PƐ MƐDÃPIA 45

Kɔɓo Kpoula Zee Wɔ̃ Ba Yi Lɛ E Mɛɛ Ka?

À DA YƐƁO PÍÉ

Zizɛ e pɛzɔ̃ɔ̃ la toapiemia lɛɛ kelɛ o “wá gbaa kpoula la mia ni ka.” (Zɔ̃ɔ̃ 15:19) A yi lɛ e kelɛ ko ko kɔɓo gelegɔ̃ɔ̃ wa sɛlɛ liesiwɔ̃ ba. Kpokpo ɓoa ye wa lɔɔlɔɔ ko ko kɔɓo sɛlɛ liesiwɔ̃ ba. Mia oo bɛi yei sii ko mɔ ɓii ko kɔ wá kpoula zee wɔ̃ ba. Zi kpɛɛ lɛ ko bɛi ko kɔɓooa kpoula zee wɔ̃ ba, ɛ̃ɛ̃ kɛ ko kunu Zihova Wala mɔ?

1. Zi kpɛɛ lɛ Tokɛlɛipiemia wanazɛ o miagbunu wa Gomɛnɛ gɛ̃ a ka?

Tokɛlɛipiemia oo ɓɛlɛya nɔ gomɛnɛ lɛɛ. Koo wɔ̃ lɛ Zizɛ a geea kɛ, “ka pɛ lɛ e Siza la pɛ kaa nɔ a lɛɛ,”—a yi lɛ e kelɛ kɔa to lɔɔ lɛ e sɛlɛɛ yia pie, ɛ̃ɛ̃ ko ɓopɛ lɛ laa mɔ ko ɓoa ɓo. (Maa 12:17) Baaboa lɛɛ pɛzɔ̃ɔ̃ kelɛ miagbunu zi gomɛnɛ lɛɛ liesi ɓii Zihova a to o liesiia wɛĩ. (Woloma 13:1) A mɔɔ wɔ̃ mɔɔ, koo yidɔ kelɛ miagbunu zi gomɛnɛ la yikɛgaa teapia lɛ ɓe. Ko nyiɛ lɛ ko Wala ɛ̃ɛ̃ la Tomiala lɛ e lɛi sɛlɛ yia mɔ kɛ e kpoula wɔ̃ yibɛi.

2. Zi kpɛɛ lɛ ko zɔ̃ɔ̃a kelɛ ko kɔ wa kpoula zee wɔ̃ ba?

Lɛ Zizɛ lɛ ɓea, koó ko kɔda sɛlɛ liesiwɔ̃ ba. Lɛ mia o Zizɛ gɛ̃ aa la kpalewɔ̃ kɛɛ, wa naa o a kɛ wa sɛlɛ liesimi ka kpoula, kɛɛ lɛɛ́ gbaa wee a mɔ. (Zɔ̃ɔ̃ 6:15) Mɛɛ wɔ̃ wɛĩ? Ɓii, lɛ e lo liea a gee kelɛ, “m zi Tomiala wa kpoula zee.” (Zɔ̃ɔ̃ 18:36) Ko kɛ Zizɛ la Toapiemia kaa, koo zɔ̃ɔ̃ zi gbɛɛ gbɛɛ ka kelɛ ko kɔ wá kpoula zee wɔ̃ ba. A gɔ̃ã lɛ e, koó lo gele pie. (Maaka 4:3 gee.) Koo ɓɛlɛya nɔ sɛlɛ dɔa lɛɛ—kelɛ sɔpɛ̃ɛ̃ ni lɛ o sɛlɛ dɔa kaa ka—kɛɛ koó ɓɛlɛya lɛ laa mɔ ko nɔ Wala lɛɛ nɔ o lɛɛ. (1 Zɔ̃ɔ̃ 5:21) Koó dɔ sɛlɛ liesimia ɛ̃ɛ̃ dɔ-naa-mia nɔɔfe pie ɛ̃ɛ̃ koó niɛ o lɛɛ. Zi e kea ka piea, koo zɔ̃ɔ̃ kelɛ ko kunu lɛ Wala la gomɛnɛ lɛ e la Tomiala kaa doo kpãã mɔ.

A PIE FOO

Wɔ̃ ni lɛ e bɛi a kɛɛ gaga kɛ i i kɔɓo kpoula zee wɔ̃ baa mɛnyɛ, ɛ̃ɛ̃ zi lɛ i bɛi a kɛɛa kɛ i Zihova zodaa gɛ̃.

3. Tokɛlɛipiemia wanazɛ kɔ wa kpoula zee wɔ̃ ba

Zizɛ wa la toapiemia o wɔ̃ gɔ̃ã kpeĩ to ko lɛɛ. Ko Woloma 13:1, 5-7 wa 1 Pilɛ 2:13, 14 gee. Ye aa kɛɛ, ko VILOA gɛ̃, ɛ̃ɛ̃ kɛ ko wɛĩlɔɔ ni lɛ o to a piea yiɓo.

VILO: Tokɛlɛipiemia Wanazɛ Kɔ Wa Kpoula Zee Wɔ̃ Ba—Kpo 1 (4:28)

Mɛ e kɛ lɛ laa mɔ ko sɛlɛ liesimia ɓɛlɛya?
Zi gbɛɛ gbɛɛ kpɛɛ lɛ ko zɔ̃ɔ̃a kelɛ koo o we kɛ?

Ye waa kɛ gelegɔ̃piaa, sɛlɛ bunuzɛ laa gee kelɛ o kɔ waa ba, kɛɛ oo gbumɔ nɔ mia lɛ o gelegɔ̃ɔ lɛɛ. Mɛ e kɔɓo kpoula zee wɔ̃ ba ka kpokpo ɓo? Ko Zɔ̃ɔ̃ 17:16 gee. Ye aa kɛɛ, ko VILOA gɛ̃, ɛ̃ɛ̃ kɛ ko wɛĩlɔɔ lɛ e toa piea yiɓo.

VILO: Tokɛlɛipiemia Wanazɛ Kɔ Wa Kpoula Zee Wɔ̃ Ba—Kpo 2 (3:11)

Kɔɓo kpoula zee wɔ̃ ba yi lɛ e mɛɛ ka?

Ye sɛlɛ liesimia waa gee i wɔ̃ do kɛ, lɛ Wala la lɔɔɔ lɛɛ́ wee a mɔɔ bɛ̃ɛ̃? Ko Apɔsɔlɔ 5:28, 29 gee. Ye aa kɛɛ, ko VILOA gɛ̃, ɛ̃ɛ̃ kɛ ko wɛĩlɔɔ ni lɛ o to a piea yiɓo.

VILO: Tokɛlɛipiemia Wanazɛ Kɔ Wa Kpoula Zee Wɔ̃ Ba—Kpo 3 (1:18)

Ye miagbunu zi lɔɔ aa sã Wala laa lɔɔɔ kaa, deĩ zi lɔɔ lɛ laa mɔ ko to a pie?
Ii bɛi i yɛlɛtaa wɔ̃ do yi, lɛ Tokɛlɛipiemia oó bɛi sɛlɛ liesimia we kɛɛ a yia?

4. I kɔɓo kpoula zee wɔ̃ ba zi lɛ i i yɛlɛtaa kaa wa wɔ̃ ɓa kɛɛ yi

Ko 1 Zɔ̃ɔ̃ 5:21 gee. Ye aa kɛɛ, ko VILOA gɛ̃, ɛ̃ɛ̃ kɛ ko wɛĩlɔɔ ni lɛ o toa piea yiɓo.

VILO: Mɛ E Kɛ Lɛ Laa Mɔ Tokɛlɛipiemia Wanazɛ Zo E Kɛ Gaa—Kɛ O O Kɔɓo Kpoula Zee Wɔ̃ Ba (2:49)

Viloa yia, mɛ e kɛ lɛ Yemɛi a ya e ge yekɛ e da sɛlɛ liesiwɔ̃, ɛ̃ɛ̃ ɓɛlɛya nɔ sɛlɛ dɔa ni lɛ o kelɛ sɔpɛ̃ɛ̃ lɛ ɓea lɛɛ ba?
Ii i yɛlɛtaa kelɛ e wɔ̃ kɛ gikã ka?

Mɛɛ wɔ̃ lɛ e bɛia kɛɛ gaga ko ko kɔɓo kpoula zee wɔ̃ ba? Ko VILOA gɛ̃, ɛ̃ɛ̃ kɛ ko wɛĩlɔɔ ni lɛ o to a piea yiɓo.

VILO: Pɛ Kɔa Mɛdã Wɔ̃lagɛ̃kama Kiia Yia—I Kɔɓo Kpoula Lɛ A Yigini Lɛɛ Wɔ̃ Ba (5:16)

Zi kpɛɛ lɛ i bɛi i kɔɓooa kpoula zee wɔ̃ ba, ye sɛlɛ gbɛɛ gbɛɛ aa kɛ bɔɔ mɛpiaa ka?
Zi kpɛɛ lɛ ko bɛi ko kɔɓooa kpoula zee wɔ̃ ba, ye sɛlɛ liesimia waa wɔ̃ kɛ, lɛ a pie aa to ko mɔɔ ka?
Wɔ̃laũ lɛ ko ma fããla ɛ̃ɛ̃ lɛ mia o geea, zi kpɛɛ lɛ a pie e toa ko kɔɓo kpoula zee wɔ̃ baa mɔ?