Zizɛ e pɛzɔ̃ɔ̃ kelɛ batai kɛɛ lɛ wɔ̃ lɛ laa mɔ Tokɛlɛipiemia o kɛɛ ka. (Mafiu 28:​19, 20 gee.) Kɛɛ, mɛɛ e batai kɛɛ ka? Ɛɛ̃ mɛɛ wɔ̃ lɛ laa mɔ mi a kɛ, kɛɛ o tĩã batai kɛɛ?

1. Zi kpɛɛ lɛ o mi batai kɛa?

We lɛ e “batai” kɛɛ kaa, e go Gili we yi. A yi lɛ e kelɛ “o i waa” yii wi. Lɛ Zɔ̃ɔ̃ e Zizɛ ‘batai kɛ Zɔdã Yiia baa. Zizɛ e go yiia ba.’ (Maa 1:​9, 10) Zi nɔ dooa, lɛ o Tokɛlɛipiemia kpokpoa batai kɛa o waa yii wi kaa.

2. Mɛ mi a zɔ̃ɔ̃ ye waa batai kɛɛ ka?

Ye waa mi batai kɛɛ, laa zɔ̃ɔ̃ kelɛ aa e die nɔ Zihova Wala lɛɛ. Zi kpɛɛ lɛ mi e e die nɔa? Kɛɛ o tĩã a batai kɛɛ, a mɔɔ mi lɛɛ sɛnɛɓo e doo lɛpia aa gee Zihova lɛɛ kelɛ laa naa e gbini a lɛɛ toakili ka. Lɛɛ e we ɓele kelɛ lɛɛ lo gbini Zihova doo kpãã lɛɛ, ɛ̃ɛ̃ lɛɛ lo Wala wɔ̃ kɛɛ wɔ̃ kpanazɛ kpokpo ka la kɛɓe yi. A mɔɔ mi lɛ “mi lɛ e e die wɔ̃ da tãã to aa to” Zizɛ la pɛzɔ̃ɔ̃kɔ wa wɔ̃ gɔ̃ã nia pie teelea ka. (Luu 17:​33) A dienɔ Wala lɛɛ wa a batai kɛɛ laa kɛ lɔɔlɔɔ kɛɛ e nyɔɔ Zihova ka kɔɛ ɛ̃ɛ̃ kɛɛ wa e leege ni o fĩã e kɛ sɛ.

3. Mɛɛ wɔ̃ lɛ laa mɔ mi a kɛ kɛɛ o tĩã a batai kɛɛ?

Kɛɛ o tĩã i batai kɛɛ, laa mɔ i pɛ mɛdã e gbɛ̃a Zihova mɔ, ɛ̃ɛ̃ ɓa zodɔamɔ mɛ e kɛ gaga. (Hiibulu 11:6 gee.) Ye ɓaa kɛ faapia ɓa pɛ mɛdãa ɛ̃ɛ̃ zodɔamɔ yiia, ɓa lɔkɛamɔ lɛ e Zihova wɛĩa la lɛɛ lo kpɔɔ nɔ kili. Ye aa kɛ kilia, ii loa naa i wɔ̃laũ yie lɛ a gbɛ̃ɛ̃ lɛ a mɔɔ gee mia lɛɛ, ɛ̃ɛ̃ i to a zi yiikɔ nia pie. (2 Temɔte 4:2; 1 Zɔ̃ɔ̃ 5:3) Ye a mɔɔ mi aa kɛ kɛɓe kɛpia “lɛ zi ko Daami a naa a kaa lɛ ɓea,” lɛɛ bɛi e dienɔɔ Wala lɛɛ ɛ̃ɛ̃ kɛɛ o batai kɛ.​—Kɔlɔsĩã 1:​9, 10. a

 A PIE FOO

4. Koo bɛi pɛ mɛdãa Zizɛ batai kɛɛ kolola

Ko Mafiu 3:​13-​17 gee kɛ ko pɛ bunuzɛ mɛdã e gbɛ̃a Zizɛ batai kɛɛ mɔ. Ɛɛ̃ kɛ ko wɛĩlɔɔ ni o kea yiɓo:

• Kea Zizɛ e kɛ nɛfu dɛɛ ka lɛ wa batai kɛɛ ka?

• Zi kpɛɛ lɛ wa batai kɛa? Kea o yii kaa nɔ a wĩĩ?

Zizɛ e gbɛ̃ aa yɛɓo lɛ Wala a nɔ a lɛɛ kɛ lɛ wa batai kɛɛ ka. Ko Luu 3:​21-​23 wa Zɔ̃ɔ̃ 6:​38 gee, ɛ̃ɛ̃ kɛ ko wɛĩlɔɔ e kea yiɓo:

• Lɛ o Zizɛ batai kɛɛ, yɛɓo kpɛɛ lɛ a kɛɛ si beĩzɛ la kɛɓe yi?

5. Batai kɛɛ lɛ wɔ̃ lɛ i bɛia kɛɛ ka

Dienɔwalalɛɛ wa batai kɛɛ lɛɛ bɛi kɛɛ i ledũ wɔ̃ ka. E kɛ bɛ̃ɛ̃ kilia, ye ɓaa faa ɓa pɛ mɛdãa yia, i zo lɛɛ bɛi kɛɛ gaga kɛɛ i wɔ̃ kpanazɛ e kilia kɛ. Kɛ ko mia lɛ o wɔ̃ e kilia kɛɛ do gɛ̃ɛ, ko VILOA gɛ̃.

Ko Zɔ̃ɔ̃ 17:3 wa Zĩĩ 1:5 gee, ɛ̃ɛ̃ kɛ ko wɛĩlɔɔ e kea yiɓo:

• Mɛɛ e bɛi gbũu mi mɔ kɛɛ e e die pɛkɛ batai kɛɛ wɛĩ?

1. Koo ko dienɔ Zihova lɛɛ ye kɔaa gee a lɛɛ kelɛ koo naa ko gbini a lɛɛ toakili kaa ka

2. Ye waa kɛ ko batai kɛpiaa, koo zɔ̃ɔ̃ mia lɛɛ kelɛ kɔaa ko dienɔ gbaa Wala lɛɛ

 6. Ye waa ko batai kɛɛ kɛ kɔa kɛ Zihova la mia nia do ka

Ye waa ko batai kɛɛ, kɛ kɔaa kɛ gbaa leege vɔ lɛ o o kie ba kpoula lɛ seĩ mɔɔ do ka. Ko go bɛ̃ɛ̃ lɛ gbɛɛ gbɛɛ mɔɔ, wɔ̃ ko si wana kaa wa ko yiikɔ nia lɛ nɔ doo. Ko Sãã 25:​14 wa 1 Pilɛ 2:​17 gee, ɛ̃ɛ̃ kɛ ko wɛĩlɔɔ e kea yiɓo:

• Zi kpɛɛ lɛ mi batai kɛɛ pie e toa ɓɛɛla lɛ e wa Zihova ɛ̃ɛ̃ wa e leege vɔ o fĩãa mɔ?

 WƆ̃Ɔ WŨ

Zizɛ a zɔ̃ɔ̃ kelɛ laa mɔ o Tokɛlɛipiemia batai kɛ. Kɛ o tĩã mi batai kɛɛɛ, laa mɔ la zodɔamɔ lɛ e Zihova wɛĩa mɛ e kɛ gaga, e to la yiikɔ nia pie, ɛ̃ɛ̃ e e dienɔ a lɛɛ.

Zovuo Wɔ̃

• Mɛɛ e batai kɛɛ ka, ɛ̃ɛ̃ mɛɛ e a kɛ kpanazɛ?

• Mɛɛ dienɔwalalɛɛ wa batai kɛɛ a zɔ̃ɔ̃?

• Mɛɛ wɔ̃ ni lɛ laa mɔ mi a kɛ kɛɛ e tĩã e dienɔɔ Wala lɛɛ ɛ̃ɛ̃ o a batai kɛ?