PƐ MƐDÃPIA 34

Zi Kpɛɛ Lɛ Ko Bɛi A Zɔ̃ɔ̃a Kelɛ Zihova Lɔkpɔɔ Lɛ Ko Mɔ?

À DA YƐƁO PÍÉ

Kea ɓaa nyɔɔ Wala ka kɔɛ lɛ i gbɛ̃ ɓaa Baabo mɛdãa ka? Ii loa naa i ɓɛɛla lɛ e ka Wala ka fĩãa mɛ kɛ gaga teele? E kɛa lɛ kilia, a kpɔ i yɛlɛpie kelɛ, ye Zihova aa i gɛ̃ ɓaa lɔkɛ a ka kpokpo ɓoa, a bɛ̃ɛ̃ lɛɛ lo lɔkɛɛ i ka, ɛ̃ɛ̃ lɛɛ lo e zokɛɛ i pie. Zi kpɛɛ lɛ i bɛi a zɔ̃ɔ̃a kelɛ Zihova lɔkpɔɔ lɛ i mɔ?

1. Zi kpɛɛ lɛ ko bɛi a zɔ̃ɔ̃a kelɛ Zihova lɔkpɔɔ lɛ ko mɔ?

Koo lɔkɛamɔ zɔ̃ɔ̃ Zihova lɛɛ, ye kɔaa a we kɛɛ ka. (1 Zɔ̃ɔ̃ 5:3 gee.) Laá gee teetee kelɛ mia o lɔkɛ a ka. Kɛɛ, doo dooa laa to kɔaa ko zɔ̃ɔ̃ si e kɛa koo lo a we kɛɛɛ ka. Mɛɛ wɔ̃ wɛĩ? Zihova laa naa ko “zo e wee a mɔ” ko a we kɛ. (Woloma 6:17) A yi lɛ e kelɛ, laá naa ɓa we kɛ ɓii laa mɔ ɓa kɛɛ wɛĩ, kɛɛ lɛɛ a naa ɓa kɛ, ɓii a lɔkpɔɔ lɛ i mɔɔ wɛĩ. Kii e kea kpo 3 wa 4 pɛkɛɛ lɛ kɛ e gbũ i mɔ, kɛ ɓa zɔ̃ɔ̃ kelɛ Zihova lɔkpɔɔ lɛ i mɔ, wɔ̃ a naa a kaa kɛɛ ka.

2. Mɛ a kɛ gaga kɛ ko zɔ̃ɔ̃ kelɛ Zihova lɔkpɔɔ lɛ ko mɔ?

“Mia o wɔ̃ kpeĩ kɛmia kaa oo luo gaa kũ nyɔɔ.” (Sãã 34:19) Ko seĩ koo wàa ɓele ko dietĩ ko niɓo ni ko kɛɛ wɛĩ. Ɛɛ̃ ye aa kɛɛ, pɛlee mɔɔ wɔ̃ lɛɛ kɛ gaa ko mɔ, to fulu wɔ̃, wa wɔ̃ gaagaa aa ɓɔ ko la. Ye kɔaa kɛ luo gaa kũpiaa, ye wa lɔɔlɔɔ ko wɔ̃ Zihova a geea kɛ. Lɛ kili, ɓii lɛ lɔɔlɔɔ kɛ mia o to zi yɔɔ pie. Kɛɛ, ye ɓaa to wɔ̃ lɛ Zihova a gee ɓa kɛɛ piea, ii loa zɔ̃ɔ̃ kelɛ a lɔkpɔɔ lɛ i mɔ e diea pɛ nɔɔfe la. Ɛɛ̃ ii loa zɔ̃ɔ̃ kelɛ i kunu lɛ a mɔ. Ɛɛ̃ a bɛ̃ɛ̃ lɛɛ lo kunu i mɔ nɔ kili, lɛɛ́ lo e ko gbɛ̃ɛ̃ i mɔ gbɛɛ ɓo.—Sãã 4:3 gee.

A PIE FOO

Pɛ e kɛ lɛ Zihova ge e li ye ɓaa a we kɛɛ, wa pɛ e lo gbũu i mɔ ɓa kɛɛ mɛdã.

3. Wɔ̃ lɛ a gbɛ̃ɛ̃ lɛ mia seĩ mɔɔ

Baabo kii lɛ e Zoo kaa, laa zɔ̃ɔ̃ kelɛ Setɔ̃ laa gee, Zoo wa mia ye o to, lɛ o naa o gbini Zihova lɛɛ, oó a kɛ ɓɔɔ. Ko Zoo 1:1, 6–2:10 gee, ɛ̃ɛ̃ kɛ ko wɛĩlɔɔ ni o kea yiɓo:

Lɛ zi Setɔ̃ a gee a kaa, mɛ e kɛ lɛ Zoo e Zihova we kɛ?—Zoo 1:9-11 gɛ̃.
Mɛɛ wɔ̃ lɛ Setɔ̃ a gee e gbɛ̃a mia seĩ mɔ, e daa i ba?—Zoo 2:4 gɛ̃.

Ko Zoo 27:5b gee, ɛ̃ɛ̃ kɛ ko wɛĩlɔɔ e kea yiɓo:

Zi kpɛɛ lɛ Zoo a zɔ̃ɔ̃a kpokpo ɓo kelɛ Zihova lɔkpɔɔ lɛ a mɔ?

Zoo a zɔ̃ɔ̃ kelɛ Zihova lɔkpɔɔ lɛ a mɔ, lɛ e kunu a mɔɔ ka

Koo a zɔ̃ɔ̃ kelɛ Zihova lɔkpɔɔ lɛ ko mɔ, ye kɔaa kunu a mɔɔ ka

4. A kɛ Zihova zo ge e li

Ko Pɔlɔvɛɛ 27:11 gee, ɛ̃ɛ̃ kɛ ko wɛĩlɔɔ e kea yiɓo:

Zi kpɛɛ lɛ Zihova e i gɛ̃ a ka, ye ɓaa kɛ gikãzɛ lɛ ɓaa we kɛɛ ka? Mɛɛ wɔ̃ wɛĩ?

5. Ii bɛi kunu Zihova mɔ

Ɓii koo lɔkɛ Zihova kaa, laa kɛ kɔaa wɔ̃ gee mia ye o toa lɛɛ e gbɛ̃a a mɔ. Ye kɔaa kunu a mɔɔ, laa kɛ lɔɔlɔɔ kɛ ko a kɛ kili. Ko VILOA gɛ̃, ɛ̃ɛ̃ kɛ ko wɛĩlɔɔ ni lɛ o to a piea yiɓo.

VILO: Ɓa Zodɔamɔɔ Wũla Kɔ̃ɔ̃, Mia O Ya Bɛ̃ɛ̃ I Lɛɛ Ka (5:09)

Kea aa kɛ do i mɔ gaga i wɔ̃ gee mia ye o toa lɛɛ e gbɛ̃a Zihova mɔ?
Viloa yia, mɛ e gbũ Gɔanu mɔ yekɛ e tuo?

Lɛɛ kɛ lɔɔlɔɔ kɛ ko kunu Zihova mɔ, ye kɔaa lɔkɛ pɛ a lɔkɛ a kaa ka, ɛ̃ɛ̃ pɛ lɛɛ́ naa a kaa lɔ aa nyɛ ko mɔɔ ka. Ko Sãã 97:10 gee, ɛ̃ɛ̃ kɛ ko wɛĩlɔɔ ni o kea yiɓo:

Ye ɓaa lɛ gɛ̃ pɛ ɓaa mɛdãa mɔɔ, Zihova naa ka wɔ̃ɔ do lɛ e mɛɛ ka? Wɔ̃ ni lɛ lɛɛ́ naa a kaa do lɛ e mɛɛ ka?
Zi kpɛɛ lɛ i bɛi wɔ̃ yie lɔkpɔ i mɔ wa wɔ̃ yɔɔ lɔ nyɛ i mɔɔ mɛdãa a ka?

6. Lɛɛ gbũ ko mɔ ye kɔaa Zihova we kɛɛ ka

Zihova we kɛɛ lɛ wɔ̃ kpeĩ ka kɛɛ ko kɛ teele. Ko Aazaya 48:17, 18 gee, ɛ̃ɛ̃ kɛ ko wɛĩlɔɔ ni o kea yiɓo:

Ɓaa i yɛlɛtaaa, koo bɛi ko zo dɔɔ Zihova mɔ kelɛ lɛɛ wɔ̃ lɛ lɛ sɛ ko wɛĩa dɔ teele? Mɛɛ wɔ̃ wɛĩ?
Zi kpɛɛ lɛ ɓa Baabo mɛdã e gbɛ̃a Wala wanazɛ, lɛ e Zihova kaa mɔɔ, aa gbũa i mɔ kpokpo ɓo?

MIA DO OO GEE: “Wɔ̃ m kɛɛ kpaa wá Wala mɔ kpokpo ɓo.”