PƐ MƐDÃPIA 17

Kea Zizɛ Kɛkɔ Lɛ Kpɛ?

À DA YƐƁO PÍÉ

Ye kɔaa kɛ pɛ mɛdãpia e gbɛ̃a wɔ̃ lɛ Zizɛ a gee ɛ̃ɛ̃ a kɛɛ mɔɔ, laa kɛ kɔaa gãã wa e Daa Zihova ka kɔɛ. Mɛɛ e yiikɔ yie yie nia do ka? Zi kpɛɛ lɛ ko bɛi tooa Zizɛ zi yiikɔ nia pie ko kɛɓe yi?

1. Zi kpɛɛ lɛ Zizɛ lɛ a ka lɛ a Daa lɛ ɓe?

Lɛ Zizɛ e kɛ lɛi sɛlɛ yia, e pɛ mɛdã e lɔkɛa Daa Zihova kɛlɛ kɛɛ lɛɛkɔɛi bunu bunuzɛ pie. A mɔɔ wɔ̃ mɔɔ, lɛɛ e yɛlɛtaa, ɛ̃ɛ̃ aa wɔ̃ kɛ nɔ lɛ e Daa lɛ ɓe. (Zɔ̃ɔ̃ 5:19 gee.) Zizɛ e to e Daa yiikɔ yie yiea pie nɔ kpale, lɛ a mɔɔ a gee ɓo: “Mi lɛ aa m gɛ̃ɛ, kɛɛ aa mia Daa ɓɛ gɛ̃.” (Zɔ̃ɔ̃ 14:9) Ye ɓaa pɛ mɛdã e gbɛ̃a Zizɛ yiikɔ yie yie nia mɔɔ, ii lo Zihova dɔɔ sɛ. A gɔ̃a gɛ̃, zi mia yeĩ e kɛa Zizɛ mɔɔ, lɛɛ zi mia kpaa laa Zihova mɔɔ zɔ̃ɔ.

2. Zi kpɛɛ lɛ Zizɛ a zɔ̃ɔa kelɛ laa lɔkɛ Zihova ka?

Zizɛ a gee: “Lɛ a mɔ kɛɛ kpoula e a yidɔ kelɛ mia Daa lɔkpɔɔ lɛ m mɔ. Pɛ a kɛ lɛ m wɔ̃ seĩ kɛ lɛ zi a geea m lɛɛ lɛ ɓɛ.” (Zɔ̃ɔ̃ 14:31) Lɛ Zizɛ e kɛ kpoulaa, a zɔ̃ɔ kelɛ a Daa lɔkpɔɔ lɛ a mɔ kpokpo ɓo a we kɛɛ ka lɛ bɛ̃ɛ̃ lɛ e kɛ gaga a kɛ kilia ka. Zeniia, Zizɛ a lɔkɛ e Daa ka kpokpo ɓo ɛ̃ɛ̃ e kɛ wɔ̃ geepia e gbɛ̃a mɔ kɛ e gbũ mia ye o toa mɔ o gãã a ka kɔɛ.—Zɔ̃ɔ̃ 14:23.

3. Zi kpɛɛ lɛ Zizɛ a zɔ̃ɔa kelɛ laa lɔkɛ miagbunu ka?

Baaboa laa gee kelɛ “Zizɛ laa lɔkɛ miagbunu ka die ɓo.” (Pɔlɔvɛɛ 8:31, gãwikii) E lɔkɛamɔ e kea zɔ̃ɔ mia fãawaa ka, aa gbumɔ nɔ o lɛɛ. Kpalewɔ̃ ni lɛ a kɛɛ, lɛɛ́ gbaa nɔ la yikɛgaa zɔ̃ɔ, kɛɛ a zɔ̃ɔ kelɛ mia yeĩ laa mɔ. (Maa 1:40-42) Lɛɛ́ gbaa miaɓomiaba kɛ, a sɔ̃ɔ̃ e kɛ sɛ. Wɔ̃ lɛ a geea, e mia lɛ o zo pie e kɛ sɛɛ nɛɛnɛɛ ɛ̃ɛ̃ e zokɛpɛmɔ nɔ o lɛɛ lɛ oo too dɔ a mɔɔ ka. Zizɛ die pɛkɛɛ e kɛa kɛ e wàa ɓele ɛ̃ɛ̃ e ga, ɓii laa lɔkɛ miagbunu kaa wɛĩ. Kɛɛ a lɔkɛ kpokpo ɓo mia lɛ o kɛ topia la pɛzɔ̃ɔkɔ piea ka.—Zɔ̃ɔ̃ 15:13, 14 gee.

A PIE FOO

Pɛ mɛdã e gbɛ̃a Zizɛ sɔ̃ɔ̃ mɔ. Zi i bɛi lɔkɛamɔ zɔ̃ɔa ɛ̃ɛ̃ wɔ̃ yie kɛɛa lɛ zi a kɛaa gɛ̃.

4. Zizɛ A Lɔkɛ E Daa Ka

Zizɛ la wɔ̃ gɔ̃aa, lɛɛ zi lɛ ko bɛi lɔkɛamɔ zɔ̃ɔa Wala lɛɛ zɔ̃ɔ ko lɛɛ. Ko Luu 6:12 wa Zɔ̃ɔ̃ 15:10; 17:26 gee. Ye kɔaa nyɛ Baabo wekpo nia geee mɔ doo doo lea, koo lo wɛĩlɔɔ e kea yiɓoo:

Zi kpɛɛ lɛ ko bɛi Zizɛ piegɔ̃ɔ a ka kɛ ko zɔ̃ɔ kelɛ koo lɔkɛ Zihova ka?

Zizɛ a lɔkɛ e Daa lɛ e lɛia ka ɛ̃ɛ̃ e kɛ weepia a pie teele sɛnɛɓoo yi

5. Mia lɛ o naa gbumɔ kaa, o yeĩ lɛ Zizɛ mɔ

Zizɛ e mia ye o toa mɔɔ wɔ̃ si beĩzɛ e diea a die mɔɔ wɔ̃ la. Ye bɛ̃ɛ̃ lɛ luo lɛɛ́ gbaa kɛ a kelɛ kɛ e e fĩĩdɔɔ, e dɔ gaa kɛ e gbũ mia mɔ. Ko Maa 6:30-44 gee, ɛ̃ɛ̃ kɛ ko wɛĩlɔɔ ni o kea yiɓo:

Zi kpɛɛ lɛ Zizɛ a zɔ̃ɔa kelɛ mia kpaa lɛ a mɔ?—A lonipia 31, 34, 41, wa 42 gɛ̃.
Mɛ e pa Zizɛ mɔ kɛ e gbũ mia mɔ?—A lonipia 34 gɛ̃.
Ɓii Zizɛ lɛɛ to e Daa yiikɔ yie yiea piea, mɛɛ wɔ̃ lɛ a zɔ̃ɔ i lɛɛ e gbɛ̃a Zihova mɔ?
Zi kpɛɛ lɛ ko bɛi mia kpaa kɛ Zizɛ mɔɔ piegɔ̃ɔ a ka?

6. Zizɛ sɔ̃ɔ̃ lɛ sɛ

Zizɛ sɔ̃ɔ̃ e kɛ sɛ ye bɛ̃ɛ̃ lɛ pɔɔ ku gbuozɛ lɛɛ́ gbaa kɛ a kɛlɛɛ ka, ɛ̃ɛ̃ e ko fãawaa kɛ ko sɔ̃ɔ̃ e kɛ sɛ. Ko Apɔsɔlɔ 20:35 gee, ɛ̃ɛ̃ kɛ ko wɛĩlɔɔ e kea yiɓo:

Lɛ zi lɛ Zizɛ a gee a kaa, zi kpɛɛ lɛ ko bɛi kɛɛa gelizɛ?

Ko VILOA gɛ̃, ɛ̃ɛ̃ kɛ ko wɛĩlɔɔ e to a piea yiɓo.

VILO: “Geli Lɛ Pɛ Nɔ Mia Lɛɛ Yi Gbuo”—Pɛ̃ɛ̃-kpuu ɓoa-mɔ-zɛ (4:00)

Zi bunuzɛ kpɛɛ lɛ ko bɛi pɛ ɓooa ko kɔle kɔaa nɔ, ye bɛ̃ɛ̃ lɛ pɛ wa ko kɛlɛ kpãkpãa ka?

Ɓaa yidɔ?

Baaboa laa gee ko sɛnɛɓo Zihova lɛɛ Zizɛ tɔ yi. (Zɔ̃ɔ̃ 16:23, 24 gee.) Ye kɔaa sɛnɛɓo zi e kilia kaa, lɛɛ lo a zɔ̃ɔ kelɛ koo Zizɛ zuo ɓo wɔ̃ lɛ e a kɛ ko lɛɛ, kɛɛ ko kɛ Zihova ɓɛɛ kaa wɛĩ.

MIA DO OO GEE: “Wàa ko ɓelea ko kpaa wá Wala mɔ.”