Non parski ador Bondie li enn desizion personel. (Romin 14:12) Bann Temwin Zeova ansegn zot bann zanfan bann prinsip Labib me kan zot bann zanfan vinn pli gran, sakenn bizin deside par limem si li pou vinn enn Temwin Zeova.​—Romin 12:2; Galat 6:5.

 Parey kouma tou bann paran, bann Temwin Zeova anvi ki zot bann zanfan gagn pli bon lavi ki ena. Zot ansegn zot bann zanfan seki zot panse pou bon pou zot, par exanp bann formasion pratik ek osi bann prinsip moral ek bann krwayans relizie. Bann Temwin Zeova krwar ki gras-a Labib, nou kapav ena pli bon lavi ki ena, alor zot esey ansegn zot bann zanfan bann valer moral ki ena dan Labib. Bann paran fer sa kan zot etidie Labib ek kan zot asiste bann renion Kretien ansam avek zot bann zanfan. (Deteronom 6:6, 7) Sak zanfan kan li vinn pli gran, kapav lerla deside par limem si li pou swiv mem relizion ki so bann paran.

•  Eski bann Temwin Zeova batiz bann ti-baba?

•  Eski bann Temwin Zeova rezet zot bann zanfan si zot swazir pou pa pran batem?

•  Kifer bann Temwin Zeova amenn zot zanfan kan zot al prese?

•  Eski bann Temwin Zeova partisip dan bann fet ouswa bann lezot selebrasion?

•  Ki santiman bann ki finn elve antan ki Temwin Zeova ena?

 Non. Labib pa aprouv batem enn ti-baba. Par exanp, li montre ki avan ki bann Kretien dan premie siek ti pran batem, zot ti ekout mesaz lapot Pier, “ti aksepte so parol avek tou zot leker” , ek zot ti repanti. (Zistwar Bann Apot 2:14, 22, 38, 41) Alor, pou enn kikenn pran batem, li bizin ase gran pou konpran seki Labib ansegne, krwar seki li dir ek pran desizion pou viv dapre seki li finn aprann. Sa se bann kitsoz ki enn ti-baba pa kapav fer.

 Amezir ki bann zanfan grandi, zot kapav swazir pou pran batem. Me selman, si zot pran batem, zot bizin konpran langazman ki zot inn pran.

 Non. Mem si bann paran ki Temwin tris si zot zanfan pa partaz zot bann krwayans, zot touzour kontan zot zanfan ek zot pa koup zot relasion avek zot zanfan zis akoz zot refiz pou vinn enn Temwin.

 Nou bann zanfan partisip avek nou dan travay predikasion pou plizir rezon. a

•   Labib donn lord bann paran pou ansegn zot zanfan lor plan spiritiel, pou form zot pou ador Bondie. (Efezien 6:4) Ladorasion pou Bondie inplik montre nou lafwa dan enn fason piblik, alor predikasion form parti lansegnman spiritiel enn zanfan ek li bien inportan.​—Romin 10:9, 10; Ebre 13:15.

•   Labib ankouraz bann zenn spesialman pou “loue nom Lesegner.” (Psom 148:12, 13, King James Version) Enn fason inportan pou loue Bondie se kan nou koz lor Li ar lezot. b

•   Dan enn fason pratik, bann zanfan gagn bann bienfe kan zot pres avek zot bann paran. Par exanp, zot aprann pou koz avek tou kalite dimounn ek zot devlop bann kalite kouma konpasion, bonte, respe ek konsiderasion pou lezot. Predikasion ed osi bann zanfan pou konpran pli bien ki bann krwayans baze lor bann Lekritir.

 Bann Temwin Zeova pa partisip dan bann fet relizie ouswa bann lezot selebrasion ki pa fer Bondie plezir. c (2 Korintien 6:14-17; Efezien 5:10) Par exanp, nou pa partisip dan bann laniverser nesans ek fet Nwel parski zot ena bann lorizinn ki pa Kretien.

 Me selman, nou kontan pas letan avek nou fami ek nou kontan donn bann kado nou bann zanfan. Olie ki nou reini an fami sak lane ek nou partaz bann kado zis pandan enn zour spesifik, nou organiz bann fet ek nou ofer bann kado toutlong lane.