Nou respekte progre ki sians finn fer ek nou krwar dan bann resers ki finn fer ek ki soutenir par bann prev.

 “Sians se letid lanatir, konportman bann kitsoz natirel ek konesans ki nou gagne kan nou etidie zot.” (Collins Cobuild Advanced Learner’s English Dictionary) Mem si Labib pa enn liv sians, li ankouraz bann dimounn pou etidie lanatir otour zot ek pou gagn bann bienfe ar bann resers siantifik ki lezot finn fer. Anou get sertin lexanp:

•   Astronomi: “Lev zot lizie ek get lesiel. Kisannla ki’nn kree tou sa bann kitsoz-la? Se sa Kikenn ki fer zot larme sorti dapre kantite ki zot ete; Li apel zot tou par zot nom.”​—Izai 40:26.

•   Biolozi: Salomon “ti koz lor bann pie, depi sed dan Liban ziska lizop ki pouse lor miray. Li ti koz lor bann zanimo, bann zwazo, bann zanimo ek bebet ki ranpe ek lor bann pwason.”​—1 Lerwa 4:33.

•   Medsinn: “Pa bann dimounn ki bien ki bizin al get dokter, me bann ki malad.”​—Lik 5:31.

•   Meteorolozi: “Eski to finn rant dan bann stor lanez, ouswa eski to finn trouv bann stor lagrel . . . ? depi ki kote divan les soufle lor later?”​—Zob 38:22-24.

 Nou bann piblikasion favoriz respe pou sians atraver bann lartik lor lanatir ek bann progre siantifik. Bann paran Temwin ankouraz zot zanfan pou gagn enn ledikasion pou ki zot kapav konpran pli bien lemond otour zot. Ena boukou Temwin Zeova ki travay dan domenn siantifik parmi ena biosimi, matematik ek fizik.

 Nou krwar ki sians pa kapav reponn tou bann kestion ki imin poze. a Par exanp, bann zeolog analiz ar ki kitsoz later finn fer ek bann biolozis etidie kouma enn lekor fonksione. Me kifer later ena bann kondision ideal pou ki lavi existe, ek kifer diferan parti nou lekor fonksione an-armoni?

 Nou finn realize ki zis Labib ki donn bann bon repons sa bann kestion-la. (Psom 139:13-16; Izai 45:18) Alor, nou krwar ki enn bon ledikasion inplik etidie sians ek Labib toulede.

 Parfwa, seki sians dir kapav paret kontrer avek seki Labib dir. Me, sertin kapav trouv vremem bann kontradiksion parski zot inn mal konpran seki Labib vremem ansegne. Par exanp, li pa ansegne ki later ti kree dan sis zour 24-er-tan.​—Zenez 1:1; 2:4.

 Sertin bann gran siantis finn rezet sertin teori siantifik ki bien popiler akoz mank bann prev. Nou partaz mem lopinion ki boukou biolozis, simist ek lezot ki finn tir konklizion ki bann kitsoz ki vivan pa finn evolie par azar parski lanatir reflekte enn lintelizans.