Bann Temwin Zeova fer zefor pou swiv lansegnman Zezi ek ki so bann zapot ti met an pratik. Sa lartik-la fer enn rezime lor nou bann krwayans debaz.

1.   Bondie. Nou ador sel vre Bondie ki Tou-Pwisan ek ki nou Kreater. Li apel Zeova. (Psom 83:18; Revelasion 4:11) Limem Bondie Abraam, Moiz ek Zezi.​—Exod 3:6; 32:11; Zan 20:17.

2.   Labib. Nou konsider Labib kouma enn liv ki inspire par Bondie ek ki ena enn mesaz pou bann imin. (Zan 17:17; 2 Timote 3:16) Nou baz nou bann krwayans lor toule 66 liv ki ena dan “Ansien Testaman” ek “Nouvo Testaman.” Professor Jason D. BeDuhn ti bien dekrir sa liv-la kan li ti ekrir ki bann Temwin Zeova baz zot krwayans ek zot bann pratik lor seki Labib vremem dir san ki zot deside alavans seki zot panse Labib bizin dir. a

    Nou aksepte Labib an-antie. Me kan nou esey konpran Labib, nou rekonet ki sertin parti ladan dekrir bann kitsoz ki finn arive ouswa ki pou arive dan lavenir. Nou rekonet osi ki sertin parti Labib finn ekrir dan enn fason sinbolik ouswa poetik pou reprezant lezot kitsoz.​—Revelasion 1:1.

3.   Zezi. Nou swiv bann lansegnman ek lexanp Zezi ek nou donn li loner antan ki nou Sover ek Garson Bondie. (Matie 20:28; Zistwar Bann Apot 5:31) Akoz sa, nou bann Kretien. (Zistwar Bann Apot 11:26) Me selman, nou finn aprann dan Labib ki Zezi, li pa Bondie Tou-Pwisan ek ki lansegnman lor Trinite pa baze dapre bann Lekritir.​—Zan 14:28.

4.   Rwayom Bondie. Li enn gouvernman reel ki dan lesiel ek li pa enn kondision ki dan leker bann Kretien. Li pou ranplas bann gouvernman imin ek li pou realiz proze Bondie pou later. (Daniel 2:44; Matie 6:9, 10) Ek biento samem ki li pou fer parski bann profesi Labib dir ki nou pe viv “dan bann dernie zour.”​—2 Timote 3:1-5; Matie 24:3-14.

    Zezi limem Lerwa dan Rwayom Bondie ki dan lesiel. Li’nn koumans dirize an 1914.​—Revelasion 11:15.

5.   Delivrans. Nou pou kapav gagn delivrans nou bann pese ek lamor atraver sakrifis Zezi. (Matie 20:28; Zistwar Bann Apot 4:12) Pou gagn bann bienfe ar sakrifis Zezi, bann dimounn bizin pa zis ena lafwa dan Zezi me zot bizin osi viv dan enn fason ki fer Bondie plezir ek pran batem. (Matie 28:19, 20; Zan 3:16; Zistwar Bann Apot 3:19, 20) Enn dimounn montre ki li ena lafwa par so bann aksion. (Zak 2:24, 26) Me nou pa kapav gagn delivrans koumsa mem parski li depann lor ‘Bondie so faver ki nou pa merite.’​—Galat 2:16, 21.

6.   Lesiel. Bondie Zeova, Zezi Kris, ek bann anz ki fidel res dan lesiel. b (Psom 103:19-21; Zistwar Bann Apot 7:55) Enn tigit dimounn, setadir 144,000, ki pou resisite ek pou al viv dan lesiel avek Zezi dan Rwayom Bondie.​—Daniel 7:27; 2 Timote 2:12; Revelasion 5:9, 10; 14:1, 3.

7.   Later. Bondie ti kree later pou ki bann imin viv lor la pou touletan. (Psom 104:5; 115:16; Ekleziast 1:4) Bann dimounn ki obeir, Bondie pou beni zot avek enn lasante parfe ek zot pou viv pou touletan lor enn later ki pou vinn enn paradi.​—Psom 37:11, 34.

8.   Lemal ek soufrans. Sa ti koumanse kan enn parmi bann anz Bondie ti rebele. (Zan 8:44) Sa anz-la ti rebele kont Bondie ek ti apel li “Satan” ek “Diab.” Li ti konvink premie koup imin pou fer parey kouma li, ek zot bann desandan finn sibir bann konsekans bien grav. (Zenez 3:1-6; Romin 5:12) Pou kapav reponn sa bann kestion ki Satan ti souleve la, Bondie finn permet lemal ek soufrans me Li pa pou les sa kontigne pou touletan.

9.   Lamor. Dimounn nepli existe kan zot mor. (Psom 146:4; Ekleziast 9:5, 10) Zot pa soufer dan enn lanfer dife.

    Bondie pou relev bann milyar dimounn par mwayin rezireksion. (Zistwar Bann Apot 24:15) Me bann ki refiz swiv semin Bondie apre ki zot finn resisite, pou detrir pou touletan. Zot pa pou ena okenn lespwar rezireksion.​—Revelasion 20:14, 15.

10.   Lafami. Nou swiv prinsip Bondie lor maryaz. Bondie finn ini enn zom ek enn fam ek sel rezon valab pou divorse se limoralite sexiel. (Matie 19:4-9) Nou sir ki sazes ki ena dan Labib ed bann fami pou ere.​—Efezien 5:22–6:1.

11.   Nou ladorasion. Nou pa ador lakrwa ek ninport ki lezot zimaz. (Deteronom 4:15-19; 1 Zan 5:21) Bann laspe inportan dan nou ladorasion:

    •   Priye Bondie.​—Filipien 4:6.

    •   Lir ek etidie Labib.​—Psom 1:1-3.

    •   Medite lor seki nou aprann dan Labib.​—Psom 77:12.

    •   Zwenn ansam pou priye, etidie Labib, sante, exprim nou lafwa ek ankouraz bann Temwin ek lezot.​—Kolosien 3:16; Ebre 10:23-25.

    •   Pres “bonn nouvel lor Rwayom Bondie.”​—Matie 24:14.

    •   Soutenir bann seki bizin led.​—Zak 2:14-17.

    •   Konstrir ek lantretien nou bann Lasal Renion ek lezot fasilite ki servi pou lansegnman Biblik dan lemond antie.​—Psom 127:1.

    •   Ede kan ena bann katastrof natirel.​—Zistwar Bann Apot 11:27-30.

12.   Nou lorganizasion. Nou ena bann lasanble ek sak lasanble dirize par enn komite ansien. Me, bann ansien pa form enn group sef relizie ek zot pa gagn okenn saler. (Matie 10:8; 23:8) Nou pa demann ladim ek zame nou pa pas laket dan nou bann renion. (2 Korintien 9:7) Tou nou bann aktivite soutenir par bann donasion anonim.

     Komite Santral, enn ti group Kretien ki ena matirite ki servi dan biro mondial fourni direksion bann Temwin Zeova dan lemond antie.​—Matie 24:45.

13.   Nou linite. Dan lemond antie, nou ini dan nou bann krwayans. (1 Korintien 1:10) Nou osi travay dir pou ki pena okenn divizion sosial, etnik ouswa rasial. (Zistwar Bann Apot 10:34, 35; Zak 2:4) Me sakenn fer so swa personel. Sak Temwin pran so bann desizion an-akor avek so konsians ki forme par Labib.​—Romin 14:1-4; Ebre 5:14.

14.   Nou kondwit. Nou fer zefor pou montre enn lamour ki pa egois dan tou seki nou fer. (Zan 13:34, 35) Nou rezet tou bann pratik ki pa fer Bondie plezir par exanp, fer bann transfizion disan. (Zistwar Bann Apot 15:28, 29; Galat 5:19-21) Nou favoriz lape ek nou pa partisip dan lager. (Matie 5:9; Izai 2:4) Nou respekte gouvernman nou pei ek nou obeir so bann lalwa tanki zot pa kont bann lalwa Bondie.​—Matie 22:21; Zistwar Bann Apot 5:29.

15.   Nou relasion avek lezot. Zezi ti donn lord: “To bizin kontan to prosin kouma tomem.” Li ti osi dir ki bann Kretien “pa fer parti dan lemond.” (Matie 22:39; Zan 17:16) Alor nou esey “fer dibien anver tou dimounn,” me nou gard nou netralite dan enn fason strikt dan bann zafer politik ek nou pena okenn lien avek lezot relizion. (Galat 6:10; 2 Korintien 6:14) Me, nou respekte bann swa ki lezot fer dan sa bann domenn-la.​—Romin 14:12.

 Si ou ena plis kestion lor krwayans bann Temwin Zeova, ou kapav gagn plis ransegnman lor nou sit Internet, kontakte enn nou bann biro nasional, asiste enn nou bann renion pre kot ou, ouswa koz avek enn parmi bann Temwin dan ou landrwa.