Wɔ̃́ làṹ yiè lɛ́ e kélɛ̀ mia óò lo kɛ̀ɓe kɛ̀ɛ wɔ́lɔ́-wɔ́lɔ́ ká kpóṹlà zèea à bɛ̃̀ɛ̃ɛ̃̀ lɛ Bàábòa yi. (Sã́ã̀ 37:29) Bàábòa kɛɛ̀ lɛ kii bè kélé kélé vũ̀ sáláádo wɛ́lɛ́ sáláádo ka. Wálà e gɔ̃a zò-dɔ̀à-mɔ̀ zɛ̀ vũ̀ yììsɛ sí kɛɛ ó kii vɔ̀ o kília bɛ̃̀ɛ̃. Kɛ̀ɛ̀ 3,500 aà die gbaa lɛ̀ Móózè e kii bèa sɔ́ɔ́li bèĩzɛ̀ɛ bɛ̃̀ɛ̃ɛ̃̀ mɔ́ɔ ka. Zéniía, kɛ̀ɛ̀ 1,900 aà die gbaa lɛ̀ Àpɔ́sɔ̀lɔ̀ Zɔ̃̀ɔ̃́ e kii bèa léĩ́-tó-pìàa bɛ̃̀ɛ̃ɛ̃̀ mɔ́ɔ ka. Deĩ̀ zì gíkã́ wɔ̃̀ lɛ́ Bàábò bɛ̃̀ɛ̃ mìàa wa bɛ̃̀ɛ̃ɛ̃̀? Wálà e wɔ̃́ gèe Bàábò bɛ̃̀ɛ̃ mìàa lɛ̀ɛ à zì gɛ̀ɛ̀ púlúa yí zàá. (2 Sámìò 23:2) Pɛ́ míáa wa bɛ̃̀ɛ̃ɛ̃̀ lɛ Wálà zì yɛ́lɛ́táá wɔ̃̀ ka, lɛ̀ɛ́ gbaa kɛ o dìè tĩ́ zì yɛ́lɛ́táá wɔ̃̀ ka. À mɔ́ɔ̀-wɔ̃̀-mɔ̀ɔ, Zìhóvà lɛ́ à wè lɛ Bàábòa yía.​—2 Témɔ́tè 3:16; 2 Pílɛ̀ 1:20, 21 gèe.

Ì Deĩ lɛ a Lewe lɛ Baaboa yi? viloa gɛ̃.

Kóò à yí dɔ kélɛ̀ Bàábòa lɛ́ɛ̀ go Wálà kɛ̀lɛ̀, ɓii lɛ́ɛ̀ wɔ̃́ lɛ́ è lo tòò kɛɛ̀ líéa yí ɓo wánà kpó-kpó ká fɛ́fɛ́ le. Mi nɔ́ɔ fé dò lɛ̀ɛ́ bɛ̀i wɔ̃́ nìa kɛɛ̀. (Zásùà 23:14) Wálà lɛ́ à kɔ̀ diè lɛ pɛ séĩ́ làa doó kpã́ã́ lɛ́ nɔ́ è bɛ̀i wɔ̃́ è lo tòò kɛɛ̀ mia ká wánà kpó-kpó káa gɛ̃̀ɛ̃.​—Ààzáyà 42:9; 46:10 gèe.

Kii lɛ́ è go Wálà kɛ̀lɛ̀ɛ lɛ sɛ̀ é kɛ nɔ́ doó kpã́ã́ keĩ keĩ, lɛ̀ zí nɔ́ lɛ à káa lɛ́ ɓe. Waà Bàábòa lɛ́ɛ́ kɔ́ɛ́í kù gbùò zɛ̀ nɔ gbaa mia lɛ̀ɛ wè gbɛɛ̀ gbɛɛ wũ búnùzɛ̀ yi. Bàábòa lɛ ye mɔ̀ kii zii ka, kɛɛ wɔ̃́ lɛ́ e a gèe mɔ́ɔ, míá lɛ́ ò pɛ mɛdã é gbɛ̃̀á lɛ̀í wà tã́ã̀ mɔ̀ɔ waà gɛ̃̀ wánà ka. Zéniía, wɔ̃́ lɛ́ mia 40 wa bɛ̃̀ɛ̃ɛ̃̀ Bàábòa yía lɛ̀ɛ́ gbaa sã́ e kíe ka. * Bɛ̀izeĩ́a, Bàábòa lɛ Wálà là lɔ̀-kɛ̀á kpo dòló ka, ɛ̃́ɛ̃́ yíkɛ̀ gágà lɛ tĩã́ à kɛ̀lɛ̀ kɛɛ é mia wà kɛ̀ɓe mɛ́ vɔ̀ɔ kɛ é kɛ kpeĩ. Wɔ̃́ wánàzɛ̀ nì o kéa láà zɔ̃̀ɔ̃̀ mia lɛ́ɛ́ kɔ́ɛ́í búnùzɛ̀ lɛ̀ɛ kélɛ̀ Bàábòa lɛ Wálà lé-wè ka.​—1 Tɛsàlónìà 2:13 gèe.

Ì Zi Kpɛɛ Lɛ Kɔa Bɛi A Yidɔɔa Kelɛ Baaboa Lɛ Wanazɛ? viloa gɛ̃.

Wɔ̃́ séĩ́ lɛ́ lɛ Bàábò yía gbɛ̃̀ɛ̃ lɛ wɔ̃́ làṹ yiè lɛ́ è gbɛ̃̀ Wálà zì lɔ̀-kɛ̀á lɛ́ aà yà e gé á kɛ mia lɛ̀ɛ mɔ̀. Bàábò nɔ́ doóa lɛ́ɛ̀ lɛ̀ zí lɛ́ mia o kɛ̀ɓe yiè gíni mɔ́ à ká Pálédáà lɛ́ e kɛ kpóṹlà zèea yí mia gã̀ gbɛ̃̀ lùò ká, ɛ̃́ɛ̃́ zí lɛ́ Pálédáà e kília è lo nuùá e mɛ̀ĩ́a wɔ̃̀ gèe.​—Wɛ̀lɛ̀vèlésɔ̃̀ 21:4, 5 gèe.

Lɔ́ɔ̀ nì wà yììɓo kɔ̀, ɛ̃́ɛ̃́ lìè-wè lɛ Wálà lé-wèa yi. Bɛ̀izeĩ́a, Bàábò lɛ́ɛ̀ lɛ̀ zí lɛ́ Wálà e wɔ̃́ kɛ mɔ́ à ká, à yé lɛ́ lɛ à kɛpìà, ɛ̃́ɛ̃́ à yé è lo tòò à kɛɛ̀ mia wɛ̃́ĩ̀a wɔ̃̀ gèe—wɔ̃́ nìa lɛ́ɛ̀ lɛ́ɛ́ ɓo Wálà zì yììɓo kɔ̀ là. À mɔ́ɔ̀-wɔ̃̀-mɔ̀ɔ, Bàábòa lɛ́ɛ̀ bɛ̀i gbũ̀mɔ̀ nɔ̀ɔ i lɛ̀ɛ kɛɛ í Wálà dɔ. Zí ì bɛ̀izeĩ́ kɛɛ̀á Wálà ɓɛ́ɛ káa, lɛ́ɛ̀ à zɔ̃̀ɔ̃̀ i lɛ̀ɛ.​—Sã́ã̀ 19:7, 11; Zĩ́ĩ̀ 2:23; 4:8 gèe.

Kii lɛ́ɛ́ bè góó-gòò e kéa lɛ́ɛ̀ lo gbũ̀mɔ̀ nɔɔ̀ i lɛ̀ɛ í Bàábòa yí ma fɛ́fɛ́ le, yé ɓaà tó zí lɛ́ Zízɛ̀ e pɛ zɔ̃̀ɔ̃̀ mɔ́ à káa píéa. Zízɛ̀ e kɛ wɔ̃́ gèe pìà é gbɛ̃̀á Bàábò wè kpo vɔ̀ɔ mɔ̀ doó doó le. Yé aà kɛ kília lɛ́ɛ̀ wɔ̃́ kpó-kpó lɛ́ wè kpo vɔ̀ɔ ò gèea yíɓo mia lɛ̀ɛ “kɛ ó Wálà kiia yí ma.”​—Lúù 24:27, 45 gèe.

Wɔ̃́ ɓéĩ́ lɛ nɔ́ kpɛɛ̀zɛ̀ lɛ̀ zí lɛ́ wɔ̃́ làṹ yiè è go Wálà kɛ̀lɛ̀ɛ lɛ nɔ́ à káa. Kɛɛ mia búnùzɛ̀ bɛ̃̀ɛ̃ óò wɔ̃́ làṹ yièa gɛ̃̀ o nyiɛ̀ yɔɔ yi, ɛ̃́ɛ̃́ o dò bɛ̃̀ɛ̃ à wɔ̃̀ lɛ́ɛ̀ o wàa. Yé kɛ̀ wɔ̃́ nìa é i zò dà zízàá. I zì kɛ̀ɓe wɔ́lɔ́-wɔ́lɔ́ kɛ̀ zò-géli ká mɔ́ɔ̀ zò-dɔ̀à mɔ̀ gáná gbɛ̃̀ɛ̃̀ lɛ ɓà Wálà dɔ̀ɔ là.​—Zɔ̃̀ɔ̃́ 17:3 gèe.