1. Edena dalai 2 Korinto 3:1-3 ese e hahedinaraiamu, ita ese pablisa ta baita durua ela bona baine bapatiso na hahenamo badana? (Rau 1 laulauna ba itaia.)

KONGRIGEISEN ai Baibul stiuden ta e bapatisomu neganai, emu hemami be ede heto? Reana oi na o moalemu, ani? (Mat. 28:19) To bema oi ese o stadi heniamu pablisa e bapatisomu, oi na o moale dikadikamu, ani? (1 Tes. 2:19, 20) Oibe, kongrigeisin bona Baibul stiuden edia teacher ediai, unu e bapatisomu taudia na “hahenamo revarevadia” na heto.​—2 Korinto 3:1-3 ba duahi.

2. (a) Edena henanadai badana baita laloa be namo, bona dahaka dainai? (b) Baibul stadi ta anina be dahaka? (Futnout ba itaia.)

² Ita na ta moalemu badina laḡani 4 lalodiai, tanobada heḡeḡemadai, hua ta ta ai, tadikaka ese Baibul stadi * iboudiai 10,000,000 e repotilai. Anina na, unu laḡani ta ta ai, taunimanima 280,000 e bapatiso, unu amo Iehova ena Witnes bona Iesu Keriso ena hahediba taudia matamatadia ai ela. Ededia dalai ma Baibul stiuden milion momo baita durudia bae bapatiso totona? Iehova na e haheaukamu o nega doini e henimu taunimanima na iena Witnes taudia ai baela totona, una dainai baita hekwarahi idia baita durudia haraḡa  ela bona bae goada bona bae bapatiso. Badina be, nega na vada lasi!​—1 Kor. 7:29a; 1 Pet. 4:7.

3. Ina atikol ai Baibul stadi ikaradia dalana be ede be herevalaia tomamu?

³ Hari ina negai, taunimanima na hahediba ai baita halaodia haraḡa totona, Gavanin Bodi ese brens ofesi ta ta e noidia survey ta bae karaia, heḡereḡere edena dalai Baibul stiuden momo baita durudia bae goada ela bona bae bapatiso. Una dainai, ina atikol bona atikol 42 ai baita itaiamu, edena dalai tano idauidau ai painia taudia, misinari taudia, o seket taudia edia ekspiriens ese ita bae duruda diba. * (Her. 11:14; 15:22) Idia ese be hahedinaraiamu Baibul teacher bona edia stiuden be dahaka bae kara, unu amo Baibul stadi baine heau namonamo. Ina atikol ai baita itaiamu, ededia dala 5 amo stiuden ta ta baita durua baine goada ela bona baine bapatiso.

4. Ruma murimurinai Baibul stadi baita karaia ena namo bona dika be dahaka?

⁴ Pablisa momo na kamonai tauna ena ruma murimurinai e ginimu bena Baibul stadi e karamu. Ena be ina na dala namona ta, to nega momo herevahereva inihetomadia na kwadoḡi o wiki haida ai mo bo karaiamu. Pablisa haida be kamonai tauna ena fon namba e abiamu, unu amo fon o teks mesij amo Baibul e herevalaiamu. Dala inihetomadia na reana hua momo lalodiai ba karaia hanaihanai diba, to reana stadi na basine heau namonamomu. Bema stiuden ta ese ena nega bona goada ibounai na Baibul stadi ai basine ḡaukaralaia, o laloamu ia baine goada ela bona baine gwauhamata bona baine bapatiso, a? Reana lasi.

5. Luka 14:28-33 ai tame duahia, Iesu be e uramu Baibul stiuden be ede baita durua toma?

⁵ Iesu ese haheitalai ta amo e hahedinaraia, tau ta be dahaka baine kara bema ia na e uramu Iesu ena hahediba ai bainela. Iesu eto, kapenta be e ura kohoro ta baine haginia, bona king ta be e ura bainela tuari. Iesu eto, namona na kapenta na baine “helai diho guna” bona ‘davana baine laloa,’ unu amo baine itaia kohoro baine haḡuḡurua diba eiava, bona danu, king na baine “helai diho guna” bona ma haida edia lalohadai baine tahua guna, unu amo baine itaia ena tuari taudia be heḡereḡeremu inaidia bae hadareredia totona eiava. (Luka 14:28-33 ba duahi.) Una heḡereḡerena, Iesu dibana bema tau ta e uramu hahediba ai bainela, namona  na baine helai diho bona ḡau iboudiai baine lalohadailaidia namonamo guna, unu amo baine itaia ia heḡereḡere Iesu murinai baine raka eiava. Baibul stiuden baita hagoadadia wiki ta ta ai baita stadi henidia na namo. Una be ede baita karaia toma?

6. Baibul stiuden baita durua daladia namodia haida be dahaka?

⁶ Dala ta be, ruma murimurinai o karaiamu Baibul stadi negana na taina ruana ba halataia. Eiava oi emu vadivadi negadia ta ta ai Baibul siri ma haida ba herevalai hebou. Ruma tauna ese vadivadi unuhetomana e manadalaiamu neganai, ba noia bema gabu ta ai ba helai bena Baibul ba herevalaia hebou. Ruma tauna ena haere amo bo dibamu ia ese Baibul stadi e laloa badamu eiava lasi. Bona oi na o uramu stiuden ba durua haraḡa dainai, ba nanadaia ia e uramu wiki ta ta ai stadi be nega rua ba karaia eiava. To, dahaka ma ba kara be namo?

7. Teacher ta be ede baine heḡaeḡae namonamo toma be namo?

⁷ Teacher e, namona na ba heḡaeḡae namonamo muridiai stadi ba karaia. Heḡereḡere, stadi bukana ba duahia bona siri ba itadia. Point badadia anidia ba dibadia. Stadi ena hereva kwarana, sinado maraḡidia, henanadai, “ba duahi” siri iboudiai, laulau, bona vidio idauidau ba itadia. Bena stiuden ba hadibaia dalana ba lalohadailaia loulou, unu amo stadi ba karaia neganai, ia ese stadi anina baine lalopararalaia bona baine badinadia na dia auka.​—Neh. 8:8; Her. 15:28a.

8. Kolose 1:9, 10 ai, Baibul stiuden totona baita ḡuriḡuri dalana be Paulo ese ede e herevalaia toma?

⁸ Emu heḡaeḡae lalonai Iehova o guriguri heniamu neganai, namona na stiuden ladana bona ena dabu gaudia ba gwaurai hedinarai. Iehova ba noia oi baine durumu Baibul amo stiuden ba hadibaia namonamo totona. (Kolose 1:9, 10 ba duahi.) Bona namona na ba diba stiuden be edena hereva be lalopararalaimu o basine abi daemu. Ba laloatao, oi na o uramu stiuden ba durua haraḡa baine goada ela bona baine bapatiso.

9. Edena dalai teacher ese stiuden baine durua ena stadi totona baine heḡaeḡae? Ba herevalaia.

⁹ Ita na ta uramu Baibul stadi baita karaia hanaihanai, unu amo stiuden ese Iehova bona Iesu e kara ḡaudia iboudiai baine moalelaidia, bena baine ura ena diba  ma baine habadaia. (Mat. 5:3, 6) To, namona na stiuden ese danu e dibamu ḡaudia na baine lalodia bada. Ia ba hadibaia dahaka dainai stadi baine heḡaeḡaelaia be namo, heḡereḡere stadi negana e kahikahimu neganai, paragraf iboudiai baine duahi, bona baine diba ḡaudia ibadinadia daladia baine lalohadailaidia loulou. Teacher be dahaka ma baina kara diba? Oi na stiuden ida ba helai hebou, stadi ta baine heḡaeḡaelaia dalana ba hadibaia. * Reana ia ba hadibaia edena dalai stadi ena henanadai baine davaria, bona baine lalotao herevadia haida na peni amo baine underline o baine maka. Bena oi ese ba noia haere na buka ai basine duahia, to sibona ena hereva dalana amo baine haere. Unu amo bo dibamu stiuden ese stadi e lalopararalaiamu o lasi. To edena dala ma ta ai emu stiuden ba durua diba?

10. Dahaka dainai stiuden ese dina ta ta ai Baibul baine duahia na ḡau badana? Bona oi ese stiuden ba hagoadaia ma dahaka baine karaia be namo?

¹⁰ Ena be wiki ta ta ai teacher ese stiuden be stadi heniamu, to danu, namona na dina ta ta ai stiuden na ḡau haida na sibona ese baine kara. Heḡereḡere, Iehova ida baine herevahereva hebou be namo. Edena dalai? Ia ese Iehova baine kamonai henia bona baine ḡuriḡuri henia. Ia ese Dirava baine kamonai henia diba dalana binai: Dina ta ta ai Baibul baine duahia. (Ios. 1:8; Sal. 1:1-3) Namona na jw.org ai “Bible Reading Schedule” iḡaukaralaina dalana ba hadibalaia. * Bona stiuden ba hagoadaia ena duahiduahi ai Baibul ese Iehova e herevalaiamu dalana bona ia ese e dibadiamu ḡaudia baine badina daladia na baine lalohadailaidia loulou.​—Apos. 17:11; Iak. 1:25.

11. Stiuden ta baine ḡuriḡuri dalana maorona be ede baine dibaia toma? Bona dahaka dainai ia ese Iehova baine ḡuriḡuri henia hanaihanai na ḡau badana?

¹¹ Oi ese stiuden ba hagoadaia Iehova ida baine herevahereva hebou dalana ma ta binai: Dina ta ta ai baine ḡuriḡuri. Stadi matamadiai bona dokodiai, namona na mai lalomu idoinai ida ba ḡuriḡuri, bona emu ḡuriḡuri ai stiuden ladana ba gwauraia danu. Ia na emu ḡuriḡuri ikamonaina amo be dibamu edena dalai Iesu Keriso ladanai Iehova Dirava baine ḡuriḡuri henia. (Mat. 6:9; Ioa. 15:16)  Mani ina a laloa: Dina ta ta ai Baibul iduahina (Iehova ikamonai henina) bona ḡuriḡuri (Iehova ihereva henina) ese stiuden be duruamu Dirava be raka henia kahimu totona! (Iak. 4:8) Bema stiuden na hanaihanai unu be kara tomamu, una ese baine durua dahaka ma baine kara totona?

12. Edena dalai teacher ese stiuden baine durua Iehova baine lalokau henia totona?

¹² Ita na ta uramu stiuden ese Iehova baine dibaia. To namona na ia e dibamu ḡaudia ese ia lalona bae doria bena baine badinadia. Iesu ena hahediba dalana na unuheto. Una dainai, taunimanima na ia murina amo e loava. (Luka 24:15, 27, 32) Namona na stiuden ese baine itaia Iehova na e maurimu, lalokau Tauna, ia Tamana, ena Dirava, bona Turana. (Sal. 25:4, 5) Baibul stadi lalodiai, stiuden ese Dirava ena kara namodia baine diba be namo. (Eso. 34:5, 6; 1 Pet. 5:6, 7) Hanaihanai ba hahedinaraia Iehova be daika, herevana edena topik o herevalaiamu. Stiuden ba durua Iehova ena kara namodia baine diba heḡereḡere lalokau, kara namo, bona hebogahisi. Iesu eto, “haheḡani gini-gunana bona hereana” be ina: Iehova “emu Dirava ba lalokau henia.” (Mat. 22:37, 38) Oibe, emu stiuden ba durua namonamo ela bona Iehova baine lalokau henia.

13. Edena dalai oi ese stiuden ba durua Iehova ena kara namodia baine dibadia totona?

¹³ Stiuden ba hadibaia dahaka dainai oi ese Iehova o lalokau heniamu. Reana unu amo ia na be itaiamu ia ese danu Iehova baine lalokau henia na namo. (Sal. 73:28) Heḡereḡere, edena stadi bukana ena hereva ta o siri ta ese Iehova ena lalokau, aonega, kara maoromaoro o siahu e herevalaiamu bona oi e hagoadaiamu? Una na ba gwauraia hedinarai stiuden enai, bona ba hadibaia oi ese Dirava o lalokau heniamu badina ta be una. To, stiuden baine goada bona baine bapatiso totona, dahaka ma baine karaia be namo?

14. Heberu 10:24, 25 ai tame duahia, kongrigeisin heboudia ese stiuden be ede be durua tomamu?

¹⁴ Ita na ta uramu iseda stiuden baita durua ela bona baine bapatiso. Ita ese ia baita durua dalana badana ta binai: Stiuden baita durua kongrigeisin heboudia bainela. Teacher momo e gwaumu, matamana  amo hebou e laomu stiuden na e goada haraḡamu. (Sal. 111:1) Teacher haida ese edia stiuden na ini e hamaorodia tomamu, ‘Baibul edukeisin ai be ḡau haida mo bo dibamu, to hebou ai be ḡau momo bo dibamu.’ Reana Heberu 10:24, 25 ba duahi emu stiuden ida, bena ba hadibaia dahaka dainai hebou bainela be namo. Vidio ladana Kingdom Hall ai be Dahaka E Karamu? * ba hahedinaraia. Emu stiuden ba durua wiki ta ta ai hebou bainela na ḡau badana.

15. Ededia dalai stiuden baita durua nega iboudiai hebou bainela totona?

¹⁵ Oi be dahaka ba kara diba bema stiuden na nega ta hebou ta do sela o nega haida mo e heboumu? Reana vanegai hebou ai o dibaia ḡauna ta na stiuden ida ba herevalaia. Sivarai unuhetomadia ese stiuden baine durua, hebou bainela totona. Eiava hebou ai baita stadilaiamu Gima Kohorona eiava Eda Mauri Bona Hesiai Ḡaukara Hebou Pepana ba henia. Bena oi ese ba hadibaia wiki vaira heboudia ai be dahaka bo stadilaimu, bona ba nanadaia ia be edena kaha e ura heniamu. Bona stiuden na ena hebou ginigunana ai be itamu bona be kamonaimu ḡaudia amo dubu ma haida edia idau be itaiamu. (1 Kor. 14:24, 25) Hebou ela taudia edia kara namodia bona hereva namodia ese stiuden be duruamu baine goada ela bona baine bapatiso diba.

16. Edena dalai Baibul stadi baita karaia ela bona stiuden baine bapatiso? Bona wiki vairai be dahaka baita herevalaimu?

¹⁶ Edena dalai Baibul stadi baita karadia ela bona stiuden bae bapatiso? Stiuden ese stadi baine laloa bada totona, ia baita hagoadaia wiki ta ta ai baine stadi bona stadi ta ta baine heḡaeḡaelaia. Danu, ta uramu ia baita hagoadaia dina ta ta ai Iehova baine ḡuriḡuri henia bona Ia turana bainela. Ita na ta uramu stiuden baita hagoadaia kongrigeisin heboudia bainela. (Rau 12 ai maua ladana, “Stiuden be Dahaka Baine Kara Bena Baine Goada ela Bona Baine Bapatiso?” ba itaia.) To, wiki vairai baita itaiamu, ededia dala ma 5 amo teacher ese stiuden baine durua baine ela bona baine bapatiso.