Zihova lɛ Wala lɛ e wɔ̃ kɛ e kɛzi ka kpeĩ lea ka. (1 Kɔleĩtĩã 14:​33, 40) Ye mɔu lɛ kilia, la mia ni oo bɛi kɛɛ mia lɛ o wɔ̃ kɛ e kɛzi ka kpeĩ lea ka. Zi kpɛɛ lɛ Tokɛlɛipiemia wa nukielaa yaa laa e kie le? Zi kpɛɛ lɛ ko bɛi gbumɔ nɔɔa e kɛ sɛ?

1. Deĩ lɛ e nukielaa wũlami ka?

“Kɛlɛi lɛ e la mia ni laa.” (Ifisɔ̃ 5:​23) Lɛ lɛi sɛlɛ yi aa liesi yɛɓo lɛ Zihova la mia ni o kɛ kpoula lɛ seĩ mɔɔ ka. Zizɛ e “yɛɓokɛmi gikãazɛ lɛ o bɛi o zo dɔɔ a mɔɔ” si​—lɛ e Mia Diedievɔ Kpo Ɓeĩ lɛ o nukiebaa la gɛ̃ɛ kaa. (Mafiu 24:​45-47 gee.) Lɛ zi nɔ apɔsɔlɔ vɔɔ wa mia diedievɔɔ o kɛa mɔ Zulusalɛɛ, lɛ Mia Diedievɔ Kpo Ɓeĩa o zi zɔ̃ɔa nukielaa lɛɛ kpoula lɛ seĩ mɔɔ. (Apɔsɔlɔ 15:2) Kɛɛ gɔ̃a o kilia, o wáa ka kɛɛ o kɛ ko nukiebaa wũlamia ka. Oo Baaboa gee kɛ o wɔ̃ lɛ Zihova a naa a kaa dɔ, ɛ̃ɛ̃ o zo wee laa mɔ kɛ o to Zizɛ la zi zɔ̃ɔ mia lɛɛ pie.

2. Deĩ mia lɛ o mia diedievɔɔ ka, ɛ̃ɛ̃ mɛɛ yɛɓo lɛ o kɛ?

Mia diedievɔɔ o gɔ̃a lɛ waa to zodɔamɔzɛ kɛɛ bunu bunuzɛ piea ka. Oo Baaboa zɔ̃ɔ Zihova la mia ni lɛɛ ɛ̃ɛ̃ waa o fãawaa. Oó o fɔnɔ si yɛɓo o kɛɛ wɛĩ. Kɛɛ, o die nɔɔ lɛ Wala yɛɓo kɛɛ lɛɛ. O wá mia “lɛ pɛlee wɔ̃ diee lɛ o zo kaa ka.” (1 Temɔte 3:​1-3) Gbũwalamiamɔ miaa oo gbumɔ nɔ mia diedievɔɔ lɛɛ. Luo do kaa bɛi lɛɛ lo kɛɛ o mɔ o kɛ mia diedievɔɔ ka nɔ kili.

Mia Diedievɔ Kpo Ɓeĩa oo mia diedievɔɔ do si o kɛ sɛki lagɛmia ka. Mia o kilia oo ɓɔ nukielaa yi deĩ le kɛ o zi zɔ̃ɔ o leege ni lɛɛ ɛ̃ɛ̃ o o fãawaa. Oo lɛ gɛ̃ Baaboa yi kɛ o gɔ̃a lɛ bɛi lɛ o mɔɔ si o kɛ mia diedievɔ ɛ̃ɛ̃ gbũwalamiamɔ miaa do ka.​—1 Temɔte 3:​1-10, 12; Tatɔ 1:​5-9.

3. Yɛɓo kpɛɛ lɛ e Zihova la Kelavɔ seĩ kɔla o kɛ?

Mia seĩ lɛ o nukielaa yia oo “Zihova tɔɓɔ,” da wɔ̃ ni lɛ o kɛ nukiela mɔɔ pakiemɔɔ yi wa wɔ̃laũ yiea geee ka ye bɛi aa kɛ o mɔɔ ka.​—Sãã 148:​12, 13 gee.

 A PIE FOO

4. Zizɛ lɛ mia wũlami lɛ a zo lɛ sɛɛ ka

Zizɛ lɛɛ ko suo kɛ maaɓo ko pie ka ko nu a pie. Ko Mafiu 11:​28-​30 gee, ɛ̃ɛ̃ kɛ ko wɛĩlɔɔ e kea yiɓo:

• Zi kpɛɛ lɛ Zizɛ a naa ko ko yɛlɛtaa ka e gbɛ̃a a zi liesikɔɔ mɔ?

5. Mia diedievɔɔ oo pɛzɔ̃ɔ wɔ̃ gɔ̃a ka

1. Mia diedievɔɔ oo o die ɛ̃ɛ̃ o kɔpiemia mɛkɛgaa wa Wala wɔ̃ kɛɛ yi

2. Mia diedievɔɔ oo o zokɛ mia seĩ pie nukielaa yi

3.   Mia diedievɔ fãawaa lɛ wɔ̃laũ yiea geee mɔ

4. Mia diedievɔ o pɛzɔ̃ɔmia ka. Oo gbumɔ nɔ lɛbɛii wa wɔ̃ ye e toa kɛɛ ka

6. Koo bɛi mia diedievɔɔ we kɛɛ

Baaboa e pɛ e kɛ lɛ laa mɔ ko mia diedievɔɔ we kɛɛ gee. Ko Hiibulu 13:​17 gee, ɛ̃ɛ̃ kɛ ko wɛĩlɔɔ ni o kea yiɓo:

• Kea a gee lɛ Baabo a ɓo ko ko liesimia we kɛɛ, mɛɛ e a kɛ gikãazɛ? Mɛɛ wɔ̃ wɛĩ?

Ko Luu 16:​10 gee, ɛ̃ɛ̃ kɛ ko wɛĩlɔɔ e kea yiɓo:

• Mɛ e kɛ lɛ lɛ kpanazɛ ko mia diedievɔɔ we kɛ e kɛ bɛ̃ɛ̃ lɛ lɛ wɔ̃ nyɔnɔ kaa ka?

 WƆ̃Ɔ WŨ

Zizɛ lɛ e nukielaa wũlami kaa. Ko ge lɛɛ li ko mia diedievɔ lɛ o yɛɓo kɛ a kɔ wia we kɛ, ɓii oo ko zoyage wɔ̃ gee ɛ̃ɛ̃ waa pɛzɔ̃ɔ ko lɛɛ wɔ̃ gɔ̃a ka.

Zovuo Wɔ̃

• Deĩ lɛ e nukielaa wũlami ka?

• Zi kpɛɛ lɛ mia diedievɔɔ o gbumɔ nɔa nukielaa lɛɛ?

• Yɛɓo kpɛɛ lɛ laa mɔ gbini Zihova lɛɛ mia seĩ o kɛ?