1-2. (a) Aposetolo Paulo ese Iudea ai e nohova Heberu taudia e tore henidia neganai, edia noho dalana be ede bamona? (b) Edena dala ai una revareva na nega maorona ai e hedinarai?

 IESU e mase murinai, Ierusalem bona Iudea ai e nohova Heberu Kristen taudia na hekwakwanai momo e haheaukalai. Kristen kongrigeisin e matama neganai daḡedaḡe bada e vara. (Apos. 8:1) Danu laḡani 20 muridiai, doe bada e vara dainai, Keriso ena hahediba na ogoḡami bona moni hekwakwanaina e davaria. (Apos. 11:​27-30) To, laḡani 61 C.E. ai, daḡedaḡe na e maraḡi Kristen taudia ediai, to dia gabeai baine vara ḡauna heḡereḡerena. Unu nega ai Iehova ese aposetolo Paulo e rohea dainai e torea revarevana amo e heni sisibana ese idia na e durudia vaira nega ai bae vara ḡaudia daidiai bae heḡaeḡae.

² Heberu Kristen e tore henidia revarevana na nega maorona badina idia ese e noholaiava mainona na basine mia daudaumu. Paulo ese sisiba namona ta amo Kristen taudia e durudia vaira nega ai bae vara hisihisidia bae haheaukalai totona. Iesu ese e gwauraia peroveta herevana, Iuda baine hadikaia ore negana na e kahikahiva. (Luka 21:20) To momokani, Paulo eiava Iuda ai e nohova Kristen taudia na asi dibadia una be edena nega ai baine vara. Una dainai, Kristen taudia ese edia nega miana na bae ḡaukaralaia namonamo, ini kara heḡereḡere abidadama bona haheauka bae goadalai.—Heb. 10:25; 12:​1, 2.

3. Dahaka dainai hari Kristen taudia ediai, Heberu bukana na mai anina bada?

 ³ Kahirakahira ita edai hisihisi bada hereana be varamu, una ese Heberu Kristen ediai e vara ḡauna na be hereaiamu. (Mat. 24:21; Apok. 16:​14, 16) Una dainai Iehova ese unu Kristen taudia e durulaidia sisibadia haida aita herevalai, unu amo heduru baita abi.

“LO TAUDIA AI BAITALA”

4. Kristen ai ela Iuda taudia be dahaka hekwakwanai e davari? (Laulau danu ba itaia.)

⁴ Kristen ai ela Iuda taudia na sensi badadia bae kara bona una na mai hekwarahina. Guna, Iehova ese Iuda taudia na e abidia hidi iena taunimanima ai ela. Laḡani momo lalodiai, Ierusalem na mai anina bada gabuna. Iehova e laulaulaia Pavapavana na unuseniai e lohiava. Bona e urava Iehova bae tomadiho henia taudia na Ierusalem dubu helaḡana e laova. Iuda taudia na Mose ena Taravatu bona edia tomadiho igunalaina taudia edia taravatu e badinava. Unu ese edia aniani, peritome karana, bona idau bese taudia bae kara henidia daladia e biaguva. To Iesu e mase murinai Iehova ese Iuda taudia edia boubou karadia na se abi daeva. Mose ena taravatu e badinaiava Iuda Kristen taudia ediai una na hahetoho badana. (Heb. 10:​1, 4, 10) Bona lo Kristen taudia heḡereḡere, aposetolo Petro danu e hekwarahiva sensi baine kara. (Apos. 10:​9-14; Gal. 2:​11-14) Unu Kristen taudia na dala matamatana e badinaiava dainai Iuda tomadiho igunalaina taudia ese e daḡedaḡe henidiava.

5. Dahaka dainai Kristen taudia na bae henahua toho?

⁵ Heberu Kristen taudia na orea rua ese e inai henidiava. Orea ginigunana na Iuda tomadihona e gunalaiava taudia, idia na e laloava unu Kristen taudia ese Iuda tomadihona e rakatania. Bona ma orea ta be sibodia e hegwauraiva Kristen taudia, idia na e laloava Keriso e badinaiava taudia na dounu Mose ena taravatu haida bae badina na namo, bena reana daḡedaḡe na basie davari. (Gal. 6:12) Abidadama Kristen taudia be dahaka ese baine durudia hereva momokani bae badinaia totona?

6. Paulo ese Kristen taudia e hagoadadia dahaka bae kara? (Heberu 5:14–6:1)

 ⁶ Paulo ese Heberu Kristen taudia e tore henidia neganai, e hagoadadia Dirava ena Hereva na bae stadilaia bona bae laloa dobu. (Heberu 5:14–6:1 ba duahidia.) Heberu Toretoredia amo idia e durudia bae laloparara, Kristen tomadiho dalana ese Iuda tomadihona na e hereaia. a Paulo na e diba bema unu Kristen taudia ese hereva momokani be lalopararalaia namonamomu, hahediba kereredia na be dibadiamu bona be dadaraimu.

7. Hari ita be dahaka hahetoho idauidau ta davarimu?

⁷ Heberu Kristen taudia heḡereḡeredia, hari eda nega ai taunimanima ese e halasimu herevadia bona lalohadaidia na Iehova taravatu e utumu. Baibul ena taravatu mahuta hebou karana ai ta badinaiamu dainai momo ese ita na e dadaraidamu, bona e gwauraidamu kara auka tauda. Tanobada taudia edia lalohadai na daudau herea Iehova ena amo. (Her. 17:15) Una dainai, namona na lalohadai kereredia baita dibadia unu amo baita dadaraidia, danu, e inai henidamu taudia ese laloda basie hamanokaia bena Iehova ihesiai henina baita hadokoa.—Heb. 13:9.

8. Dahaka ese baine duruda lo Kristen taudia ai baitala?

⁸ Paulo ese Heberu Kristen taudia e hagoadadia namona na bae hekwarahi lo Kristen taudia ai baela, ita danu unu baita kara toma. Anina na Baibul ai hereva momokani dobudia baita stadilai, unu amo Iehova ena lalohadai baita abi dae. Una na gwauhamata bona bapatiso murinai dounu baita karaia ḡauna. Bona ena be laḡani daudau hereva momokani ai ta noho, to namona na Baibul baita duahia bona baita stadilaia hanaihanai. (Sal. 1:2) Bema unu baita kara tomamu, Paulo ese e gwauraia herevana, eda abidadama karana, baita hagoadaiamu.—Heb. 11:​1, 6.

“ITA NA ABIDADAMA TAUDA DAINAI EDA MAURI NA BASITA HABOIOAMU”

9. Dahaka dainai Heberu Kristen taudia edia abidadama baine goada na mai anina bada?

⁹ Heberu Kristen taudia edia abidadama baine goada na mai anina bada, Iudea ai baine vara hisihisina amo bae roho mauri totona. (Heb. 10:​37-39, NWT) Iesu ese ena hahediba e hamaorodia, bema e itaiamu tuari oreana na Ierusalem e ḡeḡeamu, namona na ororo bae heau lao. Kristen taudia iboudiai ediai iena hereva na mai anina bada, ena be idia na Ierusalem siti lalonai eiava murimurinai e nohova. (Luka 21:​20-24) Unu nega ai, murimuri ai e nohova taudia na siti mai maḡuna lalonai e heau vareaiva bae mauri helaoreana. Una dainai idia ediai ororo bae heau lao na vaitani dia aonega karana, to Iesu ena hereva bae badinaia totona bae abidadama na mai anina bada.

10. Kristen tauna ena abidadama be goadamu neganai, dahaka be karamu? (Heberu 13:17)

¹⁰ Heberu Kristen taudia na Iesu ese e ḡaukaralaidiava kongrigeisin bae hakaua taudia danu bae abidadama henidia na mai anina bada. Unu tadikaka na hahediba herevadia e heniva kongrigeisin taudia iboudiai bae durudia Iesu ena hereva na nega maorona ai bona dala maorona ai bae badina totona. (Heberu 13:17 ba duahia.) Heberu 13:17 ai ina hereva “ba kamonai henidia” na Grik herevana ta amo e hahanaia, anina na ta na hereva e badinamu, badina unu hereva e henimu tauna na e abidadama heniamu. Danu, dia ena dagi dainai mo to e abidadama heniamu ena hereva e badinaiamu. Una dainai Heberu Kristen taudia na ediai baine vara hisihisina do se kau  ai e hakaudiava taudia bae abidadama henidia na mai anina bada. Bema maino negadia lalodiai idia na e hakaudiava taudia e kamonai henidiava, hisihisi negadiai danu idia ibadinadia na be haraḡamu.

11. Dahaka dainai hari Kristen taudia edia abidadama baine goada na mai anina bada?

¹¹ Hari, ita danu Heberu Kristen taudia heḡereḡeredia eda abidadama baine goada na mai anina bada. Momo ese ina nega oromana baine ore herevana na se abia daemu bona una na Baibul amo ta hadibadiamu neganai, e kirikirilaidamu. (2 Pet. 3:​3, 4) Danu, ena be Baibul ese hisihisi badana lalonai be varamu ḡaudia haida na e herevalaidia, to ma bae vara ḡaudia momo na asi dibada. Una dainai namona na eda abidadama baine goada, unu amo baita abia dae vaitani Iehova ena dina na iena nega korikori ai be ginidaemu bona ia ese ita na be naridamu.—Hab. 2:3.

12. Dahaka ese baine duruda hisihisi badana amo baita roho mauri totona?

¹² Ita ese “hesiai tauna mai ena abidadama bona mai ena aonega” ediai danu eda abidadama baita hagoadaia na mai anina bada, idia na hari Iehova ese e ḡaukaralaidiamu ita e hakaudamu. (Mat. 24:​45, NWT) Hisihisi badana be matamamu neganai, reana ita na hahediba herevadia baita abimu, Roma tuari oreana ese Ierusalem e ḡeḡea neganai Kristen taudia ese hahediba herevadia e abi heḡereḡerena. Una dainai hari Iehova ena orea e hakauamu taudia edia amo e maimu herevadia baita abidadama henidia na mai anina bada. Bema hari edia hahekau herevadia na basita abidadama henimu bona basita badinamu, edai na be aukamu hisihisi badana lalonai be henimu hahekau herevadia baita badinamu.

13. Dahaka dainai Heberu Kristen taudia ese Heberu 13:5 ai e torea sisibana bae badinaia na namo?

¹³ Heberu Kristen taudia na bae heau negana e gwauraia toana e nariava lalonai, namona na kohu momo itahuna bona ‘moni ihekise-hekise henina’ karana bae dadaraia. (Heberu 13:5 ba duahia.) Idia haida na hitolo bona ogoḡami negadia lalodia e noho. (Heb. 10:​32-34) Ena be idia haida na guna e urava sivarai namona dainai unu nega aukadia bae haheaukalai, to gabeai e laloava moni momo iabina karana ese nega unu bamodiai baine gimadia. To Ierusalem ihadikana negana ai, moni ese idia na basine hamauridia diba. (Iak. 5:3) Momokani, moni bona kohu e ura heni badava taudia ediai na baine auka edia ruma bona kohu bae rakatani bona bae heau mauri.

14. Edena dala ai abidadama goadana ese be durudamu tauani ḡaudia ai abi hidi maorodia baita karamu?

¹⁴ Bema ta abidadamamu Iehova ese kahirakahira ina tanobada oromana dikana na be haoreamu, una ese ita na be hagoadadamu kohu bona moni iura henina karana baita dadaraia. Hisihisi badana lalonai, moni ese taunimanima na basine hamauridiamu, Baibul na e gwaumu, ‘edia silver na ariara ai be negeamu’ badina be lalopararamu ‘Iehova ena badu-ḡaraḡara dinana ai, edia silver bona edia gold ese basie hamauridiamu.’ (Esek. 7:19) Dia namo moni momo ihabouna karana baita laloa bada, to namona na ta karamu abi hiddiia ese ita bae duruda, eda ruma bese bae durudia bona iboudai ese Iehova baita hesiai henia diba. Danu dia namo abi-torehai asi anidia baita kara eiava kohu ireḡudia ai eda nega bada baita haore. Baita henari namonamo danu, dia namo eda mauri lalonai kohu bona moni na ḡau badadia ai baela. (Mat. 6:​19, 24) Ina nega oromana dokona ta nariamu lalonai, eda abidadama na ḡau idauidau, heḡereḡere tauanina ḡaudia iabidia karana ese be tohoamu.

 “EMUI HAHEAUKA BADINA”

15. Dahaka dainai Heberu Kristen taudia bae haheauka na mai anina bada?

¹⁵ Heberu Kristen taudia na vairadiai e maiva daḡedaḡe negana dainai, bae haheauka na mai anina bada. (Heb. 10:36) Ena be Heberu Kristen taudia haida na daḡedaḡe e davari, to idia momo na maino negana lalonai Kristen tomadihona e abia dae. Una dainai Paulo ese e hagoadadia namona na daḡedaḡe bada negana dainai bae heḡaeḡae, bona bae abidadama ela bona mase, Iesu enai e vara bamona. (Heb. 12:4) Iuda taudia momo na e baduva bona e daḡedaḡeva, badina edia taunimanima momo na Kristen taudia ai e laova. Laḡani haida gunadiai, Paulo na Ierusalem ai e harorova lalonai, haida ese e daḡedaḡe henia. Iuda taudia 40 mai kahana na “e gwau hamata mai hereva metaudia ida, basie aniani bona ranu basie inua ela bona Paulo bae alaia mase.” (Apos. 22:22; 23:​12-14) Ena be Kristen taudia na bae inai henidia bona bae daḡedaḡe henidia bada, to namona na tomadiho totona dounu bae hebou, sivarai namona bae harorolaia, bona edia abidadama bae hagoadaia.

16. Edena dala ai Heberu taudia e tore henidia revarevana ese baine duruda daḡedaḡe baita laloa maoromaoro? (Heberu 12:7)

¹⁶ Heberu Kristen taudia be dahaka ese baine durudia daḡedaḡe bae haheaukalai totona? Paulo na e diba namona na idia ese hahetoho na bae lalodia maoromaoro. Paulo ese e hahedinaraia Kristen taudia na hahetoho e davarimu neganai, Dirava ese una na se kouamu unu amo idia na ḡau haida e dibamu. (Heberu 12:7 ba duahia.) Una ese be durudiamu Kristen kara namodia bae hahedinarai bona bae goadalai totona. Bema Heberu Kristen taudia na hahetoho lalonai bona bae hanaia murinai bae vara ḡau namodia be lalomu neganai, ediai na be haraḡamu bae haheauka.—Heb. 12:11.

17. Paulo be daḡedaḡe ihaheaukalaina karana ai dahaka e diba?

¹⁷ Paulo ese Heberu Kristen taudia e hagoadadia,  mai edia lalo goadadia ida hahetoho bae haheaukalai. Bona ia na heḡereḡere sisiba namodia baine heni, daḡedaḡe bae haheaukalai totona. Guna, ia na Kristen taudia e daḡedaḡe henidiava, bona e kara henidiava dalana na e itaia. Bona mai dibana daḡedaḡe karadia be ede baine haheaukalai toma. Danu, ia na Kristen tauna ai ela murinai, dala idauidau ai daḡedaḡe e davari. (2 Kor. 11:​23-25) Una dainai, Paulo na mai dibana ḡoevaḡoeva ta be dahaka baine kara baine haheauka totona. Ia ese Kristen taudia e hagoadadia, hahetoho lalodiai sibodia edia goada ai basie tabekau to Iehova enai bae tabekau. Paulo na mai ena lalo goada ida e gwa: “[Iehova] be egu hekaha, lau na basina gari.”—Heb. 13:6.

18. Vaira nega ai ita iboudai edai be dahaka be varamu bona ede baita heḡaeḡae toma?

¹⁸ Hari, tadikaka haida na daḡedaḡe e haheaukalaimu. Eda lalokau idia ediai baita hahedinaraia dalana ta na, daidiai baita ḡuriḡuri, ma dala ta be edia dabu ḡaudia baita heni. (Heb. 10:33) Baibul ese e hahedinaraia ḡoevaḡoevamu, “Keriso Iesu lalonai Dirava ibadinana bae ura taudia iboudiai na daḡedaḡe do bae hisihisilai.” (2 Tim. 3:12) Una dainai, ita iboudai na baita heḡaeḡae vairai bae vara daḡedaḡe baita haheaukalaidia totona. Namona na mai kudouda idoinai ida Iehova baita abidadama henia, badina ta dibamu herevana edena hahetoho baita davariamu, ia ese ita na be durudamu. Danu iena nega korikori ai, ia e lalokau heniamu taudia iboudiai na be hamauridiamu.—2 Tes. 1:​7, 8.

19. Dahaka baita kara unu amo hisihisi badana totona baita heḡaeḡae? (Laulau danu ba itaia.)

¹⁹ Momokani Paulo ese Heberu taudia e tore henidia revarevana ese Kristen ginigunadia e durudia, vairadiai baine vara hisihisi negana dainai bae heḡaeḡae totona. Paulo ese idia na e hagoadadia Dirava ena Hereva bae stadilaia namonamo bona bae lalopararalaia. Unu bae kara toma neganai, edia abidadama bae hamanokaia diba hahediba herevadia na bae lalopararalai bona bae dadarai diba. Ia ese idia na e hagoadadia edia abidadama na baine goada, unu amo Iesu bona kongrigeisin ai hahekau taudia edia herevadia na bae badina haraḡa diba. Bona e durudia dounu bae haheauka totona, e davarimu hahetohodia na bae lalodia maoromaoro bona unu hahetoho lalodiai bae itaia Tamadia lalokauna ese idia na ḡau ta e hadibadiamu. Ita danu una Baibul sisibana baita badinaia. Unu baita kara tomamu neganai, mai haheaukada ida baita abidadama ela bona dokona.—Heb. 3:14.