PƐ MƐDÃPIA 59
Ii Bɛi Too Zodɔamɔzɛ Ye Waa I Sãdɔɔ Ka
Mia oo loa naa o ya ko lɛɛ, o ko tea gbini Zihova lɛɛ mɔ, ɛ̃ɛ̃ oo lo ko sãdɔɔ bɛ̃ɛ̃ ye koó teaa ka. Kea laa mɔ e ko mɛtuo ɛ̃ɛ̃ ko le e dũ?
1. Mɛ e kɛ lɛ lɛ ko yɛlɛ pie kelɛ oo lo ko sãdɔɔ?
Baaboa a gee e seĩ seĩ ka kelɛ: “Mia seĩ lɛ wa Kɛlɛi Zizɛ ni o doo, lɛ o naa o kɛ ɓe Wala lɛɛ, mia oo lo o sãdɔɔ nɔ teetee.” (2 Temɔte 3:12) O Zizɛ sãdɔ, ɓii lɛɛ́ gbaa kɛ Setɔ̃ la kpoulaa la mi ka. Ko bɛ̃ɛ̃ ko wa kpoulaa la mi ka, a mɔ wɔ̃ mɔɔ, ye waa mɔ e ko lepa ye kpoula zee gomɛnɛ wa Walaka liesimia wa kɔlokieba aa ko sãdɔɔ ka.—Zɔ̃ɔ̃ 15:18, 19.
2. Zi kpɛɛ lɛ ko bɛi ko die pɛkɛɛa sãdɔ wɛĩ?
Dɛɛ kaa mɔɔ, laa mɔ ko ko zodɔamɔ lɛ e Zihova wɛĩa mɛkɛ gaga. Laa mɔ ko luo si teele kɔaa sɛnɛɓo a lɛɛ ɛ̃ɛ̃ kɔaa a Lewea gee. Kɔaa lo nukiela mɔɔ pakiemɔɔ yi teele. Wɔ̃ ni e kea kɛɛ lɛɛ lo gbũu i mɔ i mɛ e kɛ gaga ye waa i sãdɔɔ ka, e kɛ bɛ̃ɛ̃ lɛ e go i kɔpiemia kɛlɛɛ ka. Apɔsɔlɔ Pɔɔ lɛ o kɛ a sãdɔpiaa a gee kelɛ: “Mia Daami [Zihova] lɛ e gbũ-m-mɔ-mi kaa; mḿ lo tuo”—Hiibulu 13:6.
Ye kɔaa kɛ wɔ̃laũ yiea geepia teelea, lɛɛ lo gbũu ko mɔ ko zo e kɛ gaa. Wɔ̃laũ yiea geee lɛɛ gbũ ko mɔ ko ko zodɔ Zihova mɔ ɛ̃ɛ̃ yekɛ ko tuo mi nɔɔfe lɛɛ. (Pɔlɔvɛɛ 29:25) Ye ɓaa zogaala si i wɔ̃laũ yiea gee dɛɛ kaa, lɛɛ lo gbũu i mɔ i wɔ̃laũ yiea gee ye sɛlɛ liesimia waa gee yekɛ ɓa kɛɛ ka.—1 Tɛsalonia 2:2.
3. Zi kpɛɛ lɛ zokũtãã e gbũa ko mɔ ye waa ko sãdɔɔ ka?
Ye mɔɔ, ye wa ko geliwɔ̃ ka kɛɛ o ko sãdɔ, kɛɛ ye kɔaa to ko dɔlɔmɔ ko sãdɔɔ yia, lɛɛ ko mɛkɛ gaga. Koo gãã Zihova ka kɔɛ, ɓii koo yidɔ kelɛ lɛɛ gbũ ko mɔ ye kɔaa kɛ tɛɛtɛɛ ka. (Zĩĩ 1:2-4 gee.) Lɛɛ́ Zihova geli ye waa kɛ ko sãdɔpiaa ka, kɛɛ lɛɛ a zoda ye kɔaa ko zokũtããa ka. Baaboa laa gee: “Ye kaa wɔ̃ yie kɛ, lɛ kaa wàa ɓele a wɛĩa, Wala lɛɛ lo lua kpɔɔ ka mɔ a mɔ wɔ̃ mɔ.” (1 Pilɛ 2:20) Ye kɔaa to zodɔamɔzɛɛ, Zihova lɛɛ lo ko fɔnɔ nɔɔ kɛɓe wɔlɔwɔlɔ ka kpoula dɛɛ yi, mia lɛ o lo kɛɛ yia seĩ oo lo gbini a lɛɛ, lɛ mi nɔɔfe lɛɛ́ lo o sãdɔɔ.—Mafiu 24:13.
A PIE FOO
Pɛ e kɛ lɛ ko gee kelɛ koo bɛi too zodɔamɔzɛ Zihova lɛɛ e kɛ bɛ̃ɛ̃ lɛ mia o ko sãdɔ, ɛ̃ɛ̃ zi lɛ e lo ko fɔnɔ nɔɔ a kaa gɛ̃.
4. Ii bɛi i zokũtãã ye i piekɛimia waa ya i lɛɛ ka
Zizɛ a yidɔ kpokpo ɓo kelɛ ko piekɛimia do oó lo a naa ko gbini Zihova lɛɛ. Ko Mafiu 10:34-36 gee, ɛ̃ɛ̃ kɛ ko wɛĩlɔɔ e kea yiɓo:
-
Mɛɛ wɔ̃ lɛ e kɛ ye mia o kɛia do aa naa e gbini Zihova lɛɛ ka?
Kɛ ko wɔ̃ e kea gɔ̃ã gɛ̃ɛ, ko VILOA gɛ̃, ɛ̃ɛ̃ kɛ ko wɛĩlɔɔ e to a piea yiɓo.
-
Mɛɛ wɔ̃ lɛ i loa kɛɛ ye i mii ɛ̃ɛ̃ i ɓɛɛmi aa naa e i tea gbini Zihova lɛɛ mɔɔ ka?
Ko Sãã 27:10 wa Maa 10:29, 30 gee. Ye kɔaa nyɛ a lonipia nia geee mɔɔ, ko wɛĩlɔɔ e kea yiɓo:
-
Zi kpɛɛ lɛ wedɔwe e kea e bɛi gbũua i mɔ ye i mii do ɛ̃ɛ̃ i ɓɛɛmi aa naa i tea gbini Zihova lɛɛ mɔɔ ka?
5. Kɛ gbinipia Zihova lɛɛ teele e kɛ bɛ̃ɛ̃ lɛ o i sãdɔɔ ka
Lɛɛ i si zogaala ka kɛ i gbini Zihova lɛɛ, ye mia ye o toa waa naa o i tea a kɛɛ mɔɔ ka. Ko VILOA gɛ̃, ɛ̃ɛ̃ kɛ ko wɛĩlɔɔ e to a piea yiɓo.
-
Wɔ̃ gɔ̃ã lɛ e viloa yia zi kpɛɛ lɛ e zogaala nɔa i lɛɛ?
Ko Apɔsɔlɔ 5:27-29 wa Hiibulu 10:24, 25 gee. Ye kɔaa nyɛ a lonipia nia geee mɔɔ, ko wɛĩlɔɔ e kea yiɓo:
-
Mɛ e kɛ lɛ lɛ kpanazɛ ko gbini Zihova lɛɛ teele e kɛ bɛ̃ɛ̃ lɛ o ko wɔ̃laũ yie gee yɛɓoa wa ko pakiemɔ nia teaa ka?
6. Zihova lɛɛ lo gbũu i mɔ zokũtãã e kɛ i kɛlɛ
Kpoula lɛ seĩ mɔɔ Zihova la Kelavɔ, o kɛ bɛ̃ɛ̃ kolo ɛ̃ɛ̃ dɛɛ oo to zodɔamɔzɛ wa gbini Zihova lɛɛ yi e kɛ bɛ̃ɛ̃ lɛ o o sãdɔɔ ka. Kɛ i pɛ e gbũ o mɔɔ gɛ̃ɛ, ko VILOA gɛ̃, ɛ̃ɛ̃ kɛ ko wɛĩlɔɔ e toa piea yiɓo
-
Viloa yia, mɛ e gbũ ko leege nia mɔ o die wɔ̃ nia yi?
Ko Woloma 8:35, 37-39 wa Felepĩã 4:13 gee. Ye kɔaa nyɛ Baabo wekpo nia geee mɔɔ, ko wɛĩlɔɔ e kea yiɓo:
-
Zi kpɛɛ lɛ Baabo lɛ kɔa geea a zɔ̃ɔ̃a i lɛɛ kelɛ ii bɛi die yidãwɔ̃ nɔɔfe yi?
Ko Mafiu 5:10-12 gee, ɛ̃ɛ̃ kɛ ko wɛĩlɔɔ e kea yiɓo:
-
Mɛ e kɛ lɛ i bɛi kɛɛ gelizɛ e kɛ bɛ̃ɛ̃ lɛ o i sãdɔɔ ka?
Zihova la mia ni gbaala gbuozɛ waa to zodɔamɔzɛ lɛ bɛ̃ɛ̃ lɛ o ya o lɛɛ ka. Ɓi bɛ̃ɛ̃ ii bɛi a kɛɛ nɔ kili!
MIA DO OO GEE: “Mḿ bɛi m zokũtãã ye waa kɛ m sãdɔpiaa ka.”
-
Baabo wekpo kpɛɛ lɛ e bɛi zogaala nɔɔ o lɛɛ?
WƆ̃Ɔ WŨ
Lɛ kpanazɛ Zihova lɛɛ ye kɔaa dɔ gaa ko gbini a lɛɛ e kɛ bɛ̃ɛ̃ lɛ o ko sãdɔɔ ka. Zihova lɛɛ bɛi gbũu ko mɔ ko to ko dɔlɔmɔ.
Zovuo Wɔ̃
-
Mɛ e kɛ lɛ laa mɔ Tokɛlɛipiemia o yidɔ kelɛ mia oo lo o sãdɔɔ?
-
Mɛɛ wɔ̃ lɛ i bɛia kɛɛ dɛɛ ka kɛɛ i die pɛkɛɛ e kɛa, ye waa kɛ i sãdɔpiaa ka?
-
Mɛɛ wɔ̃ lɛ e bɛi gbũu i mɔ kɛ ɓa yidɔ kelɛ ii bɛi gbini Zihova lɛɛ, e kɛ bɛ̃ɛ̃ lɛ o i sãdɔ zi nɔɔfe kaa ka?
I NYIƐ KPƆ
Ko leege doo e zi lɛ Zihova e gbũa mɔ kɛɛ e kɛ zokũtããzɛ, lɛ e kɛ bĩkɛi ɓii lɛɛ́ gbaa wee a mɔ e e kɔda kpoula zee wɔ̃ baa wɔ̃ gee.
Wɔ̃ lɛ e gbũ gɔ̃ doo wa e na o mɔ, kɛɛ o to zodɔamɔzɛ Zihova lɛɛ kɛɛ bunuzɛ pie, ye bɛ̃ɛ̃ lɛ o ya o lɛɛ gɛ̃.
Zi i bɛi zogaala siia ye waa i sãdɔɔ gɛ̃.
“I Die Pɛkɛ Dɛɛ Kaa Mɔ Sãdɔ Wɛĩ” (Wɔ̃lagɛ̃kamaa, Gbaalɛɛ 2019)
Zi kpɛɛ lɛ ko bɛi a gɛ̃a ka ye ko piekɛimia waa ya ko lɛɛ ka, ɛ̃ɛ̃ mɛɛ wɔ̃ lɛ ko bɛia kɛɛ kɛ zoyage e kɛ ko fĩã, kɛ ko to zodɔamɔzɛ ko gbini Zihova lɛɛ yi?
“Wanawɔ̃ɔ ‘Lɛɛ́ Nu Zoyage Ka, Kɛɛ Lɛɛ Nu Gelegɔ̃ Laa Ka’” (Wɔ̃lagɛ̃kamaa, Walawala 2017)
