PƐ MƐDÃPIA 40
Zi Kpɛɛ Lɛ Ko La E Bɛi Ɓɔɔ A Ka Wala Wɛlɛ Mɔ?
I yɛlɛtaa nɛyelee lɔkɛamɔzɛ lɛ e la nɛ pɛkɛ e yie ka kɛ e tĩã loo kiikɛia ka. Lɛɛ a zulu, to e la sɔ nia pɛkɛ e yie ka, kɛɛ e kɛ e laɓɔɔzɛ ka. Wɔ̃ e kea lɛɛ gbũa mɔ e kɛ keleŋkeleŋ, ɛ̃ɛ̃ laa zɔ̃ɔ̃ kelɛ a mia ni oo o zokɛ a pie e yie ka. Zi nɔ dooa, lɛ ko lɔkɛa Daa, Zihova a naa ko la e ɓɔa ko gbĩkpala yi, ɛ̃ɛ̃ ko yiikɔ yia. Ye ko la aa kɛ ɓɔpiaa, lɛɛ gbũ ko mɔ ɛ̃ɛ̃ lɛɛ Zihova tɔɓɔ.
1. Zi kpɛɛ lɛ ko bɛi a kɛɛa kɛɛ ko gbĩkpala la e ɓɔ?
Zihova a gee ko lɛɛ: “Lɛ a mɔ ka kɛ pulu.” (1 Pilɛ 1:16) Kɛ ko kɛ pulua, laa mɔ ko laɓɔɔ e kɛa ko gbĩkpala yi, ɛ̃ɛ̃ ko yiikɔ yi. Ko gbĩkpala la lɛɛ ɓɔ ye kɔaa kɛ ko zulupia teele, kɔaa ko sɔ pɛlɛɛ, kɔaa ko piekɛi bɛi, ɛ̃ɛ̃ kɔaa ko zokɛ ko taapɛ piea ka. Kɔaa bɛi zeĩ gbumɔ nɔɔ, kɔaa ko Tomiala Kaa wi bɛi. Ye ko gbĩkpala la aa kɛ ɓɔpiaa, lɛɛ Zihova tɔɓɔ.—2 Kɔleĩtĩã 6:3, 4.
2. Kɛ ko la e ɓɔɔ, mɛɛ wɔ̃ lɛ ye waa mɔ ko kɛ?
Baaboa laa gee “ko ko die kɛ pulu lɛ zi Kɛlɛi lɛ a ka pulua lɛ ɓe.” (1 Zɔ̃ɔ̃ 3:3) A yi lɛ e kelɛ, ko dɔ gaga ko ko kɔɓo wɔ̃ nɔɔfe lɛ e lo ko gbĩkpala wa ko yɛlɛtaa lilikũũa ba. Laa mɔ wɔ̃ lɛ ko ko yɛlɛtaa yia e kɛ Zihova zoda wɔ̃ ka, a mɔɔ wɔ̃ mɔɔ, laa mɔ ko yɛlɛtaa e kɛ kpeĩ. (Sãã 104:34) Zeniia, ko dɔ gaga yekɛ we lilikũãzɛ e go ko le.—Kɔlɔsĩã 3:8 gee.
Mɛɛ wɔ̃ gbɛɛ kpɛɛ lɛ e bɛi kɔa gbĩkpala wa kɔa yiikɔ la lilikũũ? Pɔɔ ni lɛ ko ɓele, ɛ̃ɛ̃ lɛ ko sia do pie yɔɔ lɛɛ to ko gbĩkpala mɔ. A mɔ wɔ̃ mɔɔ, koó sikalee ɛ̃ɛ̃ tããkpaa mi, koó zana gbɛ̃, ɛ̃ɛ̃ nyiɛ si nɔ ɓɔɔ geli ba. Ye kɔaa ko kɔɓo wɔ̃ ni o kea baa, koo lo kɛɛ keleŋkeleŋ ko gbĩkpala yi, ɛ̃ɛ̃ koo lo a zɔ̃ɔ̃ kelɛ ɓɛlɛya lɛ ko kɛlɛ gbaapɛ lɛ e kɛɓe kaa wɛĩ. Koo lo zeĩ a zɔ̃ɔ̃ kelɛ ko yiikɔ lɛ kpeĩ ye kɔaa dɔ gaga ko ko kɔɓo wɔ̃ lilikũãzɛ ni lɛ o kelɛ sɔyɔɔɓodieka, wa mia kpãã gɛ̃ɛ kaa ba. (Sãã 119:37; Ifisɔ̃ 5:5) Ye wa lɔɔlɔɔ kɛɛ i i kɔɓo wɔ̃ ni e kea kɛɛ ba, kɛɛ Zihova lɛɛ bɛi gbũu i mɔ ɓa kɛ.—Aazaya 41:13 gee.
A PIE FOO
Pɛ e kɛ lɛ ko laɓɔɔ e Zihova tɔɓɔɔ mɛdã, ɛ̃ɛ̃ zi ko bɛi ko kɔɓooa wɔ̃ lilikũãzɛ baa gɛ̃.
3. Ko laɓɔɔ lɛɛ Zihova tɔɓɔ
Ye kɔaa lɔɔ lɛ Zihova a nɔ mɔ Eezɛlɛmia lɛɛ geea, laa zɔ̃ɔ̃ kelɛ Zihova lɛɛ la mia ni laɓɔ wɔ̃ si kpanazɛ. Ko Ɛselɔ 19:10 wa 30:17-19 gee, ɛ̃ɛ̃ kɛ ko wɛĩlɔɔ ni o kea yiɓo:
-
Mɛɛ wɔ̃ lɛ a lonipia nia o zɔ̃ɔ̃ ko lɛɛ e gbɛ̃a zi Zihova e mia laɓɔ wɔ̃ gɛ̃aa mɔ?
-
Mɛɛ wɔ̃ lɛ i bɛi a kɛɛ teele kɛ i la e ɓɔ?
Kɛ i la e ɓɔɔ, laa mɔ i luo si ɛ̃ɛ̃ i fãã e waa a kɛɛ mɔ. Kɛɛ, koo bɛi a kɛɛ kili, ko kɛ bɛ̃ɛ̃ lɛ nɔɔfe mɔ, ɛ̃ɛ̃ lɛ pɛ wa ko kɛlɛɛ ka. Ko VILOA gɛ̃, ɛ̃ɛ̃ kɛ ko wɛĩlɔɔ e toa piea yiɓo.
-
Zi kpɛɛ lɛ e lo gbũua mia lɛ ko Wala lewe gee o lɛɛ mɔ, kɛ o Zihova tɔɓɔ kpokpo ɓo, ye waa pɔɔ ni lɛ e ko kɛlɛɛ gɛ̃ to a la aa ɓɔɔ ka?
4. Tea wɔ̃ lilikũãzɛ kɛɛ lɛɛ
Zihova lɛɛ bɛi gbũu ko mɔ kɛɛ ko ko kɔɓo wɔ̃ lilikũãzɛ nɔɔfe ba
E kea ii sikalee mi ɛ̃ɛ̃ ii nyiɛ si nɔ ɓɔɔ geli wɛĩa, ii loa yidɔɔ kelɛ ye wa lɔɔlɔɔ kɛ i i kɔɓo a ba. Mɛ e bɛi gbũu i mɔ? Zi lɛ yiikɔ nia pie e toa i mɔɔ gɛ̃. Ko Mafiu 22:37-39 gee, ɛ̃ɛ̃ kɛ ko wɔ̃ gee e gbɛ̃a zi lɛ tããkpaa mii ɛ̃ɛ̃ nyiɛ si nɔ ɓɔɔ pie e toa . . .
-
ka Zihova ka ɓɛɛla kɛɛ mɔ
-
ka i kɔpiemia ɛ̃ɛ̃ mia lɛ o i sɔnɔpiea mɔɔ mɔ
Wɔ̃ ya e kie le kɛ i i kɔɓo wɔ̃ lilikũãzɛ ba. a Ko VILOA gɛ̃.
Ko Felepĩã 4:13 gee, ɛ̃ɛ̃ kɛ ko wɛĩlɔɔ e kea yiɓo:
-
Zi kpɛɛ lɛ sɛnɛɓoo, wa Baabo mɛdãa, ɛ̃ɛ̃ lo pakiemɔ yi teele e gbũa mi mɔ kɛɛ e e kɔɓo wɔ̃ lilikũãzɛ kɛɛ ba?
5. I gele gɔ̃ yɛlɛtaa wa wɔ̃ lilikũãzɛ kɛɛ ka
Ko Kɔlɔsĩã 3:5 gee, ɛ̃ɛ̃ kɛ ko wɛĩlɔɔ ni o kea yiɓo:
-
Zi kpɛɛ lɛ kɔa yidɔa kelɛ mia kpãã gɛ̃ɛ, wɔ̃ gee e gbɛ̃a lee wa gɔ̃ wɔ̃ kɛɛ mɔ, ɛ̃ɛ̃ sɔyɔɔɓodieka lɛ wɔ̃ lilikũãzɛ ka Zihova wɛlɛ mɔ?
-
Ɓaa i yɛlɛtaaa, Zihova laa naa ko yiikɔ e kɛ kpeĩ? Mɛɛ wɔ̃ wɛĩ?
Zi lɛ i bɛi gele gɔ̃ɔ a ka yɛlɛtaa lilikũãzɛ kaa gɛ̃. Ko VILOA gɛ̃.
Zizɛ e pĩã lɛ a zɔ̃ɔ̃ kelɛ laa mɔ ko dɔ gaga ko yiikɔ e kɛ kpeĩa vɔ. Ko Mafiu 5:29, 30 gee, ɛ̃ɛ̃ kɛ ko wɛĩlɔɔ e kea yiɓo:
-
Yeɓoa, Zizɛ wá a geepia ko ko gbĩkpala lɛ do kã ko mɔ, kɛɛ laa zɔ̃ɔ̃ kelɛ laa mɔ ko wɔ̃ do kɛ. Mɛɛ wɔ̃ lɛ laa mɔ mi a kɛ yekɛ e e yɛlɛtaa wɔ̃ lilikũãzɛ yi? b
E kɛa i dɔpia gaga yekɛ i i yɛlɛtaa wɔ̃ lilikũãzɛ yia, Zihova laa gɛ̃. Ko Sãã 103:13, 14 gee, ɛ̃ɛ̃ kɛ ko wɛĩlɔɔ e kea yiɓo:
-
E kɛa i dɔpia gaga kɛ i i kɔɓo wɔ̃ lilikũãzɛ kɛɛ baa, zi kpɛɛ lɛ Baabo wekpo e kea e i fããwaa ka?
Mi sã ɓaa pele, wá mi kɔ̃ wɔ̃ mɔ ka!
Lɛ lɔɔlɔɔ kɛ i i yɛlɛtaa kelɛ, ‘maa kɔ̃ a mɔ, a mɔɔ wɔ̃ mɔɔ, maa tea.’ Kɛɛ i yɛlɛtaa wɔ̃ e kea yi: Ɓii balasimi lɛɛ sã aa pelea, a yi wa kelɛ aa kɔ̃ balaa sii mɔ, ɛ̃ɛ̃ lɛɛ́ lo yɛɛ e zi zeĩ kɛ e gbɛ̃ e mɛi balaa sii mɔ. Zi nɔ dooa kaa, i pele yi wa kelɛ ɓaa kɔ̃ gele gɔ̃ wɔ̃ lilikũãzɛ kɛɛ ka mɔ. Ɛɛ̃ ii bɛi i yɛlɛtaa e kpeĩ ka e gbɛ̃a, zi i dɔpiaa gagaa mɔ. Sã waa pele, lɛ mia pie pɛ ka, ye wa mia teapia ka. Yekɛ i yi e ga! Zihova lɛɛ lo gbũu i mɔ i kɔ e die.
MIA DO OO GEE: “Aa die gbaa m zo ka, mḿ bɛi tea.”
-
Baabo wekpo kpɛɛ lɛ i bɛi a zɔ̃ɔ̃ a mɔɔ mi lɛɛ, kɛɛ a yidɔ kelɛ Zihova lɛɛ bɛi gbũu a mɔ e tea wɔ̃ e kilia kɛɛ mɔ?
WƆ̃Ɔ WŨ
Ye ko gbĩkpala la aa ɓɔ, lɛ ko yɛlɛtaa wa ko yiikɔ aa kɛ kpeĩa, lɛɛ Zihova zoda.
Zovuo Wɔ̃
-
Mɛ e kɛ lɛ lɛ kpanazɛ kpokpo ɓo kɛɛ ko la e ɓɔ?
-
Zi kpɛɛ lɛ ko la e bɛi ɓɔɔ a ka?
-
Zi kpɛɛ lɛ ɓa yɛlɛtaa wa i yiikɔ e bɛi kɛɛa kpeĩ?
I NYIƐ KPƆ
Mɛɛ wɔ̃ kelekele ni kpɛɛ lɛ i bɛi a kɛɛ kɛ i la e ɓɔ ye bɛ̃ɛ̃ lɛ pɛ wa i kɛlɛ kpãkpãa ka?
Wɔ̃ ni lɛ i bɛia kɛɛ kɛ i kã tããkpaa mii lɛɛ gɛ̃.
“Zi I Bɛi Kãã Ka Tããkpaa Mii Lɛɛ” (Ya Nyiɛ!, Gelemɛzɔ̃ã 2010)
Zi mia kpãã bĩĩ gɛ̃ɛ pie e toa mia mɔɔ gɛ̃.
“Mia Kpãã Bĩĩ Gɛ̃ɛ—Kea Lɛ Sɛɛ, maa Lɛ Yɔɔ?” (Wɔ̃lagɛ̃kamaa, Kaakaa 1, 2013)
Gɔ̃ doo lɛ mia kpãã bĩĩ gɛ̃ɛ wɔ̃ e die a zo kaa, zi e tea a mɔɔ gɛ̃.
“M Kɔ̃ A Mɔ Bunu Bunuzɛ Kɛ M Tĩã Tea” (Wɔ̃lagɛ̃kamaa Nɔ. 4 2016)
a “Zi I Bɛi Kãã Ka Tããkpaa Mii Lɛɛ,” “I Nyiɛ Kpɔ” lɛmɔ pɛ mɛdãpia e kea yia, lɛɛ wɔ̃ pɛɛ e gbɛ̃a wɔ̃ ni lɛ i bɛi a kɛɛ kɛ i i kɔɓo wɔ̃ lilikũãzɛ wɔ̃ die mi zo ka mɔɔ mɔ.
b Kɛ i gbumɔ sɔlɔɓo i tea sɔyɔɔɓodieka lɛɛ, i “Zi Kpɛɛ Lɛ M Bɛi Kãã Ka Sɔyɔɔɓodieka Lɛɛ Mɔ?” gɛ̃ kii e kea yi, Wɛĩlɔɔ Ni Lɛ Mia Dɛɛ O Kɛɛ —A Yiɓoa Ni Lɛ E Gbũ O Mɔɔ, A be 1, wekpo 25.
