1. Kahirakahira Iesu be dahaka hahemaoro be karaiamu?

 ITA TA noholaiamu negana lalonai sensi badadia haida be varamu! Kahirakahira Iesu ese tanobada ai e nohomu taudia iboudiai be hahemaoro henidiamu. Ia ese e hadibadamu tanobada ai be dahaka be vara gunamu, una murinai hahemaoro ḡaukarana be karaiamu. Ia ese ena hahediba na “toa” ta e henidia una ese iena noho negana bona ina “nega oromana dokona” e hahedinaraia. (Mat. 24:​3, NWT) Una toa na Mataio karoa 24 bona 25, Mareko karoa 13 bona Luka karoa 21 ai e gwauraidia.

2. Ina atikol ai dahaka baita herevalaimu bona dahaka dainai una ese ita na be durudamu?

² Iesu ese parabole toi e herevalai, bona unu amo ita e hadibadamu dahaka baita kara. Paraboledia be ini: Mamoe bona nani, aonega bona kavakava ulatodia bona talent. Unu parabole ta ta ese ita be durudamu bena baita lalopararamu Iesu ese ta ta eda kara heḡereḡerena be hahemaoro henidamu. Unu parabole baita herevalaimu neganai baita itaiamu, unu hereva anidia baita badina. Ita ese mamoe bona nani parabolena baita herevalaia gunamu.

MAMOE BONA NANI

3. Edena nega ai Iesu ese taunimanima be hahemaoro henidiamu?

³ Mamoe bona nani parabolena lalonai, Iesu na taunimanima ese sivarai namona e abia dae eiava lasi bona ia tadikakana  e kara henidia dalana heḡereḡerena ai be hahemaoro henidiamu. (Mat. 25:​31-46) ‘Hisihisi badana’ lalonai, Aramagedono do se hematama ai, Iesu ese una hahemaoro ḡaukarana be karaiamu. (Mat. 24:21) Mamoe nari tauna ese mamoe na nani amo e hapararadiamu heḡereḡerena, Iesu ese tadikakana horoa taudia e durudiamu taudia na asie durudiamu taudia edia amo be hapararadiamu.

4. Isaia 11:​3, 4 heḡereḡerena, dahaka dainai ta dibamu Iesu na kara maoromaoro ai taunimanima be hahemaoro henidiamu? (laulauna danu ba itaia.)

⁴ Baibul ena peroveta herevana ese e hahedinaraiamu, Iehova ese e abia hidi tauna, Iesu, na mai kara maoromaorona ida hahemaoro ḡaukarana be karaiamu. (Isaia 11:​3, 4 ba duahidia.) Ia ese taunimanima edia kara, lalohadai, hereva bona ia tadikakana e kara henidiamu dalana na e haerodiamu. (Mat. 12:​36, 37; 25:40) Iesu na be dibamu daidia be ia tadikakana horoa taudia bona edia ḡaukara e duruamu. a Mamoe heḡereḡerena taudia ese horoa taudia e durudiamu dalana badana na haroro ḡaukara. Una ḡaukara ai e hedurumu taudia na Iesu ese be gwauraidiamu “kara maoromaoro” taudia bona edia helaro na tanobada ai bae “mauri hanaihanai.” (Mat. 25:46; Apok. 7:​16, 17) Una na Dirava e badinaiamu taudia ese be abiamu hahenamona! Hisihisi badana lalonai bona murinai, idia na Dirava be badinaiamu dainai, ladadia na “mauri bukana” ai be miamu.—Apok. 20:15.

5. Mamoe bona nani parabolena amo dahaka ta dibamu, bona daidia ediai una na mai anina bada?

⁵ Ba hahedinaraia oi na Dirava o abidadama heniamu bona o badinaiamu. Tanobada ai bae mauri hanaihanai taudia ediai, Iesu ese e gwauraia mamoe bona nani parabolena na mai anina bada. Edia abidadama e hahedinaraiamu dalana na haroro ḡaukara ai Keriso tadikakana e durudiamu, to dia una mo hesiai tauna mai ena aonega bona abidadama ena hahekau dalana danu e badinaiamu. (Mat. 24:45) Guba helarona e abia taudia danu mamoe bona nani parabolena amo ta dibaiamu hahediba herevana bae badinaia na mai anina bada. Dahaka dainai? Badina Iesu ese idia edia lalohadai, kara, bona hereva na e haerodiamu. Idia danu bae abidadama na namo. To, Iesu na ma parabole rua amo horoa taudia ese bae badina hahediba herevadia e hahedinarai. Unu parabole na Mataio karoa 25 lalonai baita davaridiamu. Mani aonega bona kavakava ulatodia parabolena aita herevalaia.

AONEGA BONA KAVAKAVA ULATODIA

6. Edena dala ai ulato faiv na e aonega? (Mataio 25:​6-10)

⁶ Iesu ese e gwauraia parabolena ma ta lalonai, ulato ten e herevalaidia, idia na baine headava tauna ihedavari henina ela. (Mat. 25:​1-4) Idia iboudiai edia ura na headava tauna ida iena headava ariana baela. Iesu ese ulato faiv be e gwauraidia “mai aonegadia” a faiv be “kavakava.” Aonega ulatodia na e heḡaeḡae bona e gima. Oibe idia na e heḡaeḡae, baine headava tauna e naria, ena be hanuaboi ai baine ginidae. Una dainai idia na oela lamepadia e abi kau, hanuaboi ai bae ḡaukaralai. Bona oela ma haida danu e abi kau unu amo headava tauna basinema haraḡa neganai idia ediai na heḡereḡere. Oibe idia na e heḡaeḡae edia lamepa na dounu baine ara totona. (Mataio 25:​6-10 ba duahidia.) Baine headava tauna e ginidae neganai, aonega ulatodia na ia ida headava ariana ai e vareai. Una heḡereḡerena, horoa Kristen taudia na bema bae hahedinaraia idia na e gimamu bona e  abidadamamu, Iesu bainema neganai ahudia na guba Gavamanina lalonai bae abia diba. b (Apok. 7:​1-3) Kavakava ulatodia be ede bamona?

7. Kavakava ulatodia faiv ediai be dahaka e vara bona dahaka dainai?

⁷ Kavakava ulatodia na dia aonega ulatodia heḡereḡererdia, badina baine headava tauna e gini dae neganai idia na se heḡaeḡae. Edia lamepa na kahirakahira bae bodo to oela haida asie abi kau. E kamonai baine headava tauna na kahirakahira baine kau neganai, oela ihoidia ela. To baine headava tauna e ginidae neganai idia na do se kau. Una nega ai, “e noho heḡaeḡae ulatodia na ia ida headava ariana ai e raka vareai” bena iduara e koua ahu. (Mat. 25:10) Gabeai kavakava ulatodia e lou neganai, e ura bae vareai to headava tauna ese e hamaorodia eto: “Lau na asi dibagu umui.” (Mat. 25:​11, 12) Kavakava ulatodia na baine headava tauna bae naria totona se heḡaeḡae. Ina parabole amo horoa taudia be dahaka e dibamu?

8-9. Ulato parabolena amo horoa taudia be dahaka e dibamu? (Laulau danu ba itaia.)

⁸ Ba hahedinaraia oi na heḡaeḡae bona o gimamu. Ina parabole lalonai Iesu na dia horoa taudia edia orea rua e herevalai—orea ta be ina nega oromana dokona inarina karana ai e heḡaeḡae a ta be lasi. To ia ese e herevalaia ḡauna na horoa taudia ediai be dahaka baine vara bema idia na basie heḡaeḡae bona basie haheauka ela bona dokona. Oibe, bema idia na basie heḡaeḡaemu ahudia namona na basie abiamu. (Ioa. 14:​3, 4) Una na mai anina bada! Herevana iseda helaro na guba ai eiava tanobada ai baita mauri hanaihanai, to ita iboudai ese ulato parabolena amo ta dibaiamu ḡauna na baita laloa bada. Ita ta ta na baita gima bona baita heḡaeḡae, unu amo baita haheauka diba ela bona dokona.—Mat. 24:13.

⁹ Iesu na ulato parabolena amo e hahedinaraia baita heḡaeḡae bona baita gima na mai anina bada, una murinai ia ese talent parabolena  e gwauraia. Una parabole amo e hahedinaraia baita ḡaukara goada na mai anina bada.

TALENT

10. Edena dala ai hesiai taudia rarua na biagudia e badinaia? (Mataio 25:​19-23)

¹⁰ Talent parabolena ai Iesu ese e hahedinaraia, hesiai taudia rarua be biagudia e badinaia a ta be lasi. (Mat. 25:​14-18) Hesiai taudia rarua ese biagudia e badinaia dalana na e ḡaukara goada e henidia monina e habadaia. Biagudia na gabu daudauna do sela neganai, idia ta ta na talent e henidia bona una na moni bada hereana. Biagudia e badinaia hesiai taudia rarua na e ḡaukara goada bona e henidia monina na e ḡaukaralaia namonamo. Bena dahaka e vara? Biagudia e lou neganai e itaia ia ese e henidia monina na nega rua e habadaia. Una dainai biagudia ese e hanamodia bona ia ida e “moale hebou.” (Mataio 25:​19-23 ba duahidia.) To hesiai tauna ihatoina be ede bamona? Biaguna ese e henia monina be ede e ḡaukaralaia toma?

11. Dahaka e vara e “lahedo” hesiai tauna enai bona dahaka dainai?

¹¹ Hesiai tauna ihatoina na talent tamona e henia to ia na e “lahedo.” Biaguna na e ura una talent na baine ḡaukaralaia namonamo. To ia ese una talent na tano ai e guria. Bena tauna na biaguna e lou neganai, ḡau ta se heni to e henia monina mo e heni lou. Iena kara na dia namo. Ia na bema sori, badina biaguna ena moni na se habadaia, to biaguna e gwauraia “biagu aukana.” Una dainai una hesiai tauna ese biaguna ena lalonamo e haboioa. Dia una mo, talent na iena amo e abia oho bona ena ruma amo e lulua.—Mat. 25:​24, NWT, 26-30.

12. Hari ina nega ai biagudia e badinaia hesiai taudia raruosi be daidia e laulaulaidia?

¹² Biagudia e badinaia hesiai taudia raruosi na horoa taudia e laulaulaidia. Biagudia, Iesu ese e hamaorodia ia ida ‘bae moale hebou.’ Toreisi lou ginigunana bae abia, ahudia na guba ai. (Mat. 25:​21, 23; Apok. 20:5b) To e lahedo hesiai tauna sivaraina amo danu horoa taudia na ḡau ta e dibaiamu. Una be dahaka?

13-14. Talent parabolena amo horoa taudia be dahaka e dibamu? (Laulau danu ba itaia.)

 ¹³ Ba hahedinaraia oi na o ḡaukara goadamu. Talent bona ulato paraboledia ai, Iesu na se gwa horoa taudia na do bae lahedo. To ia na idia basie ḡaukara goada neganai baine vara ḡauna e herevalaia. Una na ‘e boiridia bona e abidia hidi karana basie hamomokaniamu’ bona guba gavamanina lalonai basie vareaimu.—2 Pet. 1:10.

¹⁴ Iesu ese ulato bona talent paraboledia amo e hahedinaraia ḡoevaḡoeva, horoa Kristen taudia na ba heḡaeḡae, bae gima, bona bae ḡaukara goada. To, Iesu ese horoa taudia daidia ma hereva ta e gwauraia, a? Oibe, una na Mataio 24:​40, 41 ai baita davariamu.

DAIDIA BE BAE “HEABI OHO”?

15-16. Edena dala ai Mataio 24:​40, 41 ese e hahedinaraiamu horoa taudia bae gima na ḡau badana?

¹⁵ Iesu na parabole toiosi do se gwaurai neganai, horoa taudia ihahemaoro henidia negana ginigabena e herevalaia, una hahemaoro amo baine hedinarai daidia be Dirava ese e lalonamo henidiamu. Ia na uma ai e ḡaukarava ta’tau rarua bona uit igwadana nadina e giroava ha’hine rarua e herevalaidia. Toana na unu ta’tau raruosi edia ḡaukara na heḡereḡere bona unu ha’hine raruosi danu edia ḡaukara na heḡereḡere, to Iesu na e gwa, “ta baine heabi oho, ta baine noho.” (Mataio 24:​40, 41 ba duahidia.) Una murinai ia ese ena hahediba e hamaorodia, eto: “Taunabunai ba gima, badina be emui Lohiabada bainema negana na asi dibamui.” (Mat. 24:42) Iesu ese hereva unuhetomana danu ulato parabolena ai e gwauraia murinai e herevalaia. (Mat. 25:13) Unu hereva be heḡereḡere, a? Oibe. Mai momokanidia ida Dirava e badinaiamu horoa taudia mo Iesu ese baine ‘abidia oho’ guba gavamanina lalonai.—Ioa. 14:3.

¹⁶ Ba hahedinaraia oi na o gimamu. Bema horoa tauna ta na lauma dalanai basine gimamu, ia na e “abidia hidi taudia” ida basie gogodia heboumu. (Mat. 24:31) Ita Dirava ena taunimanima iboudai danu herevana eda helaro na ede kahai, namona na Iesu ena hahediba herevana ba gima bona bavabidadama, na baita badinaia.

17. Dahaka dainai Iehova ese horoa taudia haida e abidia hidimu negana na basita lalohekwarahilaia?

¹⁷ Ita na mai dibada Iehova dainai ta abia daemu Ia e karamu ḡaudia iboudiai na mamaoro. Una ese e durudamu basita lalohekwarahi bema vanegai laḡani lalodiai ia ese horoa taudia haida e abidia hidi. c Mani vine imeana haheitalaina ai, Iesu ese hora tamona lalonai e ḡaukara taudia e herevalaidia dalana aita laloa. (Mat. 20:​1-16) Idia na adorahi ai e boiridia vine imeana ai bae ḡaukara, to davadia e heni neganai dina ibounai e ḡaukara taudia davadia ida e haheḡereḡeredia. Una heḡereḡerena, ena be horoa taudia e abidia hidi negadia na idauidau, to ahudia na guba ai be abimu bema idia na dounu Dirava be badinaiamu.

HAHEDIBA HEREVADIA BAITA BADINA

18-19. Tame herevalai paraboledia toi amo dahaka ta dibamu?

¹⁸ Ina atikol ai dahaka tame diba? Mamoe bona nani parabolena amo tame diba, namona na tanobada ai bae mauri hanaihanai taudia na Iehova bae abidadama henia bona bae badinaia tarikatarika hari bona hisihisi badana lalonai danu. Una nega ai, Iesu ese Dirava e badinaiamu taudia na be hamaorodiamu bae “mauri hanaihanai.”—Mat. 25:46.

¹⁹ Danu, ita ese parabole rua ai, horoa taudia ese bae badina hahediba herevadia tame  herevalai. Iesu na aonega bona kavakava ulatodia parabolena e gwauraia bona idia faiv ese aonega karana e hahedinaraia. Idia na baine headava tauna e nariava lalonai e heḡaeḡae bona e gima. To kavakava ulatodia na se heḡaeḡae. Una dainai baine headava tauna ese idia na se abidia dae. Ita danu namona na baita heḡaeḡae, ena be ede daudauna Iesu baita naria, ina nega dokona baine haorea totona. Bona, Iesu ese e gwauraia talent parabolena lalonai ta itaia hesiai taudia rarua na e ḡaukara goada. Oibe, idia na e ḡaukara goada dainai biagudia ese e lalonamo henidia. To, e lahedo hesiai tauna be e dadaraia. Dahaka ta dibamu? Namona na Iehova ena hesiai ḡaukara baita goadalai ela bona dokona. Tame herevalaia ḡauna ginigabena be, edena dala ai horoa taudia na bae gima, unu amo Iesu ese baine ‘abidia oho’ guba ai ahudia bae abi totona. Idia na guba ai Iesu ida ‘bae hebou’ negana e nariamu, mai moaledia ida. Aramagedono tuarina murinai, idia na Iesu, Mamoe Natuna, adavana ai be laomu dainai una headava lalonai be vareaimu.—2 Tes. 2:1; Apok. 19:9.

20. Iehova be ena hahediba herevadia e badinamu taudia daidiai dahaka be karamu?

²⁰ Iesu ese tanobada taudia baine hahemaoro henidia negana na e kahikahimu, to ita na basita gari. Bema ita na Tamada lalokauna baita badinaiamu, ia ese “siahu herea-daena” be henidamu, unu amo “Taunimanima Natuna vairanai” baita gini. (2 Kor. 4:7; Luka 21:36) Ena be eda helaro na guba ai eiava tanobada ai, to Tamada na baita hamoaleamu, bema Iesu ese e gwaurai paraboledia amo tame diba hahediba herevadia baita badinamu. Iehova ena hebogahisi hereadaena dainai, ladada na mauri ‘bukana ai bae toredia.’—Dan. 12:1; Apok. 3:5.