Kpoula lɛ seĩ mɔɔ, mia wa yɛlɛtaa lɛ gbɛɛ gbɛɛ e gbɛ̃a yɔ mɔ. Mia do oo naa wa o ɓɛɛmia o yɔ mi o kie ba luo do ka. Mia do bɛ̃ɛ̃ oó wee a mɔ o yɔ nɔɔfe mi. Mia do bɛ̃ɛ̃ oo yɔ mi aa o kɛ. Mɛɛ wɔ̃ lɛ Baaboa a gee e gbɛ̃a yɔ mii mɔ?

1. Kea lɛ yɔɔ kɛ mi e yɔ nɔɔfe mi?

Baaboa lɛɛ́ gbaa gee kelɛ yɔ mii lɛ yɔɔ. E kãa mɔɔ, ye kɔaa kɛ lɛ gɛ̃pia gbaapɛ lɛ Wala a nɔ ko lɛɛ mɔɔ, Baaboa laa gee, “yɔ laa kɛ mi ge aa li.” (Sãã 104:​14, 15) Baaboa laa gee gbiniwalalɛɛ mia zodɔamɔzɛ lɛ o kɛ mɔɔ, o do o yɔ mi.​—1 Temɔte 5:​23.

2. Liewe kpɛɛ lɛ Baaboa a dɔ mia o yɔ mia lɛɛ?

Zihova lɛɛ́ wee yɔ mi gbuo ɛ̃ɛ̃ aa i kɛɛ wɔ̃ mɔ. (Gɛlesia 5:​21) A Lewe laa gee: “Yekɛ i kɛ mia lɛ o yɔ yii mi nyɔɔ ba.” (Pɔlɔvɛɛ 23:​20) A mɔɔ wɔ̃ mɔɔ, ye kɔaa naa ko yɔ mi e kɛ bɛ̃ɛ̃ ko doo lɛpiaa, yekɛ ko mi nyɔɔ a kɔ e die ko la, lɛ e lo a kɛɛ yekɛ ko ko yɛlɛtaa e kpeĩ ka, lɛ koó bɛi wɔ̃ lɛ ko lo a geee ɛ̃ɛ̃ a kɛɛɛ wũla kũ zi dɔɔɔ, ɛ̃ɛ̃ lɛ koó bɛi ko zokɛɛ ko die piea. E kɛa koó bɛi ko die kũu tãã ye kɔaa yɔ mia kaa, ye waa mɔ gbaa ko a mi.

3. Zi kpɛɛ lɛ ko bɛi ɓɛlɛya nɔɔa mia ye o toa lɛɛ e gbɛ̃a yɔ mii mɔ?

Laa mɔ mi seĩ e e zɔ̃ɔ̃ sii e kɛa lɛɛ lo yɔ miia. Ye waa mɔ kɛ ko mɛisa kaa mido wĩĩ ye aa naa e yɔ mi e ɓeĩ kaa ka, ɛ̃ɛ̃ ye waa mɔ ko tie kpaa mido la ye laá naa e yɔ mia ka. (Woloma 14:​10) Koó lo wee a mɔ ko yɔ mi, ye kɔaa yidɔ kelɛ lɛɛ lo kɛɛ wɔ̃ ka mia ye o toa lɛɛ ka. (Woloma 14:​21 gee.) Koo naa ko to liewe e kea pie kelɛ “yekɛ mi nɔɔfe e e yɛlɛ kɛ e die mɔɔ wɔ̃ yi, kɛɛ a yɛlɛ e kɛ e ɓɛĩ gbɛɛ mɔɔ wɔ̃ yi.”​—1 Kɔleĩtĩã 10:​23, 24 gee.

 A PIE FOO

4. I yɛlɛtaa e kɛa ii lo yɔ miia

Zi kpɛɛ lɛ Zizɛ e yɔ mii gɛ̃ a ka? Kɛ ko yiɓoa gɛ̃ɛ, ko kpalewɔ̃ beĩzɛ lɛ Zizɛ a kɛɛ gɛ̃. Ko Zɔ̃ɔ̃ 2:​1-11 gee, ɛ̃ɛ̃ kɛ ko wɛĩlɔɔ ni o kea yiɓo:

• Ye kɔaa lɛ gɛ̃ kpalewɔ̃ e kea mɔɔ, zi kpɛɛ lɛ Zizɛ e yɔ ɛ̃ɛ̃ mia o a mia gɛ̃ a ka?

• Ye mɔu Zizɛ lɛɛ́ gbaa gee yɔ mii lɛ yɔɔ, zi kpɛɛ lɛ laa mɔ ko mia o yɔ mia gɛ̃ a ka?

Ye bɛ̃ɛ̃ lɛ ye wa yɔɔ kɛ Tokɛlɛipiemia o yɔ mia, a yi wa kelɛ laa mɔ o kɛ a kɛpia teele. Ko Pɔlɔvɛɛ 22:3 gee, ɛ̃ɛ̃ kɛ ko lɛ gɛ̃ wɔ̃ e kea mɔ e kɛa lɛ sɛ i yɔ mia:

• I lopia taapɛ taa ɛ̃ɛ̃ yɛɓo kɛɛ pɛkulu ka.

• I gi lɛ i mɔ.

• Daita aa i liewe dɔ yekɛ i yɔ mi.

• Ii yɔ mi aa vɔ i kɔ zi.

• Lɔɔ e sɛlɛɛ yia lɛɛ́ wee a mɔ kɛ i yɔ mi.

• Ka mido kaa kie ba lɛ lɛɛ́ wee a mɔ e yɔ mi, ɓii lɛɛ́ bɛi e die kũu tãã yɔ mii yi.

Lɛɛ lo kɛɛ sɛ i yɔ dɔ lee si kpili la, ɛ̃ɛ̃ gbũ nɔɔfe la? Kɛ i wɔ̃ lɛ e lo gbũu i mɔ i i zɔ̃ɔ̃ sia dɔɔ, ko VILOA gɛ̃.

Ko Woloma 13:​13 wa 1 Kɔleĩtĩã 10:​31, 32 gee. Ye kɔaa nyɛ Baabo wekpo nia geepia doo dooa, koo lo wɛĩlɔɔ e kea yiɓoo:

• Ye ɓaa liewekpo e kea da yɛɓo piea, zi kpɛɛ lɛ e lo gbũua i mɔ kɛ i wɔ̃ lɛ e lo Zihova zodaa kũ i zɔ̃ɔ̃ si ka?

 5. I yɛlɛtaa a ye i bɛi a miia ka

Ye ɓaa naa i yɔ mia, i yɛlɛtaa wɔ̃ e kea yi: Ye bɛ̃ɛ̃ lɛ Zihova lɛɛ́ gbaa gee yɔ mii lɛ yɔɔ, a gee kelɛ yɔ yii mi wɔ̃ die mi zo ka wa sɛ. Mɛɛ wɔ̃ wɛĩ? Ko Hozia 4:11, 18 gee, ɛ̃ɛ̃ kɛ ko wɛĩlɔɔ e kea yiɓo:

• Mɛɛ wɔ̃ lɛ e kɛ ye mi aa yɔ mi nyɔɔ ka?

Zi kpɛɛ lɛ ko bɛi ko mɛtɛ̃ɛ̃a yɔ mi nyɔɔ mɔ? Laa mɔ ko mi e ɓeĩ ka ɛ̃ɛ̃ koo teapia dɔ. Ko Pɔlɔvɛɛ 11:2 gee, ɛ̃ɛ̃ kɛ ko wɛĩlɔɔ e kea yiɓo:

• Mɛ e kɛ lɛ lɛ gikã kpeĩ ka kɛɛ ko ko teapia dɔ?

6. Wɔ̃ e bɛi gbũu mi mɔ kɛɛ e e teapia dɔɔ

 WƆ̃Ɔ WŨ

Zihova e yɔ nɔ ko lɛɛ ko geli wɛĩ, kɛɛ laa gee kelɛ a mii nyɔɔ, to aa vɔ ko kɔ zia ye wa sɛ.

Zovuo Wɔ̃

• Mɛɛ wɔ̃ lɛ Baaboa a gee e gbɛ̃a yɔ mɔ?

• Mɛɛ wɔ̃ yɔɔ yɔɔ lɛ e go yɔ mi nyɔɔ kolola?

• Zi kpɛɛ lɛ ko bɛi ɓɛlɛya nɔɔa mia ye o toa wa wɔ̃ wa ya o ge e gbɛ̃a yɔ mii mɔɔ lɛɛ?