PƐ MƐDÃPIA 05
Baaboa Lɛ Wala La Wedɔwe Lɛ A Vɔ Ko Piea Ka
Zihova e Baaboa nɔ ko lɛɛ—kii 66 gbɛɛ gbɛɛ lɛ e kiibe doo kaa, lɛ gbaapɛ kpanazɛ kpokpo ka. Kɛɛ, ii bɛi i yɛlɛtaa: ‘Mɛɛ zaa lɛ Baaboa e go yi? Deĩ lewe lɛ?’ Kɛ ko wɛĩlɔɔ nia yiɓoa, ko wɔ̃ gee e gbɛ̃a zi Wala la wevɔwe e Baabo yia e nua ko piea mɔ.
1. Ye mɔu mia lɛ o Baaboa bɛ̃ɛ̃, zi kpɛɛ lɛ laa Wala Lewe ka?
Gɔ̃a 40 lɛ o Baaboa bɛ̃ɛ̃ kɛɛ 1,600 piea. A gã e gbɛ̃ kɛɛ 1513 yi kɛ Kɛlɛi e tĩa nuu, e lo e ɓɔa kɛɛ 98 mɔ kɛ Kɛlɛi aa nu. Ɛɛ̃ a bɛ̃ɛ̃ mia o go zi gbɛɛ gbɛɛ ka. E kɛ bɛ̃ɛ̃ kilia, Baaboa lɛ seĩ lɛɛ wee e kie we mɔ. Zi kpɛɛ lɛ laa kili? Lɛ kili ɓii Wala lɛ a Lewe lɛ Baaboa kaa. (1 Tɛsalonia 2:13 gee.) A bɛ̃ɛ̃ mia oó gbaa o die wa yɛlɛtaa bɛ̃ɛ̃ tãã. Kɛɛ, “gɛɛ pulua e mia si aa lo o ka, waa lo wɔ̃ lɛ Wala a kaa o lea geea si.” a (2 Pilɛ 1:21) Wala a kɛ gɛɛ pulua e lie si mia ka kɛ o a zi yɛlɛtaa ni bɛ̃ɛ̃.—2 Temɔte 3:16.
2. Deĩ mia lɛ Baaboa e bɛi gbũu o mɔ?
“Mia kpolo kɛkɔ gbɛɛ gbɛɛ zɛ, ɛ̃ɛ̃ sii gbɛɛ gbɛɛ la mia, e bɛi we gbɛɛ gbɛɛ gee mia ɛ̃ɛ̃ zeĩ sɛlɛ gbɛɛ gbɛɛ yimia” oo bɛi gbumɔ sɔlɔɓoo wɔ̃laũ yie lɛ e Baaboa yia kololaa. (Wɛlɛvelesɔ̃ 14:6 gee.) Wala aa zi kɛ ɓe kɛ Baaboa e kɛ ɓe we gbɛɛ gbɛɛ yi e diea kii nɔɔfe lɛ waa kɛɛ la pɛnɛɛ. Koo bɛia gee kelɛ Baaboa lɛ mia seĩ kɛlɛ waa gee ɛ̃ɛ̃ waa o too dɔ Wala Lewe mɔ. Wɔ̃ e kea lɛ wana ka, mia o kɛ bɛ̃ɛ̃ lɛ nɔɔfe mɔ ɛ̃ɛ̃ we nɔɔfe geemia kaa ka.
3. Zi kpɛɛ lɛ Wala aa e zo kɛa Baaboa pie yekɛ a yi e sie?
Baaboa bɛ̃ɛ̃ɛ e kɛa pɛ lɛɛ́ yii fɛ̃ɛ̃ kelɛ wii kiia la. Kɛɛ mia lɛ Baaboa lɔkpɔɔ e kɛa o mɔɔ, o luo si wa bɛ̃ɛ̃ ɛ̃ɛ̃ waa bɛ̃ɛ̃ zeĩ o kɔ ka. Ye bɛ̃ɛ̃ lɛ mia yikɛgaa e kɛ o kɛlɛɛ o dɔ gaa kɛ o Baaboa ɓo tããa, mia ye o toa, o zo wee e kɛa mɔ kɛ o dɔ gaa Baaboa ɓeee e to a yi. Zihova lɛɛ́ gbaa to kɛ mi nɔɔfe ɛ̃ɛ̃ pɛ nɔɔfe a tea wɔ̃ gee ko lɛɛ pia. Baaboa laa gee: “Ko Wala lewea lɛɛ lo too ɓe toakili ka.”—Aazaya 40:8.
A PIE FOO
Zi Wala e mia sia kɛ o Baaboa bɛ̃ɛ̃, zi ee zo kɛa a pie, ɛ̃ɛ̃ zi a kɛa kɛ mia seĩ o sɔlɔɓoa mɛdã.
4. Baaboa lɛɛ Mi a lewe lɛɛ zɔ̃ɔ
Ko VILOA gɛ̃. Ye aa kɛɛ ko 2 Temɔte 3:16 gee, ɛ̃ɛ̃ kɛ ko wɛĩlɔɔ ni lɛ o to a piea yiɓo.
-
Ye mɔu mia lɛ o Baaboa bɛ̃ɛ̃, mɛ e kɛ lɛ o si Wala Lewe?
-
Ɓaa si wana ka kelɛ Wala lɛɛ bɛi a kɛɛ kɛ mia o a zi yɛlɛtaa bɛ̃ɛ̃?
Mi lɛɛ bɛi wɔ̃laũ lɛ e a kɛlɛɛ geee la kii bɛ̃ɛ̃ mi lɛɛ a bɛ̃ɛ̃ tãã. Zi nɔ dooa, lɛ mia o Baaboa bɛ̃ɛ̃ a kaa, kɛɛ Wala lɛ e a gee o wɔ̃laũ e a yia bɛ̃ɛ̃
5. Baaboa aa la wɔ̃ gaa-gaa kɛlɛ
Ye mɔu Baaboa e go Wala kɛlɛɛ, koo gɛ̃ kelɛ lɛɛ bɛi e zo kɛɛ a pie. Gɔ̃a lɛ yikɛgaa lɛ o kɛlɛɛ, waa gbɛ̃ mɔ zi naa ka kɛ o Baaboa yisie. Gbiniwalalɛɛ kɔ gbɛɛ gbɛɛ liesimia waa dɔ gaa kɛ o a la kpaa. Mia bunuzɛ waa dɔ gaga kɛ oo zo kɛ Baaboa pie ye bɛ̃ɛ̃ lɛ mia o niɛ o lɛɛ ɛ̃ɛ̃ waa o zɛ-wɔ̃ geea ka. Kɛ ko pɛ mɛdã e gbɛ̃a gɔ̃a o kilia doomi mɔɔ, ko VILOA gɛ̃, ɛ̃ɛ̃ kɛ ko wɛĩlɔɔ ni lɛ o to a piea yiɓo.
-
Kea a yidɔ kelɛ Baaboa e die wɔ̃ bunuzɛ yi kɛ e to ɓea, lɛɛ loa kɛɛ kɛ ɓa gee? Mɛɛ wɔ̃ wɛĩ?
Ko Sãã 119:97 gee, ɛ̃ɛ̃ kɛ ko wɛĩlɔɔ e kea yiɓo:
-
Mɛɛ aa mia bunuzɛ fãawaa kɛ o dɔ gaga o Baaboa laniɛ ɛ̃ɛ̃ o nɔ mia lɛɛ?
6. Kii e kea lɛ mia seĩ wɛĩ
Baaboa lɛ kii lɛ waa laniɛ ɛ̃ɛ̃ lɛ waa nɔ mia lɛɛ kpokpo ɓoa ka. Ko Apɔsɔlɔ 10:34, 35 gee, ɛ̃ɛ̃ kɛ ko wɛĩlɔɔ ni o kea yiɓo:
-
Mɛ e kɛ lɛ Wala a naa o a Lewea laniɛ ɛ̃ɛ̃ o a nɔ mia lɛɛ kpokpo ɓo?
-
Mɛɛ wɔ̃ lɛ e i zo si kpokpo ɓo e gbɛ̃a Baaboa mɔ?
Koo bɛia gee
mia seĩ
lɛ o kpoulaa
Baaboa lɛ o kɛlɛ we lɛ o yimaa yi
Lɛ ɓe we ni lɛ o diee lɛ
3,000
yia yi
e kɛ bɛ̃ɛ̃ a seĩ ɛ̃ɛ̃ a pɛ̃ɛ̃ do kaa ka
5,000,000,000
A ye waa pɛkɛ leĩa,
ku diee lɛ kii nɔɔfe la
MIA DO OO GEE: “Baaboa lɛ nɔ kii zii lɛ mia wa bɛ̃ɛ̃ ka.”
-
Ii i yɛlɛtaa kpɛ?
-
Mɛɛ a zɔ̃ɔ wana ka kelɛ Baaboa lɛ Wala Lewe ka?
WƆ̃Ɔ WŨ
Baaboa lɛ Wala Lewe ka, ɛ̃ɛ̃ aa zi kɛ ɓe kɛ mia seĩ o a sɔlɔɓo.
Zovuo Wɔ̃
-
Ye waa gee kelɛ Wala lɛ ee Lewe da mia zo pie kɛ o bɛ̃ɛ̃, a yi lɛ e mɛɛ ka?
-
Mɛɛ wɔ̃ lɛ e i zo si e gbɛ̃a Baaboa la-wɔ̃ mɔ, a laniɛ, ɛ̃ɛ̃ waa nɔ mia lɛɛ mɔ?
-
Kɛ ɓa yidɔ kelɛ Wala e dɔ gaga zi suua ka kɛ e wɔ̃ gee i lɛɛ, zi kpɛɛ lɛ ii yɛlɛtaa ka?
I NYIƐ KPƆ
I wɔ̃ zii lɛ a gbɛ̃ɛ̃ lɛ Baaboa mɔ—e wɛlɛ mɔ Baaboa bɛ̃ɛ̃ luo mɔ e ɓɔa pɛnɛɛ mɔɔ gee.
Zi Baaboa e laa ka wɔ̃ gaa-gaa yaaka kɛlɛɛ mɛdã.
I zi lɛ mia do o die a ka wɔ̃ gaa yi kɛ o Baaboa laniɛɛ gɛ̃.
Waa Baaboa bɛ̃ɛ̃ ɛ̃ɛ̃ waa laniɛ kpola bunuzɛ. Zi kpɛɛ lɛ ɓa yidɔa kelɛ wevɔwe e a yia mɛ lɛɛ́ vɔɔ nɛ?
“Kea Waa Wɔ̃ Bunuzɛ Mɛvɔɔ Baaboa Yi, ɛ̃ɛ̃ Lɛ Nɔ Tĩa Kili?” (Lɛ jw.org la)
a Lɛ zi ko lo a gɛ̃a pɛ mɛdãpia ye e nua yia, Wala la gɛɛ pulua lɛ la yikɛgaa ka.
