Disiplinn fer sirtou referans ar bann instriksion ek ledikasion, me li inplik osi koreksion ek pinision. Zeova disiplinn nou pou ki nou kapav ador Li dan fason ki Li aksepte. (Rom 12:1; Eb 12:10, 11) Parfwa, disiplinn kapav fer dimal, me gras-a sa nou kapav mars lor semin lazistis ek gagn bann benediksion. (Pr 10:7) Ki kitsoz bann ki donn disiplinn ek bann ki gagn disiplinn bizin rapel?

Sa kikenn ki pe donn disiplinn la. Parey kouma Zeova, bann ansien, bann paran ek lezot fer boukou zefor pou donn disiplinn avek bonte ek lamour. (Zr 46:28) Mem si enn kikenn merit enn disiplinn ki sever, sa disiplinn-la bizin adapte ar so sitiasion ek motive par lamour.​—Tit 1:13.

Sa kikenn ki gagn disiplinn la. Ninport ki disiplinn nou gagne, fode pa nou rezet li me nou bizin esey aplik li deswit. (Pr 3:11, 12) Antan ki bann imin inparfe, nou tou nou bizin ki disiplinn nou ek nou kapav gagn sa disiplinn-la dan diferan fason. Par exanp, nou kapav gagn sa disiplinn-la atraver seki nou lir dan Labib ouswa seki nou tande dan renion. Ouswa sertin bizin ki disiplinn zot atraver enn komite disiplinn relizie. Si nou aksepte ek aplik disiplinn ki nou gagne, nou pou ena enn pli bon lavi ek nou pou viv pou touletan.​—Pr 10:17.

GET VIDEO “ZEOVA ‘KORIZ DIMOUN KI LI KONTAN,’” EK APRE SA, REPONN SA BANN KESTION-LA:

• Kouma Canon so lavi ti ete, ek kouma sa finn sanze?

• Kouma Zeova ti disiplinn li avek boukou lamour?

• Ki bann leson nou aprann ar so lexperyans?