PƐ MƐDÃPIA 24

Wana Wɔ̃ Kpɛɛ Lɛ A Gbɛ̃ɛ̃ Lɛ Wala Lɛ Vɔmiaa Mɔ?

À DA YƐƁO PÍÉ

Zihova laa naa ko pɛ mɛdã e gbɛ̃a a kɔpiemia lɛ o lɛia mɔ. Wala kɔpiemia o kilia lɛ o la vɔmia, lɛ o o si “Wala gbe nia” kaa. (Zoo 38:7) Mɛɛ wɔ̃ lɛ Baabo a gee e gbɛ̃a Wala la vɔmia mɔ? Yikɛgaa kpɛɛ lɛ e o kɛlɛ mia la? Kea Wala la vɔmiaa seĩ o a kɔpiemia ka?

1. Deĩ mia lɛ o Wala la vɔmiaa ka?

Zihova e la vɔmiaa kɛ lie kɛɛ e tĩã kpoulaa kɛɛ. Lɛ Wala lɛ ɓea, o gɛɛ vɔ ka koó o gɛ̃, oo kɛɓe kɛ lɛi sɛlɛ yi. (Hiibulu 1:14) Wala la vɔmiaa o gbaala lɛ gbuo, ɛ̃ɛ̃ o kɛkɔ lɛ gbɛɛ gbɛɛ. (Wɛlɛvelesɔ̃ 5:11) Oo “lo [Zihova] lewe ka mia pie ɛ̃ɛ̃ waa we kɛ.” (Sãã 103:20) Mɔ zeea, Zihova e kɛ la vɔmia vɔpia, waa nu la wevɔ ka mia pie, waa gbũ o mɔ, ɛ̃ɛ̃ waa o la. Pɛnɛɛ, Wala la vɔmia oo liesi Tokɛlɛipiemia ka kɛɛ o lo mia lɛ o naa o pɛ mɛdã e gbɛ̃a Wala mɔɔ pie.

2. Deĩ mia lɛ o Setɔ̃ wa la gɛɛyɔɔ vɔɔ ka?

Wala la vɔmiaa do oó gbaa Zihova we kɛ. Wala la vɔmi beĩzɛ lɛ e a we toa “lɛ o si Dɛɓo ɛ̃ɛ̃ Setɔ̃ lɛ e kpoula zee mia seĩ bekɛɓomi kaa kaa.” (Wɛlɛvelesɔ̃ 12:9) Setɔ̃ a naa yikɛgaa e kɛ a kɛlɛ mia la, a mɔɔ wɔ̃ mɔɔ, e mia beĩzɛɛ ɓekɛɓo, lɛ e kɛɛ e Wala la vɔmiaa do too yiɓo o daa pie. Wala la vɔmia ye o a we toa lɛ o o si gɛɛyɔɔ vɔɔ. Zihova e o luo lɛi sɛlɛ yi, o nuu lɛ tãã zee, ɛ̃ɛ̃ lɛɛ lo o yisie.—Wɛlɛvelesɔ̃ 12:9, 12 gee.

3. Zi kpɛɛ lɛ Setɔ̃ wa la gɛɛyɔɔ vɔɔ o dɔa gaga kɛɛ o ko bekɛɓo?

Setɔ̃ wa la gɛɛyɔɔ vɔɔ oo mia ku gbuozɛ bekɛɓo pɛnɛɛ wee mia lɛ waa gaa pie ka. Wee mia mia ni lɛ waa gaa pie lɛ wɔ̃ lɛ lɛ wɔ̃ yɔɔ kpokpo kaa ka. A gɔ̃ã gɛ̃, mia do oo lo mia lɛ o siaaŋele mɔɔ wɔ̃ yidɔ sɛɛ, wa dɛvɔ mia ɛ̃ɛ̃ zóo vɔ pie. Mia do bɛ̃ɛ̃ oo lo nyiɛ lɛ a gã gbɛ̃ɛ̃ lɛ dɛvɔɔ mɔɔ kɛmia pie. Oo mia bekɛɓo zeĩ kelɛ oo bɛi wee mia lɛ waa gaa pie. Kɛɛ Zihova e liewe dɔ ko lɛɛ: “Yekɛ ka lo dɛvɔ mia nɔɔfe pie.” (Livelekɔ 19:31) E liewe e kea dɔ ko lɛɛ kɛɛ e ko la Setɔ̃ wa la gɛɛyɔɔ vɔ kɛlɛ. O Wala yoko vɔ ka ɛ̃ɛ̃ oo naa o wɔ̃ yɔɔ kɛ ko ka.

A PIE FOO

Pɛ mɛdã e gbɛ̃a wɔ̃ yie yie lɛ Wala la vɔmia o kɛ, ɛ̃ɛ̃ pɛ e wee mia lɛ waa gaa pie kɛ yɔɔ kpokpo ɓo, wa zi lɛ laa mɔ ko ko zokɛa ko die pie Setɔ̃ wa la gɛɛyɔɔ vɔ wɛĩa mɔ.

4. Zihova wa la vɔmia oo gbũ ko mɔ kɛɛ ko pɛ mɛdã e gbɛ̃a mɔ

Wala la vɔ miaa, o die oó Wala lewe gee mia lɛɛ. Kɛɛ, oo liesi Wala la mia ni ka kɛɛ o lo mia lɛ o naa o pɛ mɛdã e gbɛ̃a a mɔɔ pie. Ko Wɛlɛvelesɔ̃ 14:6, 7 gee, ɛ̃ɛ̃ kɛ ko wɛĩlɔɔ ni o kea yiɓo:

Mɛ e kɛ lɛ ko naa Wala la vɔmiaa o gbũ ko mɔ kɛɛ ko wɔ̃laũ yiea gee. Kea lɛɛ i fããwaa kɛ ɓa yidɔ kelɛ Wala la vɔmiaa, oo liesi mia ka kɛɛ o lo wɔ̃laũ yiea ka mia lɛ laa mɔ o maa pie? Mɛɛ wɔ̃ wɛĩ?

5. I i ko gbɛ̃ gɛɛyɔɔ kɛwɔ̃ nɔɔfe mɔ

Setɔ̃ wa la gɛɛyɔɔ vɔɔ o Zihova yoko vɔ ka. O ko yoko vɔ ka nɔ kili. Ko Luu 9:38-42 gee, ɛ̃ɛ̃ kɛ ko wɛĩlɔɔ e kea yiɓo:

Mɛɛ wɔ̃ lɛ gɛɛyɔɔ vɔɔ o kɛ mia ka?

Koó naa ko a kɛ kɛɛ gɛɛyɔɔ vɔɔ pie e to ko mɔ. Ko Ditɔlɔnɔme 18:10-12 gee, ɛ̃ɛ̃ kɛ ko wɛĩlɔɔ ni o kea yiɓo.

Zi gbɛɛ gbɛɛ kpɛɛ lɛ gɛɛyɔɔ vɔɔ o dɔa gaga kɛɛ wa yikɛgaa e kɛ ko la ɛ̃ɛ̃ o wee ko pie? Gɛɛyɔɔ kɛwɔ̃ɔ ye kpɛɛ lɛ mia o kɛ teele lɛ ɓaa mɔɔ mɔ?
Kea a gee lɛ Zihova a ɓo yekɛ ko ko kɔda gɛɛyɔɔ kɛwɔ̃ nɔɔfe baa gikã laa yi? Mɛɛ wɔ̃ wɛĩ?

Ko VILOA gɛ̃, ɛ̃ɛ̃ kɛ ko wɛĩlɔɔ ni lɛ o toa piea yiɓo.

VILO: “Ka Gele Gɔ̃ Dɛɓo Ka” (5:02)

Kea ɓaa i yɛlɛtaaa, ɓɛlɛ lɛ wa da Nɔɔ́ lu kɔkpɛia lɛ yɔɔ kpokpo ɓo? Mɛɛ wɔ̃ wɛĩ?
Mɛɛ wɔ̃ lɛ e kɛa mɔ Nɔɔ a kɛ kɛɛ e e zokɛ e die pie gɛɛyɔɔ vɔɔ wɛĩ?

Mia o Tokɛlɛipiemia die kpokpo kaa, oo gelegɔ̃ gɛɛyɔɔ vɔɔ ka teele. Ko Apɔsɔlɔ 19:19 wa 1 Kɔleĩtĩã 10:21 gee, ɛ̃ɛ̃ kɛ ko wɛĩlɔɔ e kea yiɓo:

Mɛ e kɛ lɛ laa mɔ i pɛ nɔɔfe lɛ lɛ i kɛlɛ lɛ a gbɛ̃ɛ̃ lɛ gɛɛyɔɔ kɛwɔ̃ mɔɔ gele?

6. Ka kɔ e die Setɔ̃ wa la gɛɛyɔɔ vɔ la gele lɛ o ya ka mɔɔ gɔ̃ɔ yi

Setɔ̃ lɛ e liesi gɛɛyɔɔ vɔɔ kaa. Kɛɛ Zizɛ lɛ e Wala la vɔmi kpanazɛ lɛ o si zeĩ Maikɔ, lɛ e liesi Wala la vɔmia zodɔamɔzɛɛ kaa. Yikɛgaa kpɛɛ lɛ e Maikɔ kɛlɛ? Ko Wɛlɛvelesɔ̃ 12:7-9 gee, ɛ̃ɛ̃ kɛ ko wɛĩlɔɔ ni o kea yiɓo:

Deĩ mia lɛ yikɛgaa lɛ o kɛlɛ kpokpo ɓo? Setɔ̃ wa la gɛɛyɔɔ vɔɔ lɛee, maa Maikɔ wa la vɔmia lɛ?
Ɓaa i yɛlɛtaaa, laa mɔ Zizɛ la toapiemia o tuo Setɔ̃ wa la gɛɛyɔɔ vɔɔ lɛɛ?

I kɔ lɛɛ bɛi diee gele lɛ Setɔ̃ wa la gɛɛyɔɔ vɔ o ya i mɔɔ gɔ̃ɔ yi. Ko Zĩĩ 4:7 gee, ɛ̃ɛ̃ kɛ ko wɛĩlɔɔ e kea yiɓo: