Premie Let Pier 5:1-14
5 Alor mwa, ki enn ansien parey kouma zot, enn kikenn ki’nn temwin bann soufrans Lekris, ek ki partisip dan sa laglwar ki pou revele la, mo sipliy* bann ansien ki parmi zot:
2 Pran swin* troupo Bondie ki anba zot responsabilite, ek vey bien lor li,* pa par obligasion, me volonterman devan Bondie; pa parski zot kontan gagn enn profi malonet, me parski zot ena enn gran dezir pou fer sa;
3 pa dominn lor bann ki leritaz Bondie, me vinn bann lexanp pou troupo-la.
4 Ek kan sef bann berze aparet, zot pou gagn kouronn laglwar ki pa kapav fletri.
5 Dan mem fason, zot bann zenom, soumet zot ar bann zom ki pli aze.* Me zot tou, abiy zotmem ar limilite* dan fason ki zot tret sakenn zot kamarad, parski Bondie opoze ar bann ki ena lorgey, me li donn so bonte extraordiner* bann ki ena limilite.
6 Alor abes zot anba lame pwisan Bondie, pou ki li donn zot loner kan ler pou arive,
7 pandan ki zot zet tou zot traka lor li, parski li gagn zot traka.
8 Gard zot bon sans, ek res lor zot gard. Zot adverser, Lediab, pe fer letour kouma enn lion ki pe kriye ek ki pe rod devor kikenn.*
9 Me tini ferm kont li, solid dan lafwa parski zot kone ki tou zot bann frer dan lemond pe pas par sa bann mem kalite soufrans la.
10 Me apre ki zot pou finn soufer pandan enn tipe letan, Bondie ki donn tou bonte extraordiner,* ki finn apel zot pou so laglwar eternel dan linite avek Kris, limem li pou fini zot formasion. Li pou fer zot vinn ferm, li pou fer zot vinn for, li pou met zot lor enn fondasion ki solid.
11 Pwisans pou li pou touletan. Amen.
12 Se par Silvin,* ki mo konsider kouma enn frer ki fidel, ki mo’nn ekrir zot sa de-trwa parol-la pou ankouraz zot ek pou donn zot enn vre temwaniaz ki se samem vre bonte extraordiner Bondie.* Tini ferm ladan.
13 Madam* ki dan Babilonn, ki Bondie inn swazir parey kouma zot, fer zot konpliman, ek osi Mark, mo garson.
14 Kan zot dir bonzour, anbras sakenn zot kamarad avek lamour.
Lape avek zot tou ki dan linite avek Kris.
Not
^ Ouswa “konsey.”
^ Ouswa “Pran swin kouma enn berze.”
^ Ouswa “servi kouma responsab; servi kouma sirveyan.”
^ Ouswa “bann ansien.”
^ Ouswa “pik limilite kouma enn linz dan zot lerin.”
^ Ouswa “faver ki pa merite.” Get Lexplikasion Bann Mo.
^ Ouswa “ki pe rod kikenn pou devore.”
^ Ouswa “faver ki pa merite.” Get Lexplikasion Bann Mo.
^ Ki ti apel osi Silas.
^ Ouswa “Bondie so faver ki pa merite.” Get Lexplikasion Bann Mo.
^ Isi text grek servi enn pronom feminin ki fer referans ar enn madam ek kapav reprezant lasanble ki dan Babilonn.
