PƐ MƐDÃPIA 19

Kea Zihova la Kelavɔ O Tokɛlɛipiemia Die Kpokpo Ka?

À DA YƐƁO PÍÉ

Ko kɛ Zihova la Kelavɔ kaa, koo yidɔ kelɛ ko Tokɛlɛipiemia die kpokpo ka. Mɛ e kɛ lɛ ko gee kili? Wɔ̃ ni lɛ ko si wana kaa, ko tɔ lɛ e ko kɛ gbɛɛ, ɛ̃ɛ̃ lɔkɛamɔ lɛ ko zɔ̃ɔ ko kie ni lɛɛ, pɛ a gã gbɛ̃ɛ̃ lɛ a laa gɛ̃.

1. Wɔ̃ ni lɛ Zihova la Kelavɔ o si wana kaa gã gbɛ̃ɛ̃ lɛ mɛɛ la?

Zizɛ a gee: “[Wala] lewe lɛ e wɔ̃ wanazɛ e kilia kaa.” (Zɔ̃ɔ̃ 17:17) Lɛ Zizɛ lɛ ɓea, Zihova la Kelavɔ waa gbɛ̃ mɔ wɔ̃ o si wana kaa gã gbɛ̃ɛ̃ ka Baaboa la. I zi lɛ kɔaa gbɛ̃ mɔ a kɛɛ ka e ɓɔa pɛnɛɛ mɔɔ gɛ̃. Kɛɛ 1900 lienyɛpiaa, mia kpo lɛ o kɛ Baabo mɛdã mia kaa, o gbɛ̃ waa wɔ̃ lɛ a bɛ̃ɛ̃ɛ e kea Baabo yia mɛnyɛ kpokpo ɓo. O wɔ̃ lɛ o si wana kaa gã gbɛ̃ wɔ̃ a geea la, e kɛ bɛ̃ɛ̃ lɛ lɛ gbɛɛ Wala mia ye o toa wa pɛzɔ̃ɔkɔ piea ka. Ye e kɛɛ, o gbɛ̃ waa wɔ̃ wa mɛdãa gee mia ye o toa lɛɛ. a

2. Mɛ e kɛ lɛ ko ko die si Zihova la Kelavɔ?

Zihova lɛɛ mia lɛ o gbini a lɛɛ si la kelavɔ, ɓii oo wana wɔ̃ lɛ a gbɛ̃ɛ̃ laa mɔɔ gee. (Hiibulu 11:4–12:1) A gɔ̃a gɛ̃, mɔ zeea, Wala a gee la mia ni lɛɛ: “Ka m kelavɔ ka.” (Aazaya 43:10 gee.) Oo Zizɛ si “Kela Zodɔamɔzɛ.” (Wɛlɛvelesɔ̃ 1:5) A mɔɔ wɔ̃ mɔɔ, kɛɛ 1931 yia, ko tɔ lɛ e Zihova la Kelavɔ kaa si. Lɛɛ ko geli die ɓo kɛ tɔ e kilia e kɛ ko mɔ.

3. Zi kpɛɛ lɛ Zihova la Kelavɔ o toa Zizɛ la lɔkɛamɔɔ pie?

Zizɛ a lɔkɛ la toapiemia ka kpokpo ɓo ɛ̃ɛ̃ o kɛ nɔ lɛ a mia ni lɛ ɓe. (Maa 3:35 gee.) Zi nɔ dooa lɛ Zihova la Kelavɔ waa ka o kie ba kpoula lɛ seĩ mɔɔ. Pɛ e kɛ lɛ ko ko kie ni si leege vɔɔ lɛ ɓɛ. (Falima 1, 2) Zeniia koo to wɔ̃ e kea pie: “Ka leege vɔ lɔ e kpɔ ka mɔ.” (1 Pilɛ 2:17) Zihova la Kelavɔ oo lɔkɛamɔ e kea zɔ̃ɔ zi bunuzɛ ka, kelɛ gbumɔ nɔ ko leege vɔ lɛɛ kpoula lɛ seĩ mɔ ye waa naa gbumɔ kaa ka.

A PIE FOO

Wɔ̃ a gbɛ̃ɛ̃ lɛ Zihova la Kelavɔ mɔɔ mɛdã kɛ i pɛ a zɔ̃ɔ kelɛ o Tokɛlɛipiemia die kpokpo kaa gɛ̃.

Tokɛlɛipiemia die kpokpoa, wa wɔ̃ o si wana kaa lɛɛ go Baaboa yi, ɛ̃ɛ̃ oo zɔ̃ɔ mia ye o toa lɛɛ

4. Wɔ̃ ni lɛ ko si wana kaa lɛɛ go Baaboa yi

Zihova a gee mɔ kelɛ wana wɔ̃ lɛ e Baabo yia lɛɛ lo kɛɛ seĩ seĩ. Ko Danya 12:4 wa a gãwikiia gee, ɛ̃ɛ̃ kɛ ko wɛĩlɔɔ e kea yiɓo:

Mɛɛ wɔ̃ lɛ Wala la mia ni o loa yimaa “e la gbuozɛ ka” ye waa kɛ Baaboa mɛdãpiaa ka?

Zi lɛ Saa Wɔlɔsɔ wa e ɓɛĩ Baabo mɛdã mia o Wala Lewe mɛdã a kaa gɛ̃. Ko VILOA gɛ̃, ɛ̃ɛ̃ kɛ ko wɛĩlɔɔ e to a piea yiɓo.

VILO: O Lɛɛɓo Wana Wɔ̃ Lɛ E Baabo Yia La Zeĩ (7:45)

Viloa yia, zi kpɛɛ lɛ Saa Wɔlɔsɔ wa e ɓɛĩ Baabo mɛdã mia o Baaboa mɛdã a ka?

Ɓaa yidɔ?

Luo do kaa, koo wɔ̃ ni lɛ ko si wana kaa do ɓeĩ mɛvɔɔ. Mɛ e kɛ lɛ ko kɛ kili? Lɛ zi nɔ lɛ e kpɛi a ka sɛ-sɛ lea, lɛ Wala a kɛ kɔaa a Lewe yima a ka sɛ-sɛ lea. (Ko Pɔlɔvɛɛ 4:18 gee.) Yeɓoa, Baaboa mɛ lɛɛ́ vɔɔ, kɛɛ koo ko wɔ̃ ni lɛ ko si wana kaa ɓeĩ mɛvɔɔ ye kɔaa kɛ Baaboa yimapia kpokpo ɓoa ka.

5. Koo ko tɔɔ mɔɔ yii ɓo

Mɛ e kɛ lɛ ko tɔ lɛ e Zihova la Kelavɔ kaa si? Ko VILOA gɛ̃, ɛ̃ɛ̃ kɛ ko wɛĩlɔɔ e to a piea yiɓo.

VILO: Ko Tɔɔ Lɛɛ Mia Ko A Kaa Zɔ̃ɔ (2:40)

Mɛ e kɛ lɛ tɔ e Zihova la Kelavɔ kaa lɛ kpeĩ?

Mɛ e kɛ lɛ Zihova aa mia si kɛɛ o kɛ la mia ni ka? Oo lo a zɔ̃ɔ kelɛ a ye lɛ e Wala wana zɛɛ kaa, ɓii mia waa nɛ bunuzɛ kpɔ a mɔɔ wɛĩ. Ko lɛ gɛ̃ nɔ nɛ wɔ̃ nia peelɛ mɔ.

Gbini Wala lɛɛ kɔ bunuzɛ lɛɛ pɛzɔ̃ɔ la mia ni lɛɛ kelɛ Wala laa naa o pɛbĩĩ si waa gbinia a lɛɛ. E kɛ bɛ̃ɛ̃ kilia, ko Livelekɔ 26:1 gee, ɛ̃ɛ̃ kɛ ko wɛĩlɔɔ ni o kea yiɓo:

Mɛɛ e wana wɔ̃ɔ ka? Zi kpɛɛ lɛ Zihova ee yɛlɛtaa ka e gbɛ̃a kɛɛwɛlɛ mɔ?

Walaka liesimia gbũu oo gee kelɛ Zizɛ lɛ Wala ka. E kɛ bɛ̃ɛ̃ kilia, ko Zɔ̃ɔ̃ 20:17 gee, ɛ̃ɛ̃ kɛ ko wɛĩlɔɔ ni o kea yiɓo:

Mɛɛ e wana wɔ̃ɔ ka? Kea Wala wa Zizɛ o mi nɔ dooa ka?
Kɛ ɓa yidɔ kelɛ Zihova aa la Kelavɔ vɔ o wana wɔ̃ lɛ a gbɛ̃ɛ̃ lɛ wa e gbe o mɔɔ gee mia lɛɛ, zi kpɛɛ lɛ ii yɛlɛtaa ka e gbɛ̃a mɔ?

6. Koo lɔkɛ ko kie ni ka

Baaboa e tokɛlɛipiemia gɔ̃ mia gbĩkpala lɛ doo do mɔ. Ko 1 Kɔleĩtĩã 12:25, 26 gee, ɛ̃ɛ̃ kɛ ko wɛĩlɔɔ ni o kea yiɓo:

Zi kpɛɛ lɛ laa mɔ Tokɛlɛipiemia die kpokpo o wɔ̃ kɛa ye o leege vɔ waa kɛ wàa ɓelepiaa ka?
Mɛɛ wɔ̃ lɛ ɓaa gɛ̃ e gbɛ̃a lɔkɛamɔ lɛ e Zihova la Kelavɔ fĩaa mɔ?

Ye Zihova la Kelavɔ waa kɛ waa ɓelepia kpoula lɛ do mɔɔ, o leege vɔ ye o to kpoula lɛ seĩ mɔɔ oo gbumɔ nɔ nɔ zale. Kɛ ko gɔ̃a doo gɛ̃ɛ, ko VILOA gɛ̃, ɛ̃ɛ̃ kɛ ko wɛĩlɔɔ lɛ e toa piea yiɓo.

VILO: Heti E Wàa Ɓele Fãa Mɛgagazɛ Kɛlɛ (5:29)

Gbumɔ lɛ Zihova la Kelavɔ o nɔɔ, zi kpɛɛ lɛ a zɔ̃ɔa kelɛ oo lɔkɛ o kie ni ka?

Tokɛlɛipiemia die kpokpo oo lɔkɛamɔ zɔ̃ɔ mia ye o toa lɛɛ

MIA DO OO GEE: “Zihova la Kelavɔ o gbini Wala lɛɛ kɔ dɛɛ ka.”

Mɛɛ pɛ̃ lɛ Zihova e gbɛ̃ aa mia lɛ o gbini a lɛɛ si la kelavɔ ?

WƆ̃Ɔ WŨ

Zihova la Kelavɔ o Tokɛlɛipiemia die kpokpo ka. Ko leege vɔ ka kpoula lɛ seĩ mɔ, ko wɔ̃ ni lɛ ko si wana kaa gã gbɛ̃ɛ̃ lɛ Baaboa la, ɛ̃ɛ̃ koo wana wɔ̃ lɛ a gbɛ̃ɛ̃ lɛ Zihova mɔɔ gee.