PƐ MƐDÃPIA 30
I Lɔkɛa Mia Oo Bɛi Kɛɓe Kɛɛ Zeĩ!
Ga lɛɛ a kɛ mia waa gboo ɓo ɛ̃ɛ̃ waa ya yeĩzɛ. Pɛ e kɛ lɛ Baaboa a gee ga lɛ ko daagbe kaa lɛ. (1 Kɔleĩtĩã 15:26) Pɛ mɛdãpia 27 yia, ɓa mɛdã kelɛ Zihova lɛɛ lo ko daagbe e kilia ɓoo tãã. Kɛɛ, mɛɛ wɔ̃ lɛ e lo kɛɛ mia lɛ waa nyɛ gaa mɔɔ ka? Pɛ mɛdãpia e kea yia, ii lo wɔ̃ bunuzɛ mɛdãa e gbɛ̃a Zihova la wedɔwe kpanazɛ gbɛɛ lɛ aa dɔ, lɛ e kelɛ lɛɛ lo nuu mia gbaala gbuozɛ lɛ waa gaa ka o mɛi kɛ o kɛɓe kɛ toakili kaa mɔ. Lɛɛ lo o Wɛlɛgakɛlɛ! Lɛɛ bɛi a kɛɛ kili kpokpo ɓo? Kea oo lo Wɛlɛgakɛlɛ kɛ o kɛɓe kɛ lɛi sɛlɛ yi maa kpoula zee?
1. Mɛɛ wɔ̃ lɛ Zihova a naa a kɛ ko lɔkɛa mia lɛ waa gaa wɛĩ?
Zihova laa naa ka kpokpo ɓo kɛ e nu mia lɛ waa gaa ka o mɛi. Gɔ̃ doo lɛ e kɛ zodɔamɔzɛ lɛ o si Zooa, a gɛ̃ wana ka kelɛ Zihova zo lɛɛ́ lo nii a ka ye aa gaa ka. A gee Wala lɛɛ: “Ii lo suo kɛɛ, ɛ̃ɛ̃ mm lo [too ɓɔa yi] m wee.”—Zoo 14:13-15 gee.
2. Zi kpɛɛ lɛ kɔa yidɔa kelɛ mia lɛ waa gaa oo bɛi Wɛlɛgakɛlɛ?
Lɛ Zizɛ e kɛ kpoula zeea, Wala e yikɛgaa nɔa lɛɛ kɛ e mia Wɛlɛgakɛlɛ. Zizɛ e nɛfu leezɛ lɛ a kɛɛ e kɛ 12 wa gããlee doo gbe Wɛlɛgakɛlɛ. (Maa 5:41, 42; Luu 7:12-15) Luo do kaa, Zizɛ ɓɛɛ Lazalɛ e ga. Ye bɛ̃ɛ̃ lɛ Lazalɛ e ga wa bĩĩ ɛ̃ɛ̃ a lɛkpɛi yiisɛ e diea, Zizɛ a Wɛlɛgakɛlɛ. Lɛ Zizɛ e nyɛ sɛnɛɓoo mɔ Wala lɛɛ, a gee “Lazalɛ, i wɛlɛ i ɓɔ!” Ɛɛ̃ “gɔ̃ lɛ a gaa e kɛa kilia, e wɛlɛ e ɓɔ pɛlɛi.” Lazalɛ ɓeee e kɛa yi gbaa! (Zɔ̃ɔ̃ 11:43, 44) I yɛlɛtaa zi lɛ Lazalɛ mia ni waa ɓɛĩ ni o kɛa gelizɛɛ ka!
3. Zodɔamɔ kpɛɛ lɛ lɛ ɓe i lɔkɛa mia lɛ waa gaa wɛĩ?
Baaboa laa gee kelɛ: “Mia . . . oo lo Wɛlɛgakɛlɛ.” (Apɔsɔlɔ 24:15) Mia lɛ Zizɛ e o wɛlɛ mɔ ga kɛlɛɛ oó gbaa lo lɛi sɛlɛ yi. (Zɔ̃ɔ̃ 3:13) O ge e li die ɓo lɛ Zizɛ e o Wɛlɛgakɛlɛ kɛ o kɛɓe kɛ kpoulaa ka. Zi nɔ dooa, lɛ Zizɛ lɛ nupia mia gbaala gbuozɛ wɛlɛ a ka ga kɛlɛ nɔ dɛɛ kɛ o kɛɓe kɛ toakili ka paledaa kpoulaa. A gee kelɛ Wala lɛɛ lo mia lɛ a zo nii wá o kaa wɛlɛgakɛlɛ, e kɛ bɛ̃ɛ̃ lɛ mia ɓeee zo aa ni o kaa ka.—Zɔ̃ɔ̃ 5:28, 29.
A PIE FOO
Pɛ e kɛ lɛ ko gɛ̃ wana ka kelɛ bɛi lɛ Zizɛ mɔ e mia wɛlɛgakɛlɛ, ɛ̃ɛ̃ lɛɛ loa kɛɛ kilia gɛ̃ Baaboa yi. Zi lɛ wɛlɛgakɛlɛ wɔ̃ɔ e mia nɛɛnɛɛ ɛ̃ɛ̃ aa mia zoya o gea gɛ̃.
4. Zizɛ a zɔ̃ɔ̃ kelɛ lɛɛ bɛi mia Wɛlɛgakɛlɛ
Wɔ̃ bunuzɛ mɛdã e gbɛ̃a wɔ̃ Zizɛ a kɛ e ɓɛɛ Lazalɛ wɛĩa mɔ. Ko Zɔ̃ɔ̃ 11:14, 38-44 gee, ɛ̃ɛ̃ kɛ ko wɛĩlɔɔ ni o kea yiɓo:
-
Zi kpɛɛ lɛ kɔa yidɔa kelɛ Lazalɛ gaa e kɛa kpokpo ɓo?—A lonipia 39 gɛ̃.
-
Ɓaa i yɛlɛtaaa, e kɛa Lazalɛ e lo lɛi sɛlɛ yia, Zizɛ aa sii lɛi e nu a ka kpoula zee?
5. Mia gbaala gbuozɛ oo lo wɛlɛgakɛlɛ!
Ko Sãã 37:29 gee, ɛ̃ɛ̃ kɛ ko wɛĩlɔɔ e kea yiɓo:
-
Mɛɛ zaa lɛ mia gbaala gbuozɛɛ o lo wɛlɛgakɛlɛ o kɛɓe kɛ yi?
Zizɛ lɛɛ lo mia ku gbuozɛ wɛlɛgakɛlɛ, ye wa nɔ mia lɛ o gbini Zihova lɛɛ doo ka. Ko Apɔsɔlɔ 24:15 gee, ɛ̃ɛ̃ kɛ ko wɛĩlɔɔ e kea yiɓo:
-
Deĩ lɛ i loa naa ɓa gɛ̃ aa wɛlɛgakɛlɛ?
I yɛlɛtaa wɔ̃ e kea yi: Zizɛ lɛɛ bɛi mi nɔɔfe wɛlɛgakɛlɛ e lɔɔlɔɔ ka lɛ zi nɔ nɛdaa e la nɛ wɛlɛa yi baa lɛ ɓe
6. Wɛlɛgakɛlɛ wɔ̃ɔ lɛɛ i nɛɛnɛɛ ɛ̃ɛ̃ aa zoyage nɔ i lɛɛ
Wɔ̃ lɛ Baabo a gee e gbɛ̃a Zalɛ lu mɔɔ, aa mia lɛ ga aa ɓo o mɔɔ bunuzɛ nɛɛnɛɛ ɛ̃ɛ̃ aa o zoya o ge. Ko wɔ̃ kpokpo lɛ e kɛɛ gee Luu 8:40-42, 49-56 yi.
Kɛ Zizɛ e tĩã Zalɛ lu wɛlɛgakɛlɛɛ, a gee a daa lɛɛ: “Yekɛ i le e dũ, i zo yee dɔ nɔ gaga.” (A lonipia 50 gɛ̃.) Zi kpɛɛ lɛ wɛlɛgakɛlɛ wɔ̃ɔ e bɛi gbũua i mɔ . . .
-
ye i lɔkɛa mi aa gaa ka?
-
ye wɔ̃ yɔɔ aa dɔ e kɛ i ka ɓa kɛɓe yia ka?
Ko VILOA gɛ̃, ɛ̃ɛ̃ kɛ ko wɛĩlɔɔ e to a piea yiɓo.
-
Zi kpɛɛ lɛ wɛlɛgakɛlɛ wɔ̃ɔ e Felesete mia ni nɛɛnɛɛ ɛ̃ɛ̃ o zoyaa ka o ge?
MIA DO OO GEE: “Lɛ gaga kɛ mia o si wana ka kɛlɛ mia lɛ waa gaa oo lo nuu o mɛi.”
-
Zi kpɛɛ lɛ ii yɛlɛtaa ka?
-
Baaboa lɛ kpɛɛ lɛ i bɛia daa yɛɓo pie kɛ a zɔ̃ɔ̃ kelɛ mia oo lo wɛlɛgakɛlɛ?
WƆ̃Ɔ WŨ
Baaboa laa zɔ̃ɔ̃ kelɛ mia gbaala gbuozɛ lɛ waa gaa oo lo wɛlɛgakɛlɛ. Zihova laa naa o kɛɓe kɛ zeĩ, ɛ̃ɛ̃ aa yikɛgaa nɔ Zizɛ lɛɛ kɛ e o wɛlɛgakɛlɛ.
Zovuo Wɔ̃
-
Zi kpɛɛ lɛ Zihova wa Zizɛ o o yɛlɛtaa ka e gbɛ̃a wɛlɛgakɛlɛ wɔ̃ɔ mɔ?
-
Mɛɛ zaa lɛ mia gbaala gbuozɛɛ o lo wɛlɛgakɛlɛ o kɛɓe kɛ yi, lɛi sɛlɛ yi maa kpoula? Mɛ e kɛ lɛ ɓa gee kili?
-
Mɛ e kɛ lɛ ɓa gɛ̃ wana ka kelɛ i lɔkɛa mia oo bɛi kɛɓe kɛɛ zeĩ?
I NYIƐ KPƆ
Wɔ̃ i bɛia kɛɛ kɛ e gbũ i mɔ ye ga aa ɓɔ i mɔɔ mɛdã.
“Gbumɔ Lɛ Lɛ Ɓe Mia Lɛ Ga Aa Ɓɔ O Mɔɔ Wɛĩa” (Ya Nyiɛ! Nɔ. 3 2018)
Kea liewekpo ni lɛ o Baabo yia lɛɛ bɛi gbũu mi lɛ ga aa ɓɔa mɔɔ mɔ kpokpo ɓo?
Zi kpɛɛ lɛ nɔɔɓe o bɛi zoyage sɔlɔɓooa ye o lɔkɛa mi aa gaa ka?
Kea mi nɔɔfe lɛ e lo wɛlɛgakɛlɛ kɛ e lo lɛi sɛlɛ yia? Deĩ lɛ lɛɛ́ lo wɛlɛgakɛlɛ?
