Bann Temwin Zeova fer boukou zefor pou fer zot fami ek bann lezot fami vinn pli for. Bondie Limem ki’nn kree bann fami ek nou respekte Li pou sa. (Zenez 2:21-24; Efezien 3:14, 15) Bann konsey ki Bondie done dan Labib finn ed bann fami partou dan lemond pou ena enn maryaz ki solid ek ere.

 Nou fer nou maximum pou swiv bann konsey ki ena dan Labib. Sa bann konsey-la ed nou pou vinn bann pli bon mari, bann pli bon madam ek bann pli bon paran. (Proverb 31:10-31; Efezien 5:22–6:4; 1 Timote 5:8, NTKM) Sa bann konsey-la kapav mem ed bann manb enn fami ki pena mem krwayans. (1 Pier 3:1, 2) Anou gete seki sertin konzwin inn dir lor zot konzwin ki’nn vinn enn Temwin:

•   “Nou sis premie lane maryaz nou ti pe zis lager ek nou pa ti santi nou bien dan nou maryaz. Me kan Ivete ti vinn enn Temwin Zeova, li ti ena plis lamour ek pasians. Sa bann kalite-la finn sov nou maryaz.”​—Clauir, Brezil.

•   “Mo pa ti dakor kan mo mari, Chansa, ti koumans etidie Labib avek bann Temwin Zeova. Mo ti panse ki bann Temwin Zeova kas bann fami. Me finalman, mo’nn realize ki Labib finn ed nou dan nou maryaz.”​—Agness, Zambi.

 Kan nou prese, nou montre bann dimounn kouma bann konsey ki ena dan Labib kapav ed zot pou

•   Swazir bien zot konzwin

•   Reisi zot premie lane maryaz

•   Res an bon term avek bann fami zot konzwin

•   Zer zot larzan

•   Aret lager

•   Aprann pardone

•   Form zot zanfan

 Nou bizin rekonet ki parfwa sa kapav arive. Par exanp, dapre enn rapor ki ti fer an 1998 par konpani Sofres, zot finn remarke ki 1 koup lor 20 finn gagn problem dan zot maryaz kan zot konzwin finn vinn enn Temwin Zeova.

 Zezi ti predir ki bann ki swiv so bann lansegnman parfwa ti pou gagn bann problem dan zot fami. (Matie 10:32-36, NTKM) Dapre istorien Will Durant, ti akiz bann Kretien ki ti anba Lanpir Romin ki zot ti pe kas bann fami. a Azordi osi, boukou dimounn akiz bann Temwin pou mem zafer. Me eski savedir ki se sa konzwin Temwin-la ki provok bann diskision?

 La Cour européenne des droits de l’homme ti bizin rann enn zizman konsernan lakizasion ki ti mete lor bann Temwin Zeova. Li ti dir ki bann manb enn fami ki pa Temwin souvan kree bann diskizion, parski zot refiz “pou aksepte ek respekte liberte ki sak manb so fami ena pou pratik so relizion.” Sa lakour-la ti dir osi: “Souvan sa arive dan bann fami ki pena mem krwayans ek sa ariv osi bann Temwin Zeova.” b Mem kan bann dimounn pa respekte zot relizion, bann Temwin Zeova fer zefor pou aplik konsey ki ena dan Labib: “Pa rann lemal pou lemal. . . . Otan ki posib viv dan lape ar tou dimoun.”​—Romin 12:17, 18, NTKM.

 Bann Temwin Zeova swiv konsey ki ena dan Labib pou marye zis “avek enn Kretien,” setadir pou marye avek enn dimounn ki ena mem krwayans ki zot. (1 Korintien 7:39, NTKM) Se vre ki sa konsey-la sorti dan Labib me se osi enn konsey ki kapav ed tou dimounn. Par exanp, enn lartik ki ti sorti an 2010 dan Journal of Marriage and Family dir ki “bann konzwin ki ena mem relizion, mem pratik ek mem krwayans” souvan ena enn pli bon lavi fami. c

 Selman, nou pa ankouraz bann Temwin pou kit zot konzwin ki pa partaz mem krwayans ki zot. Labib dir: “Si enn frer ena enn fam ki pa krwayan me ki dispoze viv ar li, fode pa ki frer la repous li. Parey, si enn fam ena enn mari ki pa krwayan e li dispoze viv ar fam la, ki li pa repous mari la.” (1 Korintien 7:12, 13, NTKM) Bann Temwin Zeova swiv sa konsey-la.