Ye bɛ̃ɛ̃ lɛ Zihova lɔkpɔɔ lɛ i mɔ die ɓo, ɛ̃ɛ̃ lɛ i dɔ gaga yekɛ ɓa wàa wɔ̃ nɔɔfe kɛɛ, luo do kaa ii lo nɔ niɓo kɛɛ. E kɛ bɛ̃ɛ̃ kilia, niɓo gbũu lɛ yɔɔ kpokpo ɓo e diea a ye e toa la. (1 Kɔleĩtĩã 6:​9, 10) Ye ɓaa kɛwɔ̃ yɔɔ kpokpo kɛɛ, a yidɔ kelɛ Zihova lɛɛ́ tea nɛi lɔkɛ i ka mɔ; a zo wee laa mɔ e die i kɛwɔ̃ yɔɔ la ɛ̃ɛ̃ e gbũ i mɔ.

1. Mɛɛ wɔ̃ lɛ laa mɔ ko kɛ kɛɛ Zihova e die ko kɛwɔ̃ yɔɔ la?

Mia lɛ o lɔkɛ Zihova kaa o zo lɛɛ da yeĩ yi ye waa yidɔ kelɛ waa kɛwɔ̃ yɔɔ kpokpo kɛɛ ka. Kɛɛ wɔ̃ lɛ Zihova e e wedɔa a kɛ la mia ni lɛɛ, lɛɛ o nɛɛnɛɛ: “I kɛwɔ̃ yɔɔ e tãã bɛ̃ɛ̃ lɛ sɔ zolo lɛ ɓea, lɛɛ lo kɛɛ pulu lɛ luelue lɛ ɓe.” (Aazaya 1:​18) Ye kɔaa kã ko kɛwɔ̃ yɔɔ mɔ kpokpo ɓoa, Zihova lɛɛ lo diee ko kɛwɔ̃ yɔɔ la. Zi kpɛɛ lɛ ko kãa ko kɛwɔ̃ yɔɔ mɔ? Koo kã ko kɛwɔ̃ yɔɔ mɔ ye kɔaa da yeĩ yi kpokpo ɓo, lɛ kɔaa kã kɛwɔ̃ yɔɔ e kilia kɛɛ lɛɛ, ɛ̃ɛ̃ lɛ kɔaa kpe kã Zihova lɛɛ e die ko kɛwɔ̃ yɔɔ laa ka. Ye aa kɛɛ koo dɔ gaa ko yɛlɛtaa yɔɔ, wa wɔ̃ lɛ a kɛ kɔaa kɛwɔ̃ yɔɔ kɛɛ mɛvɔɔ, ɛ̃ɛ̃ koo dɔ gaa ko to Zihova zi yiikɔ kpeĩa pie.​—Aazaya 55:​6, 7 gee.

2. Zi kpɛɛ lɛ Zihova a kɛa mia diedie vɔɔ waa gbũ ko mɔ ye kɔaa kɛwɔ̃ yɔɔ kɛɛ ka?

Ye kɔaa kɛwɔ̃ yɔɔ kpokpo kɛɛ, Zihova laa gee ko “Wala mia diedievɔ suo kɛ.” (Zĩĩ 5:​14, 15 gee.) Wala mia diedievɔ o kilia oo lɔkɛ Zihova ka ɛ̃ɛ̃ la mia nia ka. Oo bɛi gbũu ko mɔ kɛ ko Zihova ni ko fĩã e kɛ sɛ zeĩ.​—Gɛlesia 6:1.

Zi kpɛɛ lɛ mia diedievɔɔ o gbũa ko mɔ ye kɔaa kɛwɔ̃ yɔɔ kpokpo kɛɛ ka? Mia diedievɔɔ peelɛ ɛ̃ɛ̃ yaaka oo lo i gbɛ̃ɛ̃ zi kpeĩ pie Baaboa yi. Oo lo zeĩ wɔ̃ ni lɛ e lo gbũu ko mɔ ɛ̃ɛ̃ ko fããwaa yekɛ ko kɛwɔ̃ yɔɔ kɛ gbaa zɔ̃ɔ̃ ko lɛɛ. Oo bɛi leĩ ko tea wɔ̃ bunuzɛ kɛɛ mɔ nukielaa yi, e toakili ko Zihova ni ko fĩã e kɛ sɛ kpokpo ɓo. Ye mi aa kɛwɔ̃ yɔɔ kpokpo kɛ lɛ lɛɛ́ kã a kɛɛ lɛɛ, mia diedievɔɔ oo gee nukielaa e ɓɛɛla kã a mɔ, yekɛ a pie yɔɔ e to o mɔ.

 A PIE FOO

3. Wèe ko kɛwɔ̃ yɔɔ mɔɔ lɛɛ ko la

Kɛwɔ̃ yɔɔ nɔɔfe lɛ ko kɛɛ a tie lɛɛ Zihova kũ, a mɔɔ wɔ̃ mɔɔ, laa mɔ ko wee ko kɛwɔ̃ yɔɔ mɔ a lɛɛ. Ko Sãã 32:​1-5 gee, ɛ̃ɛ̃ kɛ ko wɛĩlɔɔ e kea yiɓo:

• Mɛ e kɛ lɛ lɛ sɛ ko wee ko kɛwɔ̃ yɔɔ mɔ Zihova lɛɛ e diea a lakpaa la?

 4. Zi ɓɛɛla kã kɛwɔ̃ yɔɔ kɛmi mɔ nukielaa yi e gbũa ko mɔɔ

Ye mi aa kɛwɔ̃ yɔɔ kpokpo kɛ lɛ lɛɛ́ wee a mɔ kɛ e to Zihova zi yiikɔ kpeĩa piea, lɛɛ́ bɛi too gbaa nukielaa yimi do ka. Waa ɓɛɛla kã a mɔ nukielaa yi, ɛ̃ɛ̃ ko ye ni ko wá gbaa ɓɛɛlazɛ kɛ bɛ̃ɛ̃ ko wee a pie. Ko 1 Kɔleĩtĩã 5:​6, 11 wa 2 Zɔ̃ɔ̃ 9–11 gee, ɛ̃ɛ̃ kɛ ko wɛĩlɔɔ e kea yiɓo:

• Zi nɔ belefɔɔpɛ e bele fɔɔ a kaa, zi kpɛɛ lɛ mi lɛ lɛɛ́ wee a mɔ e kã e kɛwɔ̃ yɔɔ mɔɔ pie yɔɔ e toa nukielaa mɔ?

 WƆ̃Ɔ WŨ

Ye kɔaa kɛwɔ̃ yɔɔ kpokpo kɛ, kɛɛ ko zo aa da yeĩ yi die ɓo ɛ̃ɛ̃ lɛ kɔaa kã kɛwɔ̃ yɔɔ e kilia kɛɛ lɛɛ, Zihova lɛɛ lo die e ko kɛwɔ̃ yɔɔ la.

Zovuo Wɔ̃

• Mɛ e kɛ lɛ laa mɔ ko wee ko kɛwɔ̃ yɔɔ mɔ Zihova lɛɛ?

• Mɛɛ wɔ̃ lɛ laa mɔ ko kɛ kɛɛ Zihova e die ko kɛwɔ̃ yɔɔ la?

• Ye kɔaa kɛwɔ̃ yɔɔ kpokpo kɛɛ, mɛ e kɛ lɛ laa mɔ ko gbumɔ naa mia diedievɔɔ kɛlɛ?