Lau na laḡani 1983 ai na vara. Lau maraḡigu ai egu helt na namo, to laḡanigu 10 neganai, hisi ta na mamia matama. Bena laḡani rua heḡereḡerena murinai, daba ta ai na noga neganai lau na asina marereva. Ena be na hekwarahiva aegu baina hamareredia, to asi goadadia. Una nega amo lau na asina rakava. Una gorere ese egu tubu dalana na e hadikaia. Hari, lau toagu na natu maraḡina ta bamona.

Una gorere dainai hua haida lalonai lau na rumai mo na nohova, una neganai Iehova ena Witnes rua ese e vadivadigu. Nega momo vadivadi taudia e maiva neganai na komuva, to una negai unu hahine ese e hereva henigu. Idia ese Paradaiso e herevalaia neganai, lau laḡanigu faiv ai na kamonai herevana na laloatao. Una negai, Suriname ai e nohova misinari ta ladana Jethro, na hua ta lalonai nega tamona e maiva hanuai e vadivadiva, bona lau tamagu ida Baibul e stadilaiava. Jethro ese lau na e kara namo heniguva dainai na ura heniava. Danu emai hanua ai, Witnes taudia edia hebou e heabiava neganai, nega haida tubugu ida a laova. Una dainai, Florence, una dina ai lau e vadivadigu hahinena ese e nanadaigu na uramu baina stadi neganai, lau na na gwa oibe.

Florence na adavana Justus ida ma e lou ema, bena Baibul stadi a hamatamaia. Idia na e diba lau na asi duahiduahi dibagu neganai, duahiduahi e hadibagu. Bena gabeai sibogu vada na duahiduahiva. Nega ta, tadikaka bona adavana ese e hamaorogu idia na e siaidia Suriname ai ma bae haroro. Madi, una negai Orealla ai na ta lasi egu Baibul stadi baine karaia totona. To na moale, badina Iehova ese lau na se lalogu boio.

Se daudau, painia tadikakana ta ladana Floyd na ema Orealla, bona ruma-ta-ruma-ta haroro ḡaukara e karaiava lalonai a hedavari. Baibul stadi herevana e kara neganai, lau na na kiri. Ia ese e nanadaigu, “Dahaka dainai o kirimu?” Na hamaoroa lau ese Dirava be E Uramu Dahaka Baita Kara? buklet na stadilaia ore, bona Diba ese Mauri Dekenai Ita Ia Hakaua Lao * bukana ai stadi na hamatamaia. Egu stadi e doko badina na ia enai na herevalaia. Floyd ida Diba bukana ibounai a stadilaia ore, to ia danu ma e siaia gabu ma ta ai baine ha haroro. Una negai, ta na lasi egu stadi baine karaia totona.

 To laḡani 2004 ai, spesol painia rua, Granville bona Joshua, na e siaidia Orealla ai bae haroro. Ruma-ta-ruma-ta ai e harorova lalonai a hedavari. Idia ese e nanadaigu lau na uramu baina stadi neganai, lau na na kiri. Lau ese na noidia Diba bukana ibounai ma baia stadilaia lou. Lau na ura baina diba bema idia ese be hahedibalaimu herevadia na egu stadi e naria taudia ginigunadia ese e hadibagu ḡaudia heḡereḡeredia. Granville ese e hamaorogu hebou na emai hanua ai e heabiva. Ena be laḡani 10 bamona ruma ai mo na nohova, to na ura baina hebou. Una dainai Granville na ema egu ruma, wilsea ai e atogu bena ala Kingdom Hall.

Gabeai, Granville ese e hagoadagu Tiokratik Haroro Sikulina ai baina vareai. Ia eto: “Ena be oi na diseibol, to oi na o herevamu. Nega ta oi ese pablik tok ta bo henimu. Una na be vara momokanimu.” Iena hereva ese lau na e hagoadagu bada.

Granville ida haroro ḡaukara na karaia matama. To, hanua daladia na didika dainai wilsea amo baina hanai na auka. Una dainai, Granville na noia wilbaro ai baine udagu, unu amo baine pusigu diba. Unu a kara toma. Lau na April 2005 ai na bapatiso. Se daudau, tadikaka ta ese treinini e henigu kongrigeisin ena literature bona Kingdom Hall ena saun baina naridia totona.

Madi laḡani 2007 ai, lau tamagu na bouti aksiden ai e mase. Emai famili na e lalohisihisi bada. Granville na ai daimai ai e ḡuriḡuriva bona Baibel amo hahegoada herevadia e gwauraiva. Laḡani rua muridiai, lalohisihisi ḡauna ma ta e vara​—Granville danu bouti aksiden ai e mase.

Emai kongrigeisin maraḡina ai elda na lasi, to hesiai tauna tamona mo. Lau turagu namona Granville e mase neganai, na lalohisihisi bada. Ia na nega iboudiai lau e duruguva Iehova turanai bainala, bona tauanina dalanai e duruguva. Ia e mase bona dina haida muridiai, lau na e abigu hidi Gima Kohorona Stadi ai baina duahiduahi. Paragraf rua na duahi, to una murinai na tai dikadika. Bena platfom amo na diho.

Kongrigeisin ma ta amo tadikaka haida ema Orealla ai bae durumai neganai, egu hemami na e namo. Danu, brens ofes ese spesol painia tadikaka ta ladana, Kojo e siaia. Egu moale ḡauna ma ta na, lau sinagu bona tadigu merona danu stadi e abi, bena e bapatiso. Bena March 2015 ai, lau na e abigu hidi hesiai tauna ai nala. Se daudau, egu pablik tok ginigunana na heni. Una dina ai, na kiri bona na tai, badina laḡani haida gunanai Granville ese e hamaorogu herevana na laloa lou, eto: “Nega ta oi ese pablik tok ta bo henimu. Una na be vara momokanimu.”

JW Broadcasting^® program amo, na diba tadikaka bona taihu haida edia hekwakwanai danu lau egu bamona. Ena be mai edia gorere, to idia na ḡau momo e karamu bona e moalemu. Lau danu ḡau haida baina kara diba. Egu ura badana na, mai egu goada ibounai ida Iehova baina hesiai henia, una dainai regula painia ai nala. Bona September 2019 ai sivarai namona ta na abia! Una hua lalonai, lau na e abigu hidi elda ta ai nala, bona emai kongrigeisin ai pablisa iboudiai na 40 heḡereḡerena.

Lau na na moalemu badina lau e stadi henigu tadikaka bona taihu ese e durugu Iehova baina hesiai henia totona. To, Iehova na tenkiu heniamu badina lau na se lalogu boio.