PƐ MƐDÃPIA 42
Mɛɛ Wɔ̃ Lɛ Baaboa A Gee E Gbɛ̃a Kɛ Kuia Ka wa Kiesiɓo Mɔ?
Lɛ bunuzɛ mɔɔ, mia oo gɛ̃ kelɛ ye i gɔ̃ sii wa ɛ̃ɛ̃ i lee sii waa, ií bɛi kɛɛ gelizɛ. E kɛ bɛ̃ɛ̃ kilia ye wa kiesimia seĩ ka kɛ o kɛ gelizɛ, ɛ̃ɛ̃ ye wa kuia vɔ seĩ ka kɛ o gɔ̃ kɛɛ gelizɛ. A wanazɛɛ lɛ e kelɛ, Baaboa laa gee kɛ kuia ka wa kiesiɓo lɛ gbaapɛ lɛ e go Zihova kɛlɛɛ ka.
1. Wɔ̃ yie kpɛɛ lɛ e go kɛ kuia ka kolola?
Baaboa laa gee: ‘Mi a lee si lɛɛ ɛ̃ɛ̃ a gɔ̃ si lɛɛ a kɛ sɛ, kɛɛ mi a lee ɛ̃ɛ̃ gɔ̃ sii waa, lɛɛ lo wɔ̃ kɛɛ sɛ kpokpo ɓo.’ (1 Kɔleĩtĩã 7:32, 33, 38 gee.) Mi lɛ kuia kaa, zi kpɛɛ lɛ e bɛi wɔ̃ kɛɛa “sɛ kpokpo ɓo”? Tokɛlɛipiemia lɛ o kuia kaa, pɛ naa o piemi lɛɛ wɔ̃ wá o mɔ. A mɔ wɔ̃ mɔɔ, o too lɛ o die kɔ mɔ. Bɛi lɛ o do o mɔ o wɔ̃ kpanazɛ kɛ Zihova lɛɛ, a gɔ̃ã lɛ e, oo bɛi loo sɛlɛ gbɛɛ la o wɔ̃laũ yiea gee yi. E kãa mɔɔ, bɛi lɛ o mɔ o gãã Zihova ka kɔɛ.
2. Gbumɔ kpɛɛ lɛ e go mia o kie sii lɛ e kpeĩ kaa kolola?
Lɛ zi nɔ kuiala lɛ a kaa, lɛ kiesiɓo e nua wɔ̃ yie yie kaa. Baaboa laa gee kelɛ “mia peelɛ o fia e diea mi doo la.” (Ikilisiase 4:9) Lɛ wana ka kpokpo ɓo, ye Tokɛlɛipiemia waa to liewekpo ni lɛ o Baaboa yi e gbɛ̃a kiesimia mɔɔ piea ka. Mia o o kie si e kpeĩ kaa, oo o weɓele o kie ni lɛɛ kelɛ oo lo lɔkɛɛ o kie ni ka, oo lo o kie ni ɓɛlɛya, ɛ̃ɛ̃ oo lo kpaa o kie ni wɛĩ. A mɔɔ wɔ mɔɔ, oo o zokɛ o kie ni pie e yie ka, e diea mia lɛ o o kie ba nɔ ɓɔɔ la. Ɛɛ̃ oo lo o zokɛɛ wa nɔɔɓe pie e yie ka.
3. Zi kpɛɛ lɛ Zihova e kiesiɓo gɛ̃ a ka?
Lɛ Zihova e kiesiwɔ̃ beĩzɛɛ ɓo gɔɔ yia, a gee: “Gɔ̃ lɛɛ lo e daa wa e lee o too to wa e na o da o kieba, to o peelɛɛ o kɛ gbaa doo.” (Mafiu 19:5) Zihova laa naa gɔ̃ wa e na o lɔkɛ o kie ni ka, ɛ̃ɛ̃ o kɛ o kie ba ye nɔ o tĩã ɓea ka. Lɛɛ wee kieto wɔ̃ mɔ ye mido aa e piemi to lɛ aa mi gbɛɛ kũa ka. Le e kea yia, Zihova lɛɛ yikɛgaa nɔ mi o wɔ̃ yɔɔ kɛ a kaa lɛɛ, e kɛa lɛɛ e yɛlɛtaa kɛ e e piemi lɛ e wɔ̃ yɔɔ kɛ a kaa toa. a (Mafiu 19:9) Zihova laa naa Tokɛlɛipiemi piemi e kɛ nɔ doo.—1 Temɔte 3:2.
A PIE FOO
I piemi e kɛ ɓeo ɛ̃ɛ̃ e gɔ̃ kɛɛ ɓeo, zi lɛ i bɛi kɛɛa gelizɛ ɛ̃ɛ̃ i Zihova zodaa gɛ̃.
4. I yɛɓo yie kɛ gbaapɛ lɛ e kuiala kaa ka
Zizɛ e kɛ-kuia-ka-la gɛ̃ gbaapɛ ka. (Mafiu 19:11, 12) Ko Mafiu 4:23 gee, ɛ̃ɛ̃ kɛ ko wɛĩlɔɔ e kea yiɓo:
-
Zi kpɛɛ lɛ Zizɛ e kuiala lɛ e gbaapɛ kaa daa yɛɓo pie kɛ e yɛɓo kɛ a ka e Daa lɛɛ, ɛ̃ɛ̃ e gbũa mia ye o toa mɔ?
Tokɛlɛipiemia oo bɛi wa kɛ-kuia-ka-laa nyɔnɔ sii lɛ Zizɛ ɓe. Ko VILOA gɛ̃, ɛ̃ɛ̃ kɛ ko wɛĩlɔɔ e toa piea yiɓo.
-
Zi kpɛɛ lɛ Tokɛlɛipiemia o bɛi wa kuialaa daa yɛɓo pie e yie ka?
Ɓaa yidɔ?
Baaboa lɛɛ́ gbaa kɛɛ lɛ laa mɔ mi e ɓɔ a mɔ kɛɛ e tĩã lee ɛ̃ɛ̃ gɔ̃ siia wɔ̃ gee. E kɛ bɛ̃ɛ̃ kilia, laa mɔ a to a mɛ e kpala e kɛa bɛi laa mɔ a kɛ kilia.—1 Kɔleĩtĩã 7:36.
5. I i piemi si gikã ka
I piemi sii lɛ wɔ̃ kpanazɛ lɛ i loa ya i ge ɓa kɛɛ ka. Ko Mafiu 19:4-6, 9 gee, ɛ̃ɛ̃ kɛ ko wɛĩlɔɔ e kea yiɓo:
-
Mɛ e kɛ lɛ ye waa mɔ Tokɛlɛipiemi e ɓalasi kiesiwɔ̃ ka?
Baaboa lɛɛ gbũ i mɔ i zi ɓa naa i piemi yiikɔ e kɛ a kaa dɔ. A kpanazɛɛ lɛ e kelɛ, mi e lo kɛɛ i piemi kaa, e kɛ mi lɛ e lɔkɛ Zihova kaa ka. b Ko 1 Kɔleĩtĩã 7:39 wa 2 Kɔleĩtĩã 6:14 gee, ɛ̃ɛ̃ kɛ ko wɛĩlɔɔ ni o kea yiɓo:
-
Mɛ e kɛ lɛ laa mɔ ko piemi e kɛ nɔ Tokɛlɛipiemi ka?
-
Zi kpɛɛ lɛ Zihova e lo a gɛ̃a ye kɔaa mi lɛ laá lɔkɛ a kaa sia ka?
Ye waa wii vɔ suu gbɛɛ gbɛɛzɛ yele o kie mɔ o yɛɓo kɛɛ oo wàa ɓele, zi nɔ dooa kaa ye Tokɛlɛipiemi aa mi lɛ ye wa Tokɛlɛipiemi kaa sia, lɛɛ wàa ɓele
6. I kiesiwɔ̃ gɛ̃ lɛ zi Zihova a gɛ̃aa lɛ ɓe
Mɔ Eezɛlɛɛ, gɔ̃ã do o kɛ o na ni ɓopia luu o die zokũ wɔ̃ wɛĩ. Ko Malaka 2:13, 14, 16 gee, ɛ̃ɛ̃ kɛ ko wɛĩlɔɔ e kea yiɓo:
-
Mɛ e kɛ lɛ Zihova lɛɛ́ wee kieto wɔ̃ lɛ a gã lɛɛ́ go Baabo yia mɔ?
Ye mi aa e piemi toa, a tie lɛɛ a piemi wa la nɔɔɓe kũ
Ko VILOA gɛ̃, ɛ̃ɛ̃ kɛ ko wɛĩlɔɔ e to a piea yiɓo.
-
E kɛa i piemi lɛɛ́ Zihova dɔɔ, zi kpɛɛ lɛ i bɛi a kɛɛa kɛ ka kiesiɓoa e kɛ gelizɛ?
7. To Zihova zi yiikɔ ni lɛ e kiesiɓo wɛĩa pie
Laa mɔ mi e dɔ gaga e to Zihova zi yiikɔ ni lɛ e kiesiɓo wɛĩa pie. c Ɓii Zihova lɛɛ lua kpɔ mia o kɛ kilia mɔ. Ko VILOA gɛ̃.
Ko Hiibulu 13:4 gee, ɛ̃ɛ̃ kɛ ko wɛĩlɔɔ ni o kea yiɓo:
-
Ɓaa i yɛlɛtaaa, Zihova zi yiikɔ ni lɛ o gbɛ̃ɛ̃ lɛ kiesiɓo mɔɔ, lɛ wɔ̃ yimaazɛ ka? Mɛɛ wɔ̃ wɛĩ?
Zihova laa naa Tokɛlɛipiemia o kii kɛ wa kiesiɓo ɛ̃ɛ̃ kieto wɔ̃ mɔ, sɛlɛ bunuzɛ yia gomɛnɛ lɛ e liesi a kaa. Ko Tatɔ 3:1 gee, ɛ̃ɛ̃ kɛ ko wɛĩlɔɔ e kea yiɓo:
-
E kɛa ka kie sii lɛɛ, Gomɛnɛɛ laa yidɔ kelɛ kii lɛ ka kiesiɓoa mɔ?
MI DO LƐƐ BƐI WƐĨLƆƆ KƐƐ: “Mɛ mia o mɔɔ o kie si ɓo? Mia peelɛ oo bɛi nɔ kɛɛ o kie ba.”
-
Zi kpɛɛ lɛ i bɛi a yiɓoo a ka?
WƆ̃Ɔ WŨ
Kɛ kuia ka wa kiesiɓo lɛ gbaapɛ lɛ e go Zihova kɛlɛɛ ka. I kɛ kuia kao ɛ̃ɛ̃ i piemi e kɛ ɓeo, ii bɛi kɛɛ gelizɛ ye ɓaa to wɔ̃ lɛ Zihova a geea piea ka.
Zovuo Wɔ̃
-
Zi kpɛɛ lɛ mi e bɛi la kuiala daa yɛɓo pie e kpeĩ ka?
-
Mɛ e kɛ lɛ Baaboa a gee ko mi nɔ lɛ Tokɛlɛipiemi kaa si?
-
Mɛɛ wɔ̃ lɛ Baaboa a gee mia oo bɛi o kietoo a wɛĩ?
I NYIƐ KPƆ
A yi lɛ e mɛɛ ka, ye Baaboa aa gee nɔ ko mi lɛ lɛ “ko Daami la mi kaa” sia ka?
“Wɛĩlɔɔ Ni Lɛ Kii Geemia O Kɛɛ” (Wɔ̃lagɛ̃kamaa, Gbaalɛɛ 1, 2004)
Wɔ̃kɛzi piegɔ̃ kɛɛ kpola peelɛ lɛ e bɛi gbũu i mɔ kɛ i i piemi naa ɛ̃ɛ̃ ɓa sia gɛ̃.
Pɛ e kɛ lɛ ko leege gɔ̃zɛ doo e e yɛlɛtaa kelɛ, Zihova aa pɛ kpanazɛ nɔ a lɛɛ e diea pɛ nɔɔfe lɛ e e ko gbɛ̃ a mɔɔ laa gɛ̃.
Mɛɛ wɔ̃ ni lɛ laa mɔ mi ee yɛlɛtaa yi kɛɛ e tĩã e piemi too, ɛ̃ɛ̃ o fĩã e ɓo?
“Ɓɛlɛya Nɔ ‘Pɛ Lɛ Wala Aa Da E Kie Zia Lɛɛ’” (Wɔ̃lagɛ̃kamaa, Nɛnɛ Mɛnɛ 15, 2018)
a I a lienyɛpia 4 gɛ̃ e gbɛ̃a lee wa gɔ̃ fĩã ɓo wɔ̃, lɛ mi piemi to ɓaa mi gbɛɛ kũa, mɔɔ wɔ̃ wáa yia.
b Lɛ bunuzɛ mɔɔ, nɛmia ni oo lee ɛ̃ɛ̃ gɔ̃ lɛ laa mɔ o gbe ɛ̃ɛ̃ lu e a sia zɔ̃ɔ̃ o lɛɛ. E kɛa mɔu lɛ kilia, ye waa mɔ nɛmia ni lɛ o lɔkɛ wa nɔɔ kaa o o nyiɛ gbɛ̃ mi lɛ wa nɛ lɛ nupia siia la pɛlee ɛ̃ɛ̃ a kɛ kpanazɛ kɔ mɔ, kɛɛ e kɛa a mɔɔ mi laa lɔkɛ Zihova kaa.
c E kɛa ka mido kaa kie pie, lɛ ka kie sii waa, i kã a lɛo ɛ̃ɛ̃ kaa kie sio, a too lɛ i ka.
