PƐ MƐDÃPIA 38
I Kɔya Gbaapɛ Lɛ E Kɛɓe Kaa Wi
Koo wɔ̃ yie yie bunuzɛ kɛ kɔaa nyɔnɔ si, ɓii ko ɓeee laa yi. Ye bɛ̃ɛ̃ lɛ wɔ̃ nyɔɔ e ɓɔ ko laa, koo wɔ̃ bunuzɛ nyɔnɔ si ko kɛɓe yi. Zi kpɛɛ lɛ ko bɛi a zɔ̃ɔ̃a kelɛ, ko kɔyaa lɛ gbaapɛ lɛ e kɛɓe kaa wi? Ɛɛ̃ mɛɛ wɔ̃ kpanazɛ lɛ ko mɔɔ a kɛ ɓo kili?
1. Mɛ e kɛ lɛ laa mɔ ko ko kɔya kɛɓe wi?
Laa mɔ koo kɔya kɛɓe wi, ɓii lɛ gbaapɛ lɛ e go ko lɔkɛa Daa Zihova kɛlɛɛ ka. A ye lɛ e “kɛɓe goayi tɔũ” kaa, a ye lɛ e kɛɓe seĩ kɛɛ. (Sãã 36:9) “Ɓii a ye lɛ e kɛɓe, wa mi wuu, e bɛi pɛ seĩ nɔ mi lɛɛ.” (Apɔsɔlɔ 17:25, 28) Zihova lɛɛ pɛ seĩ lɛ laa mɔ ko kɛɓe kɛ a laa nɔ ko lɛɛ. E kãa mɔɔ, e zi kɛ ɓe kɛɛ ko kɛɓe kɛ geli ka.—Apɔsɔlɔ 14:17 gee.
2. Zi kpɛɛ lɛ ko bɛi a zɔ̃ɔ̃a Zihova lɛɛ kelɛ ko kɔyaa lɛ gbaapɛ lɛ e kɛɓe kaa wi?
E wɛlɛ luo lɛ ko looo e ko gi si a kaa mɔɔ, Zihova lɛɛ kpaa ko wɛĩ. Deɓe lɛ e kɛ gbini Wala lɛɛ mi kaa, a gee la sɛnɛɓowe yi kelɛ: “Lɛ bɛ̃ɛ̃ lɛ m kɛ m looo gea, i m gɛ̃.” (Sãã 139:16) Zihova lɛɛ ko kɛɓe si kpokpo ɓo kpanazɛ. (Mafiu 10:29-31 gee.) Zihova zo lɛɛ da yeĩ yi, ye mido aa ya e ge ee ɓɛɛmi la kɛɓe wɔ̃ duo a yi, ɛ̃ɛ̃ e kɛ bɛ̃ɛ̃ a dietĩ la kɛɓe kaa ka. a (Ɛselɔ 20:13) Zeniia, wɔ̃ lɛɛ lo Zihova waaa, ye koó kpaa ko kɛɓe ɛ̃ɛ̃ mia ye o toa wa kɛɓe wɛĩa ka. Ye kɔaa kpaa ko kɛɓe ɛ̃ɛ̃ mia ye o toa wa kɛɓe wɛĩa, laa zɔ̃ɔ̃ kelɛ ko kɔyaa lɛ gbaapɛ ɓɛlɛ ɓɛlɛzɛ lɛ e kɛɓe kaa wi.
A PIE FOO
Zi bunuzɛ lɛ i bɛi a zɔ̃ɔ̃a kelɛ i kɔyaa lɛ gbaapɛ lɛ e kɛɓe kaa wia gɛ̃.
3. I zokɛ i die pie ɓa kɛ keleŋkeleŋ wɔ̃ wɛĩ
Ɓii ko wedɔɔ lɛ Zihova lɛɛ kelɛ koo lo a naa ka wɔ̃ kɛɛ teelea, koo gbini a lɛɛ ko zo seĩ ka. Lɛ kelɛ ko salaɓopɛ ka Wala lɛɛ. Ko Woloma 12:1, 2 gee, ɛ̃ɛ̃ kɛ ko wɛĩlɔɔ ni o kea yiɓo:
-
Mɛɛ wɔ̃ lɛ laa mɔ e pa i mɔ kɛ i i zokɛ i die pie ɓa kɛ keleŋkeleŋ wɔ̃ wɛĩ?
-
Zi bunuzɛ kpɛɛ lɛ i bɛi a kɛɛa kili?
4. I zokɛ yi ye ɓaa kɛ wɔ̃ nɔɔfe kɛpiaa ka, yekɛ mido e gĩĩ, ɛ̃ɛ̃ la kɛɓe wɔ̃ e duo a yi
Baaboa e ko liewe dɔ ko ko kɔɓo wɔ̃ ni lɛ e mia gĩĩ, ɛ̃ɛ̃ lɛ e mia wa kɛɓe wɔ̃ duo a yia ba. Ko VILOA gɛ̃, kɛ ko wɔ̃ ni lɛ e bɛi a kɛɛ yekɛ ko gĩĩ, ɛ̃ɛ̃ ko kɛɓe wɔ̃ e duo a yia mɛdã.
Ko Pɔlɔvɛɛ 22:3 gee, ɛ̃ɛ̃ kɛ ko wɔ̃ gee e gbɛ̃a zi lɛ ka mia ye o toa ka bɛi ka zokɛɛa ka die pie . . .
-
ka piekɛi.
-
ka yɛɓo kɛpia.
-
ka sɔɓopia.
-
ye kaa kɛ taapɛ yi ɛ̃ɛ̃ a taapiaa ka.
5. Nɛ lɛ oó ye nɛɛ, la kɛɓe si kpanazɛ
Deɓe a gee kelɛ, nɛ lɛ lɛ e lee gea, Zihova lɛɛ kpaa a mɔɔ wɔ̃ wɛĩ. Ko Sãã 139:13-17 gee, ɛ̃ɛ̃ kɛ ko wɛĩlɔɔ e kea yiɓo:
-
Zihova nyiɛ laa, kea kɛɓe gã lɛɛ gbɛ̃ ye lee aa e gi sia ka, maa ye aa laa ka?
Lɔɔ ni lɛ Zihova a nɔ mɔ Eezɛlɛmia lɛɛ, e gbũ giloa mɔ. Ko Ɛselɔ 21:22, 23 gee, ɛ̃ɛ̃ kɛ ko wɛĩlɔɔ ni o kea yiɓo:
-
Zi kpɛɛ lɛ Zihova e mi lɛ lɛɛ́ gbaa a ya e ge kɛ e nɛ lɛ oó ye nɛɛ yisiea gɛ̃ a ka?
-
Zi kpɛɛ lɛ e lo mi lɛ a yɔ e ge a kɛ kilia gɛ̃ɛ a ka? b
-
Zi kpɛɛ lɛ i i yɛlɛtaa ka e gbɛ̃a zi Zihova e e yɛlɛtaa kaa mɔ?
E kɛ bɛ̃ɛ̃ lee lɛ e kɛɓe wɔ̃ si kpanazɛɛ kaa, lɛɛ bɛi e yɛlɛtaa kelɛ, giɓoamɔ lɛ wɔ̃ nɔ laa mɔ a kɛɛ ka. Ko Aazaya 41:10 gee, ɛ̃ɛ̃ kɛ ko wɛĩlɔɔ ni o kea yiɓo:
-
Ye waa o wee ya lee lɛ a gi laa mɔɔ mɔ a ɓo yia, deĩ lɛ laa mɔ e niɛ a pie gbumɔ wɛĩ? Ɛɛ̃ mɛɛ wɔ̃ wɛĩ?
MIA DO OO GEE: “A too lɛ leea ka e e giɓo e mɔ, a ye lɛ a gbĩkpala lɛɛ.”
-
Mɛ a zɔ̃ɔ̃ i lɛɛ kelɛ Zihova lɛɛ lee lɛ a gi laa mɔɔ wa la nɛ lɛ lɛɛ́ a ye nɛɛ wa kɛɓe si kpanazɛ?
WƆ̃Ɔ WŨ
Baaboa laa zɔ̃ɔ̃ kelɛ, ko lɔkɛamɔ wa ɓɛlɛya zɔ̃ɔ̃, ɛ̃ɛ̃ ko ko zokɛ Zihova la gbaapɛ lɛ e kɛɓe kaa pie, e daa ko die ko kɛɓe, ɛ̃ɛ̃ mia ye o toa wa kɛɓe ba.
Zovuo Wɔ̃
-
Mɛ e kɛ lɛ migbunu la kɛɓe lɛ kpanazɛ Zihova lɛɛ?
-
Zi kpɛɛ lɛ Zihova e e yɛlɛtaa ka ye mido aa yɔ e ge e e ɓɛɛmi la kɛɓe lienyɛɛ ka?
-
Mɛɛ wɔ̃ lɛ ɓa mɔɔ Wala zuo ɓo gbaapɛ lɛ e kɛɓe kaa wɛĩ?
I NYIƐ KPƆ
Zi kpɛɛ lɛ ko bɛi Zihova zuo ɓoo a ka gbaapɛ lɛ e kɛɓe kaa wɛĩ?
Wɛĩlɔɔ e kea yiɓoa gɛ̃, Kea ye lee aa e giɓo e mɔɔ, Wala lɛɛ die a kɛwɔ̃ yɔɔ la?
“Mɛɛ Wɔ̃ Lɛ Baaboa A Gee E Gbɛ̃a Giɓoamɔ Wɔ̃ Mɔ?” (Lɛ jw.org la)
Zi lɛ Wala e kɛɓe gɛ̃ a kaa zi laa mɔ a pie e toa ko sɔɓokɔ mɔɔ mɛdã.
“‘Sɔɓokɔ Lɛ Ye Wa Sɛɛ’—Laa Mɔ Ko Kɛ?” (Ya Nyiɛ!, Walawala 8, 2000)
Ye mi aa ya e ge e e die zɛɛ bɛ̃ɛ̃? I zi lɛ Baaboa e bɛi gbũua mɔɔ gɛ̃.
“Mm Naa M Ga—Kea Baaboa Lɛɛ Bɛi Gbũu M Mɔ Ye Maa Ya M Ge M M Die Zɛɛ Ka?” (Lɛ jw.org la)
a Zihova lɛɛ kpaa mia lɛ o zodaa lɛ zizaaa wɛĩ kpokpo ɓo. (Sãã 34:18) Lɛɛ yɛlɛtaa yɔɔ ni lɛ a kɛ mia waa naa o o die zɛɛ yima, ɛ̃ɛ̃ lɛɛ a naa e gbũ o mɔ. Kɛ i zi lɛ e gbũa mia mɔɔ gɛ̃ɛ, i kii ni lɛ o i nyiɛ kpɔ lɛmɔ pɛ mɛdãpia e kea yia gɛ̃, “Mm Naa M Ga—Kea Baaboa Lɛɛ Bɛi Gbũu M Mɔ Ye Maa Kɛ M Yɛlɛtaapia M M Die Zɛɛ Ka?”
b Mia lɛ waa o giɓo o mɔɔ, ye waa mɔ o zo e da zizaa nyɔɔ, Zihova lɛɛ bɛi die wa kɛwɔ̃ yɔɔ la. Kɛ i wɔ̃ bunuzɛ mɛdãa, i “Mɛɛ Wɔ̃ Lɛ Baaboa A Gee E Gbɛ̃a Giɓoamɔ Wɔ̃ Mɔ?” lɛ e “I Nyiɛ Kpɔ” lɛmɔ pɛ mɛdãpia e kea yia gee.
