Kifer Bann Temwin Zeova Pa Reponn Tou Bann Lakizasion ki Fer Kont Zot?

ZWE

Bann Temwin Zeova swiv sa konsey Labib ki dir pa reponn kan bann dimounn akiz nou ek boufonn nou. Par exanp, enn proverb Labib dir: “Enn kikenn ki koriz enn moker, atir dezoner lor limem.” (Proverb 9:7, 8; 26:4) Olie ki nou akord tro linportans bann fos lakizasion ek ki nou rant dan bann gran deba, nou plito konsantre nou lor fer plezir Bondie.—Psom 119:69.

Biensir, ena “enn ler pou res trankil ek enn ler pou koze.” (Ekleziast 3:7) Nou reponn bann dimounn sinser ki interese pou konn laverite me nou evit rant dan bann deba initil. Dan sa fason-la, nou pe swiv bann lansegnman ek lexanp Zezi ek bann premie Kretien.

Zezi pa ti reponn kan ti fer bann fos lakizasion lor li devan Pilat. (Matie 27:11-14; 1 Pier 2:21-23) Dan mem fason, Zezi pa ti reponn kan ti akiz li ki li enn soular ek enn gourma. Olie sa, li ti les lezot tir zot prop konklizion par so bann aksion, an-akor avek sa prinsip-la: “Rekonet lasazes enn dimounn par so bann aksion.” (Matie 11:19, not) Me dan sertin sitiasion kot li ti bizin defann limem, avek kouraz li ti reponn bann seki ti pe dir bann mansonz pou gat so repitasion.—Matie 15:1-3; Mark 3:22-30.

Zezi ti ansegn so bann disip pou pa dekouraze akoz bann fos akizasion. Li ti dir: “Ere kan dimounn koz an mal lor zot, persekit zot ek koz manti pou dir tou sort kalite move kitsoz lor zot, akoz mwa.” (Matie 5:11, 12) Me, Zezi ti osi dir ki si sa bann lakizasion-la permet zot rann enn temwaniaz, li pou realiz so promes: “Mo pou donn zot bann parol ek sazes ki tou zot bann adverser ansam pa pou kapav reponn ni kontredir.”—Lik 21:12-15.
Lapot Pol ti konsey bann Kretien pou evit bann deba initil avek bann opozan ek li ti dekrir sa bann kalite deba la kouma “initil ek zot pa vo nanye.”—Tit 3:9; Romin 16:17, 18.
Lapot Pier ti ankouraz bann Kretien pou defann zot lafwa sak fwa ki zot gagn lokazion. (1 Pier 3:15) Me li ti rekonet ki pli bon fason pou fer sa, se par bann aksion plito ki an parol. Li ti ekrir: “Par zot bann bon aksion, zot ferm labous bann dimounn ki pa rezonab ek ki . . . inioran.”—1 Pier 2:12-15.