1-2. Dirava ena hesiai taudia be ede bae moale toma? (Iakobo 1:​22-25)

 IEHOVA bona natuna lalokauna na e uramu ita na baita moale. Salamo e torea tauna na Salamo 119:2 ai e gwa: “[Iehova] ena hahediba herevadia e badinadiamu bona ia e tahuamu mai lalodia idoidiai taudia, idia na [e moalemu.]” Danu, Iesu na e gwa: “Dirava ena hereva e kamonaimu bona e badinamu taudia hari [e moalemu.]”—Luka 11:28.

² Ita Iehova ta tomadiho heniamu tauda na ta moalemu. Dahaka dainai? Badi na momo, badi badana ta na ina: Hanaihanai Dirava ena Hereva ta duahiamu bona ta hekwarahimu ta dibamu ḡaudia na eda mauri ai baita badina.—Iakobo 1:​22-25 ba duahidia.

3. Dirava ena Hereva ta duahiamu bona ta badinaiamu hahenamodia be dahaka?

³ ‘Hereva ibadinana taudia ai baita laomu’ neganai, hahenamo momo baita davarimu. Heḡereḡere, Iehova na be moalemu bona ta dibamu, Ia na e moalemu dainai ita danu baita moalemu. (Koh. 12:13) Danu eda ruma bese maurina na be namomu bona tadikaka taihu ida eda hetura karana be goadamu. Reana emu mauri ai unu hahenamo o davarimu. Bona hahenamo ma ta na, Iehova asie badinaiamu taudia ese e davarimu hekwakwanaidia momo na asita davarimu. Momokani  King David ena hereva na ta abia daemu. Ia na ane ai Iehova ena taravatu, haheḡani bona hahemaoro herevadia e gwaurai murinai, eto: “Ibadinadia ahuna na bada.”—Sal. 19:​7-11.

4. Dahaka dainai nega haida Dirava ena Hereva baita badinaia na auka?

⁴ Dirava ena Hereva ibadinana taudia ai baitala totona, namona na Baibul baita duahia, baita stadilaia, bona Dirava ena ura ita edai baita lalopararalaia. To, momokani una na dia haraḡa badina ḡau momo ta karamu. Una dainai nega baita ato unu baita kara toma totona. Ina aikol ai ita ese Baibul baita duahia hanaihanai totona heduru herevadia haida baita herevalaimu. Danu, Baibul ai ta duahimu ḡaudia baita lalohadailai bona baita badina daladia baita herevalaimu.

NEGA BAVATO DIRAVA ENA HEREVA BA DUAHIA

5. Eda nega be ededia maduna ai ta ḡaukaralai badabadamu?

⁵ Iehova ena taunimanima momo na e bisimu. Eda nega bada na ta ḡaukaralaiamu Baibul ese e gwaurai madunadia ta huamu. Heḡereḡere, ita momo na moni ḡaukara ta karamu eda femli baita naridia totona. (1 Tim. 5:8) Bona tadikaka taihu momo na varavaradia gorere taudia eiava burukadia e naridiamu. Danu ita iboudai na eda helt baine namo helaoreana nega bada ta ḡaukaralaimu. Bona kongrigeisin ḡaukaradia idauidau ta karamu. Maduna badana ma ta na haroro ḡaukarana. Emu maduna idauidau o huamu lalonai, dahaka ese baine durumu Baibul ba duahia hanaihanai, ba laloa dobu, bona ba badinaia?

6. Edena dala ai Baibul iduahina karana na mai anina bada ḡauna ai ba halaoa? (Laulau danu ba itaia.)

⁶ Ita Kristen tauda edai, Baibul iduahina karana na “mai anina bada.” (Fili. 1:​10, NWT) Salamo ginigunana ai e moalemu tauna na ini e gwauraia tomamu: “Iehova ena taravatu ia ese e moalelaiamu, ena taravatu e laloa boimu, e laloa ranimu.” (Sal. 1:​1, 2) Una ese e hahedinaraiamu, namona na nega baita ato Baibul baita duahia. Edena nega be nega namona? Ita ta ta eda nega na idauidau. To  ḡau badana na hanaihanai baita karaia. Tadikaka ta ladana Victor na e gwa: “Lau na na uramu egu Baibul duahiduahi na daba ai baina karaia. Ena be asina uramu daba vaburai baina noga, to una na nega namona badina ḡau momo ese egu duahiduahi se hadikaiamu. Bona lalogu na heḡaeḡae, na duahiamu ḡauna baina haeroa namonamo. Reana oi danu unu bamona. Ina henanadai ba laloa, ‘Lauegu ai edena nega be nega namona, Baibul baina duahia?’

O DUAHIAMU ḠAUNA BA LALOA DOBU

7-8. Dahaka ese Baibul ena namo iabina karana baine koua diba? Haheitalai ta ba gwauraia.

⁷ Momokani, ena be Baibul na hanaihanai ta duahiamu, to ḡau momo ta duahimu dainai anina na asita abiamu. Reana oi na buka ta o duahia bena se daudau o duahia ḡauna na o laloaboio, a? Ita iboudai edai una na e varamu. Baibul ta duahiamu neganai danu una na baine vara diba. Reana laloda ta hadai dina ta ta ai Baibul ena karoa haida baita duahi. Una na namo. To, namona na tahua ḡaudia baita ato bona baita hekwarahi baita haḡuḡuru. (1 Kor. 9:26) To bema ta uramu Baibul ese ita baine duruda, baita duahia mo na dia heḡereḡere.

⁸ Mani ina haheitalai a laloa. Tubutubu ḡaudia na bae mauri totona, ranu bae abi na mai anina bada. To bema nega tamona ai medu bada herea be dihomu, tano na ranu ese be utua daemu. Bona bema medu na dounu be dihomu tano lalonai na basine vareaimu, una dainai tubutubu ḡaudia na basie namomu. To bema medu na metairametaira be dihomu, tano ese ranu na be abia namonamomu dainai tubutubu ḡaudia na be tubu namonamomu. Una heḡereḡerena, Baibul na baita duahia haraḡaharaḡamu neganai, asi eda nega ta duahiamu ḡauna baita laloa dobu, baita laloa tao, bona baita badinaia.—Iak. 1:24.

9. Dahaka baita kara bema ita ese Baibul na ta duahia haraḡaharaḡamu?

⁹ Oi danu nega haida Baibul o duahia haraḡaharaḡamu, a? Bema oibe, dahaka ba kara be namo? Namona na metairametaira ba duahia. Unu amo o duahiamu ḡauna na ba laloa dobu,  eiava emu duahiduahi e oremu murinai nega taina miana na ba ḡaukaralaia o duahia ḡauna ba lalohadailaia. Una na dia auka. Reana emu stadi horana ba habadaia unu amo oi na mai emu nega o duahiamu ḡauna ba lalohadailaia eiava ba laloa dobu. Dala ma ta be siri haida mo ba duahi bena nega orena miana ba ḡaukaralaia o duahi ḡaudia ba lalohadailai. Matamanai tame herevalaia tauna Vitor na e gwa: “Egu Baibul duahiduahi na na hakwadoḡiamu, heḡereḡere karoa tamona na duahiamu. Dabadaba ai na duahiduahimu dainai, na duahiamu ḡauna na una dina ibounai lalonai na laloamu.” Ena be dala idauidau o badinamu to ḡau badana na metairametaira ba duahia, unu amo o duahiamu ḡauna na ba lalohadailaia namonamo.—Sal. 119:97; ina maua ba itaia: “ Ba Lalohadailai Henanadaidia.”

10. O dibaia ḡauna ba badinaia totona dahaka ba kara? Mani haheitalai ta a gwauraia. (1 Tesalonika 5:​17, 18)

¹⁰ Baibul siridia o duahimu neganai, ibadinadia daladia danu ba lalohadailai. O duahiduahimu lalonai ba henanadai, “Edena dala ai na duahiamu ḡauna na hari eiava vaira nega ai baina badinaia?” Haheitalai na: Oi o uramu ba duahia kahana ta na 1 Tesalonika 5:​17, 18 (ba duahidia). Unu siri ruaosi o duahidiamu murinai, ba haeroa, oi be nega hida o ḡuriḡurimu, bona oi ese ḡuriḡuri karana be ede o laloa tomamu. Danu, oi ese o moalelaimu ḡaudia ba haero. Reana Iehova ba tenkiu henia ḡaudia toi ba lalodia. Ena be miniti haida lalodiai mo o duahimu ḡaudia bo haerodiamu, to una ese oi na be durumumu hereva ikamonaina bona ibadinana tauna ai bo laomu. Mani dina ta ta ai una dala bo badinaiamu amo be varamu hahenamona a haeroa! Oibe, oi na Iehova ena hesiai tauna namona ai bo laomu. To, dahaka ba kara bema o lalopararamu oi na ḡau momo ba hanamo.

BA HAḠUḠURU DIBA TAHUA ḠAUDIA BAVABI HIDI

11. Dahaka dainai nega haida emu ai na be aukamu o duahimu ḡaudia ba badina? Haheitalai ta ba gwauraia.

¹¹ Baibul o duahiamu bona ibadinana daladia o lalomu neganai, nega haida bo mamiamu una na auka. Heḡereḡere, dina giniguna ai oiemu Baibul duahiduahi na haida mo ba ura henidia karana ba dadaraia sisibana bo duahiamu. (Iak. 2:​1-8) O lalopararamu oi ese ma haida o kara henidiamu dalana ba hanamoa dainai bo uramu ḡau haida ba haidau. Una na namo herea! To dina iharuana ai, bo duahiamu kahana ese be hahedinaraiamu namona na emu hereva nahuadia ba toho. (Iak. 3:​1-12) Oi na o lalopararamu nega haida emu hereva ese haida na se hagoadadiamu dainai bo uramu emu hereva dalana ba hanamoa. Dina ihatoina ai, bo duahiamu kahana na tanobada na basio hetura henia. (Iak. 4: 4-12) Una dainai bo uramu moale karadia bavabi hidi namonamo. Dina iha-hanina ai bo mamiamu, oi ese ba hanamo ḡaudia na momo bona ibadinadia emu ai na be aukamu.

12. Dahaka dainai basio lalomanoka bema emu Baibul duahiduahi amo o lalopararamu sensi haida ba kara na namo? (Futnout danu ba itaia.)

¹² Bema emu Baibul duahiduahi amo o lalopararamu sensi haida ba kara, basio lalomanoka na namo. Badina una ese e hahedinaraiamu oi kudoumu na namo. Manau bona e kara momokani tauna ese Baibul e duahiamu, badina e uramu ena mauri baine hanamoa. a Danu ba helalotao namona na hanaihanai ‘tau matamatana na dabua bamona ba hahedokilaia.’ (Kol. 3:10) To dahaka ese baine durumu, hanaihanai Dirava ena hereva ibadinana tauna ai baola?

13. Edena dala ai ba haḡuḡuru diba tahua ḡaudia bavato? (Laulau danu ba itaia.)

¹³ O duahimu ḡaudia iboudiai na nega tamona basio kara dibamu dainai ba haḡuḡurua diba ḡauna ta o rua mo bavabi hidi. (Her. 11:2) Ina ba tohoa: Pepa ta ai o uramu ba kara ḡaudia ba tore, bena ba badina ḡaudia ta o rua mo bavabi hidi, a haida be gabeai. Ededia bavabi hidi guna?

14. Ededia tahua ḡaudia bavabi hidi guna?

¹⁴ Reana oi ese ba haḡuḡurua diba ḡauna ta bo abia hidimu. Eiava reana emu mauri ai ba hanamoa ḡauna ta bo abia hidimu. Emu tahua ḡauna o abia hidimu murinai, eda pablikeisin ai ba hetahu. Eda Watch Tower Publications Index bona Research Guide for Jehovah’s Witnesses ba ḡaukaralai diba. Ḡuriḡuri amo Iehova ba noia emu tahua ḡauna ‘iura-henina’ bona ‘ikarana’ urana na lalomui ai baine atoa. (Fili. 2:13) Bena o dibaia ḡauna ba badinaia.  Emu tahua ḡauna ginigunana bo haḡuḡuruamu neganai, lalomu na be goadamu tahua ḡauna ma ta ba tohoa. Momokani, bema oi na emu mauri ai sensi ta bo karaiamu eiava Kristen kara namona ta ai bo kwalimumu, reana emu ai na be haraḡamu sensi ma haida ba kara.

DIRAVA ENA HEREVA NA “LALOMUI AI E ḠAUKARAMU”

15. Edena dala ai Baibul e duahiamu taudia ma haida amo Iehova ena taunimanima na idau? (1 Tesalonika 2:13)

¹⁵ Haida na e gwaumu idia ese Baibul na nega momo e duahiamu. To, idia ese Baibul e abidadama henia momokanimu, a? Eiava ena hereva be edia mauri lalonai e badinaiamu, a? Nega momo una na se varamu. To, Iehova ena taunimanima be idau. Kristen ginigunadia heḡereḡeredia, idia na e abia daemu Baibul na “Dirava ena hereva.” Danu e hekwarahimu, edia mauri lalonai bae badinaia.—1 Tesalonika 2:13 ba duahia.

16. Dahaka ese baine duruda Dirava ena Hereva ibadinana taudia ai baitala?

¹⁶ Dirava ena Hereva baita duahia bona baita badinaia hanaihanai na mai hekwarahina. Reana Baibul baita duahia haraḡamu bona asita lalohadailaiamu. Eiava ta mamiamu ḡau momo ta duahimu dainai iboudiai baita badina na auka. To unu daidiai basio laloa, Baibul iduahina bona ibadinana na auka. Iehova ena heduru amo ba kwalimu diba. Namona na iena heduru na bavabia dae, unu amo Dirava ena Hereva na dia ba kamonaia mo to ibadinana taudia ai baola. Oibe, Baibul baita duahiamu bona eda mauri ai baita badinaiamu neganai baita moalemu.—Iak. 1:25.