nega ta Petro be edena dalai lalokau se hahedinaraia? (Laulau danu ba itaia.)

⁹ Petro na dounu lalokau ihahedinaraina dalana e dibaia. Ia na Iesu ese e gwauraia haheḡanina na e kamonai. Iesu eto: “Haheḡani  matamatana name henimui: ba helalokau heheni. Lau ese na lalokau henimuimu heḡereḡerena umui danu ba helalokau heheni.” (Ioa. 13:34) Ena be Petro ese una hereva na e kamonaia, to gabeai ia na Iuda tadikakadia e gari henidia dainai se ura idau bese tadikakadia ida baine aniani hebou. Aposetolo Paulo ese Petro na e sisiba henia bona e gwa ia na e “koikoi.” (Gal. 2:​11-14) Petro ese Paulo ena sisiba na e abia dae bona unu amo diba e abi. Petro ena revareva ruaosi lalodiai e hahedinaraia, tadikaka taihu ilalokau henidia karana na dia hemami ai mo, to kara amo danu baita hahedinaraia.

10. Dahaka ese baine duruda tadikakada baita lalokau henidia? (1 Petro 1:22)

¹⁰ Petro na e gwa namona na tadikakada baita lalokau henidia momokani. (1 Petro 1:22 ba duahia.) ‘Hereva momokani ibadinana’ karana ese be durudamu una lalokau baita hahedinaraiamu. Una hereva momokani ta na ina: “Dirava ese taunimanima oromadia se lalomu.” (Apos. 10:​34, 35) Bema kongrigeisin ai haida mo baita lalokau henidiamu, Iesu ena haheḡani na asita badinaiamu. Vaia haida na turada namodia ai baita halaodia dibamu, Iesu e kara heḡereḡerena. (Ioa. 13:23; 20:2) To Petro ese e hadibadamu namona na baita hekwarahi tadikaka taihu iboudiai baita lalokau henidia, badina idia na iseda ruma bese na heto.—1 Pet. 2:17.

11. Mai laloda idoidiai ida haida baita lalokau henidia anina be dahaka?

¹¹ Petro na e gwa: “Ba heura heheni mai lalomui idoidiai.” Ina hereva “mai lalomui idoidiai” anina na ta baita lalokau henia ena be una na auka. Heḡereḡere, bema tadikaka ta na dala haida ai ita laloda e hahisiamu, dahaka baita kara? Reana matamanai baita uramu ena dika baita hadava. To, Petro na Iesu ena amo e diba dika davana ihalouna na Dirava ese se moalelaiamu. (Ioa. 18:​10, 11) Petro na e gwa: “Kara dika bona ere dika basio hadava, a e hadikamuimu taudia ba hanamodia.” (1 Pet. 3:9) Bema oi na mai lalomu idoinai ida lalokau bo hahedinaraiamu, oi e hahisimu taudia danu bo lalodiamu bona bo kara namo henidiamu.

12. (a) Lalokau heheni karana ese be durudamu dahaka baita karamu? (b) Ina vidio Preserve the Precious Gift of Unity ai heḡereḡerena, dahaka baita kara be namo?

¹² Petro ena revareva ginigunana ai e hahedinaraia, baita helalokau hehenimu neganai ita ese dia kara dika haida mo, to kara dika momo baita gwautaomu. (1 Pet. 4:8) Petro na Iesu ese laḡani momo gunadia ai dika igwautaona karana ai e hadibaia herevana na e laloa lou. Una nega ai, Petro na e laloava bema tadikakana edia dika na nega 7 baine gwautao, una na kara namona. To, Iesu ese ia bona ita danu e hadibada, tadikakada edia dika na nega 77 baita gwautao, anina na asi hetoana. (Mat. 18:​21, 22) Bema oiemu ai na e aukamu una sisiba ba badinaia, basio lalomanoka. Iehova ena hesiai taudia na dia ḡoḡoevadae dainai, nega haida na e aukamu dika bae gwautao. To ḡau badana na baita hekwarahi tadikakada edia dika baita gwautao bona baita herohemaino. c

13. Dahaka dainai elda taudia ediai na e aukamu tadikaka taihu bae vadivadidia?

¹³ Iesu e tore isi lou murinai e gwauraia herevana na Petro ese se laloaboio. Iesu eto: “Egu mamoe ba reḡudia.” (Ioa. 21:16) Bema oi na elda ta, oi na o dibamu una hereva na oi ese danu ba badinaia. To, nega haida elda ta  enai na auka nega baine ato mamoe ireḡudia ḡaukarana baine karaia. Elda taudia ese edia ruma bese na tauanina dalanai e naridiamu, e lalokau henidiamu bona e durudiamu Iehova bae hetura henia. Danu, elda taudia na e haroromu, hebou badadia bona maraḡidia e heḡaeḡaelaimu bona tok e henimu. Bona idia haida na Hospital Liaison Committee eiava Local Design/Construction Department ai e ḡaukaramu. Vaia, elda taudia na ḡaukara momo e karamu.

14. Dahaka ese elda taudia baine durudia Dirava ena mamoe bae reḡudia? (1 Petro 5:​1-4)

¹⁴ Petro ese elda taudia e hagoadadia ‘Dirava ena mamoe bae reḡudia.’ (1 Petro 5:​1-4 ba duahidia.) Bema oi na elda ta, ai na a dibamu oi ese tadikaka taihu na o lalokau henidiamu bona o uramu ba vadivadia. To, reana nega haida o bisimu eiava tauanimu na e hesikumu dainai, o mamiamu una vadivadi ḡaukarana na basio karaia dibamu. Bema unu bamona dahaka ba kara? Emu lalohekwarahi na Iehova enai ba gwauraia. Petro na e gwa: “Ma ta baine hekaha, ia na Dirava ese e heniamu goadana amo baine hekaha.” (1 Pet. 4:11) Hari ina negai tadikaka taihu ese e davarimu hekwakwanaidia ihamaoromaorodia na auka. To ba helalotao, “mamoe ireḡudia Tauna Badana,” Iesu Keriso ese idia na baine durudia diba, hari ina negai bona tanobada matamatana ai. Iehova na e uramu elda taudia ese tadikakadia bae lalokau henidia, bae vadivadidia, bona haheitalai namona bae hahedinaraia.

15. Elda ta ese mamoe vadivadi ḡaukarana be ede e karaia toma? (Laulau danu ba itaia.)

¹⁵ Laḡani daudau elda ḡaukarana e karaia tadikakana, William ese mamoe vadivadi ḡaukarana ena namo e lalopararalaia. COVID-19 pandemic e matama neganai, ia bona elda ma haida na wiki iboudiai edia grup taudia ta ta e rini henidiava. Ia na e gwa: “Tadikaka taihu momo na sibodia ruma ai nonoho dainai, lalohadai kereredia bae abi haraḡa diba.” Tadikaka o taihu ta na ena hekwakwanai e herevalaiva neganai, William na e kamonai namonamova, unu amo ena dabu ḡaudia bona lalohekwarahi e dibava. Bena eda websait amo pablikeisin o vidio haida e ḡaukaralaiva idia e hagoadadiava. Ia na e gwaumu: “Hari ina negai mamoe vadivadi ḡaukarana na mai anina bada. Ita na ta hekwarahimu  taunimanima ta durudiamu Iehova bae dibaia; una heḡereḡerena baita hekwarahi Iehova ena mamoe baita durudia hereva momokani lalonai dounu bae noho.”

16. Ededia dala ai Petro ena revareva amo ta diba ḡaudia baita badina?

¹⁶ Ita na Petro ena revareva rua amo ḡau haida mo tame herevalai. Reana oi na emu mauri ai ba hanamoa ḡauna ta ome dibaia. Heḡereḡere, oi be o uramu tanobada matamatana ai bae vara hahenamodia ba lalodia dobu loulou, a? Oi be o uramu ḡaukara gabunai, skuli ai eiava ma gabu haida ai ba haroro, a? Oi be o uramu tadikaka taihu ediai emu lalokau ba habadaia, a? Elda taumui, umui be lalomui vada o hadai mai emui ura ida Iehova ena mamoe ba reḡudia, a? Bema mai momokanimu ida emu kara bo tahu namonamomu neganai, emu manoka ḡaudia bo dibamu, to basio lalomanoka. “Lohiabada [Iesu]” na hebogahisi tauna bona ia ese be durumumu emu manoka ḡaudia ba hanamo. (1 Pet. 2:3) Petro na e gwaumu: “[Dirava] ese baine hanamomui ḡuḡuru, baine haginimui tutuka-tutuka, baine hakwalimumui.”—1 Pet. 5:10.  

17. Bema baita haheaukamu bona Iehova ena hereva baita badinamu, dahaka be varamu?

¹⁷ Nega ta Petro na e laloa ia na dia heḡereḡere Iesu baine bamoa. (Luka 5:8) To, Iehova bona Iesu edia heduru dainai, Petro na dounu Iesu e badinaia. Una dainai Dirava ese Petro na “eda Lohiabada bona eda Hahemauri Tauna Iesu Keriso ena mia-hanaihanai basileiana lalonai” e abia dae. (2 Pet. 1:11) Una na hahenamo badana ta. Bema Petro bamona baita haheaukamu bona Iehova ese e hadibamumu ḡaudia bo badinamu, mauri hanaihanai hahenamona bo abiamu. Momokani “emui abidadama” dainai hahemauri do bavabia.—1 Pet. 1:9.