PƐ MƐDÃPIA 10

Zi Kpɛɛ Lɛ Zihova La Kelavɔ Wa Pakiemɔ Nia E Bɛi Gbũua I Mɔ?

À DA YƐƁO PÍÉ

Kea waa i suo kɛ do Zihova la Kelavɔ wa pakiemɔɔ yi? E kɛa ií lo nɛ yia, tuo lɛɛ bɛi kɛɛ i la luo beĩzɛ i loa yia ka. Ii bɛi i yɛlɛtaa: ‘Mɛɛ o kɛ pakiemɔ nia yi? Mɛ e kɛ lɛ lɛ kpanazɛ? Mɛ e kɛ lɛ laa mɔ m lo yi?’ Ii lo zi lɛ lo pakiemɔ yi e bɛi gbũua i mɔ kɛ i nu Wala ka kɔɛ ɛ̃ɛ̃ i gbumɔ sɔlɔɓo a kololaa dãa pɛ mɛdãpia e kea yi.

1. Mɛɛ Zihova la Kelavɔ o mɔɔ lo ɓo pakiemɔ yi?

Ko zi lɛ Baabo bɛ̃ɛ̃-mi doo e wɔ̃ kpanazɛ lɛ ko mɔɔ lo ɓo pakiemɔ yia gee a kaa gɛ̃: “Mm lo Zihova tɔɓɔɔ la nukiela kpanazɛɛ yi.” (Sãã 26:12) Zi nɔ dooa kaa, lɛ Zihova la Kelavɔ ge e lia ye waa pa o kie mɔɔ. Kpoula lɛ seĩ mɔɔ, oo nu o kie ba lɔ́ɔ seĩ yi kɛ o Wala tɔɓɔ, o tã ɓo, ɛ̃ɛ̃ o sɛnɛɓo. Kɛɛ seĩ yia, oo nu o kie la pakiemɔ gbuo yi kɛ o gbini Zihova lɛɛ.

2. Mɛɛ i loa mɛdãa ko pakiemɔ nia yi?

Ye kɔaa lo pakiemɔ yia, ko yɛlɛ lɛ wɔ̃ o zɔ̃ɔ ko lɛɛ Wala Lewe yi, “waa yiɓo fɛfɛ le ɛ̃ɛ̃ waa da e yi kaa” pie. (Niomaya 8:8 gee.) Ye ɓaa kɛ lopia yia, ii lo pɛ mɛdãa e gbɛ̃a Zihova wa a zi yiikɔ yie yie nia mɔ. Ye ɓaa zi lɛ i lɔkpɔɔ lɛ a ka a mɔɔ wɔ̃ yidɔɔ, ii lo nuu a ka kɔɛ. Ii lo zi lɛ e bɛi gbũua i mɔ kɛ i kɛɓe lɛ a yi laa mɔɔ kɛɛ mɛdãa zeĩ.—Aazaya 48:17, 18.

3. Zi kpɛɛ lɛ ɓɛɛla kɛ pakiemɔ yi e bɛi gbũua i mɔ?

Zihova laa gee “kɔa kpaa kɔa kie ni mɔɔ wɔ̃ yi, kɛɛ kɔa gbũ kɔa kie ni mɔ, kɛ mia lɔ e kpɔ ko mɔ, ɛ̃ɛ̃ kɛ ko wɔ̃ yie kɛ. Yekɛ kɔa fĩĩ e nyɛ lo pakiemɔ mɔ pia.” (Hiibulu 10:24, 25) Ko pakiemɔ nia yia, ii lo mia lɛ o lɔkɛ kpokpo ɓo o kie ni ka lɛ ɓi lɛ ɓe, lɛ o naa o wɔ̃ bunuzɛ mɛdã e gbɛ̃a Wala mɔɔ gɛ̃ɛ yi. Ii lo kɛɛ mia fãawaa we lɛ e go Baabo yia mapia. (Woloma 1:11, 12 gee.) Ii lo mia lɛ o kelɛ, kiesimia wa mia lɛ oo doo ka lɛ o diepia wɔ̃ nyɔɔ yi geli kaa gɛ̃ɛ. Wɔ̃ ni lɛ Zihova a mɔɔ a gee ɓo ko pa ko kie mɔɔ do lɛɛ!

A PIE FOO

Wɔ̃ e kɛ Zihova la Kelavɔ wa pakiemɔ nia yia wa pɛ e kɛ lɛ laa mɔ ko dɔ gaa ko lo yia mɛdã.

4. Zihova la Kelavɔ wa pakiemɔ nia

Lɛ Tokɛlɛipiemia gã e gbɛ̃ɛ̃, o kɛ papia o kie mɔ teele waa gbini Zihova lɛɛ. (Woloma 16:3-5) Ko Kɔlɔsĩã 3:16 gee, ɛ̃ɛ̃ kɛ ko wɛĩlɔɔ e kea yiɓo:

Zi kpɛɛ lɛ Tokɛlɛipiemia beĩzɛɛ o kɛ gbinipia ka Zihova lɛɛ?

Pɛnɛɛ, Zihova la Kelavɔ oo pa o kie mɔ teele wa lɛ o gbini a lɛɛ yia mɔ nɔ kili. Kɛ i zi wa pakiemɔ nia laa kaa gɛ̃ɛ, ko VILOA gɛ̃. Ko nukielaa mɔɔ pakiemɔ bĩĩ gɛ̃ ɛ̃ɛ̃ kɛ ko wɛĩlɔɔ ni lɛ o to a piea yiɓo.

VILO: Mɛ E Kɛ Wala La Tomiala Kaa Wi? (2:12)

Mɛɛ wɔ̃ lɛ Kɔlɔsĩã 3:16 a gee, lɛ ɓa gɛ̃ aa kɛ Tomiala Kaa wi?
Kea i wɔ̃ gbɛɛ do gɛ̃ e gbɛ̃a pakiemɔɔ mɔ viloa yi, ɛ̃ɛ̃ a bĩĩa yi lɛ e i zo si kpokpo ɓoa?

Ko 2 Kɔleĩtĩã 9:7 gee, ɛ̃ɛ̃ kɛ ko wɛĩlɔɔ e kea yiɓo:

Mɛ e kɛ lɛ Zihova la Kelavɔ oó pɛlee ɓo mia mɔ wa pakiemɔ nia yi?

Ka ɓa pɛzɔ̃ɔ-mi ka lɛ gɛ̃ wɔ̃ o lo kɛɛ a geepia pakiemɔ ye e nua yia la.

Pakiemɔɔ a lɛ kpɛɛ lɛ e lo kɛɛ i lɛɛ sɛ kpokpo ɓo?

Ɓaa yidɔ?

Ii bɛi lɛ wa luo lɛ o pakiemɔ nia kũa kpoula lɛ seĩ mɔɔ gɛ̃ɛ jw.org la.

Oo Baabo yiwɔ̃ gee, to waa wɔ̃kɛzi-piegɔ̃-kɛɛ wa vilo ni zɔ̃ɔ ko pakiemɔ nia yi. Pakiemɔ nia zi lɛɛ gbɛ̃ ɛ̃ɛ̃ aa nyɛ tã wa sɛnɛɓoo ka
Ye waa ɓɔ pakiemɔɔ lɛ gbũu mɔɔ, oo mia suo kɛ to waa wɔ̃ɔ daa mɔ
Oo mia seĩ suo kɛ—mia wa o kɔpiemia, mia lɛ oó lee ɛ̃ɛ̃ gɔ̃ si nɛɛ, mia die ɛ̃ɛ̃ nɔɔɓe
Oó pɛ nɔɔfe go ko pakiemɔɔ wɛĩ. Zihova la Kelavɔ oó pɛlee ya mia wĩĩ ɛ̃ɛ̃ oó die mia pie pɛlee daa yi pɛ ka

5. Laa mɔ ko dɔ gaga kɛ ko lo pakiemɔ nia yi

Ko Zizɛ mia ni zi wɔ̃ gɔ̃aa gɛ̃. Kɛɛ seĩ kaa, e kɛa mɔ o taa maa 60 pie, waa tɔũ kũ waa yɔɔ e wɛlɛ Nazalɛ e lo Zulusalɛ kɛ o tĩĩ loo gbiniwalalɛɛ kaa wi. Ko Luu 2:39-42 gee, ɛ̃ɛ̃ kɛ ko wɛĩlɔɔ ni o kea yiɓo:

Ɓaa i yɛlɛtaaa, e kɛ lɔɔlɔɔ kɛ o lo Zulusalɛ o gbini Wala lɛɛ?
Mɛ e kɛ lɛ laa mɔ i dɔ gaga kɛ i lo pakiemɔ nia yi?
Ɓaa i yɛlɛtaaa, laa mɔ i lo pakiemɔ nia yi wɔ̃ e kɛ bɛ̃ɛ̃ gaaa ka? Mɛɛ wɔ̃ wɛĩ?

Baaboa laa gee lɛ kpokpo ɓo kpanazɛ kɛ ko pa ko kie mɔ ko gbini Zihova lɛɛ. Ko Hiibulu 10:24, 25 gee, ɛ̃ɛ̃ kɛ ko wɛĩlɔɔ e kea yiɓo:

Mɛ e kɛ lɛ laa mɔ ko lo pakiemɔ nia yi teele?

MIA DO OO GEE: “Ye koó lo pakiemɔ yia ye wa wɔ̃ ka. Ye nɔ i Baaboa gee i doo ka kalemɔɔ kɛ ye lɛ.”

Wɔ̃ gɔ̃a kpɛɛ lɛ e Baaboa yi, lɛ e wɔ̃ lɛ Zihova a naa a kaa zɔ̃ɔ?

WƆ̃Ɔ WŨ

Ye ɓaa kɛ lopia pakiemɔ nia yia, lɛɛ lo gbũu i mɔ kɛ i wɔ̃ bunuzɛ mɛdã e gbɛ̃a Zihova mɔ, lɛɛ lo ka ɓɛɛlaa mɛ kɛɛ gaga, ɛ̃ɛ̃ lɛɛ loa kɛɛ i da mia ye o toa ba ka gbini Zihova lɛɛ.