PƐ MƐDÃPIA 11

Zi I Bɛi Baaboa Geea Kɛ E Gbũ I Mɔ Kpokpo Ɓoa

À DA YƐƁO PÍÉ

Kea ɓaa ya do i ge i yɛɓo gbuo do kɛ lɛ aa kɛɛ e kɛ gaga i lɛɛ? Kɛ a kɛɛ e kɛ lɔɔ-lɔɔɔ, i gbɛ̃ leĩ ɓaa yɛɓoa si e ɓeĩ ɓeĩ ka ɓaa kɛ. Zi nɔ dooa lɛ Baaboa geee lɛ a kaa. Ii bɛi i yɛlɛtaa, ‘Zi kpɛɛ lɛ m bɛi a gã gbɛ̃ɛ a ka?’ Pɛ mɛdãpia e kea yia, koo lo wɔ̃ kelekele ni lɛ i bɛia kɛɛ kɛ e gbũ i mɔ kɛ i ɓa Baabo mɛdãa nyɔnɔ sia do gɛ̃ɛ.

1. Mɛ e kɛ lɛ laa mɔ ko kɛ Baaboa geepia teele?

Mi lɛ e Baabo, ɛ̃ɛ̃ Zihova la “lɔɔ pulua” gee teelea, a ge lɛɛ lo lii. (Zĩĩ 1:25 gee.) Kɛ ɓa zi gbɛ̃ɛ, i luo ɓeĩ si ɓaa gee lɛkpɛi seĩ ka. Ye ɓaa kɛ lɛ gɛ̃pia Wala Lewea la teelea, ii lo ɓa Baaboa geee nyɔnɔ sii kpokpo ɓo.

2. Mɛɛ wɔ̃ lɛ ko bɛia kɛɛ kɛ e gbũ ko mɔ ko Baabo geee yi?

Kɛ ko gbumɔ sɔlɔɓo ko Baabo geee kolo laa, laa mɔ ko dɔ e ɓeĩ ka ɛ̃ɛ̃ ko ko yɛlɛtaa e gbɛ̃a wɔ̃ ko geea mɔ. Laa mɔ ko kɛa geepia ɛ̃ɛ̃ kɔaa ko “yɛlɛtaa yi.” (Zasua 1:8, NWT gãwikii) Ye ɓaa kɛa geepiaa, i wɛĩlɔɔ ni o kea kɛ: ‘Mɛɛ wɔ̃ lɛ e a zɔ̃ɔ m lɛɛ e gbɛ̃a Zihova Wala mɔ? Zi kpɛɛ lɛ m bɛi wɔ̃ e kea daá yɛɓo pie m kɛɓe yi? Zi kpɛɛ lɛ m bɛi a lonipia nia daá yɛɓo pie kɛ m gbũa mia ye o toa mɔ?’

3. Zi kpɛɛ lɛ i bɛi luo sii a ka kɛ i Baaboa gee?

Kea lɛ gaga kɛ i luo si i Baaboa gee? Ko bunuzɛ koo kɛ. “Ka dɔ gaga ka yɛɓo yie kɛ luo lɛ e ka kɛlɛɛ pie.” (Ifisɔ̃ 5:16) Ii bɛia kɛɛ kili, ye ɓaa luo kpokpo lɛ i bɛi Baaboa geee a ka luo seĩ kaa sia ka. Mia do oo luo si waa Baaboa gee laapie. Mia do oo luo si nyɛnɛi waa gee wa fĩĩdɔ luo ka. Kɛɛ mia do oo wa Baaboa gee nyɛŋɛipie kɛ o tĩa loo yi ba. Luo kpɛɛ lɛ e lo kɛɛ sɛ i wɛĩ?

A PIE FOO

Lɛ zi i bɛi a kɛɛa kɛ i ɓa Baabo geee nyɔnɔ si kpokpo ɓoa mɛdã. Zi i bɛi i die pɛkɛɛa kpokpo ɓo sɛ, kɛ i gbumɔ sɔlɔɓo ɓa Baabo mɛdãa kolo laa gɛ̃.

Lɛ zi nɔ kɔa lɔkɛ leɓele gbɛɛ gbɛɛ ɓele ka mɛdãa kaa, zi nɔ dooa, lɛ kɔa Baaboa gee kɔ lɛ e loa kɛɛ kɛ kɔa a nyɔnɔ sia mɛdãa kaa

4. Zi i bɛi ɓa Baaboa geee a ka kɛ ɓa nyɔnɔ sia mɛdã

Lɛɛ́ lo leĩ kɛɛ lɔɔ-lɔɔ kɛ i gbɛ̃ Baaboa geee ka. E kɛ bɛ̃ɛ kilia, koo bɛi lɔkɛɛ Baaboa gee ka lɛ zi nɔ leɓele dɛɛ ɓele lɔ e mi kɛaa lɛ ɓe. Ko 1 Pilɛ 2:2 gee, ɛ̃ɛ̃ kɛ ko wɛĩlɔɔ e kea yiɓo:

Kea ɓaa yidɔ kelɛ ye ɓaa kɛ Baaboa geepia luo seĩ kaa ii loa nyɔnɔ sii ɛ̃ɛ̃ ii loa naa ɓa gee e diea yi?

Ko VILOA gɛ̃, kɛ ko zi lɛ mia do o gbɛ̃ waa Baaboa geee nyɔnɔ si a kaa gɛ̃, ɛ̃ɛ̃ kɛ ko wɛĩlɔɔ ni lɛ o toa piea yiɓo.

VILO: Mia Dɛɛ Waa Mɛdã Kɛ O Lɔkɛ Wala Lewe Ka (5:33)

Viloa yia, wɔ̃ gaa-gaa ni kpɛɛ lɛ mia dɛɛ o die a yi pie?
Mɛɛ e gbũ o mɔ kɛ o kunu wa Baaboa geee mɔ teele?
Zi kpɛɛ lɛ o wa Baaboa geee kɛa kpokpo ɓo nyɔnɔ nyɔnɔzɛ?

Wɔ̃ ni lɛ o lo gbũu i mɔ kɛ ɓa zi gbɛ̃ɛ:

Baabo lɛ a laniɛ lɛ we lɛ mia o gee pɛnɛɛ yi lɛ lɛ wana zɛɛ si. Baabo lɛ o si New World Translation yidã, e kɛa lɛ i pa we yia.
Beĩzɛɛ i gbɛ̃ Baaboa geee ka a lɛ ye e i zo si kpokpo ɓoa la. Kɛ a gikã e kɛ i kɛlɛɛ, i a gɔ̃a e kea gɛ̃ “Gbɛ̃ Baaboa Geee Ka.”
A lɛ ɓa geea kpɔ i yɛlɛpie. I “Ɓa Baabo Geee Kpɔ I Yɛlɛpie” lɛ e kii e kea yia da yɛɓo pie.
JW Library^®app da yɛɓo pie. A kaa, ii bɛi Baaboa gee ɛ̃ɛ̃ i too dɔɔ a gee we nia mɔ lɛ nɔɔfe ɓaa mɔɔ mɔ fɔ̃ɔ̃ lɛ e lo fãalaa ka.
I appendix lɛ e New World Translation yia da yɛɓo pie. Lɛ-bĩĩ ni wa pɛ-bĩĩ gbɛɛ gbɛɛ ɛ̃ɛ̃ tɔ doo do yiɓopia lɛ e bɛi ɓa Baabo geee kɛɛ nyɔnɔ zɛɛ o yi.

5. I die pɛkɛ ɓa Baabo mɛdãa wɛĩ

Ko Sãã 119:34 gee, ɛ̃ɛ̃ kɛ ko wɛĩlɔɔ e kea yiɓo:

Mɛ e kɛ lɛ lɛ sɛ ko sɛnɛɓo kɛ ko tĩa Baaboa geee ɛ̃ɛ̃ ko ko die pɛkɛ ko Baabo mɛdãa wɛĩ?

Zi kpɛɛ lɛ i bɛi a kɛɛa kɛ i gbumɔ kpokpo sɔlɔɓo a mɛdãpiaa mɔ doo doo le? Ye ɓaa kɛ i die pɛkɛpia a mɛdãpia nia wɛĩa, i dɔ gaa i to wɔ̃ ni o kea pie:

A ɓɛlɛkpo ni lɛ o pɛ mɛdãpiaa leɓopiaa mɔɔ gee.
Lɛ gɛ̃ Baaboa wekpo nia mɔ ɓa gee, ɛ̃ɛ̃ dɔ gaa i zi lɛ a gbɛ̃ɛ laa wɔ̃ ɓa geea mɔɔ yima.
I i pie kɛ wekpo ni lɛ o wɛĩlɔɔ yiɓo doo dooa mɔ; lɛɛ lo gbũu i mɔ kɛɛ ka ɓa pɛzɔ̃ɔ mi ka wɔ̃ gee e gbɛ̃a mɔ.

Ɓaa yidɔ?

Zihova la Kelavɔ waa Baabo laniɛ zɛ gbɛɛ gbɛɛ da yɛɓo pie. E kɛ bɛ̃ɛ kilia, koo ko kɔya New World Translation of the Holy Scriptures wi, ɓii lɛ wana zɛ, lɛ lɔɔ-lɔɔ, ɛ̃ɛ̃ Wala tɔ laa yi.—A gɛ̃ jw.org la “Kea Zihova la Kelavɔɔ Die Wa Baabo Lɛ Ɓe?”

MIA DO OO GEE: “Baaboa mɛdãa lɛ yɛɓo gaa ka. Luo wa fãawaa wá m kɛlɛ a wɛĩ.”