Kea i lɔkɛami aa ga do? Wɔ̃ nyɔɔ gɛ̃ luo e kea kaa, ii bɛi i yɛlɛtaa: Mɛɛ e kɛ ye kɔaa gaa ka? Kea zodɔamɔ lɛ ko kɛlɛ kelɛ koo lo ko lɔkɛamia lɛ waa gaa gɛ̃ɛ zeĩ? Pɛ mɛdãpia e kea wa a ye e nua yia, koo lo zi lɛ Baabo e wɛĩlɔɔ nia yiɓoa ko nɛɛnɛɛ zi piea gɛ̃ɛ.

1. Mɛɛ e kɛ ye kɔaa gaa ka?

Zizɛ e ga gɔ̃ yi mɔ, yi lɛ mi ɓaa kɛa zei kpokpo ɓoa mɔ. Mi lɛ lɛ yi zei kpokpo ɓoa lɛɛ́ wɔ̃ nɔɔfe lɛ lɛ kɛpia a sɔnɔpiea yidɔ. Zi kpɛɛ lɛ ga lɛ a ka lɛ yi lɛ ɓe? Ye mi aa gaa lɛɛ́ wàa nɔɔfe ɓele. Lɛɛ́ kɛ e doo ka wɔ̃ yidɔ, ye bɛ̃ɛ̃ lɛ a lɔkɛ e ɓɛĩ ni wa e mia ni kaa ka. Baabo laa gee: “Ga mi lɛɛ́ wɔ̃ nɔɔfe yidɔ.”​—Ikilisiase 9:5 gee.

2. Zi kpɛɛ lɛ wana wɔ̃ dɔ e gbɛ̃a gaa mɔɔ, e gbũa ko mɔ?

Mia bunuzɛ oo tuo ga lɛɛ, ɛ̃ɛ̃ mi lɛ aa gaa lɛɛ! Kɛɛ wɔ̃ lɛ Baabo a gee e gbɛ̃a ga mɔɔ, lɛɛ bɛi i nɛɛnɛɛ. Zizɛ a gee: “Wana wɔ̃ɔ lɛɛ lo a kɛɛ to ka to ka die kɔ mɔ.” (Zɔ̃ɔ̃ 8:​32) Lɛ zi gbini Wala lɛɛ mia do o a gee a kaa, Baaboa lɛɛ́ pɛzɔ̃ɔ̃ kelɛ ye mi aa gaa pɛ do lɛɛ go a yi aa kɛɓe kɛ. A mɔɔ wɔ̃ mɔɔ, mi gbɛɛ lɛɛ́ wàa ɓele ye aa gaa ka. Zeniia, ye mia waa gaa oó wɔ̃ nɔɔfe yidɔɔ, oó bɛi wɔ̃ yɔɔ kɛɛ ko ka. A mɔɔ wɔ̃ mɔɔ, ye wáa mɔ ko gbini o lɛɛ, ɛ̃ɛ̃ ko sɛnɛɓo o wɛĩ.

Mia do oo gee kelɛ wa mia lɛ waa gaa ni oo wee. Kɛɛ ye wa wana ka. Kɔa mɛdã nɔ kelɛ, mia waa gaa “oó wɔ̃ nɔɔfe do yidɔ.” Mia lɛ o gɛ̃ kelɛ o weepia o lɔkɛamia lɛ waa gaa piea, oo bɛi kɛɛ weepia gɛɛ yɔɔ vɔ, lɛ oo die kɛ mia lɛ waa gaa kaa pie. A mɔ wɔ̃ mɔɔ, wana wɔ̃ mɛdã e gbɛ̃a ga mɔɔ, lɛɛ ko la gɛɛ yɔɔ vɔ kɛlɛ. Zihova e ko liewe dɔ yekɛ ko wee mia lɛ waa gaa pie, ɓii laa yidɔ kelɛ ye kɔaa kɛ kilia, kɛ ko weepia gɛɛ yɔɔ vɔ pie, ɛ̃ɛ̃ oo lo wɔ̃ yɔɔ kɛɛ ko ka.​—Ditɔlɔnɔme 18:​10-12 gee.

3. I wana wɔ̃ lɛ a gbɛ̃ɛ̃ lɛ mia lɛ waa gaa mɔɔ mɛdã

Kpoula lɛ seĩ mɔɔ, wɔ̃ mia o si wana ka e gbɛ̃a mia lɛ waa gaa mɔɔ lɛ gbɛɛ gbɛɛ. Yeɓoa, wɔ̃ o geea seĩ wá wana ka.

• Lɛ ɓaa mɔɔ, mɛɛ wɔ̃ lɛ mia o si wana ka e gbɛ̃a mia lɛ waa gaa mɔ?

 4. Wanawɔ̃ lɛ a gbɛ̃ɛ̃ lɛ ga mɔɔ lɛɛ gbũ ko mɔ

Ye kɔaa wana wɔ̃ dɔ e gbɛ̃a ga mɔɔ, laa kɛ to koó tuo mia lɛ waa gaa lɛɛ. Ko Ikilisiase 9:​10 gee, ɛ̃ɛ̃ kɛ ko wɛĩlɔɔ e kea yiɓo:

• Kea mia lɛ waa gaa oo bɛi wɔ̃ yɔɔ kɛɛ ko ka?

Ye kɔaa wɔ̃ lɛ Baabo a geea gɛ̃ wana kaa, koó lo gbini mia lɛ waa gaa lɛɛ. Ko Aazaya 8:​19 wa Wɛlɛvelesɔ̃ 4:​11 gee, ɛ̃ɛ̃ kɛ ko wɛĩlɔɔ e kea yiɓo:

• Ɓaa i yɛlɛtaaa, zi kpɛɛ lɛ Zihova e mi lɛ e gbini ɛ̃ɛ̃ aa gbumɔ naa mi lɛ a gaa kɛlɛɛ gɛ̃ a ka?

5. Wanawɔ̃ lɛ a gbɛ̃ɛ̃ lɛ ga mɔɔ lɛɛ ko nɛɛnɛɛ

Waa pɛzɔ̃ɔ̃ mia bunuzɛ lɛɛ kelɛ ye waa gaa, oo lo wàa ɓele wɔ̃ lɛ waa kɛɛ wɛĩ. Kɛɛ lɛɛ ko zoya ko ge ye kɔaa yidɔ kelɛ mi nɔɔfe lɛɛ́ wàa ɓele ye a gaa ka, e kɛ bɛ̃ɛ̃ lɛ e wɔ̃ yɔɔ kpokpo kɛɛ ka. Ko Woloma 6:7 gee, ɛ̃ɛ̃ kɛ ko wɛĩlɔɔ e kea yiɓo:

• Lɛ zi kɔa geea Baabo yi kelɛ ye mi aa gaa kɛɛ aa la kɛwɔ̃ yɔɔ kɛlɛɛ, ii i yɛlɛtaa kelɛ ye mi a gaa lɛ tĩã wàa ɓelepia kɛwɔ̃ yɔɔ a kɛɛ wɛĩ?

Ye kɔaa Zihova dɔ sɛ kpokpo ɓoa, koo a yidɔɔ kelɛ lɛɛ́ lo mia lɛ waa gaa sãdɔɔ. Ko Ditɔlɔnɔme 32:4 wa 1 Zɔ̃ɔ̃ 4:8 gee, ɛ̃ɛ̃ kɛ ko wɛĩlɔɔ ni o kea yiɓo:

• Kea Wala lɛ wa yiikɔ yie yie ni kelekele a lonipia ni kɔa geea yia, lɛɛ bɛi wee a mɔ kɛ mia lɛ waa gaa sã e dɔ?

• Kea ii wana wɔ̃ lɛ a gbɛ̃ɛ̃ lɛ ga mɔɔ gɛ̃ mia nɛɛnɛɛ wɔ̃ ka? Mɛɛ wɔ̃ wɛĩ?

 WƆ̃Ɔ WŨ

Ye mi aa gaa, kɛɛ la kɛɓe aa nyɛ. Mia lɛ waa gaa oó wàa ɓele ɛ̃ɛ̃ kɛ bɛ̃ɛ̃ o wɔ̃ yɔɔ kɛ mia lɛ o ɓeea ka.

Zovuo Wɔ̃

• Mɛɛ e kɛ ye kɔaa gaa ka?

• Wana wɔ̃ lɛ a gbɛ̃ɛ̃ lɛ ga mɔɔ, zi kpɛɛ lɛ e gbũa ko mɔ?

• Wana wɔ̃ lɛ a gbɛ̃ɛ̃ lɛ ga mɔɔ, zi kpɛɛ lɛ e ko nɛɛnɛɛ a ka?