Non. Bann Temwin Zeova zot bann Kretien ki baz zot bann krwayans lor Labib. Sertin relizion ansegne ki rasanbleman bann Zwif dan Palestinn ena enn lien avek bann profesi ki ena dan Labib. Me bann Temwin Zeova pa pans koumsa. Zot pa krwar ki Labib ti fini predir sa levennman politik la. An realite, Labib pa ankouraz ouswa denigre ninport ki gouvernman imin. Latour Degard, se magazinn ofisiel bann Temwin Zeova ki dir ki pena okenn plas dan Labib ki soutenir Zionism politik.

 The Encyclopædia Britannica dekrir Zionism kouma enn “mouvman nasionalism bann Zwif ki ti ena lobzektif pou etabli ek soutenir nasion Zwif dan Palestinn.” Li ena bann lorizinn relizie ek politik toulede. Bann Temwin Zeova pa defann krwayans bann Zionism, ek zot gard zot netralite an rapor avek Zionism politik.

 Lorganizasion bann Temwin Zeova li antierman relizie ek li pa defann okenn mouvman politik. Ala kifer li pa defann krwayans bann Zionis. Lefet ki bann Temwin Zeova zot gard zot netralite lor plan politik, dan sertin pei zot finn mem soufer bann gran persekision. Bann Temwin Zeova san poursan sir ki se zis Rwayom Bondie ki pou kapav amenn lape pou touletan lor later. Dapre zot, okenn gouvernman imin ouswa mouvman politik pa pou kapav fer sa.

 Ninport kotsa zot reste, bann Temwin Zeova ena enn prinsip bien inportan: Zot obeir bann lalwa ki lotorite inn met en plas dan enn pei. Zot pa rebele kont lotorite gouvernman ouswa partisip dan bann lager.