1-2. Dahaka dainai Iehova ese e karada na baita moale, bema ita na hariharihari karana baita hahedinaraiamu?

 IEHOVA ese ita e karada na ḡau ihenina karana amo moale bada baita davaria. (Apos. 20:35) Anina be ta ese ḡau ta e henidamu neganai basita moale, a? Lasi, ita iboudai na mai dibada ta ese harihari ḡauna ta e henidamu neganai ta moalemu. To ḡau ta henimu neganai eda moale na e badamu. Oibe, Iehova ese unu e karada toma na mai ena namo. Dahaka dainai?

² Iehova ese unu e karada toma badina Ia na e uramu ita na baita moale. Harihari daladia idauidau baita tahu, unu amo eda moale baita habadaia. Iehova ese unu e karada toma na namo herea, ani?—Sal. 139:14.

3. Iehova be dahaka dainai e gwauraia “moale Diravana”?

³ Baibul ese e hadibadamu ḡau ihenina karana na mai moalena, una dainai Iehova e gwauraiamu “moale Diravana” neganai ita na asita daradaramu. (1 Tim. 1:​11, NWT) Ia na Harihari Tauna ginigunana bona hereadaena. Aposetolo Paulo ese e gwauraia heḡereḡerena, ‘Ia dainai ta maurimu, ta mareremu, bona ta nohomu.’ (Apos. 17:28) Oibe, “harihari ḡaudia namodia iboudiai bona herahia ḡaudia ḡoeva-daedia iboudiai” na Iehova ena amo e maimu.—Iak. 1:17.

4. Dahaka ese baine duruda unu amo eda moale baita habadaia?

⁴ Ita iboudai na ta uramu harihari karana amo e maimu moalena baita mamia. Una na Iehova ena harihari karana baita  tohotohoamu neganai baita mamiamu. (Efe. 5:1) Una ta herevalaiamu lalonai, baita itaia ita be dahaka baita kara bema haida ese eda harihari karana na se laloa badamu. Unu hereva ese be durudamu dounu baita moalemu bona eda moale na be badamu.

IEHOVA ENA HARIHARI KARANA BA TOHOTOHOA

5. Iehova ese e henimu ḡaudia haida be dahaka?

⁵ Iehova be mai moalena ida dahaka e henimu? Mani ena harihari ḡaudia haida aita lalodia. Iehova ese tauani idurudia ḡaudia e henidamu. Ena be eda kohu na dia momo, to Iehova ta tenkiu heniamu badina eda dabu ḡaudia korikoridia e henidamu. Heḡereḡere, aniani, dabua, bona noho gabudia. (Sal. 4:8; Mat. 6:​31-33; 1 Tim. 6:​6-8) Iehova ese eda dabu ḡaudia e henimu badina be dahaka? Ena maduna baine haḡuḡurua mo dainai, a? Lasi! To dahaka dainai Iehova na unu e kara tomamu?

6. Mataio 6:​25, 26 amo dahaka ta dibamu?

⁶ Iehova ese eda dabu ḡaudia e henimu badina na e lalokau henidamu. Mani Iesu ena hereva aita lalodia Mataio 6:​25, 26 ai. (Ba duahidia.) Iesu na Iehova ese e kara ḡaudia e ḡaukaralai. Iesu ese manu e herevalaidia, e gwa: “Idia na asie hadohadomu, asie taboromu, roge ai asie haboumu.” To ma e gwa: “A Tamamui guba ai e nohomu ese e ubudiamu.” Bena e henanadai, eto: “Umui ese idia asio hereadiamu a?” Iena hereva amo dahaka ta dibamu? Iehova matanai ia e tomadiho heniamu taudia ese animal na e hereadiamu. Bema Iehova ese animal e naridiamu, ta dibamu Iehova ese ita eda dabu ḡaudia na be henimu! Iehova na tama lalokauna ta heḡereḡerena, mai lalokauna ida ena famili edia dabu ḡaudia e henimu.—Sal. 145:16; Mat. 6:32.

7. Edena dala ai Iehova ena harihari karana baita tohotohoa? (Laulau danu ba itaia.)

⁷ Iehova heḡereḡerena, ita danu mai lalokauda ida ma haida edia dabu ḡaudia baita heni. Heḡereḡere, oi mai dibamu tadikaka o taihu ta be dabua eiava aniani ai e dabumu, a? Iehova ese oi na baine ḡaukaralaimu diba una tadikaka o taihu ena dabu ḡauna ba heni. Momo na mai dibadia Iehova ena taunimanima na disasta negadiai harihari karana e hahedinaraiamu. Heḡereḡere, COVID-19 pandemic ai, tadikaka bona taihu na aniani, dabua, bona ma ḡau haida na dabu taudia e henidia. Momo na tanobada heḡeḡemadai ḡaukarana  iduruna totona moni e heni. Idia na Heberu 13:​16, ena hereva e badinaia, e tomu: “Kara namo bona kohu iharina na basio rea, badina be Dirava ese helaḡa karadia enehetomadia e moalelaimu.”

8. Ededia dala ai Iehova ena siahu amo namo ta davariamu? (Filipi 2:13)

⁸ Iehova ese siahu e henidamu. Iehova ena siahu na asi hetoana bona mai moalena ida ia e tomadiho heniamu taudia e durulaidiamu. (Filipi 2:13 ba duahia.) Nega ta Iehova enai goada o noi hahetoho ta ba dadaraia eiava ba haheaukalaia totona, a? Eiava goada o noi una dina ai ba kara ḡaudia ba haḡuḡuru totona, a? Bema Iehova ese emu ḡuriḡuri na e haerelaia, oi ese aposetolo Paulo ena hereva na bo abia daemu, ia na eto: “Goada e henigumu Diravana dainai lau na ḡau iboudiai ikaradia ai na goadamu.”—Fili. 4:13.

9. Edena dala ai Iehova ese siahu e henimu karana baita tohotohoa? (Laulau danu ba itaia.)

⁹ Ena be ita na dia ḡoevadae, to Iehova ese siahu e henimu karana na baita tohotohoa dibamu. Momokani ita ese siahu na ma haida basita henidia dibamu, to eda goada hari baita ḡaukaralaiamu idia baita durudiamu. Heḡereḡere, iahudia o gorere taudia edia ruma ḡaukaradia haida baita kara eiava stoa ai edia ura ḡaudia baita tahu. Bema iseda noho daladia na heḡereḡere, Kingdom hall ihaḡoevana bona ihanamona ḡaukaradia ai baita heduru. Dala unu bamodia amo Iehova e tomadiho heniamu taudia na namo be davarimu.

10. Edena dala ai eda hereva amo ma haida baita hagoadadia?

¹⁰ Basio helaloboio eda hereva danu mai siahudia. O laloamu daika be hahenamo herevana ta amo ba hagoadaia diba? Eiava oi be mai dibamu daika be tauhalo herevadia baine abi na namo? Bema oibe, dala ta amo ba hahedinaraia ia na o laloa badamu. Ba vadivadia, ba rini henia, eiava kadi ta ba henia, bona email o tex meseij ta ba siaia diba. Ba gwaurai herevadia daidiai basio lalo hekwarahi, to reana oi kudoumu ai e miamu hereva namona ese ia na be hagoadaiamu bena dina ma ta ena metau lalonai ena abidadama na dounu be dogoataomu eiava lalohadai maorona be abiamu.—Her. 12:25; Efe. 4:29.

11. Edena dala ai Iehova ese ena aonega e ḡaukaralaiamu?

¹¹ Iehova ese aonega e henimu. Hahediba tauna Iakobo na e gwa: “Umui ta aonega ai bema dabu, ia ese taunimanima iboudiai e henidia dudu kaumu bona se gwaugwaumu Diravana na baine noia.” (Iak. 1:5) Una siri ese e hahedinaraiamu, Iehova ese ena aonega na se ruamu. To mai ena ura ida e henimu. Ena  heduru ta noiamu neganai eda hemami na se hadikaiamu, to e hagoadadamu hanaihanai ia enai baita tabekau.—Her. 2:​1-6.

12. Ededia dala idauidau ai ta dibamu ḡaudia na ma haida baita hadibalaidia?

¹² Ita be dahaka baita kara? Aonega ihenina karanai Iehova baita tohotohoa diba, eiava? (Sal. 32:8) Iehova ena taunimanima na dala idauidau ai e diba ḡaudia na ma haida e hadibalaidiamu. Heḡereḡere, ita ese haroro ḡaukara ai matamatadia ta hadibadiamu. Elda be mai haheaukadia ida hesiai taudia bona bapatiso tadikakadia ese kongrigeisin madunadia bae hua daladia e hadibadiamu. Danu, ḡaukara mai dibadia tadikaka taihu ese konstraksen bona meintenens ḡaukaradia ai, matamatadia e hadibadiamu, tiokratik rumadia bae hagini totona.

13. Edena dala ai Iehova ese ena aonega e henimu dalana baita tohotohoa?

¹³ Namona na haida ta hadibadiamu neganai, Iehova ese aonega e henimu dalana baita tohotohoa. Baita helalotao, Iehova ese ena aonega na se ruamu, to mai moalena ida e henimu. Una dainai ita danu mai moalena ida ta diba ḡaudia na ma haida baita hadibalaidia. Dia namo ta ese eda ḡaukara baine karaia garina ta garimu dainai ḡau haida na basita hadibaia namonamo. Eiava ini basita lalo toma: ‘Lau na ta ese se hadibagu! Ia danu sibona ena diba ai ḡau baine dibadia.’ Dia namo Iehova ena taunimanima na unu bae lalo toma. Namona na eda diba “bona eda mauri” baita heni, ma haida baita hadibadia totona. (1 Tes. 2:​8, NWT) Ta uramu “unu amo idia na bae heḡereḡere haida ma bae hadibadia.” (2 Tim. 2:​1, 2, NWT) Bema ita iboudai ese aonega bona diba na una dala ai baita hariharilaiamu, ita bona ta hadibadiamu taudia eda aonega bona moale na be badamu.

BEMA EDA HARIHARI KARANA SE LALOA BADAMU

14. Haida ese eda harihari karana be ede e laloa tomamu?

¹⁴ Bema eda tadikaka taihu ediai eda harihari bada karana baita hahedinaraiamu, idia ese ita na be tenkiu henidamu. Reana kadi ta amo edia tenkiu herevadia be toremu eiava dala ma haida ai be hanamodamu. (Kol. 3:15) Edia tenkiu herevadia ese eda moale na be habadaiamu.

15. Dahaka baita laloatao bema ma haida ese tenkiu karana se hahedinaraiamu?

¹⁵ Momokani taunimanima haida ese tenkiu karana na se hahedinaraiamu. Nega haida taunimanima idurudia totona eda nega, goada, bona kohu ta ḡaukaralaimu, to asie lalobadamu. Bema una e varamu, edena dala ai basita lalohisihisi? Ina atikol ena siri badana, Aposetolo Edia Kara 20:35 ba laloa. Ita ta moalemu badina na dia taunimanima ese ita bae tenkiu henida dainai. To dounu baita harihari diba dainai ta moalemu, ena be haida ese una kara na se laloabadamu. Edena dala ai? Mani dala haida aita herevalai.

16. Harihari karana ai ita be dahaka baita lalo?

¹⁶ Iehova baita tohotohoa daladia baita lalo. Iehova ese ḡau namodia na taunimanima iboudiai e henidiamu, ena be haida ese unu na asie lalo badamu. (Mat. 5:​43-48) Iehova na e gwauhamata bema ḡau bo henimu ‘bona davana basio tahuamu davamui na be badamu.’ (Luka 6:35) Basio lalohisihisi bema ta ese emu harihari ḡauna dainai se tenkiu henimumu. Ba helalotao, ma haida o durudiamu dainai Iehova ese be hanamomumu, badina ‘mai moalemu ida o hariharimu.’—Her. 19:17; 2 Kor. 9:7.

17. Edena badi maorona dainai ta uramu ma haida baita harihari henidia? (Luka 14:​12-14)

¹⁷ Iehova ena harihari bada karana baita tohotohoa totona, Iesu ena hereva baita  badinaia Luka 14:​12-14 ai. (Ba duahidia.) Eda heabidae bona harihari bada karana na bae haloua diba taudia ediai baita hahedinaraia na asi ena kerere. To bema ta uramu ta henimu ḡauna na davana baita abia be ede bamona? Namona na baita hekwarahi Iesu ena hereva baita badinaia. Eda heabidae bona harihari bada karana basine haloua diba tauna enai baita hahedinaraia. Bena baita moalemu badina Iehova ta tohotohoamu. Ena be eda harihari ḡaudia daidiai basie tenkiu henida to bema dava iabina karana basita laloamu, ita na hanaihanai mai moaleda ida baita hariharimu.

18. Dahaka basita kara be ḡau badana bona dahaka dainai?

¹⁸ Haida na basita lalodia kerere. (1 Kor. 13:7) Bema haida ese tenkiu karana na se hahedinaraiamu, namona na siboda baita henanadai: ‘Idia be momokani taunimanima unu bamodia, eiava e helalo boiomu dainai?’ Reana badi ma haida dainai tenkiu karana na se hahedinaraiamu. Haida na kudoudiai tenkiu hemamina na mia, to igwauraina na auka. Reana be hemaraimu harihari ḡauna iabina, badina guna idia ese ma haida na e harihari henidiava. Bema tadikaka bona taihu baita lalokau henidiamu, ita ese idia na basita lalodia kereremu bona hanaihanai mai moaleda ida harihari karana baita hahedinaraiamu.—Efe. 4:2.

19-20. Dahaka dainai haheauka na mai anina bada ta hariharimu neganai? (Laulau danu ba itaia.)

¹⁹ Ba haheauka. Harihari bada karanai, aonega Pavapavana Solomon na e gwa: “Amu aniani na davara kopina ai ba negea, badina be dina momo muridiai ma ba davaria.” (Koh. 11:1) Ina hereva ese e hahedinaraiamu, haida na nega taina be daudaumu murinai be tenkiumu—“dina momo muridiai”. Mani e vara momokani sivaraina ta aita herevalaia.

²⁰ Laḡani momo gunadiai, seket ḡaukara e karava tadikakana ta adavana ese revareva amo bapatosi matamata taihuna ta e hadibaia ena abidadama ai baine gini goada. Bena laḡani 8 muridiai, una taihu ese revareva ai  ena haere e siaia neganai, eto: “Na uramu baina hadibamu emu revareva ese lau na e durugu bada herea egu bapatiso negana amo emu heduru hereva namona bona siri namona ese lau kudougu na e hamarerea bona una na basina laloa boiomu.” a E haheaukalaiva ḡaudia e herevalai murinai, taihu na ma e gwa: “Nega haida na urava Iehova ihesiai henina ḡaukaradia na da baina hadoko to una o torea sirina ese lau na e duruguva dounu abidadama ai baina goada. Unu laḡani 8 lalodiai ḡau ta ese se durugu to emu leta bona o torea sirina ese e hagoadagu.” Seket tauna adavana ena moale mani a laloa “dina momo muridiai” una revareva e abia neganai! Ita danu, reana ta harihari henidia taudia ese na dina momo muridiai be tenkiu henidamu.

21. Dahaka dainai lalomu ba hadaia Iehova ena harihari bada karana ba tohotohoa?

²¹ Tame herevalaia heḡereḡerena, Iehova ese ita e karada na mai eda kara namodia. Momokani ḡau iabina na mai moalena, to ḡau baita heni moalena na bada herea. Tadikaka taihu ta durudiamu neganai eda hemami na e namomu. Bona ta moalemu bema e tenkiu henidamu. To, ena be ta harihari henidiamu taudia ese bae tenkiu henida eiava lasi, to baita moale badina kara maorona ta karaiamu. Basio helaloboio, o henimu ḡaudia na “Iehova baine henimu diba ḡauna ese una na baine hereaia.” (2 Sis. 25:9) Ita ese Iehova ena harihari karana na basita hahanaia dibamu! Iehova ese be henimu dava namona na ḡau ta ese se hereaia. Laloda baita hadai, hanaihanai harihari bada Diravana baita tohotohoa.