Sak lane, bann Temwin Zeova fer bann video ki zot pase dan zot bann lasanble sirkonskripsion ek rezional. Laplipar sa bann video-la filme an Angle. Alor, kouma bann dimounn ki asiste sa bann lasanble-la dan lezot lang, fer pou konpran? Gras-a enn teknik ki apel dubbing, setadir sanz bann dialog an Angle ek ranplas li par lang ki bizin. Ki lefe sa bann video-la ena lor bann dimounn ki asiste sa bann lasanble-la?

Get temwaniaz bann dimounn ki pa Temwin Zeova ek ki ti asiste lasanble dan Mexik ek dan Lamerik Santral:

• “Mo pa ti zis konpran fim-la, me mo ti santi ki mo pe viv li. Sa finn bien tous mo leker.”​—Enn kikenn ki ti asiste lasanble dan langaz popoluca, dan Veracruz, Mexik.

• “Mo ti santi ki koumadir, mo dan mo landrwa ek mo pe koz avek enn bon kamarad. Li ti pli bon ki sinema parski mo ti pe konpran tou.”​—Enn kikenn ki ti asiste lasanble dan langaz nahuatl, dan Nuevo León, Mexik.

• “Kan mo ti get sa bann video-la dan mo lang, mo ti santi ki sa bann personaz-la ti pe koz direk avek mwa.”​—Enn kikenn ki ti asiste lasanble dan langaz chol, dan leta Tabasco, Mexik.

• “Sa lorganizasion-la vremem ansegn bann dimounn dan zot prop lang. Pena enn lot lorganizasion ki koumsa!”​—Enn kikenn ki ti asiste lasanble dan langaz cakchiquel, dan Sololá, Gwatemala.

Bann Temwin Zeova pa angaz bann teknisien ki ena lexperyans ouswa bann dimounn pou pret zot lavwa. Anplis, zot anrezistre a-distans ek dan bann plas kot zot pena bann materyel ki bizin. Alor kouma zot kapav fer sa bann bon kalite anrezistreman-la?

An 2016, biro nasional bann Temwin Zeova dan Lamerik Santral, inn koumans fer dubbing pou bann video an Espagnol ek 38 langaz indizenn. Anviron 2,500 volonter finn ede dan sa travay-la. Bann teknisien ek bann lekip tradiksion lokal anrezistre bann son dan biro nasional, dan bann biro tradiksion ouswa dan bann lezot plas kot fer bann stidio tanporer. Fer sa bann anrezistreman-la dan plis ki 20 plas, kouma Beliz, Gwatemala, Ondiras, Mexik ek Panama.

Pou fer enn stidio tanporer, bizin fer boukou zefor pou kapav debrouy avek seki ena. Pou blok bann son andeor, ti servi bann kitsoz ki ti deza ena, kouma bann molton, ek bann matla.

Boukou frer ek ser ki finn pret zot lavwa pou bann langaz indizenn, zot pa ris, ek zot bizin fer boukou sakrifis pou al stidio ki pli pre avek zot pou fer lanrezistreman. Sertin parmi zot finn fer bann vwayaz 14-er tan. Enn papa ek so garson ti mars anviron wit-er tan pou ariv kot enn stidio.

Depi ki li tipti, Naomi finn ed so fami pou mont bann stidio tanporer. Naomi rapel: “Nou ti pe atann avek inpasians kan ti pou fer bann anrezistreman. Mo papa ti travay dir pou veye ki tou pas bien. Parfwa mo mama ti kwi manze pou enn group 30 volonter.” Aster-la, Naomi li volonter dan enn biro tradiksion dan Mexik. Li dir: “Mo extra kontan donn mo letan pou ed bann dimounn tann mesaz ki ena dan Labib dan zot lang maternel. Samem travay ki fer mwa gagn plis lazwa.”

Toule lane bann Temwin Zeova organiz bann lasanble ki fer dan lemond antie ek ki ouver pou piblik. Pou konn plis lor la, get paz LASANBLE.