PƐ MƐDÃPIA 55
Gbumɔ Nɔ Ɓa Nukielaa Yi
Kpoula lɛ seĩ mɔɔ, mia lɛɛkɔɛi bunuzɛ oo gbini Zihova lɛɛ geli ka nukiela wáa bunuzɛ yi. O ge lɛɛ li pɛ lɛ o zɔ̃ɔ̃ o lɛɛ wɛĩ, ɛ̃ɛ̃ o zo wee laa mɔ kɛ o gbumɔ nɔ nukielaa yi zi gbɛɛ gbɛɛ ka. Kea zi i i yɛlɛtaa ka e gbɛ̃a ɓa nukielaa mɔɔ lɛ?
1. Zi gbɛɛ gbɛɛ kpɛɛ lɛ i bɛi ɓa luo wa yikɛgaa daa yɛɓo pie kɛ i gbumɔ nɔ nukielaa yi?
Ko seĩ koo bɛi gbumɔ nɔɔ nukielaa yi. Kea mia kolo kolo ɛ̃ɛ̃ mia kpɔlɔzɛ o ɓa nukielaa yi? Ii bɛi gbũu o mɔ i lo o ka pakiemɔ nia yi? Kea ii bɛi yɛɓo kele kele e toa kɛɛ o lɛɛ, kelɛ pɔɔ lɔ o lɛɛ ɛ̃ɛ̃ kɛi yɛɓo kɛɛ ka? (Zĩĩ 1:27 gee.) Koo bɛi zeĩ gbumɔ nɔɔ ko Tomialaa Kaa bɛii ka ɛ̃ɛ̃ kɔaa ko zokɛ a pie. Mi nɔɔfe lɛɛ́ ko kũ gana ka kɛɛ ko wɔ̃ nia kɛ. Pɛ e kɛ lɛ “ko [ko dienɔ] ko zo seĩ kaa” lɛ e kelɛ, Wala lɔkpɔɔ lɛ ko mɔ e daa ko leege vɔ ba.—Sãã 110:3.
Zihova la Kelavɔ lɛ o batai kɛɛ lɛɛ, oo bɛi zeĩ gbumɔ nɔɔ nukielaa yi zi gbɛɛ gbɛɛ ka. Ko leege gɔ̃ãzɛ lɛ bɛi lɛ o mɔɔ, oo bɛi kɛɛ gbũwalamiamɔ miaa do ka, ye luo aa diea to o kɛ mia diedievɔɔ do ka. Ko leege gɔ̃ãzɛ ɛ̃ɛ̃ loazɛ lɛ o naa o gbumɔ nɔ wɔ̃laũ yiea geee kaa, oo kɛ paaniɛ ka. Zihova la Kelavɔ do oo gbumɔ nɔ Tomiala Kaa dɔɔ ka, to waa lo lɛ lɛ nukiela lɛ yi lɛ o naa gbumɔ ka yia mɔ.
2. Zi kpɛɛ lɛ ko bɛi gbũua nukielaa mɔ pɛlee wa pɔɔ ni o ko kɛlɛɛ ka?
Koo bɛi “Zihova tɔɓɔɔ ko pɔɔ kpanazɛ ni o ko kɛlɛɛ ka.” (Pɔlɔvɛɛ 3:9) Ko ge lɛɛ li ko pɛlee wa pɔɔ ni lɛ o ko kɛlɛɛ nɔ kɛɛ ko gbũa nukielaa mɔ ɛ̃ɛ̃ wɔ̃laũ yie gee yɛɓo lɛ e kpoula lɛ seĩ mɔɔ mɔ. (2 Kɔleĩtĩã 9:7 gee.) Ko kɔda ko nɔɔ lɛɛ gbumɔ nɔ ye kɔi aa daa ka. Mia bunuzɛ oo pɛlee kpɔ tãã teele kɛ o o kɔda a ka. (1 Kɔleĩtĩã 16:2 gee.) Koo bɛi ko kɔda pɛlee daa yi gbɔlɔ lɛ e Tomiala Ka wia lɛmɔ ɛ̃ɛ̃ fããla donate.pr418.com lɛmɔ. Zihova laa to kɔaa ko lɔkɛamɔ zɔ̃ɔ̃ a lɛɛ zi lɛ ko pɔɔ ni lɛ o ko kɛlɛɛ daa yɛɓo piea ka.
A PIE FOO
Zi gbɛɛ gbɛɛ lɛ i bɛi gbumɔ nɔɔa nukielaa yia gɛ̃.
3. Koo bɛi gbumɔ nɔɔ pɔɔ ni lɛ o ko kɛlɛɛ ka
Zihova wa Zizɛ oo lɔkɛ mia lɛ o gbaɓo kɛ zowɛlɛwɛlɛla kaa ka. A gɔ̃ã gɛ̃, gããlee lɛ e dɔ gaa lɛ e pɛlee daa, Zizɛ nyiɛ a kũ ye bɛ̃ɛ̃ lɛ pɛlee lɛɛ́ gbaa kɛ a kɛlɛ kpãkpãa ka. Ko Luu 21:1-4 gee, ɛ̃ɛ̃ kɛ ko wɛĩlɔɔ ni o kea yiɓo:
-
Kea laa mɔ ko ko kɔda pɛlee gbuo ka kɛ ko Zihova zoda?
-
Zi kpɛɛ lɛ Zihova wa Zizɛ o o yɛlɛtaa ka ye kɔaa ko kɔda zowɛlɛwɛlɛla kaa ka?
Kɛ ko zi lɛ o yɛɓo kɛa kɔda lɛ ko nɔɔ kaa dɔɔ, ko VILOA gɛ̃, ɛ̃ɛ̃ kɛ ko wɛĩlɔɔ e toa piea yiɓo.
-
Ko kɔda lɛ ko nɔɔ, zi kpɛɛ lɛ e gbũa nukiela nia mɔ kpoula lɛ seĩ mɔ?
4. Koo bɛi ko dienɔɔ gbumɔ wɛĩ
Zihova la mia ni o yɛɓo kɛ mɔ gaga kɛɛ o o zokɛ wa gbini Wala lɛɛ piaa pie. Kɛɛ wɔ̃ e kea lɛɛ́ gbaa kɛ nɔ kɔda pɛlee ka wɔ̃ doo ka. Ko 2 Kanekɔ 34:9-11 gee, ɛ̃ɛ̃ kɛ ko wɛĩlɔɔ e kea yiɓo:
-
Zi kpɛɛ lɛ Eezɛlɛmia seĩ o o zokɛa Zihova la ka, ɛ̃ɛ̃ gbini a lɛɛ piaa pie?
Kɛ ko zi lɛ Zihova la Kelavɔ o toa wɔ̃kɛkɔ ziia piea gɛ̃ɛ, ko VILOA gɛ̃, ɛ̃ɛ̃ kɛ ko wɛĩlɔɔ ni lɛ o toa piea yiɓo.
-
Mɛ e kɛ lɛ lɛ kpanazɛ ko ko Tomiala Kaa lɛmɔ bɛi, ɛ̃ɛ̃ ko ko zokɛ a pie e yie ka?
-
Zi gbɛɛ gbɛɛ kpɛɛ lɛ i bɛi a kɛɛa?
5. Ko leege gɔ̃ãzɛ oo bɛi dɔɔ gaga kɛɛ bɛi e kɛ o mɔ o yɛɓo ni lɛ e nukielaa yia do kɛ
Baaboa lɛɛ ko leege gɔ̃ãzɛ fããwaa kɛɛ o wɔ̃ o bɛia kɛɛ kɛ, kɛɛ bɛi e kɛ o mɔ o gbumɔ nɔ nukielaa yi. Kɛ ko gɔ̃ã gɛ̃ɛ, ko VILOA gɛ̃, ɛ̃ɛ̃ kɛ ko wɛĩlɔɔ lɛ e toa piea yiɓo.
-
Viloa yia, zi kpɛɛ lɛ Minawɔ̃ ee dienɔɔa yɛɓo kɛɛ ka nukielaa yi kpokpo ɓo?
Baaboa e wɔ̃ lɛ laa mɔ ko leege gɔ̃ãzɛ o kɛ, kɛɛ o kɛ gbũwalamiamɔ mia, ɛ̃ɛ̃ mia diedievɔ kaa wɔ̃ gee. Ko 1 Temɔte 3:1-13 gee, ɛ̃ɛ̃ kɛ ko wɛĩlɔɔ ni o kea yiɓo:
-
Mɛɛ wɔ̃ lɛ laa mɔ ko leege gɔ̃ãzɛ o kɛ, ye waa naa o kɛ gbũwalamiamɔ mia, ɛ̃ɛ̃ mia diedievɔ kaa ka?
-
Mɛ laa mɔ o kɔpiemia o kɛ? —A lonipia 4 wa 11 gɛ̃.
-
Ye ko leege gɔ̃ãzɛ waa dɔ gaa kɛ bɛi e kɛ o mɔɔ, zi kpɛɛ lɛ e gbũa mia seĩ mɔ nukielaa yi?
MI DO LƐƐ BƐI WƐĨLƆƆ KƐƐ: “Mɛɛ zaa lɛ Zihova la Kelavɔ o go pɛlee ka yi waa wa yɛɓo kɛa?”
-
Zi kpɛɛ lɛ i bɛi a yiɓoo a ka?
WƆ̃Ɔ WŨ
Zihova lɛɛ e kɔya kpokpo ɓo a wi ye kɔaa ko luo, yikɛgaa, ɛ̃ɛ̃ pɔɔ ni lɛ o ko kɛlɛɛ si kɔaa gbumɔ nua nukielaa lɛɛ ka.
Zovuo Wɔ̃
-
Zi kpɛɛ lɛ ko bɛi ko luo wa yikɛgaa daa ka yɛɓo pie kɔaa gbumɔ nua nukielaa lɛɛ?
-
Zi kpɛɛ lɛ ko bɛi pɔɔ ni lɛ o ko kɛlɛɛ daá yɛɓo pie kɛ ko gbumɔ nɔ nukielaa lɛɛ?
-
Zi gbɛɛ gbɛɛ kpɛɛ lɛ i loa naa i gbumɔ nɔa nukielaa lɛɛ?
I NYIƐ KPƆ
Pɛ e kɛ lɛ Wala laá gee gbaa kelɛ la mia ni o vũlepa nɔɔ gɛ̃.
Baaboa e yɛɓo bunuzɛ ya ko leege gɔ̃azɛ lɛ o batai kɛɛ lɛɛ, o kɔla o a kɛ. Kɛɛ ye aa kɛ lɛ ko leege leezɛ lɛ a batai kɛɛ lɛɛ, laa mɔ e liesi yɛɓo ni o kilia kaa bɛ̃ɛ̃?.
“Zi Lɛ Liesiwɔ̃ Lɛ A Ka Nukielaa Yia Wɔ̃ Yima” (Wɔ̃lagɛ̃kamaa, Vuulie 2021)
I Zihova la Kelavɔ lɛ o dɔ gaga kɛ o lo pɛzɔ̃ɔ̃pɔɔ ka o leege ni piea do gɛ̃.
Zi ko pɛlee sɔlɔɓo kɔ laa ka gbɛɛ ko yɛɓoa wɛĩ gbiniwalalɛɛ kɔ ye e toa piea gɛ̃.
“Zi Kpɛɛ Lɛ Zihova La Kelavɔ O Pɛlee Sɔlɔɓoa Wa Yɛɓoa Wɛĩ?” (Lɛ jw.org la)
