Mia lɛ waa o kie si dɛɛ zokɛpɛmɔ lɛ o kɛlɛ kelɛ oo lo kɛɛ gelizɛ toakili ka lɛ zi o kɛa o kie si luo kaa ka. Ɛɛ̃ lɛɛ bɛi kɛɛ. Tokɛlɛipiemia lɛ waa o kie si mɔ pɛlɛ, lɛ waa dɔ gaa o to liewe lɛ Baabo a dɔɔ piea, oo yidɔ kelɛ wɔ̃ e kea lɛɛ bɛi kɛɛ.

1. Liewe kpɛɛ lɛ Baaboa a dɔ leesigɔ̃ã lɛɛ?

Zihova aa leesigɔ̃ si e kɛ e kɔpiemia la. (Ifisɔ̃ 5:23 gee.) Zihova laa naa e wɔ̃ lɛ e lo gbũu a kɔpiemia mɔɔ kɛ. Baaboa laa gee leesigɔ̃ã: “Ka bɛ̃ɛ̃, ka na ni lɔ e kpɔ ka mɔ.” (Ifisɔ̃ 5:​25) A yi lɛ e mɛɛ ka? Leesigɔ̃ lɛ a lɔkɛ e na kaa, lɛɛ yii e na ka kpolokpɔmɔ ka, o kɛ bɛ̃ɛ̃ kɛi ɛ̃ɛ̃ mia gbũ fĩãa ka. Lɛɛ dɔ gaa aa e zokɛ a pie, aa pɛ lɛ laa mɔ a sɔlɔɓoa nɔ a lɛɛ kɛ e kɛ gelizɛ. (1 Temɔte 5:8) A kpanazɛɛ lɛ e kelɛ, lɛɛ gbũ e na mɔ kɛ e nyɔɔ Zihova ka kɔɛ. (Mafiu 4:4) A gɔ̃ã gɛ̃, wa e na oo Baaboa gee o kieba to aa sɛnɛɓo o wɛĩ. Ye leesigɔ̃ aa lɔkɛ e na ka kpokpo ɓoa, wa Zihova wa ɓɛɛlaa mɛ lɛɛ kɛ gaga.​—1 Pilɛ 3:7 gee.

2. Liewe kpɛɛ lɛ Baaboa a dɔ gɔ̃siloa lɛɛ?

Wala Lewe laa gee kelɛ “lɛ lee seĩ mɔ e ɓɛlɛya [kpokpo] nɔ e dɛ̃ lɛɛ.” (Ifisɔ̃ 5:​33) Zi kpɛɛ lɛ e bɛi a kɛɛa kili? Lɛɛ bɛi e yɛlɛtaa e gbɛ̃a e dɛ̃ yiikɔ yie yie nia mɔ, ɛ̃ɛ̃ zi lɛ dɔpiaa gaga e e zokɛ wa la nɔɔɓe piea yi. Zeniia, lɛɛ bɛi gbũu a mɔ e wɔ̃ lɛ aa ya e ge a kɛɛ kɛ kpeĩ, ɛ̃ɛ̃ lɛɛ a gee a lɛɛ kpolokpɔmɔ ka, ye bɛ̃ɛ̃ lɛ lɛɛ́ gbini Zihova lɛɛ ka.

3. Zi kpɛɛ lɛ kiesimia o bɛi wa kiesiɓoa mɛ kɛɛa gaga?

Baaboa laa gee kelɛ ye mia waa o kiesia: Oo “da o kieba to o peelɛɛ o kɛ gbaa doo.” (Mafiu 19:5) A yi lɛ e kelɛ oo lo gelegɔ̃ɔ̃ pɛ nɔɔfe lɛ e loa kɛɛ kɛ o fĩã e ɓoa ka. Oo kɛ kili, ye waa kɛ luo sipia waa kɛ o kieba, to waa o zopiewɔ̃ gee o kie ni lɛɛ lɔkɛamɔ ka teelea ka. E kã Zihova mɔɔ, oó to kɛ pɛ nɔɔfe ɛ̃ɛ̃ mi nɔɔfe wɔ̃ e kɛ kpanazɛ o lɛɛ e diea o piemi wɔ̃ la. Oo o zokɛ o die pie kpokpo ɓo yekɛ o ɓɛɛla lɛ ye waa mɔ o kɛ mi gbɛɛ piea kɛ.

 A PIE FOO

4. Leesigɔ̃ã, ka lɔkɛ ka na ni ka ɛ̃ɛ̃ ka ka yɛlɛ kɛ o pie e yie ka

5. Gɔ̃siloa, ka dɛ̃ ni lɔ e kpɔ ka mɔ ɛ̃ɛ̃ ka ɓɛlɛya nɔ o lɛɛ

Baaboa laa gee gɔ̃silee e ɓɛlɛya nɔ e dɛ̃ lɛɛ, e kɛ bɛ̃ɛ̃ lɛ lɛɛ́ gbini Zihova lɛɛ ka. Ko 1 Pilɛ 3:​1, 2 gee, ɛ̃ɛ̃ kɛ ko wɛĩlɔɔ ni o kea yiɓo:

• E kɛa i dɛ̃ lɛɛ́ gbini Zihova lɛɛ, ii loa naa e gbini a lɛɛ. Zi kpeĩ kpɛɛ lɛ i bɛi gbũua mɔ, ɓaa i yɛlɛtaaa, laa mɔ i kɛ wɔ̃laũ yiea geepia a lɛɛ teele, maa lɛɛ lo kɛɛ sɛ i kɛ gɔ̃silee kpeĩ kpolokpɔmɔzɛ lɛ e ɓɛlɛya nɔ e dɛ̃ lɛɛ ka? Mɛɛ wɔ̃ wɛĩ?

Gɔ̃ã wa o na ni oo bɛi wɔ̃ kpeĩ yaa o ge o kie ba o kɛ. E kɛ bɛ̃ɛ̃ kilia, luo gbũu kaa leea lɛɛ́ lo wee e dɛ̃ wee mɔ. Lɛɛ bɛi e zopiewɔ̃ geee a lɛɛ kpolokpɔmɔ wa ɓɛlɛya ka, kɛɛ laa mɔ a yidɔ kelɛ Zihova aa yikɛgaa nɔ gɔ̃ɔ lɛɛ kɛ e e yɛlɛtaa wɔ̃ lɛ lɛ kpeĩ o piekɛimia wɛĩa ka. Laa mɔ e dɔ gaga e e kɔya wɔ̃ lɛ a dɛ̃ aa ya e ge a kɛɛ wi. Ye aa kɛ a kɛpia kilia, lɛɛ lo kɛɛ gbumɔ nɔpia kɛ o piekɛi e kɛ gelizɛ. Ko 1 Pilɛ 3:​3-5 gee, ɛ̃ɛ̃ kɛ ko wɛĩlɔɔ e kea yiɓo:

• Zi kpɛɛ lɛ Zihova a gɛ̃a ye lee aa ɓɛlɛya nɔ e dɛ̃ lɛɛ ka?

 6. Ka kɔ lɛɛ bɛi diee wɔ̃ ni lɛ o ɓɔ ka la ka kiesiɓo yia la

 WƆ̃Ɔ WŨ

Leesigɔ̃ wa e na oo bɛi kɛɛ gelizɛ ye waa lɔkɛ o kie ni ka, waa ɓɛlɛya nɔ o kie ni lɛɛ, ɛ̃ɛ̃ lɛ waa to liewekpo ni lɛ o Baabo yia piea ka.

Zovuo Wɔ̃

• Zi kpɛɛ lɛ leesigɔ̃ e bɛi gbumɔ nɔɔa kɛ a piekɛi e kɛ gelizɛ?

• Zi kpɛɛ lɛ gɔ̃silee e bɛi gbumɔ nɔɔa kɛ a piekɛi e kɛ gelizɛ?

• E kɛa ka kiesimia kaa, liewekpo kpɛɛ lɛ e Baaboa yi lɛ e bɛi gbũu ka mɔ kɛɛ ka kiesiɓoa mɛ e kɛ gaga?