1. Ita iboudai ese edena abi hidi hereadaena baita karaia diba?

NEGA momo, tama o sina ese e karamu abi hidi haida ese natudia e durudiamu o e hadikadiamu. Bema tama o sina ese abi hidi kereredia e karamu, natudia na hekwakwanai bae davari diba. To bema idia ese abi hidi maorodia e karamu, natudia na e moale hanaihanaimu. To, namona na natu ese abi hidi maorodia bae kara danu. Ita iboudai ese baita karaia abi hidi hereadaena be ina: Iehova, Tamada lalokauna, isiaina baita lao heni.​—Sal. 73:28.

2. Iesu, Iosef bona Maria be dahaka abi hidi namodia e kara?

² Iosef bona Maria ese natudia e durudiava Iehova bae hesiai henia totona, bona idia e kara abi hidi ese e hamomokania edia mauri ai Iehova ena hesiai ḡaukara na mai anina bada. (Luka 2:40, 41, 52) Iesu danu abi hidi namodia e kara dainai, ia ese Iehova ena ura e haḡuḡurua. (Mat. 4:1-10) Iesu e bada neganai, ia na hebogahisi tauna, lalokau tauna, bona haheauka tauna ai ela​—Dirava e gari heniamu tama o sina na e moalemu bema natudia na unu heto.

3. Ina atikol ai ededia henanadai baita haerelaimu?

³ Ina atikol ai, baita haerelaimu henanadai toi bini: Iesu totona, Iehova be dahaka abi hidi haida e kara? Iosef bona Maria edia abi hidi amo, Kristen tama o sina be dahaka e dibaiamu? Bona Iesu ena abia hidi amo, Kristen memero kekeni be dahaka e dibamu?

4. Iesu totona, Iehova be dahaka abi hidi badana e karaia?

⁴ Iehova ese tama bona sina maorodia e abidia hidi, bena Iesu e havaraia. (Mat. 1: 18-23; Luka 1:26-38) Baibul ai Maria ena hereva ese e hahedinaraia, ia ese Iehova e lalokau henia badava bona ena Hereva e ura henia badava. (Luka 1:46-55) Bona Iosef ese Iehova ena hereva e badinaia ese e hahedinaraia, ia ese Dirava e gari heniava bona e urava baine hamoalea.​—Mat. 1:24.

5-6. Iehova ese Natuna e rakatania dahaka baine mami totona?

⁵ Mani a laloa, Iehova ese taḡa taudia se abidia hidi, Iesu bae havaraia totona. Iesu e vara murinai, Iosef bona Maria edia boubou ḡauna ese e hahedinaraia, idia na ogoḡami taudia. (Luka 2:24) Iosef na kapenta tauna dainai, reana ia ese ena hanua, Nasaret ai workshop maraḡina ta e haginia. To reana edia moni bona kohu na dia momo, bona ma latanai ena ruma bese na bada badina be natudia iboudiai na 7.​—Mat. 13:55, 56.

⁶ Vaia dika badadia haida lalodiai Iehova ese Iesu na e gimaiava, to hekwakwanai momo lalodiai Dirava ese Iesu na se gimaiava. (Mat. 2:13-15) Heḡereḡere, Iesu varavarana haida ese Iesu na asie abia daeva. Mani a laloa, reana Iesu na e lalohisihisi badina matamanai ena ruma taudia ese asie abia daeva, ia na Mesia. (Mar. 3:21; Ioa. 7:5) Bona reana ia e ubua tauna, Iosef, e mase neganai, Iesu na e lalohisihisi bada herea. Danu Iosef e mase neganai, anina na Iesu na roboa dainai, ia ese tamana gabuna e abia. (Mar. 6:3) Iesu e badava lalonai, ia ese ruma bese inarina dalana e dibaia. Reana Iesu na e ḡaukara goadava moni bona ma ḡau haida baine abi totona. Una dainai, tau ta ese ḡaukara dokonai e abiamu hesiku hemamina na Iesu na mai dibana.

7. (a) Bema headava taudia e uramu natudia bae havara, ededia henanadai ese bae durudia? (b) Hereva Lada-isidia 2:1-6 ai tame duahia, edena dalai tama o sina ese natuna baine training?

⁷ Bema headava taudia e uramu natudia bae havara, namona na sibodia bae henanadai: ‘Ai be Iosef bona Maria a tohotohodiamu, heḡereḡere a manaumu, Iehova a lalokau heniamu, bona ena Hereva a ura heniamu dainai, Dirava ese e abimai hidimu beibi ta baia naria, a?’ (Sal. 127:3, 4) Eiava tama o sina na sibona ini baine henanadai toma: ‘Lau ese natugu na hadibaiamu baine ḡaukara goada totona, a?’ (Koh. 3:12, 13) ‘Satana ena tanobada ai, natugu ese tauanina basine hadikaia bona kara dikana ta basine karaia totona, lau ese natugu be na gimaiamu, a?’ (Her. 22:3) Vaia, hekwakwanai  momo lalodiai natumu na basio gimaia dibamu. Momokani, una na auka. To, hanaihanai mai lalokaumu ida natumu ba durua baine heḡaeḡae, heḡereḡere ba hadibaia edena dalai hekwakwanai lalonai Baibul ena heduru baine tahua. (Hereva Lada-isidia 2:1-6 ba duahi.) Ina haheitalai a laloa: Bema varavaramu ta ese tomadiho koikoi e abia hidimu, namona na Baibul amo natumu ba hadibaia dahaka dainai ia ese Iehova baine badinaia na ḡau badana. (Sal. 31:23) Eiava bema oi ese o lalokau heniamu tauna ta e masemu, namona na Baibul siridia amo natumu ba durua lalohisihisi baine haheaukalaia bona baine lalomaino.​—2 Kor. 1:3, 4; 2 Tim. 3:16.

8. Iosef bona Maria ese Deuteronomi 6:6, 7 ena sisiba be ede e badinaia toma?

⁸ Iosef bona Maria ese Iesu na e durua namonamo, bona ia e bada neganai, ia na Dirava ese e lalonamo henia, badina una tama bona sina ese Iehova ena dala e badinaia. (Deuteronomi 6:6, 7 ba duahi.) Iosef bona Maria ese Iehova na e lalokau henia badava dainai, e urava natudia danu bae durudia Iehova bae lalokau henia totona.

9. Iosef bona Maria be dahaka abi hidi badana e karaia?

⁹ Iosef bona Maria ese e abia hidi ḡauna bina: Nega iboudiai idia bona natudia ese Iehova bae tomadiho henia na namo. Una dainai, wiki ta ta ai, Nasareta ai, idia na dubu o synagogue ai e ha hebouva, bona Pasova totona, laḡani ta ta ai, idia na Ierusalem e laova. (Luka 2:41; 4:16) Reana Ierusalem e laova bona e louva negadiai, idia na Baibul e gwaurai gabudia e vadivadiva, bena Iosef bona Maria ese Iesu bona tadina veridia ediai Iehova ena taunimanima sivaraidia e gwauraiva. Iosef bona Maria ese natudia ma haida e havaradia neganai, reana nega iboudiai tomadiho karadia bae goadalai na mai hekwarahina. To edia hekwarahi ahuna na e abia! Idia ese Iehova itomadiho henina karana e atoa guna dainai, ruma bese na lauma dalanai e goada bada.

10. Iosef bona Maria amo, Kristen tama sina be dahaka e dibaiamu?

¹⁰ Iosef bona Maria amo, Dirava e gari heniamu tama o sina be dahaka e dibaiamu? Ḡau badana be ina: Emu hereva bona kara amo  natumu ba hadibaia oi ese Iehova na o lalokau henia badamu. Ba laloatao, oi ese natumu ba henia harihari ḡauna hereadaena be ina: Idia ba durudia Iehova bae lalokau henia. Bona ḡau badana na ba hadibadia hanaihanai Baibul bae stadilaia, bae ḡuriḡuri, hebou baela, bona haroro ḡaukara bae karaia. (1 Tim. 6:6) Vaia, natumu ba ubudia eiava tauanina kahanai ba durudia na namo. (1 Tim. 5:8) To ba laloatao, moni o kohu amo natumui ba durudia na dia ḡau badana, to namona na ba durudia Iehova turana ai baela, unu amo ina nega oromana gunana baine ore neganai, idia na bae roho mauri, Dirava ena tanobada matamatana lalonai bae noho. *​—Esek. 7:19; 1 Tim. 4:8.

11. (a) Edena dalai 1 Timoteo 6:17-19 ena sisiba ese tama sina e durudiamu abi hidi namodia bae kara totona? (b) Emu ruma bese be dahaka disisin haida baine lalohadailai be namo, bona dahaka hahenamo bae vara diba? (Maua ladana,“ Dahaka Disisin Namodia Haida Ba Kara Diba?” ba itaia.)

¹¹ Ita na ta moalemu badina be tama sina ese abi hidi namodia e karamu, edia ruma bese e duruamu lauma dalanai baine goada totona! Nega iboudiai idia ese Iehova e tomadiho henia heboumu. Hebou badadia bona maraḡidia e laomu. Bona idia ese haroro ḡaukara e duruamu. Ruma bese haida na gabu daudaudia e laomu, haroro ḡaukara e ha karaiamu. Ma haida be Betele e vadivadiamu o tiokratik konstraksen project idauidau e durumu. Una abi hidi e karaiamu ruma bese momo ese moni bada e negemu dainai, reana edia mauri na be aukamu. To, edia abi hidi namona dainai, Iehova ese ahudia be henimu. (1 Timoteo 6:17-19 ba duahi.) Ruma bese unuhetomadia ai natu e badamu neganai ini ḡau namodia na doini be karamu, bona idia na be moalemu badina tamadia o sinadia ese idia na e hadibadia namonamo! *​—Her. 10:22.

12. Iesu e bada neganai, ia be dahaka e kara?

¹² Dirava, Iosef, o Maria na hanaihanai Iesu ena abi hidi namodia e karava. To idia natudia, Iesu, e bada neganai, ia danu sibona abi hidi namodia e kara. (Gal. 6:5) Ita heḡereḡereda, ia danu mai ena maoro sibona abi hidi baine kara diba. Reana ia ese sibona ena ura ḡauna bema abia hidi guna. To lasi, ia ese Iehova itura henina karana e abia hidi. (Ioa. 8:29) Edena dalai memero kekeni ese Iesu bae tohotohoa diba?

13. Iesu maraḡinai, ia be dahaka abi hidi badadia e kara?

¹³ Iesu maraḡinai, ia ese tamana o sinana ikamonai henidia karana e abia hidi. Herevana Iesu ena aonega na bada herea, to ia ese tamana bona sinana edia sisiba e badinaia. Baibul e gwaumu, “ia na idia . . . e kamonai henidia.” (Luka 2:51) Bona Iesu ese ena roboa madunana na e huaia namonamo. Eiava ia na e ḡaukara goada Iosef amo kapenta  ḡaukara baine dibaia, unu amo ena ruma bese baine sapotia diba.

14. Ede ta diba tomamu Iesu na Dirava ena Hereva e stadilaia ḡoevaḡoeva?

¹⁴ Reana Iosef o Maria ese Iesu e hadibaia ia be ede e vara toma bona Dirava ena aneru iboudiai be dahaka e gwaurai. (Luka 2:8-19, 25-38) To una na dia heḡereḡere Iesu enai; reana ia sibona ese Buka Helaḡa e stadilaia danu. To ede ta diba tomamu Iesu na Dirava ena Hereva e stadilaia ḡoevaḡoeva? Badina Ierusalem ai teacher iboudiai na mero maraḡina Iesu ena “lalo-parara bona ena haere e hoalai.” (Luka 2:46, 47) Bona Iesu laḡanina 12 neganai, ia na Baibul e stadilaia ḡoevaḡoeva amo e hamomokania, ia Tamana na Iehova.​—Luka 2:42, 43, 49.

15. Iesu ese Iehova ena ura e abia hidi karana be ede e hahedinaraia toma?

¹⁵ Iesu ese Iehova ena ura e dibaia, e abia hidi bona e badinaia. (Ioa. 6:38) Iesu dibana ia na momo ese bae inai henia, bona reana una na e lalohekwarahilaia bada herea. To, ia ese Iehova ibadinana karana e abia hidi. Laḡani 29 C.E. ai, Iesu e bapatiso neganai, iena ura badana na Iehova ena ura baine karaia. (Heb. 10:5-7) Bona satauro ai, Iesu na dounu Tamana ena ura e badinaia ela bona e mase.​—Ioa. 19:30.

16. Iesu amo natu ese bae dibaia ḡauna ta be dahaka?

¹⁶ Tamamu bona sinamu ba kamonai henidia. Iosef bona Maria heḡereḡeredia, tamamu bona sinamu na dia ḡoḡoevadae. To, Iehova ese tamamu bona simamu e abidia hidi oi bae gimamu, bae hadibamu, bona bae hakaumu. Bema oi ese edia sisiba bo kamonaimu bona bo matauraidiamu, “namo” bo davarimu.​—Efe. 6:1-4.

17. Iosua 24:15 ai tame duahia, memero kekeni ese dahaka bae abia hidi be namo?

¹⁷ Oi ese ba hesiai henia tauna bavabia hidi. Namona na ba laloparara Iehova be daika, iena ura be dahaka, bona ena ura be edena dalai ba haḡuḡurua. (Roma 12:2) Unu amo emu mauri ai bavabia hidi ḡauna hereadaena bina: Iehova ba hesiai henia. (Iosua 24:15 ba duahia; Koh. 12:1) Bema dina ta ta ai Baibul ba duahia bona ba stadilaia,  oi ese Iehova bo lalokau henia badamu bona bo abidadama heniamu.

18. Memero kekeni ese dahaka bae abia hidi be namo, bona ena namo be dahaka?

¹⁸ Emu mauri ai Iehova ena ura ikarana bavabia hidi. Satana ena tanobada ena gwauhamata binai: Bema oi ese emu aonega amo emu ura ḡaudia mo bo tahumu, oi na bo moalemu. To ita dibada ḡauna binai: Moni o kohu mo e tahumu taudia na hisihisi momo e davarimu. (1 Tim. 6:9, 10) To, bema oi ese Iehova ba kamonai henia bona emu mauri ai ena ura ikarana bavatoa guna, bo karamu ḡaudia lalodiai oi na bo kwalimumu bona mai aonegamu ida bo karadiamu.​—Ios. 1:8.

19. Tama bona sina ese dahaka bae laloatao be namo?

¹⁹ Tama bona sina e, natumu ba durua Iehova baine hesiai henia. Iehova bavabidadama henia, unu amo ia ese oi baine durumu disisin maorodia ba kara. (Her. 3:5, 6) Ba laloatao: Emu hereva o kara amo oi ese natumu bo durua namonamomu. Una dainai, natumu baine durua abi hidi maorodia ba kara, unu amo Iehova ese ia baine lalonamo henia.

20. Memero kekeni be dahaka hahenamo be abimu bema idia ese Iehova isiaina ilao-henina be abia hidimu?

²⁰ Memero bona kekeni e, tamamu o sinamu ese oi bae durumu diba abi hidi maorodia ba kara totona. To, oi sibomu danu abi hidi maorodia ba kara, unu amo Iehova ese oi baine lalonamo henimu. Una dainai, Iesu ba tohotohoa bona Tamana lalokauna isiaina ilao-henina bavabia hidi. Bema unu bo kara tomamu, hari ina negai, oi na bo bisimu, ḡaukara namodia bo karamu, bona bo moalemu. (1 Tim. 4:16) Bona vaira negana ai danu, oi ese mauri hereadaena bo moalelaiamu!