Bann Temwin Zeova pa selebre laniverser nesans parski nou krwar ki sa kalite fet la pa fer Bondie plezir. Mem si Labib pa dir exakteman ki pa gagn drwa fer laniverser, li ed nou pou reflesi lor bann pwin inportan konsernan sa levennman-la ek li fer nou konpran seki Bondie panse lor la. Anou get kat pwin ek bann prinsip Labib ki koz lor la.

1.   Bann fet laniverser nesans ena bann lorizinn payin. Dapre Funk & Wagnalls Standard Dictionary of Folklore, Mythology, and Legend, sa bann fet-la sorti depi enn krwayans ki dir ki zour laniverser enn dimounn, “bann move lespri ek linflians bann demon ena lokazion pou fer [li] ditor.” Liv-la dir osi ki “prezans bann kamarad ek bann swe ki zot fer ant zot, ti ede pou protez sa dimounn-la.” Liv The Lore of Birthdays dir ki dan lepok lontan, lalis bann dat nesans ti “inportan pou kapav fer enn oroskop” ki baze lor “lasians sirnatirel lor astrolozi.” Sa liv-la dir osi ki “bann dimounn an zeneral, krwar ki labouzi laniverser ena pouvwar pou realiz bann swe enn dimounn.

    Parkont, Labib dir ki fode pa nou fer mazik, get destin, fer spiritis (bann krwayans ek pratik ki ena lien ar bann demon) ouswa “okenn kitsoz ki parey.” (Deteronom 18:14; Galat 5:19-21) Anplis, enn rezon kifer Bondie ti kondann ansien lavil Babilonn, se parski so bann abitan ti pratik astrolozi, ki ti enn fason pou predir lavenir. (Izai 47:11-15) Bann Temwin Zeova pa rod konn lorizinn sak koutim; me kan bann Lekritir donn bann instriksion bien kler koumsa, nou pran zot kont.

2.   Bann premie Kretien pa ti selebre laniverser nesans. The World Book Encyclopedia dir ki “zot ti konsider laniverser nesans ninport kisannla kouma enn koutim payin.” Labib montre ki tou bann Kretien bizin imit seki bann zapot ek lezot disip, ki ti ansegne direkteman par Zezi, ti fer.​—2 Tesalonisien 3:6.

3.   Sel selebrasion ki bann Kretien inn gagn lord pou fer pa konsern enn nesans me enn lamor: lamor Zezi. (Lik 22:17-20) Fode pa ki sa etonn nou, parski Labib dir ki “zour lamor vo plis ki zour nesans.” (Ekleziast 7:1) Kan ti ariv ver lafin so lavi lor later, Zezi ti ena enn bon repitasion devan Bondie. Sa fer zour so lamor pli inportan ki zour ki li ti ne.​—Ebre 1:4.

4.   Labib pa koz lor okenn serviter Bondie ki’nn selebre so laniverser nesans. Sa pa enn erer parski Labib koz lor selebrasion laniverser de dimounn ki pa ti servi Bondie. Me Labib koz lor toulede selebrasion dan enn fason negatif.​—Zenez 40:20-22; Mark 6:21-29.

 Parey kouma tou bann bon paran, bann Temwin montre zot lamour pou zot zanfan toutlong lane. Par exanp, zot donn zot bann zanfan bann kado ek zot fer bann ti fet ant bann kamarad. Zot esey swiv Bondie so lexanp parfe, ki san ezite donn so bann zanfan bann bon kitsoz. (Matie 7:11) Bann zanfan ki ena bann paran Temwin pa santi ki zot mank kitsoz, kouma sa bann komanter-la montre:

•   “Li pli top pou gagn enn kado kan to pa atann ditou.”​—Tammy, 12 an.

•   “Mem si mo pa gagn bann kado zour mo laniverser, mo bann paran donn mwa bann kado dan bann lezot lokazion. Mo kontan kan li koumsa parski li enn sirpriz.”​—Gregory, 11 an.

•   “Eski zot panse ki dis minit, de-trwa ti gato ek enn sante fer enn fet? Zot bizin vinn kot mwa ek zot pou trouve ki ete enn vre fet!”​—Eric, 6 an.