PƐ MƐDÃPIA 08
Ii Bɛi Kɛɛ Zihova Ɓɛɛ Ka
Zihova laa naa ɓa dɔ kpokpo ɓo. Mɛɛ wɔ̃ wɛĩ? Laa yidɔ kelɛ ye ɓaa a sɔ̃ɔ̃ wa a yiikɔ ɛ̃ɛ̃ wɔ̃ ni lɛ aa ya e ge a kɛɛ dɔ kpokpo ɓoa, ii loa naa i kɛ a ɓɛɛ ka. Kea ii bɛi kɛɛ Wala ɓɛɛ ka? (Zĩĩ 2:23 gee.) Mɛɛ i bɛi a kɛɛ kɛ i kɛ a ɓɛɛ ka? Baaboa lɛɛ wɛĩlɔɔ nia yiɓo ɛ̃ɛ̃ lɛɛ pɛ e kɛ lɛ ɓɛɛla kɛ Zihova pie lɛ kpokpo ɓo kpanazɛɛ zɔ̃ɔ.
1. Mɛɛ Zihova a mɔɔ i suo kɛ ɓo?
“Ka nu Wala ka kɔɛ. Ka kɛa kilia, lɛɛ lo nuu ka bɛ̃ɛ̃ ka ka kɔɛ.” (Zĩĩ 4:8) Wɔ̃ e kea yi lɛ e mɛɛ ka? Zihova lɛɛ i suo kɛ i kɛ a ɓɛɛ ka. Lɛ gaga kɛ mia do o a si wana ka kelɛ oo bɛi kɛɛ Wala ɓɛɛ ka, ɓii oó a gɛ̃. E kɛ bɛ̃ɛ̃ kilia, Zihova e wɔ̃ seĩ lɛ laa mɔ ko dɔ e gbɛ̃a a yiikɔ mɔ kɛ ko nu a ka kɔɛɛ zɔ̃ɔ ko lɛɛ a Lewe lɛ e Baabo kaa yi. Ye kɔaa Wala la wevɔwe lɛ a vɔ ko piea gee Baaboa yia, ko Zihova ni ko ɓɛɛla mɛ lɛɛ lo kɛɛ gaga ye bɛ̃ɛ̃ lɛ koó a gɛ̃ doa ka.
2. Mɛ e kɛ lɛ Zihova e bɛi kɛɛ i ɓɛɛ kpeĩ kpokpo ka?
Zihova laa lɔkɛ i ka e diea mi nɔɔfe la. Laa naa ko kɛ gelizɛ ɛ̃ɛ̃ ko sɛnɛɓo a lɛɛ ye kɔaa naa gbumɔ kaa ka. Ii bɛi ɓa ‘zogɔ̃ seĩ yaa a wĩĩ, ɓii lɛɛ kpaa i mɔɔ yia wɛĩ.’ (1 Pilɛ 5:7) Zihova die pɛkɛɛ lɛ kɛ e gbumɔ nɔ luo seĩ ka, e ko nɛɛnɛɛ, ɛ̃ɛ̃ e e too dɔ e ɓɛĩ mia mɔ.—Sãã 94:18, 19 gee.
3. Mɛɛ Zihova a naa a ɓɛĩ mia o kɛ?
Zihova laa lɔkɛ mia seĩ ka, “kɛɛ mia lɛ o kɛkɔ lɛ kpeĩa lɛ e ɓɛɛla kɛ o piea.” (Pɔlɔvɛɛ 3:32) Zihova laa naa a ɓɛĩ mia o dɔ gaga, o wɔ̃ lɛ e a gee lɛ sɛɛ kɛ, ɛ̃ɛ̃ o o ko gbɛ̃ wɔ̃ lɛ e a gee lɛ yɔɔ mɔ. Mia do oo o yɛlɛtaa kelɛ oó bɛi too Zihova zi yiikɔ ni lɛ a gbɛ̃ɛ̃ lɛ wɔ̃ yie wa wɔ̃ yɔɔ mɔɔ pie. E kɛ bɛ̃ɛ̃ kilia, Zihova zo lɛ sɛ. Lɛɛ e kɔya mia seĩ lɛ o lɔkɛ A ka kpokpo ɓo, ɛ̃ɛ̃ lɛ o dɔ gaga o A zoda wɔ̃ kɛɛ wi.—Sãã 147:11; Apɔsɔlɔ 10:34, 35.
A PIE FOO
Ko wɔ̃ bunuzɛ mɛdã e gbɛ̃a zi ko bɛi kɛɛa Zihova ɓɛɛ ka, ɛ̃ɛ̃ pɛ e a kɛ ɓɛɛla mi kpeĩ ka ko lɛɛ gɛ̃.
4. Eɓɔlɔhãã e kɛ Zihova ɓɛɛ ka
Wɔ̃ Baaboa a gee e gbɛ̃a Eɓɔlɔhãã (lɛ o kɛa sipia zeĩ Eɓɔlɔũa) mɔɔ, lɛɛ gbũ ko mɔ ko kɛ Wala ɓɛɛ ka wɔ̃ yima. Ko wɔ̃ gee e gbɛ̃a Eɓɔlɔhãã mɔ Zɛnɛse 12:1-4 yi. Kɛ ko wɛĩlɔɔ nia yiɓo:
-
Mɛɛ wɔ̃ lɛ Zihova a gee Eɓɔlɔhãã a kɛ?
-
Mɛɛ wɔ̃ lɛ Zihova ee wedɔa a lɛɛ?
-
Wɔ̃ Zihova a gee Eɓɔlɔhãã lɛɛ zi kpɛɛ lɛ e a kɛa?
5. Mɛɛ wɔ̃ lɛ Zihova a naa a ɓɛɛ mia o kɛ?
Aa kɛɛ koo naa ko ɓɛĩ mia o wɔ̃ bunuzɛ kɛ ko lɛɛ.
-
Mɛɛ wɔ̃ ni lɛ ɓa naa i ɓɛĩ mia o kɛ i lɛɛ?
Ko 1 Zɔ̃ɔ̃ 5:3 gee, ɛ̃ɛ̃ kɛ ko wɛĩlɔɔ e kea yiɓo:
-
Mɛɛ wɔ̃ lɛ Zihova a naa a ɓɛĩ mia o kɛ?
Kɛ ko Zihova we kɛɛ, laa mɔ koo sɔ̃ɔ̃ wa ko yiikɔ mɛvɔɔ. Ko Aazaya 48:17, 18 gee, ɛ̃ɛ̃ kɛ ko wɛĩlɔɔ e kea yiɓo:
-
Mɛ e kɛ lɛ Zihova a naa a ɓɛĩ mia oo yiikɔ mɛvɔɔ?
Ɓɛɛla mi kpeĩ lɛɛ wɔ̃ lɛ e lo gbũu ko mɔɔ gee ko lɛɛ ko kɛ. Zihova lɛɛ wɔ̃ nɔ dooa kɛ e ɓɛĩ mia lɛɛ
6. Wɔ̃ lɛ Zihova a kɛ e ɓɛĩ mia lɛɛ
Lɛɛ gbũ e ɓɛĩ mia mɔ kɛ o die wɔ̃ ni lɛ e ɓɔ o laa yi. Ko VILOA gɛ̃, ɛ̃ɛ̃ kɛ ko wɛĩlɔɔ lɛ e to a piea yiɓo.
-
Zi kpɛɛ lɛ Zihova e gbũa leea mɔ viloa yi, lɛ e kɛ e yɛlɛtaapia yɔɔ ka?
Ko Aazaya 41:10, 13 gee, ɛ̃ɛ̃ kɛ ko wɛĩlɔɔ ni o kea yiɓo:
-
Mɛɛ wɔ̃ lɛ Zihova aa e wedɔ a kɛ e ɓɛĩ mia seĩ lɛɛ?
-
Kea Zihova lɛɛ bɛi kɛɛ Ɓɛɛla Mi kpeĩ ka? Mɛɛ wɔ̃ wɛĩ?
Mia o i ɓɛĩ mia kpokpo kaa oo gbumɔ nɔ i lɛɛ e nɔ luo ka. Zihova lɛɛ lo gbũu i mɔ nɔ kili
7. Kɛ ko kɛ Zihova ɓɛɛ kaa, laa mɔ ko wee a pie ɛ̃ɛ̃ kɔaa ko too dɔ a mɔ
Wee kie pie lɛɛ ɓɛɛla mɛ kɛ gaga. Ko Sãã 86:6, 11 gee, ɛ̃ɛ̃ kɛ ko wɛĩlɔɔ ni o kea yiɓo:
-
Zi kpɛɛ lɛ ko bɛi wee a ka Zihova pie?
-
Zi kpɛɛ lɛ Zihova bɛ̃ɛ̃ e wee a ka ko pie?
Koo wee Zihova pie sɛnɛɓoo ka; lɛɛ wɔ̃ gee ko lɛɛ Baaboa yi
MIA DO OO GEE: “Lɛ gaga kɛ mia o nu Wala ka kɔɛ.”
-
Baabo wekpo kpɛɛ lɛ i bɛia geee kɛ a zɔ̃ɔ kelɛ koo bɛi kɛɛ Zihova ɓɛɛ ka?
WƆ̃Ɔ WŨ
Zihova laa naa i kɛ a ɓɛɛ ka, ɛ̃ɛ̃ lɛɛ lo gbũu i mɔ kɛ i nu a ka kɔɛ.
Zovuo Wɔ̃
-
Zi kpɛɛ lɛ Zihova e gbũa e ɓɛĩ mia mɔ?
-
Mɛ e kɛ lɛ Zihova a gee a ɓɛĩ mia oo sɔ̃ɔ̃ mɛvɔɔ?
-
Ɓaa i yɛlɛtaaa, lɛ gaga i kɛ Zihova ɓɛɛ ka? Mɛɛ wɔ̃ wɛĩ?
I NYIƐ KPƆ
Ɓɛɛla kɛ Wala piea, zi kpɛɛ lɛ e bɛi gbũua i mɔ ɓa kɛɓe yi?
“Zihova—Wala Kpanazɛ Lɛ Laa Mɔ Mia O Dɔɔ” (Wɔ̃lagɛ̃kamaa, Vuulie 15, 2003)
Zi i bɛi kɛɛa Wala ɓɛɛ kaa mɛdã.
Pɛ e kɛ lɛ lee doo a yidɔ kelɛ ɓɛɛla kɛ Zihova pie e gbũa mɔɔ gɛ̃.
I wɔ̃ mia dɛɛ o gee e gbɛ̃a Zihova mɔɔ ma.