Mai anina bada karadia na emu mauri ai o uramu ba kara ḡaudia. Heḡereḡere, o uramu ḡau iboudiai lalodiai ba kara momokani, ani? Una dainai, bo uramu una kara namona na natumu ese ena mauri ai baine hahedinaraia.

Danu, mai anina bada karadia na kara maoromaoro taravatudia. Heḡereḡere, kara maoro e badinamu tauna na be ḡaukara goada-goadamu, be hahemaoro maoromu, bona ma haida be lalodiamu​—unu kara na ta maraḡina negana amo bae hadibalaia karadia.

BAIBUL ENA SISIBA: “Meromero bema rakalaia dalana na ba hadibalaia; bena baine buruka negana ai basine rakatania.”​—Hereva Lada-isidia 22:6.

Hari ina teknoloji e badamu negana lalonai, kara maoromaoro taravatudia na mai anidia bada. Sina ta ladana na Karyn na e gwa: “Herevana edena negai eiava herevana fon ede hetomana ta ba ḡaukaralaia, to oi bae hadikamu ḡaudia na kara haraḡa bo abi dibamu. Reana natuda na dekedai e helai, to fon amo kara mirodia baine ita diba!”

BAIBUL ENA SISIBA: “Lo taudia . . . lalodia vada eme manada, namo bona dika toadia na mai dibadia.”​—Heberu 5:​14.

Kara namo ikarana na mai anina bada danu. Anina na hereva ini bamodia “mani emu kara” bona “tenkiu” baita gwaurai bona haida baita lalodia bada​—hari ina negai momo ese una kara na asie hahedinaraia momomu, badina idia ese kohu, heḡereḡere mobael fon eiava ḡau unu bamodia e ura henidia badamu, a taunimanima be asie lalodia badamu.

BAIBUL ENA SISIBA: “Umui na o uramu taunimanima ese bae kara henimui karana na umui ese unu mo ba kara henidia toma.”​—Luka 6:​31.

Kara maorodia ibadinadia daladia ba gwaurai hedinarai. Heḡereḡere, hetahu ḡaukaradia ese e hahedinaraia, matamata taudia na do asie headava lalonai basie mahuta hebou badina ba herevalaia namonamo neganai, una kara na basie karaiamu.

HEDURU HEREVANA: Nius ai e gwauraia sivaraina ta amo kara maoromaoro taravatudia ba herevalai. Heḡereḡere, bema nius ese inai heheni karana amo e vara daḡedaḡe karana ta e herevalaia, reana bao gwa: “Ma haida unu e badu henidia tomamu na dika herea. Emu lalohadai be dahaka, dahaka dainai idia na taunimanima unu bamodia ai ela?”

“Edena dalai natu ese kara namo baine abia hidi diba, bema dika bona namo edia idau na asi dibana.”​—Brandon.

Kara maoromaoro taravatudia ba hadibalaidia. Maraḡidia danu ini hereva “mani emu kara” bona “tenkiu” igwauraina karana bae dibaia diba bona haida imatauraidia karana danu. Buka ladana Parenting Without Borders na e gwa: “Bema natu maraḡidia na bae itaia idia na dia sibodia to idia na grup ta​—ruma bese ta, skuli ta, eiava hanua ta​—lalonai e nohomu, idia na sibodia edia namo basie lalomu, to haida idurudia karadia be karamu.

HEDURU HEREVANA: Ruma ḡaukaradia haida na natumu ba henidia, unu amo haida idurudia karana ena namo ba hadibadia.

“Bema hari natumai na ruma ḡaukaradia bae manadalai, sibodia bae noho neganai basie hoa. Ruma madunadia ihuadia karana na edia mauri kahana ai dela dainai.”​—Tara.