PƐ MƐDÃPIA 41
Mɛɛ Wɔ̃ Lɛ Baaboa A Gee E Gbɛ̃a Lee wa Gɔ̃ Wɔ̃ Kɛɛ Mɔ?
Lɛɛ mia bunuzɛ fɔ̃ãfɔ̃ã kɛɓo ye waa kɛ wɔ̃ geepia e gbɛ̃a lee wa gɔ̃ wɔ̃ kɛɛ mɔɔ ka. E kɛ bɛ̃ɛ̃ kilia, ye Baabo aa wɔ̃ gee e gbɛ̃a lee wa gɔ̃ wɔ̃ kɛɛ mɔɔ, laa gee nɔ kpoule, kɛɛ ɓɛlɛya ka. Wɔ̃ lɛ a geea lɛɛ gbũ ko mɔ. Lɛ wana ka, ɓii Baaboa lɛɛ go Zihova lɛ e ko Kɛmi kaa kɛlɛ. A mɔ wɔ̃ mɔɔ, lɛɛ wɔ̃ lɛ lɛ kpeĩ ko wɛĩa dɔ. E wɔ̃ laa mɔ ko kɛ kɛɛ a zo e da ɛ̃ɛ̃ kɛ ko kɛɓe kɛ toakili kaa zɔ̃ɔ̃ ko lɛɛ.
1. Zi kpɛɛ lɛ Zihova e lee wa gɔ̃ wɔ̃ kɛɛ gɛ̃ a ka?
Lee wa gɔ̃ wɔ̃ kɛɛ lɛ gbaapɛ lɛ e go Zihova kɛlɛɛ ka. Lɛɛ a naa gɔ̃ wa lee lɛ o kie sii lɛɛ o a nyɔnɔ si o kie ba. Gbaapɛ e kea ye wa nɔ kiesimia wa nɛ ye wɔ̃ wɛĩ, kɛɛ lɛ zi lɛ o bɛi wa lɔkɛamɔ zɔ̃ɔ̃a o kie ni lɛɛ geli kaa ka. Pɛ e kɛ lɛ Baaboa a gee: “Ka i wɛlɛ tãã lee ka geli kɛ ka kie baa lɛ.” (Pɔlɔvɛɛ 5:18, 19) Zihova laa naa Tokɛlɛipiemia lɛ o kie sii lɛɛ o kɛ zodɔamɔzɛ, yekɛ o gbɛ̃ o ɓɛɛmi na ɛ̃ɛ̃ dɛ̃ pie.—Hiibulu 13:4 gee.
2. Mɛɛ e nɛi wa manaazɛɛ ka?
Baaboa laa gee kelɛ mia “o nɛi wa manaazɛɛ, . . . o dɔlɔ lɛɛ́ bɛi kɛɛ mia lɛ Wala too lɛ o laa fĩã.” (Gɛlesia 5:19-21) Baabo bɛ̃ɛ̃ mia lɛ o Gili kiia bɛ̃ɛ̃, o Gili we lɛ e [poonia] kaa kelekele kelɛ lɛ nɛi wa manaazɛɛ ka. Wea yi lɛ e zeĩ kelɛ (1) mia lɛ o lee wa gɔ̃ wɔ̃ kɛ, a lɛ o kie sii wá a kaa, (2) gɔ̃ wa gɔ̃ ɛ̃ɛ̃ lee wa lee kɛ o kie pie lɛ gɔ̃ wa lee lɛ ɓe, ɛ̃ɛ̃ (3) mi e gbɛ̃ tolopɛ pie. Ye kɔaa ko die ɓo sɔ̃ɔ̃ yɔɔ kɛɛ yia, lɛɛ Zihova geli ɛ̃ɛ̃ lɛɛ gbũ ko mɔ.—1 Tɛsalonia 4:3.
A PIE FOO
Zi i bɛi i yiɓoo a ka nɛi wa manaazɛɛ mɔ, ɛ̃ɛ̃ zi e bɛi gbũua i mɔ kɛ i to kpeĩ Wala wɛlɛ mɔɔ gɛ̃.
3. I mɛtɛ̃ nɛi wa manaazɛɛ mɔ
Zosɛ a gee gbaao lee lɛ a naa wa ye o wɔtãã kɛɛ lɛɛ. Ko Zɛnɛse 39:1-12 gee, ɛ̃ɛ̃ kɛ ko wɛĩlɔɔ ni o kea yiɓo:
-
Mɛ e pa Zosɛ mɔ kɛ e die bala ka? —A lonipia 9 gɛ̃.
-
Ɓaa i yɛlɛtaaa wɔ̃ kpeĩ lɛ Zosɛ a kɛɛ? Mɛɛ wɔ̃ wɛĩ?
Zi kpɛɛ lɛ mia dɛɛ o bɛi tooa Zosɛ la wɔ̃ gɔ̃ãa pie ɛ̃ɛ̃ kɛ o o yiɓo nɛi wa manaazɛɛ mɔ pɛnɛɛ? Ko VILOA gɛ̃.
Zihova laa naa ko seĩ ko ko yiɓo nɛi wa manaazɛɛ mɔ. Ko 1 Kɔleĩtĩã 6:18 gee, ɛ̃ɛ̃ kɛ ko wɛĩlɔɔ ni o kea yiɓo:
-
Mɛɛ wɔ̃ ni lɛ o bɛi a kɛɛ kɛ mido e e kɔda nɛi wa manaazɛɛ wɔ̃ ba?
-
Zi kpɛɛ lɛ i bɛi i mɛtɛ̃ɛ̃a nɛi wa manaazɛɛ mɔ?
4. Ii bɛi gelegɔ̃ɔ̃ yidã wɔ̃ ka
Mɛ a kɛ gaga kɛ mi e gelegɔ̃ yidã wɔ̃ lɛ e nɛi wa manaazɛɛ wɔ̃ kaa ka? Ko VILOA gɛ̃, ɛ̃ɛ̃ kɛ ko wɛĩlɔɔ e toa piea yiɓo.
-
Viloa yia, lɛ ko leegea a yidɔ kelɛ a zi yɛlɛtaa wa a zi kɛwɔ̃ɔ lɛɛ lo a kɛɛ to e e na zoda zizaa wɔ̃ kɛɛ, mɛɛ wɔ̃ lɛ a kɛ?
E kɛ bɛ̃ɛ̃ Tokɛlɛipiemia lɛ o zodɔamɔzɛɛ, oo wàa ɓele luo gbũu ka kɛ wa yɛlɛtaa e kɛ kpeĩ. Zi kpɛɛ lɛ i bɛi a kɛɛa yekɛ i i yɛlɛtaa wɔ̃ lilikũũazɛ yi? Ko Felepĩã 4:8 gee, ɛ̃ɛ̃ kɛ ko wɛĩlɔɔ ni o kea yiɓo:
-
Mɛɛ wɔ̃ ni lɛ laa mɔ ko ko yɛlɛtaa yi?
-
Zi kpɛɛ lɛ Baaboa geee, wa yɛɓo kɛ Zihova lɛɛ teele e gbũa ko mɔ yekɛ ko kɛwɔ̃ yɔɔ kɛ?
5. Zihova zi yiikɔ nia lɛɛ gbũ ko mɔ
Zihova lɛɛ wɔ̃ lɛ lɛ sɛ ko wɛĩa dɔ. Zihova lɛɛ zi ko yiikɔ e bɛi kɛɛa kpeĩ, ɛ̃ɛ̃ wɔ̃ yie ni lɛ e go a kololaa gee ko lɛɛ. Koo bɛi Pɔlɔvɛɛ 7:7-27 geee ɛ̃ɛ̃ VILOA gɛ̃ɛ, kɛ ko wɛĩlɔɔ ni lɛ o toa piea yiɓo.
-
Zi kpɛɛ lɛ gɔ̃ nɛfu dɛɛ e e die nɔ a ka yidã wɔ̃ lɛɛ?—Pɔlɔvɛɛ 7:8, 9 gɛ̃.
-
Lɛ zi Pɔlɔvɛɛ 7:23, 26, a gee a kaa, nɛi wa manaazɛɛ wɔ̃ pie yɔɔ lɛɛ to mia mɔ kpokpo ɓo. Ye kɔaa ko kɔɓo wɔ̃ lilikũũazɛ baa, mɛɛ wɔ̃ lɛ lɛɛ́ lo kɛɛ ko ka?
-
Zi kpɛɛ lɛ kɔɓo wɔ̃ lilikũũazɛ kɛɛ ba e gbũa ko mɔ ko kɛɓe kɛ toakili ka?
Mia do oo o yɛlɛtaa kelɛ wɔ̃ lɛ Baabo a gee e gbɛ̃a gɔ̃ wa gɔ̃ ɛ̃ɛ̃ lee wa lee kɛ o kie pie lɛ gɔ̃ wa e na lɛ ɓea ye wa lɔkɛa ka. Kɛɛ Zihova lɛ e Wala lɔkɛamɔzɛ kaa, laa naa mia seĩ o kɛɓe kɛ geli ka toakili ka. Kɛ bɛi e kɛ ko mɔɔ, laa mɔ ko to a zi yiikɔ nia pie. Ko Gɛlesia 5:19-21 gee, ɛ̃ɛ̃ kɛ ko wɛĩlɔɔ e kea yiɓo:
-
Kea Wala wɛlɛ mɔɔ, lee wa lee ɛ̃ɛ̃ gɔ̃ wa gɔ̃ kɛ o kie pie lɛ nɔ lɛ wɔ̃ yɔɔ kaa?
Kɛ ko Wala zoda wɔ̃ kɛɛ, laa mɔ ko seĩ ko ko sɔ̃ɔ̃ mɛvɔɔ. Kea a kɛɛ lɛ kpanazɛ? Ko Sãã 19:8, 11 gee, ɛ̃ɛ̃ kɛ ko wɛĩlɔɔ ni o kea yiɓo:
-
Ɓaa i yɛlɛtaaa Zihova zi yiikɔ nia lɛ yimaazɛ? Mɛɛ wɔ̃ wɛĩ?
Zihova aa gbũ mia bunuzɛ mɔ kɛ o to a zi yiikɔ nia pie. Lɛɛ bɛi gbũu i mɔ nɔ kili
MIA DO OO GEE: “Mia peelɛ nɔɔfe wa wɔtãã kɛɛ wa yɔɔ, a gãã nɔ o lɔkɛ o kie ni ka.”
-
Ii loa gee kpɛ?
WƆ̃Ɔ WŨ
Lee wa gɔ̃ wɔ̃ kɛɛ lɛ gbaapɛ lɛ e go Zihova kɛlɛɛ ka, ɛ̃ɛ̃ e a kɛ lee wa e dɛ̃ o a nyɔnɔ si.
Zovuo Wɔ̃
-
Wɔ̃ ni lɛ e nɛi wa manaazɛɛ kaa do lɛ e mɛɛ ka?
-
Mɛɛ wɔ̃ ni lɛ o lo gbũu ko mɔ ko ko kɔɓo nɛi wa manaazɛɛ wɔ̃ yi?
-
Zi kpɛɛ lɛ e gbũa ko mɔ ye kɔaa to Zihova zi yiikɔ nia piea ka?
I NYIƐ KPƆ
E kɛa mia lɛ o o kie piea o kie sii lɛo ɛ̃ɛ̃ o kie sii wáo, lɛ wɔ̃ ka Wala lɛɛ gɛ̃.
“Mɛɛ Wɔ̃ Lɛ Baaboa A Gee E Gbɛ̃a Mia Kɛ O Kie Pie To O Kie Sii Wá A Kaa Mɔ?” (Lɛ jw.org la)
Ye bɛ̃ɛ̃ lɛ Baaboa a gee gɔ̃ wa gɔ̃ ɛ̃ɛ̃ lee wa lee kɛ o kie pie lɛ gɔ̃ wa e na lɛ ɓea lɛ yɔɔ, pɛ e kɛ lɛ ye waa mɔ kɛ ko lɔnyɛamɔ gɔ̃ mia lɛ o kɛɛ kaa gɛ̃.
“Kea Gɔ̃ Wa Gɔ̃ ɛ̃ɛ̃ Lee Wa Lee Kɛ O Kie Pie Lɛ Gɔ̃ Wa E Na Lɛ Ɓea Lɛ Yɔɔ?” (Lɛ jw.org la)
Zi lɛ Wala la lɔɔ ni lɛ o gbɛ̃ɛ̃ lɛ lee wa gɔ̃ wɔ̃ kɛɛ seĩ mɔɔ o gbũa ko mɔɔ gɛ̃.
“Kea Sɔɓo I Ɓɛɛmi Yɛlɛpia Ka Lɛ Kpokpo Ɓo Wɔtãã Kɛɛ Ka?” (Lɛ jw.org la)
I wɔ̃ lɛ e pa lee wa lee ɛ̃ɛ̃ gɔ̃ wa gɔ̃ wɔ̃ kɛɛ lɛ lee wa e dɛ̃ lɛ ɓea kɛmi doo mɔ kɛ e e yiikɔ mɛvɔɔ Wala zoda zi piea gɛ̃, “O Wɔ̃ Kɛ M Ka Ɓɛlɛya Ka.”
a Lee wa gɔ̃ wɔ̃ kɛɛ lɛ Wala lɛɛ́ wee a mɔɔ kɛzi lɛ gbɛɛ gbɛɛ kelɛ nɛi wa manaazɛɛ, ɛ̃ɛ̃ sɔɓo i ɓɛɛmi yɛlɛpia ka kaa.
