1. Ede ta diba tomamu taunimanima hahediba ai baita halaodia ḡaukarana na hahemauri ḡaukarana?

TAUNIMANIMA hahediba ai baita halaodia ḡaukarana na hahemauri ḡaukarana! Ede ta diba tomamu? Iesu ena haheḡani, Mataio 28:19, 20 ai, eto: “Baola, . . . hahediba ai ba halaodia, bona . . . ba ha bapatisodia.” Dahaka dainai bapatiso na ḡau badana? Badina bema ta e uramu baine mauri, namona na baine bapatiso. Namona na ia ese baine abia dae ia baine mauri hanaihanai badina tamona binai: Iesu na ita daidai e mase bona e tore isi lou. Una dainai, aposetolo Petro ese Kristen taudia e hamaorodia: “Bapatiso, harihari umui eme hamaurimui, . . . Iesu Keriso mase amo e tore isi lou dainai.” (1 Pet. 3:21) Una dainai, hahediba tauna matamatana ta e bapatisomu neganai, ia na mai ena helaro baine mauri hanaihanai totona.

2. Hari 2 Timoteo 4:1, 2 heḡereḡerena, teacher be dahaka bae karaia na namo?

² Taunimanima na hahediba ai baita halaodia totona, namona na iseda hahediba daladia baita hanamo. (2 Timoteo 4:1, 2 ba duahi.) Dahaka dainai? Badina Iesu ese ita e haḡanida, eto: “Baola, . . . hahediba ai ba halaodia. . . . Ba hadibadia danu.” Paulo eto, una ḡaukara ai “ba badina tarika-tarika. Unu ba kara toma, bena sibomu ba hahemauri, bona bae kamonai henimu taudia danu ba hamauridia.” Una dainai, Paulo eto: “Sibomu nahuamu ba tohoa, bona emu hahediba herevadia nahuadia ba toho.” (1 Tim. 4:16) Momokani, hahediba ḡaukarana lalonai, ita na ta uramu eda hahediba dalana baita hanamoa.

3. Ina atikol ai, ita be dahaka baita herevalaiamu?

³ Nega iboudiai, ita ese Baibul ai hereva momokani na taunimanima milion momo ta hadibalaidiamu. Vanegai stadi ai ta itaia, ita na ta uramu baita diba edena dala ai taunimanima momo herea baita durudia bae bapatiso, bena Iesu Keriso ena hahediba ai baela. Ina  atikol ai baita itaiamu, ededia dala ma 5 amo teacher ese stiuden baine durua ela bona baine bapatiso.

4. Teacher ese Baibul stadi ta e hakauamu neganai, dahaka dainai basine hereva momo be namo? (Mani futnout ba itaia danu.)

⁴ Ita ese Baibul amo taunimanima ta hadibadiamu herevadia na ta ura henidiamu. Una dainai, reana ta uramu unu na baita herevalaidia momo. To, Gima Kohorona Stadi, Kongrigeisin Baibul Stadi, o ruma ai stiuden ta ena stadi ta karaiamu neganai, asita uramu teacher o conductor na baine hereva momo. Herevana teacher e uramu ena hahediba lalonai Baibul baine ḡaukaralaia namonamo, to dia namo ia mo baine hereva, bona ena be ia na Baibul siri ta o topik ta mai dibana namonamo, to dia namo ia ese ḡau iboudiai baine herevalaidia toho. * (Ioa. 16:12) Oi ese bapatiso neganai bona hari ina negai Baibul amo o abia dibana mani a haheḡereḡerea. Reana emu bapatiso neganai, oi na Baibul ena hereva badadia mo o lalopararalaidia. (Heb. 6:1) Bema laḡani momo lalodiai ema bona hari Baibul ome dibaia namonamo, vada dia namo ḡau iboudiai na nega tamona emu stiuden ba hadibalaia.

5. (a) 1 Tesalonika 2:13 heḡereḡerena, ita be ta uramu stiuden ese stadi amo dahaka baine dibaia? (b) Edena dalai stiuden ba hagoadaia diba ia e dibamu ḡaudia baine herevalaidia?

⁵ Ita na ta uramu stiuden ese baine itaia ia ese e dibamu ḡaudia na dia eda hereva, a Dirava ena Hereva. (1 Tesalonika 2:13 ba duahia.) Una be ede baita karaia toma? Stiuden ba hagoadaia ia e dibamu ḡaudia baine herevalaidia. Ia ba noia Baibul siri haida anidia na ia ese baine herevalai, a dia namo nega iboudiai oi ese ba herevalaidia. Ia ba durua Dirava ena Hereva ese ia e duruamu dalana na baine itaia. Reana henanadai haida ba henia, unu amo ia ese e duahimu siri anidia baine herevalaidia. (Luka 10:25-28) Heḡereḡere, oi ese ia ba nanadaia: “Edena dalai ina siri amo Iehova ena kara namona ta o itaiamu?” “Hari, Baibul amo ome dibaia ḡaudia ese oi be ede be durumu tomamu?” “Hari oi ese ome dibaia ḡauna be ede o laloa tomamu?” (Her. 20:5) Ḡau badana na stiuden ese e dibamu ḡaudia na baine ura henidia bona baine badinadia.

6. Baibul stadi e kara namonamomu teacher ese baine bamomu ena namo be dahaka?

⁶ Baibul stadi e kara namonamomu pablisa o teacher ese nega haida oi e bamomu danu, a? Reana ba nanadaia baoto, ‘Oi be dahaka o  laloamu, stadi be name hakaua namonamo, o lau ese Baibul be ede name ḡaukaralaia toma?’ Namona na ba manau bema o uramu emu hahediba dalana ba hanamoa. (Aposetolo Edia Kara 18:24-26 ba haheḡereḡerea.) Gabeai, una teacher ma ba nanadaia baoto, ‘Oi be dahaka o laloamu, stiuden ese hereva momokani be eme lalopararalaia o lasi?’ Eiava una teacher ba noia, una stadi baine hakaua bema oi na wiki tamona o haida basio nohomu. Unu amo stiuden ese stadi basine reaia, bona ia na baine laloparara stadi na ḡau badana. Basioto ia na “oiemu” stadi dainai, ma ta ese basine karaia. Ḡau badana binai: Oi na o uramu stiuden ba durua namonamo, unu amo ia ese hereva momokani baine stadilaia hanaihanai.

7. Edena dalai stiuden ba durua ena stadi baine moalelaia totona?

⁷ Namona na stiuden ese matanai baine itaia bona taiana ai baine kamonaia ḡauna binai: Oi na mai emu abidadama bona ura ida Baibul o hahedibalaiamu. (1 Tes. 1:5) Bena ia ese ena stadi na be moalelaiamu. Reana Baibul ese oi e durumu sivaraina ta ba herevalaia. Bona ia ese be itaiamu danu Baibul ena sisiba namodia ese ia na baine durua diba.

8. Edena dala ma haida ai stiuden ba durua diba, bona dahaka dainai?

⁸ Baibul stadi lalonai pablisa haida edia ekspiriens na stiuden ba hamaorolaia​—reana ia ese e davarimu hekwakwanai na pablisa ese danu e davari to e hanaidia. Eiava pablisa ta na stadi lalonai baine helai vareai, badina reana ena kara namona ese stiuden baine durua diba. Eiava jw.org ai stiuden baine durua ekspiriens haida ba tahu, heḡereḡere “The Bible Changes Lives.” * Unu atikol bona vidio amo, stiuden ese baine itaia dahaka dainai ia ese Baibul ena sisiba baine badinadia na maoro.

9. Edena dalai stiuden ba hagoadaia ia e dibamu ḡaudia na ena ruma bese bona turana baine hadibalaidia danu?

⁹ Bema stiuden e headava, ia adavana danu e stadimu, a? Reana ia adavana ba noia stadi lalonai baine helai vareai. Emu stiuden ba hagoadaia, ia e dibamu ḡaudia na ena ruma bese bona turana baine hadibalaidia danu. (Ioa. 1:40-45) Edena dalai? Reana ba nanadaia: “Oi ese ina point anina be ede bo herevalaia tomamu emu  ruma taudia ediai?” o “Oi ese edena siri amo ina point bo hamomokaniamu turamu enai?” Unu amo oi ese stiuden o hadibaiamu, teacher ai bainela totona. Bena ia na unbaptize publisher ai bainela neganai, kongrigeisin ida haroro ḡaukara baine karaia matama diba. Reana oi ese stiuden ba nanadaia, baoto ‘Oi mai dibamu daika danu e uramu Baibul stadi baine abia?’ Bema ia ese kamonai tauna ta ladana baine gwauraia, maoromaoro una tau dekena baola bona ba nanadaia ia e uramu ba stadi henia eiava. Bona vidio ta ba hahedinaraia, heḡereḡere Baibul Stadi ai be Dahaka E Karamu? *

10. Ina 1 Tesalonika 2:7, 8 heḡereḡerena, edena dalai teacher ese Paulo baine tohotohoa diba?

¹⁰ Namona na teacher ese stiuden baine lalokau henidia. Reana gabeai idia na kongrigeisin tadikaka o taihu ai be laomu. (1 Tesalonika 2:7, 8 ba duahi.) Vaia idia ese tanobada turadia bae rakatanidia bona Iehova ihesiai henina totona senisi bae kara na mai hekwarahina. Namona na baita durudia kongrigeisin ai turadia bae davaridia totona. Bona oi ese stiuden ba bamoa, dia Baibul stadi negadiai mo, to nega idauidau ai danu. Oi ese stiuden ba laloa bada daladia haida bini: Fon amo ba rini henia, teks mesij ta ba siaia, o nega haida ba vadivadia.

11. Ita ta uramu stiuden ese kongrigeisin ai dahaka baine davari, bona dahaka dainai?

¹¹ Haida na ini e gwau tomamu: “Namona na hanua taudia ese beibi ta bae durua ela bona baine bada.” A ita be baitato: “Namona na kongrigeisin taudia ese ta bae durua ela bona pablisa ai bainela.” Una dainai, teacher namodia ese edia stiuden e durudiamu pablisa ma haida e dibadiamu neganai, pablisa ese danu stiuden bae durudia diba Dirava turana ai baela totona. Bena stiuden ese Dirava ena taunimanima baine bamodia neganai, idia ese dala idauidau ai ia bae durua diba. Ita na ta uramu stiuden ese baine itaia ia na kongrigeisin tauna ta bona eda tadikaka ta. Ita na ta uramu ia na iseda Kristen oreana lalonai baine vareai. Bena ia ese kavakava taudia edia hebamo na be dadaraidia haraḡamu, badina idia ese asie duruamu Iehova baine lalokau henia totona. (Her. 13:20) Bema turana gunadia ese ia be dadaraiamu, ia dibana Iehova ena orea ai ia ese turana korikoridia baine davaridia diba.​—Mar. 10:29, 30; 1 Pet. 4:4.

12. Dahaka dainai nega iboudiai eda stiuden enai gwauhamata bona bapatiso baita herevalai na namo?

¹² Namona na nega iboudiai gwauhamata bona bapatiso ba herevalai. Ita ese Baibul stadi ta karaiamu badina binai: Stiuden baita durua Iehova baine hesiai henia bona baine bapatiso. Hua haida lalodiai baine stadi bona hebou bainema matama murinai, namona na ia ese baine lalopararalaia ḡauna binai: Ia na e uramu Baibul stadi ese baine durua ela bona Iehova ena Witnes ta ai bainela.

13. Stiuden be ededia step idauidau baine haḡuḡuru ela bona baine bapatiso?

¹³ Step-by-step o taina ruana stiuden baita durua ela bona baine bapatiso. Step ginigunana: Stiuden na Iehova baine dibaia, baine lalokau henia, bona baine abidadama henia. (Ioa. 3:16; 17:3) Step iharuana: Stiuden na Iehova bona kongrigeisin taudia baine bamodia. (Heb. 10:24, 25; Iak. 4:8) Step ihatoina: Stiuden ese e manadalai kara dikadia baine rakatanidia bena baine helalo-kerehai. (Apos. 3:19) Step ihahanina: Stiuden ese ma haida baine haroro henidia. (2 Kor. 4:13) Step ihaimana: Stiuden ese ḡuriḡuri amo ena mauri na Iehova enai baine gwauhamatalaia murinai, ia na baine bapatiso. (1 Pet. 3:21; 4:2) Bona una negai iboudiai na be moale dikadikamu! Stiuden ese unu step ta ta e haḡuḡurumu neganai, namona na ba hanamoa o ba tenkiu henia bona ba hagoadaia basine hesiku ela bona baine bapatiso.

14. Edena dalai teacher ese stiuden ena goada baine sekea diba?

¹⁴ Stiuden ta duruamu baine goada ela bona baine bapatiso totona, namona na baita haheauka. To nega haida ita ta uramu baita tahua ḡauna ta bina: Ia e uramu Iehova Dirava baine hesiai henia o lasi. Oi ese o itaiamu stiuden be e uramu Iesu ena haheḡani iboudiai baine badinadia, a? Eiava ia be e uramu Baibul amo ḡau haida mo baine diba, a?

15. Teacher ese stiuden enai dahaka ḡau haida baine seke be namo?

¹⁵ Hanaihanai stiuden ena goada ba sekea. Heḡereḡere, ena hereva amo o dibamu ia na Iehova e lalokau heniamu, a? Ia ese Iehova e ḡuriḡuri heniamu, a? (Sal. 116:1, 2) Ia be mai moalena ida Baibul e duahiamu, a? Ia be hanaihanai hebou e laomu, a? (Sal. 22:22) Ia ese ena mauri dalana e haidaua, a? (Sal. 119:112) Ia e dibamu ḡaudia be ena ruma taudia bona turana ediai e herevalaimu, a? (Sal. 9:1) Ḡau badana binai, ia be e uramu  Iehova ena Witnes ta ai bainela, a? (Sal. 40:8) Bema stiuden na ḡau ta se karaiamu, namona na hemataurai dalanai badina ba tahua, bena ba sisiba henia bona ba durua. *

16. Edena negai oi ese Baibul stadi ta ba koua diba?

¹⁶ Nega ta ta ai, oi sibomu ini ba henanadai toma: ‘Lau ese stiuden ena stadi baina karaia noho o lasi? Ia ese ena stadi bukana e heḡaeḡaelaiamu o lasi? Ia be e uramu baine hebou o lasi? Ia ese bad habits o kara dika be de rakatani o lasi? Ia be tomadiho koikoi ena memba amo de hekoki o lasi?’ Bema haere na ‘lasi,’ oi ese ia o stadi heniamu na vaitani tau ta nahu dalana o hadibaiamu to ia na se uramu baine paripari! Bema stiuden ese e stadilaimu ḡaudia se lalo badamu bona se uramu senisi haida baine kara, oi ese iena stadi ba karaia noho na asi anina, ani?

17. Ita ese 1 Timoteo 4:16 ai tame duahia, Baibul teacher iboudiai ese dahaka bae karaia be namo?

¹⁷ Taunimanima na hahediba baita halaodia na iseda maduna dainai baita haḡuḡurua na ḡau badana, bona ita na ta uramu stiuden baita durua baine goada ela bona baine bapatiso. Una dainai, iseda hahediba lalonai Baibul baita ḡaukaralaia bona mai abidadama bona ura ida stiuden baita hadibaia. Ia baita hagoadaia kongrigeisin taudia baine bamodia. Bona ita na ta uramu nega iboudiai gwauhamata bona bapatiso baita herevalai, nega ta ta ai stiuden ena goada baita sekea. (Rau 13 ai maua ladana,  “Teacher be Dahaka Baine Kara Stiuden Baine Durua ela Bona Baine Bapatiso?” ba itaia.) Ita na ta moalemu badina be ina hahemauri ḡaukarana ta duruamu! Namona na mai laloda idoinai ida Baibul stiuden baita durudia bae goada ela bona bae bapatiso.