PƐ MƐDÃPIA 09

Sɛnɛɓoo Laa Kɛ Ɓaa Nu Wala Ka Kɔɛ

À DA YƐƁO PÍÉ

Kea ɓaa i yɛlɛtaa do kelɛ laa mɔ mi do e zi zɔ̃ɔ i lɛɛ ɓa kɛɓe yi? Kea wɛĩlɔɔ kpanazɛ ni o i kɛlɛ lɛ ɓa yiɓoa naa? Kea ɓaa naa mi do e i nɛɛnɛɛ? Ii loa naa kɛ i nu Zihova ka kɔɛ? Sɛnɛɓoo lɛɛ lo gbũu i mɔ kɛ wɔ̃ nia seĩ e kɛ i lɛɛ. Kɛɛ zi kpɛɛ lɛ kɔa bɛi sɛnɛɓoo a ka e kpeĩ ka? Kea Wala lɛɛ e too dɔ sɛnɛɓo we seĩ mɔ? Mɛɛ i bɛia kɛɛ kɛ ɓa yidɔ kelɛ lɛɛ lo e too dɔɔ ɓa sɛnɛɓo we mɔ? Kɔa gɛ̃.

1. Deĩ lɛ kɔa bɛi sɛnɛɓoo a lɛɛ, ɛ̃ɛ̃ mɛɛ wɔ̃ lɛ kɔa bɛi sɛnɛɓoo e gbɛ̃a mɔ?

Zizɛ a gee ko lɛi Daa lɛ nɔ laa mɔ ko sɛnɛɓo a lɛɛ. Zizɛ dietĩ e sɛnɛɓo Zihova lɛɛ. A gee: “A mɔɔ wɔ̃ mɔɔ, zi lɛ lɛ ka mɔ ka sɛnɛɓo a kaa gɛ̃ e ke. ‘Ko Daa lɛ i lɛia . . . ’” (Mafiu 6:9) Ye kɔaa sɛnɛɓo Zihova lɛɛ, ko ɓɛɛlaa mɛ lɛɛ kɛ gaga.

Koo bɛi sɛnɛɓoo wɔ̃ kpanazɛ nɔɔfe wɛĩ. Yeɓoa, kɛ Wala e ko sɛnɛɓo we zɛ nɔɔ, laa mɔ e kɛ a naa-ka-wɔ̃ ka. “Koo a yi kpokpo dɔ kelɛ lɛɛ ko wee ma, ye kɔaa pɛ nɔɔfe pɛ̃ a mɔ a zo-da-zi piea ka.” (1 Zɔ̃ɔ̃ 5:14) Zizɛ e wɔ̃ ni lɛ laa mɔ ko sɛnɛɓo a wɛĩa gɔ̃a zɔ̃ɔ. (Mafiu 6:9-13 gee.) E kã sɛnɛɓo ko die mɔɔ wɔ̃ mɔɔ, yekɛ ko zo e ni Wala zuo ɓo wɔ̃ ka wɔ̃ a kɛ ko lɛɛ wɛĩ, ɛ̃ɛ̃ ko sɛnɛɓo mia ye o toa wɛĩ.

2. Zi kpɛɛ lɛ laa mɔ ko sɛnɛɓo a ka?

Baaboa laa gee “ko ko zo-pie-wɔ̃ seĩ gee Wala lɛɛ.” (Sãã 62:8) A mɔɔ wɔ̃ mɔɔ, laa mɔ ko sɛnɛɓo we e go ko zo pie. Ii bɛi sɛnɛɓoo to mia waa i wee ma, ɛ̃ɛ̃ ɓaa ɓo i zo pie zaa, i ya-kɔ ɛ̃ɛ̃ i dɔ-kɔ nɔɔfe lɛ a zɔ̃ɔ kelɛ ɓɛlɛya lɛ i kɛlɛ Wala wɛĩa ka. Ii bɛi sɛnɛɓoo luo nɔɔfe ka ɛ̃ɛ̃ lɛ nɔɔfe mɔ.

3. Zi kpɛɛ lɛ Wala e ko sɛnɛɓo we zɛ nɔa?

Laa kɛ kili zi gbɛɛ gbɛɛ ka. Zihova aa e Lewe, lɛ e Baabo kaa nɔ ko lɛɛ, lɛ ko bɛi ko wɛĩlɔɔ ni yiɓoa gɛ̃ɛ a yia. Wala Lewe geee “lɛɛ gikã nɔ mi a gikãa wá nɛɛ lɛɛ.” (Sãã 19:7; Zĩĩ 1:5 gee.) Lɛɛ zoyage nɔ ko lɛɛ, ye yidã wɔ̃ aa ɓɔ ko laa ka. Laa kɛ la mia ni waa gbumɔ nɔ ko lɛɛ, ye kɔaa naa kpokpo ɓo a kaa ka.

A PIE FOO

Zi i bɛi sɛnɛɓooa Wala lɛɛ a zo-da-zi piea, wa zi sɛnɛɓoo e bɛi gbũua i mɔɔ gɛ̃.

4. Zi lɛ laa mɔ mia o sɛnɛɓoa Wala lɛɛ lɛ ɓe

Mɛɛ a zɔ̃ɔ kelɛ Wala lɛɛ e kɔya ko sɛnɛɓo we wi? Ko VILOA gɛ̃.

VILO: Kea Wala Lɛɛ E Too Dɔ Sɛnɛɓo We Seĩ Mɔ?—Pɛ̃ɛ̃-kpuu Ɓoa-mɔ-zɛ (2:42)

Zihova laa naa ko sɛnɛɓo a lɛɛ. Ko Sãã 65:2 gee, ɛ̃ɛ̃ kɛ ko wɛĩlɔɔ ni o kea yiɓo:

Kea, mi e “sɛnɛɓo we Ma-mi” kaa, laa naa i sɛnɛɓo a lɛɛ? Mɛɛ wɔ̃ wɛĩ?

Laa mɔ ko dɔ gaga ko to Wala zi yiikɔ nia pie, e kɛa koo naa e ko sɛnɛɓo we maa. Ko Maaka 3:4 wa 1 Pilɛ 3:12 gee, ɛ̃ɛ̃ kɛ ko wɛĩlɔɔ e kea yiɓo:

Zi kpɛɛ lɛ ko bɛi a gɛ̃a wana ka kelɛ Zihova lɛɛ lo e too dɔɔ ko sɛnɛɓo we mɔ?

Gele luo kaa, mia oo sɛnɛɓo kɛ o kɔ e die o yoko vɔ la. Lɛ sɛ kɛ Wala ee too dɔ sɛnɛɓo we nia seĩ mɔ?

5. Laa mɔ ko sɛnɛɓo we e go ko zo pie

Waa sɛnɛɓo we zɔ̃ɔ mia gbũu lɛɛ kɛ o wɔ̃ nɔ dooa gee, waa niɛ waa gee. Kea, zi Wala a naa kɔa sɛnɛɓoa a lɛɛ lɛ? Ko Mafiu 6:7 gee, ɛ̃ɛ̃ kɛ ko wɛĩlɔɔ e kea yiɓo:

Zi kpɛɛ lɛ ko bɛi a kɛɛa yekɛ ko “sɛnɛɓo we nɔ dooa gee solototo le”?

Luo seĩ kaa, i yɛlɛtaa wɔ̃ Zihova aa kɛ i lɛɛ ɓa kɛɓe yia ka, ɛ̃ɛ̃ ɓaa zuo ɓo a wɛĩ. Ye ɓaa kɛ luo seĩ ka lɔ́ɔ doo yia, ii lo kɛɛ sɛnɛɓopia wɔ̃ salapeelɛ gbɛɛ gbɛɛ wɛĩ, lɛ ií lo kɛɛ gbɛ̃pia i pie yi ɓaa wɔ̃ doo geea.

Nɛ-ye-gɔ̃ kpeĩ nɔɔfe laa naa la nɛ e e zo-pie-wɔ̃ gee a lɛɛ. Zi nɔ dooa lɛ Zihova a naa ko ko zo-pie-wɔ̃ gee a lɛɛ sɛnɛɓoo kaa

6. Sɛnɛɓoo lɛ wɔ̃ kpanazɛ lɛ Wala aa nɔ ko lɛɛ ka

Zi kpɛɛ lɛ sɛnɛɓoo e ko mɛ kɛa gaga luo yie wa luo yɔɔ ka ko kɛɓe yi? Ko VILOA gɛ̃.

VILO: Sɛnɛɓoo Lɛɛ Gbũ Ko Mɔ Ko Die Luo Gaa Yi (1:32)

Baaboa a gee kelɛ sɛnɛɓoo lɛɛ bɛi gbũu ko mɔ kɛ ko zoyage kpokpo sɔlɔɓo. Ko Felepĩã 4:6, 7 gee, ɛ̃ɛ̃ kɛ ko wɛĩlɔɔ ni o kea yiɓo:

Yeɓoa, sɛnɛɓoo lɛɛ́ ko ɓo wɔ̃ nyɔɔ yi luo seĩ ka, kɛɛ zi kpɛɛ lɛ e gbũa ko mɔ?
Mɛɛ ni lɛ i loa naa kɛ i sɛnɛɓo a wɛĩ?

Ɓaa yidɔ?

Mia waa gbɛ̃ mɔ a gee ka “e kɛ kili” wa sɛnɛɓoo lienyɛpia.—1 Kanekɔ 16:36.

7. I luo si ɓaa sɛnɛɓo

Luo gbũu kaa, ko kɔla wɔ̃ lɛɛ kɛ too gbuo, to a kɛ ko zo e ni sɛnɛɓoo mɔ. Zi kpɛɛ lɛ Zizɛ e sɛnɛɓo wɔ̃ sia ka kpanazɛ? Ko Mafiu 14:23 wa Maa 1:35 gee, ɛ̃ɛ̃ kɛ ko wɛĩlɔɔ ni o kea yiɓo: