PƐ MƐDÃPIA 21
Zi Kpɛɛ Lɛ O Wɔ̃laũ Yiea Geepia Ka?
Luo wá gbaa gbeĩ kɛ Zihova e la Tomialaa kɛ e wɔ̃ ni lɛ o ɓɔ ko laa ɓo tãã. Wɔ̃laũ yiea lɛ sɛ die ɓo ɛ̃ɛ̃ laa mɔ mia seĩ o a ma. Zizɛ laa naa la toapiemia o wɔ̃laũ yie e kea gee mia seĩ lɛɛ! (Mafiu 28:19, 20) Wɔ̃ lɛ Zizɛ a gee la toapiemia o kɛɛ, zi kpɛɛ lɛ Zihova la Kelavɔ waa kɛpia ka?
1. Zi kpɛɛ lɛ Mafiu 24:14 pie wɔ̃ aa kɛa pɛnɛɛ?
Zizɛ a gee mɔ kelɛ: “Oo lo wɔ̃laũ yie e ke, lɛ a gbɛ̃ɛ̃ lɛ Wala la Tomiala mɔɔ, geee loũ ka sɛlɛ seĩ yi.” (Mafiu 24:14) Zihova la Kelavɔ ge lɛɛ li kɛ o yɛɓo kpanazɛ e kea kɛ. Ko wɔ̃laũ yiea geepia kpoula lɛ seĩ mɔ, we lɛ a diee lɛ 1,000 yia yi! Yɛɓo la gbuozɛ e kea laa mɔ a yaa e kea e kie le, ɛ̃ɛ̃ ko kɛ fããwaa ka. Koó bɛi a kɛɛ ye Zihova lɛɛ́ gbũ ko mɔɔ ka.
2. Zi kpɛɛ lɛ ko wɔ̃laũ yiea geea mia lɛɛ fããwaa ka?
Koo Wala lewe gee lɛ nɔɔfe lɛ ko mia gɛ̃ yia mɔ. Lɛ zi nɔ Tokɛlɛipiemia beĩzɛɛ wa kɛ mɔ a kaa, koo wɔ̃laũ yiea gee “mia pie kɛi pie.” (Apɔsɔlɔ 5:42) Wɔ̃laũ gee fããwaa ka kɔ e kea laa kɛ kɔaa ɓɔ mia lɛɛkɔɛi bunuzɛ mɔ kɛɛ seĩ ka. Ɓii mia wá kalemɔ teelea, koo wɔ̃laũ yiea gee zeĩ waala. Koo zi naa teele ko wɔ̃ gee mia ye o toa lɛɛ e gbɛ̃a Zihova wa wɔ̃ a ya e ge a kɛɛ mɔ.
3. Deĩ mia lɛ laa mɔ o wɔ̃laũ yiea gee?
Mia o Tokɛlɛipiemia die kpokpo kaa, lɛ laa mɔ o wɔ̃laũ yiea gee mia ye o toa lɛɛ. Koo ko yɛɓoa wɔ̃ si gaga kpokpo ɓo. Koo dɔ gaa kɔaa wɔ̃laũ yiea gee, ɓii koo yidɔ kelɛ lɛɛ lo a kɛɛ to mia o laɓo sɔlɔɓo. (1 Temɔte 4:16 gee.) Oó ko fɔnɔ nɔ yɛɓo e kea kɛɛ wɛĩ, ɓii Baaboa laa gee “pɛ lɛ ka sɔlɔɓoa, kaá sɔ̃ɔ̃ nɔ.” (Mafiu 10:7, 8) Ye wa mia seĩ ka kɛɛ o o too dɔ ko wɔ̃laũ yiea mɔ. Kɛɛ koo wɔ̃laũ yiea gee teele, ɓii a kɛ kili lɛ Zihova we kɛɛ ka ɛ̃ɛ̃ lɛɛ a geli.
A PIE FOO
Wɔ̃ bunuzɛ mɛdã e gbɛ̃a zi Zihova la Kelavɔ o wɔ̃laũ yiea geepia ka fããwaa ka kpoula lɛ seĩ mɔɔ mɔ, ɛ̃ɛ̃ zi Zihova lɛ gbũpiaa ko mɔɔ gɛ̃.
Wɔ̃laũ yiea geepia kpoula lɛ seĩ mɔ: (A) Kosa Wilika, (B) Unatɛ See, (C) Bɛnii, (D) Taalɛĩ, (E) Yapa, (F) Suili
4. Koo dɔ gaa kɛɛ ko ɓɔ mia seĩ mɔ
Zihova la Kelavɔ oo dɔ gaa kpokpo ɓo kɛɛ o wɔ̃laũ yiea gee mia lɛɛ lɛ seĩ mɔ. Ko VILOA gɛ̃, ɛ̃ɛ̃ kɛ ko wɛĩlɔɔ e to a piea yiɓo.
-
Mɛɛ wɔ̃ lɛ e i zo si e gbɛ̃a zi lɛ Zihova la Kelavɔ o wɔ̃ seĩ kɛa, kɛɛ o wɔ̃laũ yiea gee mia lɛɛ mɔ?
Ko Mafiu 22:39 wa Woloma 10:13-15 gee, ɛ̃ɛ̃ kɛ ko wɛĩlɔɔ ni o kea yiɓo:
-
Zi kpɛɛ lɛ ko Wala lewe gee yɛɓoa, a zɔ̃ɔ̃a kelɛ koo lɔkɛ ko yasɔnɔmia ka?
-
Mia o wɔ̃laũ yiea geea, zi kpɛɛ lɛ Zihova e o gɛ̃ a ka?—A lonipia 15 gɛ̃.
5. Koo yɛɓo kɛ ko kie ba Wala lɛɛ
Wɔ̃ bunuzɛ lɛ mia waa diea yia, laa zɔ̃ɔ̃ kelɛ Zihova lɛ e lie si ko yɛɓoa kaa. A gɔ̃ã gɛ̃, Nii Ziilɛĩ yia, ko leege lɛ o si Pɔɔɔ e to Wala lewe geepia e ɓɔ lee doo la e pie kalemɔ nyɛnɛi. A laapie kaa leea e sɛnɛɓo Wala lɛɛ, aa Wala tɔɔ gee, Zihova, ɛ̃ɛ̃ aa pɛ̃ kelɛ mi do e nu a pie. “Lɛ nyɛnɛkeĩ yaaka e diea,” Pɔɔ a gee, “M ɓɔ leea pie kalemɔ.”
Ko 1 Kɔleĩtĩã 3:9 gee, ɛ̃ɛ̃ kɛ ko wɛĩlɔɔ e kea yiɓo:
-
Zi kpɛɛ lɛ wɔ̃ ni lɛ mia o diea yi, lɛ a do e kɛ Nii Ziilɛĩ yia, a zɔ̃ɔ̃a kelɛ Zihova lɛ liesipia wɔ̃laũ yie gee yɛɓoa ka?
Ko Apɔsɔlɔ 1:8 gee, ɛ̃ɛ̃ kɛ ko wɛĩlɔɔ e kea yiɓo:
-
Mɛ e kɛ lɛ ko naa Zihova la gbumɔ ka, kɛɛ ko wɔ̃laũ yie gee yɛɓoa kɛ?
Ɓaa yidɔ?
Ko lɔɔgbĩĩ pakiemɔ yia, koo zi lɛ ko bɛi wɔ̃laũ yiea geee a kaa mɛdã yi. E kea ɓaa lo do pakiemɔ nia do yia, zi kpɛɛ lɛ i i yɛlɛtaa e gbɛ̃a pɛ ko mɛdã yia mɔ?
6. Koo Wala we kɛ, wɔ̃laũ yiea geee ka
Tokɛlɛipiemia beĩzɛ o kɛ mɔɔ zi luo kaa, mia o dɔ gaa kɛ o o tea wɔ̃laũ yiea geee mɔ. Tokɛlɛipiemia beĩzɛ o kɛ mɔɔ, o “kɛ dɔpia wɔ̃laũ yiea la . . . a zidɔzi naaa ka.” (Felepĩã 1:7) Zihova la Kelavɔ oo wɔ̃ nɔ dooa kɛ pɛnɛɛ. a
Ko Apɔsɔlɔ 5:27-42 gee, ɛ̃ɛ̃ kɛ ko wɛĩlɔɔ e kea yiɓo:
-
Mɛ e kɛ lɛ koó lo teaa wɔ̃laũ yiea geee mɔ?—Ko a lonipia 29, 38, wa 39. gɛ̃.
MI DO LƐƐ BƐI WƐĨLƆƆ KƐƐ: “Mɛ e kɛ lɛ Zihova la Kelavɔ o lo mia pie kalemɔ deĩ le?”
-
Zi kpɛɛ lɛ i bɛi a yiɓoo a ka?
WƆ̃Ɔ WŨ
Zizɛ a gee la toapiemia o wɔ̃laũ yiea gee sɛlɛ seĩ yi. Zihova lɛ gbũpia la mia ni mɔ kɛ o yɛɓo e kea kɛ.
Zovuo Wɔ̃
-
Zi kpɛɛ lɛ o wɔ̃laũ yiea geepia ka kpoula lɛ seĩ mɔ?
-
Zi kpɛɛ lɛ ko wɔ̃laũ yie gee yɛɓoa, a zɔ̃ɔ̃a kelɛ koo lɔkɛ ko yasɔnɔmia ka?
-
Ɓaa i yɛlɛtaaa, Wala lewe gee yɛɓoa lɛɛ nu geli ka? Mɛɛ wɔ̃ wɛĩ?
I NYIƐ KPƆ
Zi Zihova la Kelavɔ o wɔ̃laũ yiea geea mia lɛɛ sɛlɛ gbuo gbuo yia.
Zi kpɛɛ lɛ Zihova la Kelavɔ waa gbũa gele siluu kɛmia mɔ?
O Wɔ̃laũ Geepia Gele Siluu Kɛmia Lɛ Wala Wɔ̃ Kpaa Lɛ O Mɔɔ Lɛɛ (5:59)
Ko leege doo e zi lɛ dienɔ Wala lɛɛ yɛɓoa e a geli a kaa gee.
Wɔ̃ bunuzɛ mɛdã e gbɛ̃a zi mɛisa li ko mɔ aa kɛa lɔɔlɔɔ kɛ ko wɔ̃laũ yiea geea mɔ.
“Tomiala Wɔ̃laũ Geemia O Lo Wa Wɔ̃ Ka Mɛisaɓomia Lie” (Wala La Tomialaa Lɛ Liesipia!, wekpo 13)
a Wala lɛ a gee ko wɔ̃laũ yiea geea. A mɔɔ wɔ̃ mɔɔ, Zihova la Kelavɔ oó lo sɛlɛ liesimia pie o weea mɔ kɛɛ o tĩã wɔ̃laũ yiea gee mia lɛɛ.
