PƐ MƐDÃPIA 56

Ka Dɔ Gaa Ka Kɛ Ka Kieba Nukielaa Yi

À DA YƐƁO PÍÉ

Ye kɔaa kɛ ko leege ni baa, koo ko yɛlɛtaa nɔ lɛ zi Deɓe e e yɛlɛtaa kaa lɛ ɓe: “Zi kpɛɛ lɛ laa sɛ ɛ̃ɛ̃ gelizɛ ke kɛɛ leege vɔ o kɛ o kieba!” (Sãã 133:1) Ko kɛ ko kiebaa ye wa nɔ wɔ̃ e kɛ e die lɛɛ ɓɔɔ ka. Ko seĩ seĩ koo dɔ gaa ko kɛ koo kieba.

1. Mɛɛ wɔ̃ kpanazɛ lɛ o gɛ̃ Wala la mia ni fĩã?

Ye ɓaa lo nukiela mɔɔ pakiemɔ yi sɛlɛ gbɛɛ yia, ií lo we ni lɛ o gee yia maa leĩ, kɛɛ ii loa yidɔɔ zi bunuzɛ ka kelɛ i i leege vɔ ba. Mɛɛ wɔ̃ wɛĩ? Ɓii koo Baaboa mɛdã pɛzɔ̃ɔ̃pɔɔ nɔ dooa yi lɛ seĩ mɔ. Ɛɛ̃ koo dɔ gaga kɛɛ ko lɔkɛamɔ zɔ̃ɔ̃ mia ye o toa lɛɛ. Ko kɛ bɛ̃ɛ̃ lɛ nɔɔfe mɔɔ, ko seĩ koo “Zihova tɔ gee, to kɔaa gbini a lɛɛ ko kieba.”—Zɛfenaya 3:9.

2. Mɛɛ wɔ̃ lɛ i bɛi a kɛɛ kɛɛ kɔa kɛ kɔa kieba?

“Ka kie ni lɔ e kpɔ ka mɔ kpokpo ɓo, aa go ka zo pie.” (1 Pilɛ 1:22) Zi kpɛɛ lɛ i bɛi tooa liewe e kea pie? Yekɛ i i nyiɛ gbɛ̃ niɓo ni lɛ mia ye o toa o kɛɛ mɔ, kɛɛ i i nyiɛ gbɛ̃ wɔ̃ yie ke o kɛɛ mɔ. Yekɛ i ɓɛɛla kɛ nɔ mi lɛ ka ye ni ka naa-ka-wɔ̃ lɛ dooa pie, kɛɛ a kɛzi naa i i leege vɔ ye o toa dɔ. Koo bɛi zeĩ dɔɔ gaga yekɛ ko miaɓomiaba kɛ.—1 Pilɛ 2:17 gee. a

3. Mɛɛ wɔ̃ lɛ i loa kɛɛ ye ka i leege ka we aa sã e kie kaa ka?

Ye bɛ̃ɛ̃ lɛ ko ko kiebaa, niɓo lɛ ko yi. Luo gbũu kaa koo ko kie ni zo to lɛi ɛ̃ɛ̃ kɔaa ko kie ni wàa wɔ̃ kɛ. A mɔɔ wɔ̃ mɔɔ, Wala Lewe laa gee ko lɛɛ: “Lɛ ka mɔ ka kã ka kie ni kɛwɔ̃ mɔ kaa kàa ka pie yi, lɛ zi ko Daami e kãa ka zi mɔɔ lɛ ɓe.” (Kɔlɔsĩã 3:13 gee.) Kɔaa Zihova wàa wɔ̃ kɛ lɛ loni wáa mɔɔ, e kɛ bɛ̃ɛ̃ kilia, lɛɛ die ko kɛwɔ̃ yɔɔ la. A mɔɔ wɔ̃ mɔɔ, laa naa ko ko leege vɔ kɛwɔ̃ kaa ko pie. Ye ɓaa yidɔ kelɛ ɓaa mido wàa wɔ̃ kɛɛ, i liesi a yibɛii ka.—Mafiu 5:23, 24 gee. b

A PIE FOO

I yɛlɛtaa wɔ̃ i bɛia kɛɛ kɛ kɔa kɛ kɔa kieba zoyage ka nukielaa yia ka.

Mɛ i loa kɛɛ kɛ i nu zoyage ka?

4.Yekɛ i mia ba ɓo

Koo naa ko leege vɔ seĩ lɔ e kpɔ ko mɔ. Aa kɛɛ lɛɛ kɛ gaga ko ko kɔya mi lɛ lɛ gbɛɛ ko piea wi. Mɛ e bɛi gbumɔ nɔɔ? Ko Apɔsɔlɔ 10:34, 35 gee, ɛ̃ɛ̃ kɛ ko wɛĩlɔɔ ni o kea yiɓo:

Zihova lɛɛ e kɔya mia suu gbɛɛ gbɛɛ lɛ o la Kelavɔ kaa wi. Zi kpɛɛ lɛ a pie e bɛi tooa zi lɛ i mia lɛ o go lɛ gbɛɛ gbɛɛ mɔɔ gɛ̃ a kaa mɔ?
Miaɓomiaba wɔ̃ kpɛɛ lɛ e lɛ ɓaa mɔɔ mɔ lɛ ɓa naa i i kɔɓo a ba?

Ko 2 Kɔleĩtĩã 6:11-13 gee, ɛ̃ɛ̃ kɛ ko wɛĩlɔɔ e kea yiɓo:

Zi kpɛɛ lɛ i leege vɔ seĩ lɔ e bɛi kpɔɔa i mɔ kpokpo ɓo?

5. Mia kɛwɔ̃ yɔɔ kaa i pie kɛ zoyage e kɛ ka fĩã

Zihova lɛɛ die ko kɛwɔ̃ yɔɔ la, ye bɛ̃ɛ̃ lɛ lɛɛ́ kɛwɔ̃ yɔɔ kɛɛ ka. Ko Sãã 86:5 gee, ɛ̃ɛ̃ kɛ ko wɛĩlɔɔ ni o kea yiɓo:

Zi kpɛɛ lɛ Zihova zi die mia kɛwɔ̃ yɔɔ laa, laa kpanazɛ?
Mɛ e kɛ lɛ ɓa zuo ɓo la die mia kɛwɔ̃ yɔɔ laa wɛĩ?
Mɛɛ wɔ̃ ni lɛ aa kɛɛ a kɛ gaga kɛ zoyage e kɛ ko mia ye o toa fĩã?

Zi kpɛɛ lɛ ko bɛi Zihova piegɔ̃ɔ a ka kɛɛ ko ko leege ni ko kɛ ko kieba? Ko Pɔlɔvɛɛ 19:11 gee, ɛ̃ɛ̃ kɛ ko wɛĩlɔɔ e kea yiɓo:

Ye mi aa i wàa wɔ̃ kɛ ɛ̃ɛ̃ lɛ aa wɔ̃ yɔɔ kɛ i kaa, mɛɛ wɔ̃ lɛ i bɛia kɛɛ kɛ ka a yibɛi e yie ka?

Luo gbũu kaa koo wɔ̃ yɔɔ kɛ mia ka. Ye aa kɛɛ, mɛɛ wɔ̃ lɛ laa mɔ ko kɛ? Ko VILOA gɛ̃, ɛ̃ɛ̃ kɛ ko wɛĩlɔɔ e toa piea yiɓo.

VILO: Ye Zoyage Aa Kɛ Mia Fĩãa Lɛ Lua Ka (6:01)

Viloa yia, mɛɛ wɔ̃ lɛ ko leegea a kɛ kɛɛ e nu zoyage ka?

6. I nyiɛ gbɛ̃ wɔ̃ yie ke i leege ni o kɛɛ mɔ

Ye kɔaa ko leege ni dɔ kpokpo ɓoa, koo lo lɛ lɛ o mɛ lɛ yi gaga, ɛ̃ɛ̃ yɔũyɔũa dɔɔ. Zi kpɛɛ lɛ ko bɛi ko nyiɛ gbɛ̃a lɛ lɛ o mɛ lɛ yi gagaa mɔ? Ko VILOA gɛ̃, ɛ̃ɛ̃ kɛ ko wɛĩlɔɔ e toa piea yiɓo.