Ḡau ta ba tahua bona ba karaia na dia nihi mo​—dia oiemu ura ai bainela ḡauna mo. Ba tahu ḡau momokanidia iabidia totona, plen ba karaia, reana emu lalohadai ba haidaua, bona ba hekwarahi be namo.

Ḡau haida itahudia na nega sisina lalonai (dina haida o pura haida lalodiai), haida na nega taina daudau lalodiai (hua haida ai), bona ma haida na nega daudau ai (laḡani ta o laḡani haida lalodiai) ba davaridia. Nega kwadoḡi lalonai ba kara diba tahua ḡaudia bavato, una ese baine durumu nega daudau lalonai o uramu ba kara tahua ḡaudia ba haḡuḡurudia diba.

O uramu ba kara tahua ḡaudia bo haḡuḡurumu neganai, lalomu be hagoadaiamu, turamu ida emui hetura karana be hagoadaiamu, bona emu moale be habadaiamu danu.

Lalomu be goadamu: O uramu ba kara ḡaudia maraḡidia bo haḡuḡurumu neganai, be hagoadamumu o uramu ba kara ḡaudia badadia bo karamu. Bona bo mamiamu oi na heḡereḡere dina ta ta ai o davarimu hekwakwanaidia​—heḡereḡere bamomu edia hahetoho karadia​—na bo hahanaidia dibamu.

Hetura karana: Taunimanima na be uramu mai edia plen taudia​—heḡereḡere mai dibadia dahaka bae kara bona e ḡaukara goadamu e uramu ḡaudia bae haḡuḡuru taudia, bae bamodia. Danu, o uramu ba karaia ḡauna na, ma ta ida bo karaia heboumu neganai, emui hetura karana na be hagoadaiamu.

Bo moalemu: O uramu ba kara ḡaudia bo haḡuḡurumu neganai, bo moalemu.

“Na uramu ḡau ta baina plenia bona baina karaia. Una ese e ha bisigumu bona na karaiamu dainai, egu nega na asina haorea kavamu. Bema o plenia ḡauna bo haḡuḡuruamu, bo moalemu bona bo tomu, ‘Aaa, da name haorea! Na ura baina karaia ḡauna na da name haḡuḡurua.’”​—Christopher.

BAIBUL ENA SISIBA: “Lai e narimu tauna na uhe basine hado, bona dagadaga e ita taomu tauna na basine ḡeiḡei.”​—Kohelete 11:4.

O uramu ba kara ḡaudia ikaradia daladia ba kara bona ba haḡuḡurudia totona, ini dala ba badina.

Ba Haerodia. O uramu ba kara ḡaudia listina ta ba karaia, bena ba kara guna ḡaudia ba tore guna, ia murinai ba kara ḡaudia ba tore, bena dokona ai o uramu ba kara ḡaudia be dokonai bavatodia.

Ba pleni. O uramu ba kara ḡaudia ta ta ai, ina ba badinaia:

• Ihaḡuḡuruna negana bavabia hidi.

• Ikarana daladia ba plenilai.

• Ba davari diba hekwakwanaidia bona ihahanaidia dalana ba lalodia.

Ba karaia. Basio nari ela bona o uramu ba kara ḡaudia maraḡimaraḡidia iboudiai bavabi. Sibomu ba henanadai, ‘Na uramu baina karaia ḡauna ihaḡuḡuruna totona baina karaia ḡauna ginigunana be dahaka?’ Bena ba karaia. O karamu ḡaudia iboudiai na ba tore diho.

BAIBUL ENA SISIBA: “Ḡaukara malaka-malaka tauna ena lalo-hadai ese anidia e havara badamu.”​—Hereva Lada-isidia 21:5.