1. Petro na Iesu ese hoa dalanai e durua gwarume e abi dainai dahaka e kara?

 PETRO na hanuaboi ibounai lalonai e haoda to gwarume ta se davaria. A Iesu ese e hamaoroa: “Dobuna aitala, emui ole [“reke,” NWT] ba torea, gwarume bavala.” (Luka 5:4) Petro na e laloava gwarume ta basine abiamu, to Iesu ena hereva heḡereḡerena e kara, bena e torea rekena e veria dae neganai, gwarume na momo herea dainai reke na e hedare. Petro mai bamona ida na Iesu ena hoa karana e itaia neganai e “hoa dikadika.” Bena Petro eto: “Lohiabada e, egu amo ba raka oho, badina be lau na dika taugu.” (Luka 5:​6-9) Petro na e laloa ia na dia heḡereḡere Iesu baine bamoa.

2. Dahaka dainai Petro sivaraina baita stadilaia na namo?

² Petro eto ia na ‘dika tauna’ na maoro badina Baibul ese e hahedinaraiamu, ia na nega haida ena hereva bona kara ai e kerereva, bona gabeai unu kerere daidiai e lalohisihisiva. Nega haida oi danu unu o hemami tomamu, a? Oi be o hekwarahimu emu kara eiava manoka ḡauna ta ba hanamoa, a? Bema oibe, Petro ena haheitalai istadilaina karana ese be hagoadamumu. Edena dala ai? Mani a laloa, Dirava bema ura neganai Petro e kerere sivaraidia na Baibul ai basinema tore. To unu na e toredia, unu amo ita baine hadibada. (2 Tim. 3:​16, 17) Petro ena hemami bona manoka ḡaudia baita dibamu  neganai, baita lalopararamu Iehova ese ita na se doridamu baita ḡoevadae. Ia na e uramu baita haheauka, ena be eda manoka ḡaudia daidiai ta hekwarahimu.

3. Dahaka dainai baita haheauka na mai anina bada?

³ Dahaka dainai baita haheauka na mai anina bada? Mani a laloa, bema ita na baita haheaukamu ḡau ta ikarana totona, una ḡau ikarana ai baita manadamu. Heḡereḡere, bema ta na e uramu gita gadaralai dalana baine diba, ia na laḡani momo lalodiai be hekwarahimu. Reana be kerere louloumu, to dounu be tohoamu neganai be dibamu. Bona ena be gita gadaralai dalana na be manadalaiamu, to nega ta ta ai be kereremu. To baine haheauka, unu amo ena diba baine habadaia. Una heḡereḡerena, ena be eda kerere ta na baita hamaoromaoroamu, to una kerere na ma baita karaia loumu. To namona na baita hekwarahi dounu baita hamaoromaoroa. Vaia, nega haida eda hereva o kara daidiai baita lalohisihisimu, to bema baita haheaukamu, Iehova ese be durudamu eda manoka ḡaudia baita hanamodiamu. (1 Pet. 5:10) Mani Petro e haheauka karana aita laloa. Iesu ese e bogaia hisi karana ese ita be hagoadadamu mai haheauka ida Iehova baita hesiai henia.

4. Luka 5:​5-10 ai, Petro na e gwa ia na taunimanima ede bamona, to Iesu ese ede e durua toma?

⁴ Baibul ese na se hahedinaraia Petro be dahaka dika e kara eiava dahaka dainai sibona e hegwaurai ia na ‘dika tauna.’ (Luka 5:​5-10 ba duahidia.) To reana ia na kerere badadia haida e kara. Iesu na e diba Petro na e gari, reana badina Petro na e laloa ia na dia heḡereḡere Iesu baine bamoa. Danu Iesu na e diba Petro ese ia na dounu baine badinaia. Una dainai e hamaoroa, eto: “Basio gari.” Iesu ese Petro na e abidadama henia bona una ese Petro na e durua bada. Gabeai Petro bona tadina Andrea na edia haoda bisnes e rakatani bena Iesu murinai e raka, bona Iehova ese dala momo ai e hanamodia.—Mar. 1:​16-18.

5. Petro na Keriso e badinaia dainai dahaka hahenamo e abi?

⁵ Petro na Keriso e badinaia dainai hahenamo momo e abi. Heḡereḡere, Iesu ese gorere taudia e hanamodia, demoni e luludia, bona mase taudia e hatoredia isi lou karadia na e ita. b (Mat. 8:​14-17; Mar. 5:​37, 41, 42) Danu, Petro na matahanai ta ai Iesu na vaira negai Dirava ena Basileia ena King ai ela hairaina e  itaia, bona una na se laloaboio. (Mar. 9:​1-8; 2 Pet. 1:​16-18) Petro ese unu na basinema itadia diba bema Iesu basinema badinaia. Petro na ena lalohadai kereredia e dadarai bona e abi hahenamo daidiai e moale.

6. Petro ese ena manoka ḡaudia be e hanamodia haraḡa, a? Mani a herevalaia.

⁶ Petro na dounu e hekwarahiva ena manoka ḡaudia baine hanamodia, ena be Iesu ese e kara ḡaudia e ita bona e kamonai. Mani haheitalai haida aita lalodia: Iesu ese peroveta herevana heḡereḡerena bae hahisia bona baine mase dalana e herevalaia neganai, Petro ese e gwau henia. (Mar. 8:​31-33) Petro bona aposetolo ma haida na e hepapahuahu loulouva daika be herea. (Mar. 9:​33, 34) Iesu do se mase hanuaboina ai Petro ese tau ta taiana e utua oho. (Ioa. 18:10) Una hanuaboi ai, Petro na e gari dainai nega toi Iesu e ḡorea. (Mar. 14:​66-72) Bona una dainai e tai dikadika.—Mat. 26:75.

7. Iesu e tore isi lou murinai Petro be dahaka hahenamo e abi?

⁷ Iesu ese Petro na se rakatania. Iesu e tore isi lou murinai, Petro na hahenamo haida e henia, unu amo e hamomokania ia na e lalokau henia. Iesu ese e hamaoroa iena mamoe ireḡudia ḡaukarana baine karaia. (Ioa. 21:​15-17) Bona Petro na unu e kara toma. Pentekost dinana ai, ia na Ierusalem ela, bona Dirava ese ena lauma helaḡa amo e horodia taudia ginigunadia ta na ia.

8. Antioka ai Petro be dahaka kerere badana e karaia?

⁸ Petro na horoa Kristen tauna ta ai ela danu dounu e hekwarahiva ena manoka ḡaudia baine hanaidia. Laḡani 36 C.E. ai, Dirava ese Petro e siaia Idau Bese tauna Korenelio dekena bona una negai Dirava ese Korenelio na lauma helaḡa amo e horoa. Una ese e hahedinaraiamu “Dirava ese taunimanima oromadia [na] se lalomu,” bona Idau Bese taudia na Kristen kongrigeisin ai bae noho diba. (Apos. 10:​34, 44, 45) Una murinai, Petro na Idau Bese taudia ida e aniani hebouva, guna unu na se kara tomava. (Gal. 2:12) To, Iuda Kristen taudia haida na e laloava Iuda taudia bona Idau Bese taudia na basie aniani hebou. Unu e lalo toma taudia haida na Antioka ela neganai, Petro na Idau Bese tadikakadia edia amo e raka oho, Iuda tadikakadia baine habadudia garina. Aposetolo Paulo na una kara e itaia neganai, taunimanima vairadiai Petro e gwau henia. (Gal. 2:​13, 14) Ena be Petro na e kerere to e haheauka. Dahaka ese ia e durua?

9. Ioane 6:​68, 69 ai Petro ese Iesu e badinaia karana be ede e herevalaia toma?

⁹ Petro na dounu Iesu e badinaia. Heḡereḡere, nega ta hahediba taudia ese Iesu ena hereva ta se lalopararalaia neganai, Petro na Iesu e badinaia. (Ioane 6:​68, 69 ba duahidia.) Unu hahediba taudia momo na Iesu ena hereva anina asie tahua, to Iesu e rakatania. A Petro ese Iesu na se rakatania. Ia ese Iesu e hamaoroa, eto: “Mauri hanaihanai herevadia na oiemu ai.”

10. Edena dala ai Iesu ese e hahedinaraia Petro na dounu ia be badinaiamu? (Laulau danu ba itaia.)

¹⁰ Iesu ese Petro na se rakatania. Iesu ena hanuaboi ginigabena ai, ia na e diba Petro bona aposetolo ma haida ese ia na bae rakatania. To, Iesu ese Petro e hamaoroa ia na be goada loumu bona dounu ia be badinaiamu. (Luka 22:​31, 32) Iesu na e diba “Petro lalona na e uramu, to tauanina na e manoka.” (Mar. 14:​38, NWT) Una dainai, ena be Petro ese Iesu e ḡorea, to Iesu ese ia na se rakatania. Iesu e tore isi lou murinai, ia na Petro enai e hedinarai—una negai Petro na sibona noho.  (Mar. 16:7; Luka 24:34; 1 Kor. 15:5) Una ese Petro na e hagoadaia.

11. Edena dala ai Iesu ese Petro e hagoadaia Iehova ese ia na be duruamu?

¹¹ Iesu ese Petro e hamaoroa Iehova ese ia na be duruamu. Iesu ese Petro bona aposetolo ma haida e durudia gwarume momo herea ma e veri. (Ioa. 21:​4-6) Petro na una hoa karana amo e diba Iehova ese iena dabu ḡaudia na baine heni diba. Reana Petro na Iesu ena hereva e laloa lou, Iehova ese “Basileia” e tahua gunamu taudia na baine durudia. (Mat. 6:33) Una ese Petro e durua dainai, ena mauri lalonai haroro ḡaukarana e atoa guna, a haoda ḡaukarana be gabeai. Pentekost 33 C.E. ai, ia na e haroro goadagoada bona taunimanima momo e durudia sivarai namona e abia dae. (Apos. 2:​14, 37-41) Una murinai ia ese Samaria taudia bona Idau Bese taudia e durudia Keriso e abia dae. (Apos. 8:​14-17; 10:​44-48) Iehova ese Petro e ḡaukaralaia taunimanima idauidau e durudia kongrigeisin lalonai e vareai.

12. Eda manoka ḡauna ta ihanaina totona ta hekwarahimu neganai, dahaka baita laloatao?

¹² Iehova ena heduru amo baita haheauka dibamu. Bema ita na nega daudau lalonai eda manoka ḡauna ta ihanaina totona ta hekwarahimu, reana baita haheaukamu na auka. Reana ita eda manoka ḡaudia haida na dia Petro ena manoka ḡaudia heḡereḡeredia. To Iehova ese goada be henidamu, unu manoka ḡaudia ihanaidia karana ai baita haheauka. (Sal. 94:​17-19) Haheitalai ta na ina, tadikaka ta na hereva momokani do se diba neganai, ia na tatau bona tatau e mahuta heboumu (homosexual) mauri dalana e badinaia. Gabeai ia na Baibul ena hereva e diba neganai, una mauri dalana na e rakatania. To, nega ta ta ai ura dikadia na e abiva. Dahaka ese e durua unu ura dikadia e dadarai? Ia na e gwa: “Iehova ese e durugu. Iena lauma helaḡa ena heduru amo na diba hereva momokani na dounu baina badinaia. Iehova ese e ḡaukaralaigumu, bona ena be na kara kereremu to dounu e durugumu baina goada.”

13. Aposetolo Edia Kara 4:​13, 29, 31 heḡereḡerena, Petro ena haheitalai be ede baita tohotohoa toma? (Laulau danu ba itaia.)

¹³ Petro na taunimanima garidia e gari dainai kerere badadia haida e kara. To Dirava enai goada e noia dainai una gari karana na e  hanaia. (Aposetolo Edia Kara 4:​13, 29, 31 ba duahidia.) Ita danu taunimanima igari henidia karana na baita hanaia dibamu. Nazi Germany ai e nohova matamata tadikaka ta, Horst enai e vara ḡauna mani aita laloa. Nega momo ia na skuli ai taunimanima garidia e gariva dainai, ina hereva “Heil Hitler!” e gwauraiava. Horst tamana bona sinana ese ia na se gwau henia, to ia ida e ḡuriḡuri, Iehova e noia goada baine henia. Horst na Iehova enai e tabekau bona tamana sinana ese e durua dainai e gini goada. Gabeai ia na e gwa: “Iehova ese lau na se rakatanigu.” c

14. Elda taudia ese e lalomanokamu taudia be ede bae hagoadadia toma?

¹⁴ Iehova bona Iesu ese ita na e laloda badamu. Petro na Iesu e ḡorea murinai, ia na baine abi hidi, ia be dounu Keriso baine badinaia eiava? Iesu ese Iehova e noia Petro baine durua ena abidadama baine hagoadaia. Iesu ese ena ḡuriḡuri herevana na Petro e hamaorolaia bona e hadibaia ia na gabeai tadikakana baine hagoadadia. (Luka 22:​31, 32) Petro na Iesu ena hereva e lalodia lou neganai, una ese e hagoadaia! Ita ese abi hidi badana ta, ta uramu baita karaia neganai, Iehova ese elda taudia amo be hagoadadamu, ia dounu baita badinaia totona. (Efe. 4:​8, 11) Laḡani momo elda ḡaukarana e karaia tadikakana Paul ese haida na unu e hagoadadia toma. Ia ese lalomanoka taudia na e hamaorodia, Iehova ese hereva momokani ai e veridia mai dalana bae laloa. Bena e hagoadadia Iehova na ena mia hanaihanai lalokauna dainai idia na basine rakatanidia. Ia na e gwa: “Na itaia e lalomanoka taudia momo na Iehova ena heduru amo e haheauka.”

15. Petro bona Horst edia haheitalai ese Mataio 6:33 ena hereva be ede e hamomokania toma?

 ¹⁵ Iehova ese Petro bona aposetolo ma haida na tauanina dalanai e durudia heḡereḡerena, ia ese iseda dabu ḡaudia na be henimu bema iena hesiai ḡaukara baita atoa gunamu. (Mat. 6:33) Tanobada Tuarina Iharuana e ore murinai, Horst, matamanai tame herevalaia tadikakana, na e ura painia ḡaukarana baine karaia. To ia na ogoḡami ai e nohova dainai, e daradara ena dabu ḡaudia be ede baine abi toma, unu amo dounu baine painia. Dahaka e kara? Ia na e ura baine diba Iehova be momokani ia be duruamu, una dainai lalona e hadaia seket tauna e vadivadi wikina ibounai lalonai ia na e haroro. Bena wiki dokonai, ia na e hoa badina seket tauna ese envalop ta e henia to se hadibaia una be daika ese e henia. Una envalop lalonai na moni haida bona una na heḡereḡere hua haida lalodiai ena painia ḡaukara ai baine durua. Horst na una harihari ḡauna amo e diba Iehova ese ia na e durua. Una dainai ena mauri lalonai Basileia ḡaukarana e atoa guna.—Mal. 3:10.

16. Dahaka dainai Petro ena haheitalai bona e tore ḡaudia baita dibadia?

¹⁶ Petro na e moale badina Iesu ese ia na se rakatania, ena be guna ia ese Iesu e noia ia ena amo baine raka oho. Iesu ese Petro na dounu treinin e henia aposetolo goadana ai bainela bona Kristen taudia ediai haheitalai namona baine hahedinaraia. Unu na Baibul ai e toredia, ita ese namo baita davari helaoreana. Petro ese e diba ḡaudia na kongrigeisin ginigunadia e siai henidia revarevadia ruaosi ai e toredia. Atikol gabena ai, unu revareva edia hereva haida bona baita badinadia daladia be herevalaimu.