PƐ MƐDÃPIA 18
Zi Ko Bɛi Tokɛlɛipiemia Die Kpokpo Dɔɔ A Kaa
Mia lɛɛkɔɛi bunuzɛ oo o die si Tokɛlɛipiemia. Kɛɛ wɔ̃ o si wana kaa wa o zi yiikɔ nia ye wa doo. A mɔɔ wɔ̃ mɔɔ, zi kpɛɛ lɛ kɔa bɛi Tokɛlɛipiemia die kpokpoa dɔɔ a ka?
1. Deĩ mia lɛ o Tokɛlɛipiemia ka?
Tokɛlɛipiemia o mia lɛ o to Zizɛ piea ka. (Apɔsɔlɔ 11:26 gee.) Zi kpɛɛ lɛ o zɔ̃ɔa kelɛ o Zizɛ la Toapiemia ka? Zizɛ a gee: “Ye kaa lo lie wɔ̃ m geea kɛɛ kaa, kɛɛ ka to m pie mia kpokpo ka.” (Zɔ̃ɔ̃ 8:31) A yi lɛ e kelɛ laa mɔ Tokɛlɛipiemia die kpokpoa o to pɛ Zizɛ a zɔ̃ɔɔ pie. Wɔ̃ lɛ Zizɛ e kɛa zɔ̃ɔpiaa, e kɛa sipia Baaboa yi teele. La Toapiemia die kpokpoa oo wɔ̃ nɔ dooa kɛ.—Luu 24:27 gee.
2. Zi kpɛɛ lɛ Tokɛlɛipiemia die kpokpoa o lɔkɛamɔ zɔ̃ɔ a ka?
Zizɛ a gee la Toapiemia lɛɛ: “Ka kie ni lɔ e kpɔ ka mɔ, lɛ zi ka lɔkpɔɔ lɛ a ka m mɔɔ lɛ ɓe.” (Zɔ̃ɔ̃ 15:12) Zi kpɛɛ lɛ Zizɛ a zɔ̃ɔa kelɛ la toapiemia lɔkpɔɔ lɛ a mɔ? E luo si kɛ wa ye ni o kɛ o kie ba, e o fãawaa, ɛ̃ɛ̃ e gbũ o mɔ. E la kɛɓe nɔ o wɛĩ. (1 Zɔ̃ɔ̃ 3:16) Zi nɔ dooa kaa, mia o Tokɛlɛipiemia die kpokpo kaa oó wɔ̃ gee nɔ e gbɛ̃a lɔkɛamɔ doo mɔ. Zi o wɔ̃ geea ɛ̃ɛ̃ waa wɔ̃ kɛ a kaa, laa zɔ̃ɔ kelɛ oo lɔkɛ o kie ni ka.
3. Yɛɓo kpɛɛ lɛ Tokɛlɛipiemia die kpokpoa waa kɛpia?
Zizɛ e yɛɓo nɔ la toapiemia lɛɛ. “E o vɔ kɛ o Wala zi Tomialaa wɔ̃ gee loũ ka.” (Luu 9:2) Tokɛlɛipiemia o kɛ mɔɔ, oó gbaa Wala lewe gee nɔ wa gbini Wala lɛɛ kaa wi. Kɛɛ, wa gee pɛlɛzei lɛ ye e toa mɔ ɛ̃ɛ̃ mia pie kɛi pie. (Apɔsɔlɔ 5:42; 17:17 gee.) Tokɛlɛipiemia die kpokpoa oo wɔ̃laũ yie gee nɔ kili lɛ nɔɔfe lɛ o mia gɛ̃ yia mɔ pɛnɛɛ. Oo lɔkɛ o yasɔnɔmia ka. A mɔɔ wɔ̃ mɔɔ, o ge lɛɛ li kɛ o luo wa yikɛgaa lɛ e o kɛlɛɛ si kɛ o zokɛpɛmɔ wa mia nɛɛnɛɛ we lɛ e Baaboa yia zɔ̃ɔ mia lɛɛ.—Maa 12:31.
A PIE FOO
Zi lɛ i bɛi Tokɛlɛipiemia die kpokpoa dɔɔa mia lɛ oó to Zizɛ la pɛzɔ̃ɔkɔ wa wɔ̃ gɔ̃a nia piea gɛ̃.
4. Oo o nyiɛ kpɔ wana wɔ̃ lɛ e Baabo yia ka
Tokɛlɛipiemia o kɛ mɔɔ o Wala Lewe si kpanazɛ
Mia o gee o Tokɛlɛipiemia kaa o seĩ wá kɛ o wana wɔ̃ lɛ e Baabo yia si kpanazɛ. Ko VILOA gɛ̃, ɛ̃ɛ̃ kɛ ko wɛĩlɔɔ e to a piea yiɓo.
-
Mɛɛ wɔ̃ lɛ mia oo die si Tokɛlɛipiemiaa do waa kɛ kɛɛ o mia tea pɛ Zizɛ a zɔ̃ɔɔ mɛdãa mɔ?
Zizɛ e wana wɔ̃ lɛ e go Baabo yia zɔ̃ɔ. Ko Zɔ̃ɔ̃ 18:37 gee, ɛ̃ɛ̃ kɛ ko wɛĩlɔɔ e kea yiɓo:
-
Lɛ zi lɛ Zizɛ a gee a kaa, zi kpɛɛ lɛ ko bɛi Tokɛlɛipiemia lɛ o “wana wɔ̃ pie zaaa dɔɔ a ka”?
5. Oo wana wɔ̃ lɛ e Baabo yia zɔ̃ɔ
Tokɛlɛipiemia o wɔ̃laũ yiea gee mia ye o toa lɛɛ
Kɛ Zizɛ e to lopia lɛia, e yɛɓo nɔ la toapiemia lɛɛ lɛ waa kɛpia pɛnɛɛ. Ko Mafiu 28:19, 20 wa Apɔsɔlɔ 1:8 gee, ɛ̃ɛ̃ kɛ ko wɛĩlɔɔ e kea yiɓo:
-
Mɛɛ zaa lɛ o lo ɓɔɔ wɔ̃laũ yie gee yɛɓoa ka yi ɛ̃ɛ̃ luo kpɛɛ lɛ e lo nyɛɛa?
6. Oo to pɛ o zɔ̃ɔɔ pie
Zi kpɛɛ lɛ Tɔ̃ɔ̃ a yidɔa kelɛ aa Tokɛlɛipiekɔ die kpokpoa gɛ̃? Ko VILOA gɛ̃, ɛ̃ɛ̃ kɛ ko wɛĩlɔɔ ni lɛ o to a piea yiɓo.
-
Viloa yia, zi kpɛɛ lɛ mia wa gbini Wala lɛɛ kɔɔ e Tɔ̃ɔ̃ zodaa zizaa?
-
Mɛ e kɛ lɛ a yidɔ kelɛ aa wana wɔ̃ɔ gɛ̃?
Mia oo wɔ̃ ɓa kɛɛ si kpanazɛ e diea wɔ̃ ɓa geea la. Ko Mafiu 7:21 gee, ɛ̃ɛ̃ kɛ ko wɛĩlɔɔ e kea yiɓo:
-
Mɛɛ wɔ̃ lɛ lɛ kpanazɛ Zizɛ lɛɛ—wɔ̃ ko si wana kaa lɛee, maa wɔ̃ ko kɛɛ lɛ?
7. Oo lɔkɛ o kie ni ka
Tokɛlɛipiemia o lɔ e kpɔ o kie ni mɔ
Kea Tokɛlɛipiemia waa dɔ gaga o leege vɔ wɛĩ e kɛ bɛ̃ɛ̃ lɛ e lo wa kɛɓe wɔ̃ duo a yia ka? Ko VILOA gɛ̃, ɛ̃ɛ̃ kɛ ko wɛĩlɔɔ ni lɛ o to a piea yiɓo.
-
Viloa yia, mɛɛ e pa Loya mɔ lɛ e la kɛɓe wɔ̃ da tãã e leege Zohãsĩ wɛĩ?
-
Ɓaa i yɛlɛtaaa, e wɔ̃ kɛ lɛ Tokɛlɛipiemi die kpokpo lɛ ɓe?
Ko Zɔ̃ɔ̃ 13:34, 35 gee, ɛ̃ɛ̃ kɛ ko wɛĩlɔɔ ni o kea yiɓo:
-
Zi kpɛɛ lɛ Zizɛ la toapiemia (Tokɛlɛipiemia die kpokpo) o mia lɛ o kpolo kɛkɔ lɛ gbɛɛ ɛ̃ɛ̃ lɛ o go sɛlɛ gbɛɛ yia gɛ̃ a ka?
-
Zi kpɛɛ lɛ o bɛi a kɛɛa kili gele luo ka?
MIA DO OO GEE: “Tokɛlɛipiemia waa wɔ̃ yɔɔ yɔɔ minizɛ kɛ —zi kpɛɛ lɛ o bɛi kɛɛa gbini Wala lɛɛ mia wana zɛ ka?”
-
Baabo lɛ kpɛɛ lɛ i bɛia zɔ̃ɔ mi lɛɛ kɛ e zi lɛ ko bɛi Tokɛlɛipiemia die kpokpoa dɔɔ a kaa gɛ̃?
WƆ̃Ɔ WŨ
Tokɛlɛipiemia die kpokpo oo to wɔ̃ lɛ Baabo a zɔ̃ɔɔ pie, oo die-kpaa-nyɛa-mɔ lɔkɛa, wa wana wɔ̃ lɛ e Baabo yia zɔ̃ɔ.
Zovuo Wɔ̃
-
Wɔ̃ Tokɛlɛipiemia die kpokpo o si wana kaa gã gbɛ̃ɛ̃ lɛ mɛɛ la?
-
Yiikɔ kpɛɛ lɛ a zɔ̃ɔ kelɛ o Tokɛlɛipiemia die kpokpo ka?
-
Mɛɛ yɛɓo lɛ Tokɛlɛipiemia die kpokpo o kɛ?
I NYIƐ KPƆ
I pɛ mɛdã e gbɛ̃a mia kpo lɛ o to Zizɛ zi wɔ̃ gɔ̃a ɛ̃ɛ̃ pɛzɔ̃ɔkɔ nia piea mɔ.
I pɛ e gbũ lee do lɛ e go gbini Wala lɛɛ kɔ gbɛɛ yia mɔ kɛ e da mia o Tokɛlɛipiemia die kpokpo kaa baa gɛ̃.
“O M Wɛĩlɔɔ Seĩ Lɛ Ma Kɛɛ Yiɓo Baaboa Yi!” (Wɔ̃lagɛ̃kamaa, Duo 1, 2014)
Zi lɛ Tokɛlɛipiemia die kpokpo o lɔkɛamɔ zɔ̃ɔa o leege vɔ lɛ o naa gbumɔ kaa lɛɛ gɛ̃.
Koo Gbumɔ Nɔ Ko Leege Vɔ Lɛɛ Ye Kɔi Aa Daa Ka—Pɛ̃ɛ̃-kpuu Ɓoa-mɔ-zɛ 3:57
Wɔ̃ lɛ Tokɛlɛipiemia o kɛ mɔɔ wa kɛ, ɛ̃ɛ̃ lɛ Tokɛlɛipiemia die kpokpo o pɛnɛɛ waa kɛpia, lɛ Zizɛ a gee lɛɛ loa zɔ̃ɔ kelɛ o la toapiemia kaa gɛ̃.
“Tokɛlɛipiemia Wana Zɛ Dɔa Nia Lɛ O Mɛɛ Ka?” (Wɔ̃lagɛ̃kamaa, Vuusie 1, 2012)